Earroo 1 Yn Arragh 1951
Ta "Coraa Ghailckagh" cheet rish keayrt elley lurg tostid foddey; ta shin treishteil
as credjal bee e h'aa-ruggyr oyr dy oltaghey as dy voggey da nyn lhaihderyn. Te dy
mie er-enn dy vel ymmodee doilleeidyn as cumrailyn dy ve scughit roish foddee eer
lioaran veg goll-rish ee shoh ve hoilshit magh; ta shin guee ro-laue nyn leshtal ass
lieh marranyn erbee vees ry-gheddyn aynjee!
My vees nyn lhaihderyn soiaghey jeh "Coraa Ghailckagh" cha vod ad soilshagh nyn
ennaghtyn-booisal er aght share na liorish cooney lhien dy ghaarlaghey cour yn cheet
rish eck dagh raiee. Bee cohoyrtyssyn erbee as failt reue, lhig daue ve skeealyn
noa yn shenn skeealyn screeuit sheese foddey er dy henney ny er nyn jaglym ry-cheilley veih
beill yn chenndiaght ta foast er-mayrn.
Fy-yerrey cha nel agh un yeearree ain: ta shen dy hoshiaghey graih as studeyrys
chengey ny mayrey cheer nyn ghooie.
GOLL ER NY BRADDANYN
Ta mee goll dy insh diu mychione oie ren mee ceau er y cheayn marish daa ghooinney
braew. Va shin sheese ec Kione ny h'Ayrey eeastagh braddanyn lesh lieen.
Mysh kiare 'sy voghrey ren shin goaill toshiaght dy chuirr; va keayn feer chiune
ayn as frough veg harrish y thalloo. Hooar shin shiaght braddanyn 'sy lieen as ren
shin creck ad gys y marchan son queig skillinyn as daeed -- va shen leagh feer vie
neesht. Cha row ymmodee 'syn aaley shoh ec y traa shen. Eisht hie shin dy-valley dy ghoaill
fea son va shin feer skee.
Va mee goll magh maroo dy-mennick, as keayrt elley ren shin tayrtyn palchey eeastyn.
Va shin mooie ec y Kione mysh tree ny kiare 'sy voghrey. Va mish my hoie ec jerrey'n
vaatey tra cheayll mee sheean ayns yn ushtey as honnick mee raun as v'eshyn jeeaghyn orrym. Ghow shin aggle as hie shin stiagh son y traie. Tra hie yn raun ersooyl
ghow shin toshiaght dy eeastagh reesht, as hayr shin shiaght ny hoght braddanyn mooarey.
Laa ny vairagh chreck shin ad ayns Rhumsaa son queig skillinyn y phunt.
Un laa elley hie mee marish tree deiney voish Sostyn magh ayns baaie Rhumsaa.
Dooyrt mee rish fer jeu, "Ta dorrin cheet." "Cha nel," dreggyr eshyn, "t'eh goll
dy ve feer chiune." Cha dooyrt mee veg rish, son cha row mee son cur aggle ayn. Ren
shin eeastagh rish tammylt dy hraa, as hooar un Sostynagh kiare boaddee mooarey; v'eshyn yn
ynrican dooinney 'sy vaatey ren tayrtyn eeast erbee. Va shin er ve eeastagh mysh
leih oor, tra ghow yn gheay toshiaght dy heidey dy agglagh, as va mish smooinaghtyn
dy beagh ny share dooin cosney y phurt. Liorish y traa va shin er hroggal yn aker va'n dorrin
mygeayrt-y-mooin. Tra va shin er roshtyn gys y phurt va shin fliugh eer gys nyn grackan.
Anmagh er yn oie cheddin hie mee gys thie ny deiney shoh, as dinsh ad dou nagh
jinnagh ad goll magh reesht dy eeastagh marym, derrey veagh baatey share aym.
Walter Clarke
SHENN CHARVAL
Naightyn gerjoil t'ayms dy insh diu
Jiu ec yn Oie'll Voirrey,
She corrym rish yn laa t'ayn jiu
Rug Yeesey Creest Mac Yee.
O oltey shiuish O bea yn laa jiu
Lesh cree as aigney glen
Jiu ruggyr nyn Saualtagh, jiu,
Jiu yn laa share 'sy vlein.
Nagh re ayns stable hooar ad eh,
Ayns manjoor fegooish cleayn.
Marish va Joseph as Moirrey e voir
Tra haink ny bochillyn.
Tra haink nyn Saualtagh stiagh 'sy theihll
Ny ainleyn huitt ad sheese
Va pooar yn noid as eh currit mow
As boyn yn ard-nieu brisht.
O oltey shiuish O bea yn laa jiu
Lesh cree as aigney glen,
Jiu ruggyr nyn Saualtagh, jiu,
Jiu yn laa share 'sy vlein.
She yn aegid ta goaill taitnys ayn
Dy gholl dys yn Oie'll Voirrey,
Dy akin yn shilley eunyssagh
Ta soilshean ayns thie Yee.
Lesh boggey t'ad ginsh ec y thie
Cre yn shilley honnick ad
Ny cainleyn sollys londemee
As arrane moyllee goit.
O oltey shiuish O bea yn laa jiu
Lesh cree as aigney glen
Jiu ruggyr nyn Saualtagh, jiu,
Jiu yn laa share 'sy vlein.
Nagh eunyssagh yn shilley eh
Da bochilley yn shioltane
Dy akin e chirree marish jiu
Moghey 'sy vadran.
'Sy conleayrtys goll magh maroo
As reesht ec y vunlaa
Goll mygeayrt y moo 'syn astyr reesht,
S'mie shione daue e choraa.
O oltey shiuish O bea yn laa jiu
Lesh cree as aigney glen,
Jiu ruggyr nyn Saualtagh, jiu,
Jiu yn laa share 'sy vlein.
Ayns laddag Slieau Moriah cheet
Ayns pastyr millish glen,
Yn bochilley mygeayrt y moo
Kiaulleeaght er nyn skyn.
Jiu-hene t'ad cheet dy'n woaillee echey
Dy eaishtagh rish yn chayrn
Va ec yn bochilley, sheidey ard
Er mullagh Cronk Sion.
O oltey shiuish O bea yn laa jiu
Lesh cree as aigney glen
Jiu ruggyr nyn Saualtagh, jiu,
Nish ta mee gra AMEN.
YN SHIRVEISH SOUREE
Va'n Shirveish Souree cummit er fastyr yn 2500 Mean souree 'sy cheeill ec Skylley Vreeshey er y twoaie. Haggil ry-cheilley ayns
shen cruinnaght vooar jeusyn ta graihagh er y chenn ghlare, marish cummaltee ny skeerey,
dy yannoo yn cheeill lung-lane.
Va'n preachoor yn Arrymagh C. A. Cannan, as va kionfenish myrgeddin daa haggyrt
joarree veih'n Phurt-aeragh ec Jurby as saggyrt ny skeerey, yn Arrymagh J. H. Jones.
Loayr yn preachoor er goan ass Nehemiah 12. 43., "Er y laa shen myrgeddin heb ad
ymmodee ourallyn mooarey, as ghow ad boggey; son va Jee er gherjaghey nyn greeaghyn lesh
ard-voggey; va boggey myrgeddin er ny mraane as y chloan, myr shen dy row kiaull
gerjoil Yerusalem er ny chlashtyn foddey as gerrit." Preacheil ass chammah yn Ghailck
as y Baarle, choyrlee eh shin gyn dy bragh dy yarrood nyn gurrym dy hebbal, myr ren cummaltee
Yerusalem, nyn mooise son "nyn groo, nyn goadey as ooilley bannaghtyn y vea shoh."
Va ny deiney-kiaullee nyn studeyryn ass ny kiare ardyn, as s'bing va sheean y
chiaulliaght ocsyn as y cochruinnaght. Va ny lessoonyn er nyn lhaih dy flaoil liorish
Mainstyryn J. T. Chrystal as W. Clarke, daa studeyr voish Rhumsaa.
Asbyrt ec kione, hie ny fir-charree as fir-kiaullee ayns ard-shooyl hug y lhiack-cooinaghtyn
caggee, ta er-gerrey da'n cheeill. Ayns shen, marish y cochruinnaght, heb shin nyn
badjeryn as ren Fer-toshee yn Kiare as Feed hoiaghey slongan er y lhiack. Eisht, lurg yn Arrane Ashoonagh, va laa imraagh ec kione.
Illiam Radcliffe
Bee "Coraa Ghailckagh" er ny coyrt magh kiare keayrt 'sy vlein, as ta'n leagh
lieh-chroon dagh vlein.
Cur fys da'n scrudeyr lesh ordagh-phost gys
Miss Frances Davidson,
Barrule Cottage,
Port Lewaigue,
Ramsey, Isle of Man.
Prentit liorish Quine as Cubbon
Purt Chiarn, Ellan Vannin
as lieh Yn Cheshaght Ghailckagh.