GYNSAGHEY CHENGEY MY GHOOIE



Va mee ruggit ayns Balley Chashtal 'sy vlein 1887 as va my ayr Thomaase y Comish ruggit cheumooie jeh Balley Sallagh 'sy vlein 1856. V'eshyn ny Manninagh dooie as va Gaelg e ghlare veih'n chlean.
Tra va mee aeg va my ayr gobbraghey ec Knock Rushen, boayl eirinagh cheumooie jeh'n valley as dy mennick va mee marishyn ayns shen, shooyl mygeayrt ny magheryn. Vrie mee jeh dy kinjagh "Cur Gaelg er shoh as "Cur Gaelg er shen", as ga dy dinsh eh ooilley dou, yiarragh eh nagh beagh eh jeh ymmyd erbee dou ny enmyn shen y ynsaghey, agh lurg tammylt daase eh skee ginsh y lhied dou, er yn oyr dy row mee thurneishagh as cha dug mee geill da shen ny dooyrt eh. She shen myr v'eh eisht, dy row ny enmyn Gaelgagh aym er yn ayrn smoo jeh ny reddyn va gaase ayns ny magheryn, as mish agh my phonniar beg.
Dy dooghyssagh dy liooar, cha row red erbee Gaelgagh er ny ynsaghey dooin 'sy scoill. Cha dynsee shin red erbee mychione Ellan Vannin, e glare ghooie, shennaghys ny h-Ellan ny red erbee bentyn j'ee. Ren ad ny b'are va fys ocsyn dy jannoo nyn Hostynee miey beggey assjin, as haink eh lhieu shen y yannoo ny keayrtyn!
Dynsee my ayr yn abyrlhit dou roish my jagh mee dy scoill ec queig bleeaney d'eash as cha nel mee foast er n'yarrood M as N myr dynsee eh ad dou. V'ad ebM as edN.
She shen yn aght myr va ny shenn Vanninee loayrt. Hug ad sheean ayns shoh as ayns shen ayns focklyn ennagh raad, smooinagh oo, nagh lhisagh ad ve. Va ben "bedn" as shenn "sheddan", dy imraa agh jees.
Cha nel cooinaghtyn erbee aym jeh Gaelg dynsee my ayr dou dy arryltagh, begin dou briaght son dagh ooilley nhee! Va sleih elley ayn jeh'n chenn heeloghe dy dug mee shilley orroo ny keayrtyn, as, oie dy row, tra daag mee shenn dooinney baccagh as eshyn gynsaghey Gaelg dou, dooyrt eh, "Oie vie, kern!" vrie mee jeh, "Kern? " Ta kern yn fockle kiart son "soldier" as eshyn, "T'ad gra 'sidoor' nish agh cha nee kiart eh. Ta 'kern' yn fockle kiart son 'soldier'. "Cavalry ny infantry?" vrie mee jeh. "Cha nel fys aym er ny focklyn shen," as eshyn. "Agh adsyn t'ayn nish ayns Balley Chashtal, adsyn as cooatyn jiargey orroo as nagh vel cabbil ocsyn."
(Va sheshaght veg dy hidooryn Sostnagh 'sy valley ec y traa shen, er aggle dy jinnagh ny Manninee boghtey girree magh noi Sostyn Wooar!)
Daag mee yn scoill ayns Balley Chashtal roish my row mee kiare bleeaney jeig d'eash as hoshiaght va mee gobbragh ayns shapp fuinneyder as lurg blein hie mee dy ynsagh keird yn 'uinneyder. Va keayrt (round) aym, creck arran, ayns ny fastyryn beggey, as shimmey shenn ven ny cheerey v'ayn as Gaelg eck ny mast ' ocsyn va mee creck arran daue, as myr shen dynsee mee mooarane vouesyn. Yiarragh ad dy jarroo, "Cha chionneemayd dty arran Eoineen, er lhimmey vees Gaelg ayd! "
Boallin cur shilley er thie my naim as va "Book of Manx Songs" echey, as gagh laa yeeagh mee stiagh 'sy lioar shen. Va Baarle as Gaelg aynjee.
Va cooinaghtyn geyre aym ayns ny laghyn shen as yinnin goaill arrane lesh ayrn jeh drane ass y lioar as eisht vriein jeh my ayr yn aght kiart dy ockley magh ny focklyn. Shimmey'n "caggey reeoil" v'eddyr ain tra hug eh "d" ny "b" stiagh ayns focklyn ennagh -- "Cha nee kiart shen", boallin gra, "Cha nel 'd' ayn!". Hie eh bunnys ass e cheeal eisht as yiarragh eh "Cha s'ayms cre'n aght t'eh scruit agh shen myr t'eh loayrit!"
She'n red cheddin v'ayn lesh "Corneil ny Baitchyn", colloon ayns Baarle as Gaelg liorish J. J. Kring ayns "Brialtagh Ellan Vannin". Hass mish lesh yn fockle scruit as hass my ayr lesh yn aght va Gaelg er ve loayrit rish sheeloghyn gyn earroo! Dooyrt my yishag laa dy row, "T'ad cheet noal dys Mannin as t'ad geabbey dy ynsagh dooin yn aght kiart dy loayrt eer chengey ny mayrey!"
Dy jarroo ta mee smooinaghtyn dy jagh yn Gaelg voish yn olk gys yn smessey car ny bleeantyn shen. Hooar mee lioaran ass yn Ellan tammylt er dy henney as dimraa eh boayl ta enney aym er, as 'sy lioaran t'eh scruit dy vel yn aght kiaragh dy 'ockley magh ennym y voayl "Pool Vaysh". Son shickyrys t'eh scruit "Poyll Vaaish" er ny caslyssyn cheerey, agh tra va mee my lhiannoo, goaill greim er laue my ayrey as honnick mee yn boayl shen son y chied keayrt, dinsh my ayr dou dy row yn ennym jeh "Pul Vahsh".
She shen myr v'eh eisht dy b'egin dou gynsaghey my hengey ghooie my lomarcan, gyn monney cooney agh voish feallagh ny ghaa feer henn, as cre'n vondeish t'ee er ve dooys car ny bleeantyn? Cha row ee mooarane edyr, er yn oyr dy jagh mee roym er y cheayn tra va mee ynsit dy ve my 'uinneyder. Rish ymmodee bleeantyn va carrey Manninagh aym ayns Lerphul, raad va mee shiaulley magh ass ayns lhongyn "Blue Funnel", guilley gollrhym pene b'ynney lesh y chenn ghlare. Va Jamys Mac Andreas yn ennym ersyn. Tra harrin dy valley ec kione my hurryssyn boallagh shin taggloo ayns y chenn ghlare, agh hooar eh baase. Ny keayrtyn veagh Albinagh ny Yernagh shiaulley marym ayns lhong ennagh as Gaelg e heer hene echey as veagh coloayrtys eddyr ain, agh, lesh goll shaghey ny bleeantyn, daase yn Ghaelg aym annoon as ny s' annooney as va glaraghyn elley goaill ynnyd j'ee, er yn oyr dy row mee rieau cha jeean dy ynsaghey glaraghyn elley as va mee, keayrt dy row tra va mee aeg, dy ynsaghey chengey ny mayrey Ellan Vannin.