AILE! AILE! AILE!


Tra va mee shiaght ny hoght bleeaney d'eash, va dooinney enmyssit Harry K . . . as y chummal echey ec bun y traid ain, myr ve 'sy chenn earish, ga s'likly ta caghlaa ny ghaa er n'yannoo aynsyn neayr's y traa shen, er-lhiams, Va Harry ny ghooinney keirdey - seyr-thie - as v'eh fer-toshiaght yn 'Fire Brigade' myrgeddin. My ta'n cooinaghtyn aym kiart, v'eh ny seyr ec yn Ard scoill Ree Illiam.
Huitt eh magh eisht, oie feayr geuree dy row, va Harry cheet roish dy-valley jeeaghyn er e hoshiaght rish shibbyr cheh, er-yn-oyr v'eh feayr as accryssagh. Ny-yeih, tra haink eh cheu-mooie jeh'n thie echey-hene, b'leayr da dy re dorraghey ve, gyn scell-hollys ry-akin aynsyn. Hie eh stiagh as hrog eh seose e choraa, gyllagh dy ard er e ven, agh cha dooar eh freggyrt erbee rish yn eam. Woaill eh maidjey-lostey, as yeeagh eh mygeayrt-y-mysh, as kiongoyrt rish va'n voayrd as ooilley ny claareeyn sallagh ersyn, er-mayrn lurg da'n ven echey as paitchyn v'er n'ee nyn shibbyr.
Shen myr ve eisht - cha row e ven ec y thie as cha row ny paitchyn nyn goyrt dy lhie noadyr, as yn aile! Gollrish Molly Malone, t'ee er n'gholl magh neesht! Hass Harry son tammylt ayns smooinaghtyn dowin, as eisht hie eh roish er y traid, as yeeagh eh seose gys ny thieyn elley, as magh ass dy chooilley uinnag va soilshey cheet!
Eisht ren Harry toshiaght dy roie seose y traid, as marish dagh chesmad v'eh geamagh dy ard, "Aile, Aile, Aile," Cheayll eh ny dorryssyn er nyn vosley er-e-chooyl, as feallagh briaght er, " C'raad ta'n aile, Harry bhoy?" Agh cha ren eh scuirr derrey haink eh gys kione y traid, ec Straid Malew, eisht hyndaa eh dy roie sheese y traid reesht. Liorish y traa shoh va ooilley cummaltee ny traid er jeet magh, paart jeu eiyrt er Harry as paart ny hassoo ec ny dorryssyn, agh cha ren Harry scuirr derrey rosh eh y thie ainyn, as hass eh ayns shen lesh e ghreeym nyn 'oi.
Ec yn chied eam va m'ayr er n'osley yn dorrys as v'eh jeeaghyn magh, my vummig ry-lhiattee echey, as mish, my ghuilley beg, jeeaghyn fo roih m'ayrey. Ec yn traa cheddin doshil dorrys yn thie va er-tessyn y traid voin, as quoi va'n chied pheiagh dy yeeaghyn magh ass y thie shen agh y Ven Harry-hene! Hass Harry ayns shen, e hooillyn as e veeal foshlit feayn, as er e eddin va red ennagh foddym fakin jiu - yindys mooar er-bashtal! As va red ennagh elley - aggle! agh aggle er red ennagh nagh bione da'n ven echey.
Hass Harry son tammylt ny host, as dy chooilley nane foast briaght jeh, c'raad va'n aile, as fy-yerrey hrog Harry seose e laue, as huitt dagh unnane ayns tostid dowin. Eisht ayns ard-choraa, ard dy liooar dy ghoostey ny merriu ayns Rullick Cheeill Malew, deie eh, "AYNS DY CHOOILLEY THIE *** 'SY TRAID, ER-LHIMMEY JEH'N THIE AYM-PENE.'
Shoh grait, hyndaa eh er e voyn as ersooyl lesh dy-valley, as deiyr e ven ersyn, gyn fockle erbee as imlee dy liooar, e kione er e h-oghrish, dyn jeeaghyn gys y cheu-yesh na'n cheu-hoshtal.
Cha b'egin da'n chrout shen er ny chloie yn nah cheayrt - va'n un cheayrt dy liooar!