LOSTEY YN LING ER NY SLEITYN


Ayns my laghyn seyrey souree 'sy vlein 1899 tra va mee my ghuilley mysh tree bleeaney jeig d'eash, va kiare j'in mysh yn eash keddin goll mygeayrt er y cheer faggys da Balley Chashtal. Hie shin gys thie fer elley dy gheddyn eh dy heet marin as cha lheah as haink eh magh ass y thie hrog eh e chione 'syn aer myr ta moddey jannoo as dooyrt eh "T'ad lostey ling er ny sleityn jiu." (Va "Ling" yn ennym va shin jannoo ymmyd jeh son "freoagh", shenn ennym Loghlynnagh er e hon, va foast er mayrn lurg keeadyn dy vleeantyn).
Yeeagh shin ayns yindys mooar ersyn, er yn oyr dy row fys mie ain ooilley nagh row ad lostey ling 'sy tourey. By gummey leshyn, dooyrt eh, mannagh row soar dy yaagh as lostey ainyn, v'eh echeysyn, hooar eshyn eh, as cha row veg elley dy ghra! Va fys mie ain nagh row eh jeh ymmyd erbee dy arganey rishyn as cha dooyrt shin fockle derrey haink shin ayns shilley jeh ny sleityn as cha row jaagh erbee ry akin! Va'n aer dy slane sullyr mygeayrt ny sleityn va nyn lhie my hwoaie j'in as va geay yiass ayn. Dinsh shin ooilley shoh dasyn agh v'eh cha thurneishagh as muc as dooyrt eh, "Er lhiam dy vel ad lostey er cheu elley jeh ny sleityn!"
Feiy'n laa shen as rish jeih laa elley ny yei, she'n red cheddin v'ayn. Boayl erbee dy jagh eshyn va soar jeh'n jaagh echeysyn as shinyn gobbal dy row eh ayn.
Va'n chooish er ny yarrood ain, as eisht, reggyryn dy hiaghteeyn ny lurg shen haink screeuyn da'n thie echey veih Callao, Peru, veih braar shinney nyn garrey as eshyn ny guilley mysh shiaght bleeaney d'eash, v'er lhong shiaulley mygeayrt y theihll gynsagh yn keird echey dy ve ny hiaulteyr. V'ad er n'aagail Hamburg lughtit lesh geayl as geayl fuinnit, as rish jeih laa roish my rosh yn lhong Callao va'n lught er ve er aile as lostey as s'mooar as s'doillee va'n obbyr ec ny deiney dy reayll yn aile fo lout, as shimmey keayrtyn, as yn braar echey, smooinee ad dy b'egin daue yn lhong y hreigeil.
Nish, er hoh yn ayrn quaagh jeh my skeeal. Va ny laghyn va'n lhong er aile ny kiart laghyn cheddin va'n braar echey ayns Balley Chashtal, Ellan Vannin, gra dy row, ad "lostey ling er ny sleityn ".