GOLL DYS NY SLEITYN



Ayns ny laghyn moghrey va'n Agglish booiagh as arryltagh dy liooar dy goaill r'ee hene ymmodee shenn chliaghtaghyn ass yn chenn Chredjue tra veagh adsyn vondeishagh as ymmydoil r'ee hene. Ny cliaghtaghyn nagh row vondeishagh r'ee ren ee e cooid share ad y gheyrey as ad y eebyrt magh ass y cheer. Ny yeih cha dooar ooilley ny cliaghtaghyn baase kyndagh rish noidys ny Hagglish, agh hie ad fo-halloo as va nane jeu foast er mayrn tra va mee aeg ayns Mannin, agh er lhiam dy vel yn cliaghtey er n'gheddyn baase ayns yn jeih cheead blein t'er n'gholl shaghey neayr's yn traa shen!
Haghyr eh, laa souree dy row, tra va mish nuy ny jeih bleeaney d'eash lurg lhongey y vunlaa, dy row mee shassoo cheusthie jeh dorrys ny hie, er chee goll magh dy chloie, as va my voir as ben naboo, Bnr Kodhere, nyn shassoo cheumooie taggloo eddyr oc hene, ren dorrys y thie noi ain cheu elley jeh'n raad fosley as haink y ven thie magh ass e thie as hass ee er y ghreeish, v'ee ny ben ruy as stoamey as thollee mysh jeih bleeaney as feed d'eash as kiare paitchyn eck.
Lurg va reggyryn d'ocklyn goll shaghey eddyr oc mychione lhied yn emshir vraew v'ayn dooyrt y ven naboo ain rish y ven ruy, "C'raad v'ou hene jea? Cha naik shin oo goll mygeart boayl erbee?" "Oh, hie mee dy valley jea, dy akin my ayr as my voir," dreggyr y ven aeg ruy, "Cha nel mee er n'akin ad rish tammylt liauyr."
"Oh! Jagh oo da'n Whallag, eisht? " vrie nyn ven naboo j'ee. "Hie, as b'egin dou goll roym dy moghey, kyndagh rish lhied y raad liauyr t'ayn, as cha nel ny paitchyn cliaghtit rish shooyl feer foddey, myr shen b'egin dou shooyl dy moal," as y ven ruy.
Choud's shoh va ny coraaghyn ocsyn er ve dooghyssagh dy liooar, agh nish honnick mee Benainshtyr Kodhere sheeyney magh e kione rish y ven tessen y traid as va e choraa injil as geyre, beggan erskyn sonnish, myr b'aillee nagh gluinaagh naboo erbee ny v'ee gra, tra dooyrt ee, "Ren oo goll er y clieau tra v'ou ec y Whallag?" "Ta'n Whallag er y clieau! " dreggyr y ven ruy, as va e coraa beggan geyre. "Ta, ta fys mie aym er shen," dreggyr Bnr Kodhere, "Agh ren uss goll seose er y clieau?"
Honnick mee dy row eddin y ven aeg ruy jiargaghey as va soilshey ayns ny sooillyn eck tra dreggyr ee "Ren! " "Row ny paitchyn mayrt er y clieau?" vrie y daa ven j'ee. "Cha row ad marym, er yn oyr dy vel eh ro gharroo dauesyn er y clieau," dreggyr ee, jeeaghyn dy daaney er ny mraane elley. "Quoi va mayrt eisht mannagh row ny paitchyn mayrt?" vrie y daa ven. "Quoi elley veagh marym eisht? Cha nel fer erbee beaghey er y clieau," as ish. "Foddee nagh vel foddee nagh vel, agh b'aashagh dy liooar da fer ennagh dy veeiteil oo er y clieau," dooyrt y daa ven. "Cha veeit mee rish peiagh erbee er y clieau, va mish my lomarcan ayns shen," as ish. "Cre hon hie oo seose er y clieau eisht?" vrie y daa ven j'ee. "Hie mee seose er y clieau dy heiy freoghaneyn," dreggyr ish dy daaney. ' Yn chenn leshtal cheddin. Yn chenn leshtal cheddin!" dyllee y daa ven, gearey dy creeoil urree. "As c'red elley ren oo er y clieau chammah as teiy freoghaneyn?" "C'red elley yinnins? Insh dou my sailliu, er y fa nagh vel mee toiggal bun ny focklyn euish " vrie ish "C'red elley jinnagh ish er y clieau! Oh dy jarroo! C'red elley veagh ee jannoo er y clieau! Teiy freoaghaneyn t'ish gra, yn chenn leshtal cheddin!" dyllee y daa ven, foast gearey dy creeoil urree, "Insh dooin eisht, cre'n fa b'egin dhyt goll seose er y clieau yn chied laa Mee Luanistyn!" "Er yn oyr dy vel ny freoaghaneyn appee. Cha row ad appee roish y traa shen," as y ven ruy. "Ta ny freoaghaneyn appee er y chied laa Mee Luanistyn, as cha row ad rieau appee roish y laa shen. Cha row ad rieau! As vel shickyrys ayd nagh ren oo red erbee elley er y clieau eisht?" vrie y daa ven j'ee. "C'red elley veagh aym dy yannoo? Heiy mee ooilley ny freoaghaneyn va mee laccal as hie mee dy valley reesht dys y Whallag," dreggyr ish, jeeaghyn dy daaney orroo dys yn jerrey, ga dy row yn eddin eck cha ruy as y folt eck! Cha row fockle elley dy ghra ec y daa ven, as hie mee roym magh ass y thie dy chloie as chelleeragh ren mee jarrood y chooish.
Va mee queig bleeaney jeig d'eash ayns 1902, gynsaghey keird yn 'uinneyder as ayns ny fastyryn beggey raghin noon as noal mygeayrt y valley (Balley Chashtal) cairt-laue aym, creck arran voish thie dy hie. Ny mastey ny thieyn va ymmodee thieyn mooarey as va nane jeu freayll daa inney veyl. Ayns nane jeu va 'neen enmyssit Catreeney Guilley Chreest ass Glion Rushen, ben aeg cheerey stoamey as ish ben coagyrey 'sy thie shen.
Laa souree dy row, hug mee my hilley cliaghtagh urree 'sy thie as honnick mee dy row Catreeney ayns cree mie, kyndagh rish red ennagh, mongey as sollyssid ayns ny sooillyn eck, as dooyrt mee "S'mayrey t'ou jiu Chatreeney! " "Ta mee dy jarroo, Eoineen. S'leah vees laa feailley ain," dreggyr ish, mongey orrym. "Laa feailley? As cre'n laa feailley vees ayn?" vrie mee j'ee. "Laa feailley y Vanc, ta fys ayd, Yn Chied Laa Mee Luanastyn," as ish, as va mongey lhean harrish yn eddin eck. "Ta fys ayms er shen agh s'beggan ymmyd ta'n laa shen dooys, er y fa dy beeym gobbraghey," dreggyr mish. Eisht, dy doaltattym, cheayll mee coraa y daa ven voish laghyn my aegid briaght jeh'n ven stoamey ruy. "Insh dooin, eisht, cre'n fa b'egin dhyt goll seose er y clieau er y chied laa Mee Luanistyn?" focklyn nagh row mee er smooinaghtyn er rish ymmodee bleeantyn!
Va fys aym nagh row ny Manninee jannoo mooar jeh'n laa shen cha row eh dy liooar dy chur lhied y mongey lhean harrish e heddin na'n vaynrys v'urree reggyryn dy laghyn roish Laa Luanistyn, as cha nel foast fys aym cre'n aght haink eh dou dy ghra "Cur foayr dou Chatreeney, my s'aillt." Kiart dy liooar Eoineen, as cre t'eh?" as ish dy eddrym, mongey orrym. Yeeagh mee dy geyre urree as dooyrt mee. "Gow mish mayrt tra t'ou goll gys y clieau Laa Luanistyn Chatreeney! " Ren yn mongey fioghey dy tappee veih'n eddin eck myr va mee loayrt, as vlake ee orrym myr nagh row ee credjal ny v'ee clashtyn ny sooillyn eck foshlit dy lhean as y beeal eck myrgeddin, as haink ee fy yerrey dy my vriaght. "Cre ren oo gra, Eoineen? Cre dooyrt oo?" "Ah! Ta red ennagh ayns 'goll dys ny sleityn' lurg ooilley! Cha row Benainshtyr Kodhere as my Vummig boirey er y 'neen stoamey ruy son veg! As cre erbee t'eh ta fys mie er ec Catreeney," dooyrt mee rhym pene.
Yeeagh Catreeney orrym rish tammylt as eisht ghow ee toshiaght dy ghearey, as ren ee garaghtee dy ard as rish traa liauyr, e kione ceaut er ash ny lhiattaghyn eck er creau as ny jeir roie sheese er e lhieckanyn as smooinee mee, "Ta. Ta fys mie aym cre'n fa t'ou garaghtee, as cha nyrrys edyr! Cre'n ymmyd veagh scollag aeg my lhieds dhyt hene er y clieau mastey'n freoagh! "
Fy yerrey, ren ee scuirr as yeeagh ee sheese orrym, agh er aght kenjal, as hug ee minniag dou er my lhieckan, as dooyrt ee "Cha nee yn traa shoh Eoineen! T'ou ro aeg! T'ou ro aeg dy gholl dys ny sleityn! Keayrt ennagh elley, foddee! "
''Ersooyl lhiat Chatreeney! Cha nel mee ro aeg er chor erbee! Gow mee mayrt!" dooyrt mish dy chleaynagh. "Traa ennagh elley, foddee, Eoineen, tra vees oo ny shinney, agh cha nee yn traa shoh," dooyrt ee, as honnick mee nagh row eh boirey urree mychione y chooish ny s'odjey, as myr shen ren mee geabbey er aght elley - "Kiart dy liooar, eisht brieym jeh Emily. Hed ish marym, ta fys mie aym," dooyrt mee, lhiggey orrym dy row corree orryms! Va Emily yn shuyr eck ny ben aeg feed vlein d'eash, lieckanyn ruissagh eck as lane dy vree. "Cha jean oo y lhied er chor erbee," dyllee ee dy gheyre orrym, as va aggle ayns yn coraa eck."Cre t'eh nagh jeanyms?" vrie mee urree dy daaney. "Brie jeh Emily oo hene! " dreggyr ish, lesh yn aggle nish ayns ny sooillyn eck. "Dy jarroo, neeyms!" as mish, "Mannagh jedym mayrts," dooyrt mish ayns coraa creoi. "Eoineen! Ny jean! Cha nel fys erbee ec Emily my-e-chione! Nish v'ee jannoo aghin hym! Cred t'eh, nagh vel fys ec Emily er?" vrie mee j'ee. 'Mychione goll dys ny sleityn Laa Luanistyn," dreggyr ish. "Foddee dy vel fys eck!" dooyrt mee "Cha nel, Eoineen, cha nel t'ee gollrhyt hene ro aeg! Giall dou Eoineen my ghuilley mie, nagh jir oo fockle erbee rish Emily my-e-chione!" "Oh, kiart dy liooar, eisht. Cha jiryms fockle erbee r'ee myr-e-chione, agh ta mee foast smooinaghtyn dy beagh eh ny share dhyt mish y ghoaill gys y clieau mayrt!" dreggyr mish.
''Eoineen, cha n'oddym! Ta mee hannah er my yialdyn! Mannagh row mee, gowins uss marym Eoineen, er yn oyr dy vel oo dty ghuilley bwaagh stoamey aalin dy jarroo! V'ee mongey orrym reesht, fakin dy row mish er lhiggey'n raad j'ee as erreish dou gialdyn nagh yiarrin veg rish e shuyr Emily mychione y chooish, as myr shen daag mee ish, caarjyn feer choardit ny n'yees.
Fakin dy row foast kuse dy laghyn roish Laa Luanistyn, ren mee eabbey ny s'diuney dy chosney fys smoo mychione y chooish, as tra va mee cur shilley er my chionneyderyn arran va mee lhiggey tuittym fockle ny ghaa my-e-chione. Deab mee fys y gheddyn ass troor dy vraane Yernagh v'ayn agh v'ad gollrish ny mraane elley as cha naik adsyn cre'n taitnys veagh ayns goll dys ny sleityn agh dy heiy freoaghaneyn as dy ve nyn lhie mastey'n freoagh!
Va nane jeu fy yerrey as fys eck er shen va mee cheet, ben aeg elley nagh row rieau monney eck dy ghra, as tra scruirr mee dy haggloo mychione freoaghaneyn, y ling as ny sleityn, yeeagh ee orrym lesh mongey lhean er yn eddin eck as dooyrt ee, "Ogh Eoineen, bee oo jummal yn traa ayd shooyl er yn sleityn marish mraane ny shinney na uss, ta palchey jeh ry-gheddyn ayns Balley Chashtal hene!" as cha dooar mee fockle erbee elley assjee my-e-chione! Phoos Catreeney er y Gheurey cheddin as honnick mee ee laa ennagh er yn Arragh, as v'eh baghtal ry akin dy row ee torragh as faggys da'n traa lhie hoalley eck. Tra honnick mee ee, scuirr mee as dooyrt mee r'ee ayns coraa injil, "Cha lhias dhyt goll dys ny sleityn mleeaney Chatreeney!"
Yeeagh ee orrym myr nagh row ee rieau er chlashtyn mychione sleityn, freoaghaneyn as y lhied, ny mychione cre erbee va'n feallagh ny shinney jannoo ry cheilley tra ragh ad dys ny sleityn Laa Luanistyn, as doshil ee ny sooillyn eck dy oney as dooyrt ee rhym, "C'red t'ou cheet er Eoineen?" "Oh cha nel eh veg, cha nel eh veg Chatreeney," dreggyr mish, as mish mongey urree!