MUTCHY BRIDSON


Keayrt dy row, tra va mee aeg, yinnagh shin meeiteil rish shenn Vanninagh dooie as Gaelg feer vie echey enmyssit "Mutchy Bridson." V'eh cummal ec "Kione y Valley" ta shen enmyssit 'sy Vaarle "Malew Street". Un oie va shin ooilley nyn hassoo cheumooie jeh'n thie oast ta nish enmyssit "Yn Glue Pot" as va ymmodee mraane aegey as deiney aegey kionefenish
Dooyrt Bill Hom rish 'Mutchy', "Cre'n eash vees er ny 'neenyn aegey tra vees eh kiart daue dy gholl marish deiney?" (Va fys mie ain ooilley er shen ny v'eh cheet er agh cha dooyrt shin veg! "Oh cha s'ayms" dooyrt 'Mutchy', "Ny laghyn t'ayn jiu t'ad ny s'daaney ny v'ad tra va mish aeg. Cha s'ayms er chor erbee!" Lurg tammylt, yeeagh eh dy gheayr orrin, as dooyrt eh, "Er lhiam pene, tra t'ad shenn dy liooar t'ad mooar dy liooar, as tra t'ad mooar dy liooar, t'ad shenn dy liooar! "
Ta ymmodee skeeallyn elley aym mychione ny shenn laghyn ayns Balley Chashtal as yn sleih va enney aym er tra va mee aeg. Va Gaelg ec y chooid smoo jeh'n shenn sleih agh cha row ad arryltagh ee y ynsaghey dooinyn er y fa nagh smooinnee ad dy beagh ee jeh monney vondeish dooin 'sy theihll. Smooinnee ad dy row yn Ghaelg kiart dy liooar tra veagh ee loayrit ny mastey Manninee jeh'n kynney injil, lhied as adsyn va gimman carriads da'n ooashlaght as adsyn va jannoo gareydys as y lhied. Va fer ayn enmyssit "Johnny Quayle the Gardener" as va ram Gaelg echeysyn. Dooyrt eh rhym un oie, "Cha jean y Ghaelg cosney ping dhyt 'sy theihll shoh wooinney." Son shickyrys cha chossyn ee rieau ping dou hene as mish aynshoh ayns eebyrtys 'sy Chanadey, agh quoi ec ta fys? Foddee dy vel sleih aegey ayn ayns Mannin as foays oc er chengey ny mayrey, cosnys ram argid as ram taitnys assjee ayns ny bleeantyn ry heet? Ta mish shenn as ta mee raad y vaaish as cha bee ny laghyn liauyr aym er y thalloo agh ta mee shickyr nagh now y Ghaelg baase choud's vees Ellan Vannin er mayrn.