Y NAH HILLEY



Laa souree dy row, 'sy vlein 1906 va'n lhong ghaal 'Tabor' er e raad dy valley dys Lerphull, Sostyn ass Poti, Georgia 'sy Vooir Ghoo, lughtit lesh manganese. Er y laa ta mee gimraa v'ee mastey ny h-Ellanyn Greagagh, as mish aynjee, my ghuilley stuirt. Va mee nuy bleeaney jeig d'eash ec y traa shen.
Mysh tree cluig lurg munlaa, ta shen dy ghra, lieh oor lurg 'nane er y chlag, ghow mee yn ushtey va ny jystyn er ve strullit ayn as cheau mee eh harrish cheu ny lhuingey, fakin, myr ren mee shen, dy row shin goll shaghey ellan ennagh. Cha lheah as honnick mee dy kiart yn ellan shid, ghow mee yindys, as dooyrt mee rhym pene "Ta enney aym er yn ellan shid! Ta mee er ve ayns shoh roie! " Agh chelleeragh dreggyr mee rhym pene as dooyrt mee, "Cha row uss rieau ayns shoh roie ' Cre'n boghtynid ta shoh! Ersooyl lhiat! Ta shoh yn kied cheayrt t'ou rieau er ve mygeayrt yn cheayn shoh! Cha nel shoh agh dty nah hurrys er yn cheayn ooilley cooidjagh!" "Ta fys aym er shen," dooyrt mee rhym pene, "Agh son shickyrys ta fys aym dy vel mee er n'akin yn ellan veg shid roie." As yeeagh mee dy jeean er yn ellan reesht. "Gowym loo er shen!" "Nar jean ommidan jeed hene, " dreggyr mee rhym pene. "Cre'n aght t'ou er n'akin ee as shoh yn kied hraa t'ou er ve fud ny h-ellanyn Greagagh!"
Shen myr v'eh, eisht, rish tammylt ny s'odjey. Mish arganey rhym pene, as s'beggan ta ry gheddyn ass y lhied! Agh fy yerrey, dy hickyraghey mee hene, dooyrt mee "Kiart dy liooar! Yn ellan shoh, ta ellan elley eck, beggan ny share na creg, ny lhie cooyl yn gheaylin eck, as ta ellan elley ny lhie cheu elley ny lhong, as ta ellan veg eckish neesht, beggan ny smoo na creg neesht ny lhie 'point' jeh'n chione j'ee. As hannah honnick mee ny hellanyn shen myr dy beagh ad kiongoyrt rhym.
Nish, derrey yn traa shoh, cha row mee er n'akin cheu elley ny lhong, agh, shoh loayrit aym, hie mee roym gys yn cheu elley as yeeagh mee magh, as cur my ner, shee bannee mee! Va shin er jeet seose rish cass ellan elley. Vong mee er aght fea, as dooyrt mee rhym pene "Cum dty hengey Eoineen, fuirree ort rish tammylt as hee oo red ennagh!" Aynshen, ny lhie cooyl yn ellan elley, va eer ellan elley ayn, beggan ny smoo na creg myr va mee er ghra dy row! Eisht roie mee gys cheu elley ny lhong, as son shickyrys, ny lhie 'point' jee va'n trass ellan ayn, kiart myr dooyrt mee!
Ymmodee keayrtyn neayr's yn traa shen ta ny hellanyn ad shen er ve roish my hooillyn, as ta mee foast goaill yindys kys haink eh lhiam dy akin ad roish my row mee er cheau my hooillyn orroo! Ta sleih gra, er lheh ny shenn Vanninee as ny Gaeljee ooilley, dy vel reddyn ta ry heet ceau caslyssyn jeu hene rolaue. Ta shin fakin reddyn quaagh ayns ashlishyn ny hoie as ny s'anmey t'ad cheet ayns rieughid, as foddee dy vel red ennagh ayns ny raaghyn shen as y chredjal shen, agh ta mee kiart shickyr nagh vaik mee rieau ny hellanyn shen ayns ashlish erbee rolaue. Foddee dy vaik mee ad ayns bioys elley? Quoi ec ta fys? Cha nel fer erbee ayn dy chur freggyrt da ny keishtyn shen, agh my ta shin er ve ayns shoh roie, cre'n fa nagh vel cooinaghtyn ain jeh? Tra ennagh screeuym skeeal bentyn rish y chooish shen, agh cha nel foast jerrey er yn skeeal t'ayns my aigney dy screeu.
Tra va shinyn aeg ayns Balley Chashtal cheayll shin ram skeealyn quaagh voish yn shenn sleih as Gaelg oc, skeeallyn mychione bugganeyn, terriu ushtey, glashtinyn as y lhied, as cha ren shin agh garaghtee tra va'd er ny insh dooin liorish yn shenn sleih!
Ta cooinaghtyn aym er un shenn dooinney, ny Saasilagh v'eh, dooinney slane obbaltagh noi'n jough, dooinney nagh inshagh breag son ooilley'n tey ayns China. Er e lhiabbee vaaish dinsh eh da'n jishag aym pene dy row eh shooyl un oie faggys da Kintraagh ayns Skeerey Chreest Rushen, raad ta'n lught thie Gaauin cummal, as honnick eh, 'sy lheeannee faggys da'n awin veg ayns shen, ferrishyn daunsey mygeayrt as bayrnyn jiargey as cooatyn geayney orroo! Myr dooyrt mee, cha jinnagh yn dooinney shoh ginsh skeealyn er chor erbee. Cre, eisht, honnick eh? Cre'n fa va ny shenn Vanninee ooilley credjal dy bollagh ayns y vooinjey veggey? Cha row ny shenn Vanninee ooilley ass nyn geeayl!
Ta shenn raa 'sy Ghaelg, as foast cooinaghtyn aym er. "Ta reddyn ayn, as ta reddyn goaill," ta shen dy ghra, dy vel reddyn quaagh ayn as dy vel ny reddyn quaagh shen jannoo reddyn neughooghyssagh, neu heiltagh.
Cheayll mee keayrt dy row, mychione inneen aeg voish Colby as ish shooyl er ny sleityn faggys da'n Boayrd Runt er gerrey da Baarool. V'ee ny lomarcan derrey haink dooinney er gerrey j'ee as eshyn markiagh er cabbyl mooar bane. Loayr eh r'ee as smooinee ish dy row eh ny ghooinney seyr voish Doolish ny boayl ennagh, ga dy row Gaelg feer vie echey, as cha row lhied ny deiney as eshyn jannoo monney ymmyd jeh chengey ny mayrey ec y traa shen tra va'n chengey goll mow. Doaltattym skell eh roish! Eshyn as y cabbyl echey neesht. Roie y ven aeg dy valley as aggle mooar urree as rosh ee yn thie eck ass ennal as ooilley er creau. Lurg tammylt dinsh ee da'n vummig eck yn clane skeeal, kys va'n dooinney seyr coamrit cre'n sorch dy chabbyl v'echey, ny cowraghyn er y chabbyl, cre'n eaddagh v'eh coamrit ayn as eer mychione yn ainey airh as "daiman" ayn, v'er y vair echey. Cha lheah's cheayll yn chenn ven ooilley shoh, hie ee neealloo as huitt ee er laare y chott v'ad cummal ayn. Va'n 'neen eck er ve loayrt mychione fer aeg va sooree er y chenn ven tra v'ish aeg as va'n dooinney baiht er marrinys gys America tra hie yn lhong v'eh ny troailtagh aynjee fo ayns sterrym mooar faggys da Boston. V'eh yn chied er ny ruggyr jeh lught thie mooar, berchagh voish Skeerey Braddan. Tra hooar e yishag fys dy row eh sooree er ben aeg voght voish y jiass, hug yn jishag echey eshyn ersooyl ayns eebyrtys dys sleih mooinjer oc ayns Cleveland, Ohio.
Agh son shen as ooilley, hooyl eh, dy jarroo, vark eh, ny sleitynyn yn oie shen as loayr eh rish 'neen y caillin v'eh er ve sooree urree ooilley ny bleeantyn shen er ash! Dy jarroo, ta ny smoo reddyn ayn 'sy theihll shoh wass na ta enney ny fys ain er!
Cheayll mee shenn dooinney ginsh skeeal un oie ayns Balley Chashtal. Dooyrt eh dy row eh shooyl un oie ghorraghey faggys da'n Smelt ec Purt le Moirrey. Honnick eh red mooar doo ayns magher er gerrey da'n wyllin as ghow eh aggle atchimagh. "Quoi oo hene? " dooyrt yn dooinney ayns Gaelg, agh cha dooar eh ansoor erbee, agh haink yn red mooar doo eer ny sniessey da. Ghow eh eer ny smoo aggle agh cha row eh son roie ersooyl edyr, er aggle dy jinnagh yn red quaagh cheet geiyrt er! Fy yerrey, ren eh giarrey cowrey ny croshey ersyn hene as dooyrt eh ayns Gaelg, "Nar jean boirey orryms as cha jeanym boirey orts, ayns ennym yn Ayr as y Vac as y Spyrryd Noo.'' Chelleeragh skell yn red mooar doo roish as cha vaik eh arragh eh, ga dy row eh dy mennick ny lurg shen shooyl 'sy dorraghys 'syn un voayl.
Er my hon hene, cha nel mee rieau er n'akin scaa, ny ferrish, ny red erbee neuheiltagh agh son ny hellanyn shid honnick mee ooilley ny bleeantyn shen er dy henney 'sy Cheayn Ghreagagh tra va mee nuy bleeaney jeig d'eash. Ayns shoh 'sy Chanadey raad ta mee beaghey nish, cha nel sleih credjal ayns lhied ny reddyn va ny shenn ayraghyn ain ayns Mannin credjal ayndoo as shen y fa nagh vel mee gimraa ad dys peiagh erbee ayns shoh.