SHENN VODDEY ER RAAD CREOI

Va deiney Valley Chashtal gra dy row Pat Gallagher "Shenn Voddey er raad creoi" as cha row ad foddey er-shaghryn edyr.
V'eh ny Yernagh, ny ghaaue stainney as paays dy kinjagh ersyn as s'beggan nagh jinnagh eshyn jough son veg y chosney.
Cheayll mee ymmodee skeeallyn mychione Pat tra va mee aeg ayns Balley Chashtal. Ta ram jarroodit aym agh ta un skeeal ayn nagh jarroodym dy bragh. Moghrey laa dy row, roish my jagh eh rish yn obbyr echey, v'eh er ny straidjyn, ny sooillyn echey jeeaghyn ooilley mygeayrt y mysh son fer erbee va goll roish gys thie oast as lurg tammylt honnick eh troor dy gheiney va goll gys y "Glue Pot". Deiyr eh dy moal orroo, cur traa dy liooar daue yn yough y hayrn as eisht hie Pat stiagh 'sy thie oast.
Va ny deiney nyn shassoo aynshen as three pyntyn kion goyrt roo.
"Moghrey mie dhyt Phat" as nane jeu, "Vel anjeeal er ve ayds foast?" "Lieh jeh" dreggyr Pat dy tappee "Ta'n lieh elley aynshoh marym," as hayrn eh roddan mooar marroo ass e phoggaid dy tappee. Eisht roish my row fys ocsyn er yn aigney echey, va'n roddan ayns beeal Phat as honnick ad eshyn gee jeh!
Va shen dy liooar dauesyn! Magh ass thie oast Venainshter Sayle roie ad dy tappee, nyn laueyn harrish ny beill oc as tra hooar ad magh, hilg ad cre erbee v'ayndoo!
As Pat Gallagher? Hass eshyn aynshen, giu dy kiune jeh'n lhune derrey va ny three glessyn er nyn folmaghey as eisht hie eh magh dy moal magh ass y "Glue Pot" gys yn obbyr echey.