JUAN DOO



Screeuyn voish Juan y Comish gys Manninagh tra chionnee eh "Juan Doo, Shiaulteyr", ayns Canada ayns 1955.



Hooar mee Juan Doo, shiaulteyr, tammylt er dy henney as t'eh bunnys erskyn oltooan. Lhisagh shinyn as Gaelg ain cur bwooise da Art Mac Ghavid as R. L. Thomson, ny deiney ooasle shen ren screeu y lioar.
She red doillee eh dy hoiggal as red joarree eh, tra ta shin fakin lioar Ghaelgagh scruit ec deiney nagh row ruggit nyn Vanninee, as adsyn ginsh da ny Manninee yn currym ocsyn mychione freayll bio chengey ny mayrey oc hene! Shimmey Manninagh dooie ayns ny laghyn foddey er dy henney, as eer ayns ny laghyn t'ayn jiu, t'er ghwee yn dy hreigeil y Ghaelg, agh er lhiam dy vel ad ooilley er ve gollrish coraa geamagh 'syn aasagh er ny oyr nagh vel Gaelg ayns creeaghyn ny Manninee arragh. Lhig dooin moylley ny deiney ard ooasle shoh son yn obbyr yindyssagh oc as yn eab ocsyn dy reayll bio as dy jarroo dy chroo, lettyraght noa 'sy Ghaelg. Cha lhisagh mooarane doilleeidyn ve ayn, ta deiney 'syn ellan as palchey Gaelg oc foast as deiney elley 'syn Ellan as "oashyryn liauyrey" oc! Lhisagh ad cheet ry cheilley as sauail chengey ny mayrey voish goll mow.