BEN FLAH YAVANAGH


Laa dy row, ayns Tanjong Priok, yn phurt son Batavia, cheayll shin dy beagh ben flah Yavanagh cheet er y lhong marin gys Jeddah, as dooyrt Illiam "Shenn chaillagh ghraney ennagh, ta mee sheiltyn, s'aillee goll gys Mecca roish my vow ee baase." As eisht yarrood shin dagh ooilley nhee mychione y chooish!
Er y lhong ain va'n shamyr-choagyree ny lhie cheu chooylloo jeh ''Thie-mean ny lhuingey" er lout eaghtyr ny lhong. Er gagh heu jeh'n lout eaghtyr shoh, ec yn jerrey jeh, va kiare shamyryn ayn as va cassan roie eddyr ocsyn as thie-mean ny lhuingey. Ec jerrey y chassan shoh va shamyr yn Earroo1 Cleragh ayn as va'n dorrys as daa uinnag jeh ayns y chassan as uinnag chruinn elley jeeaghyn lesh jerrey ny lhuingey, erskyn y voayrd raad va shinyn gaarlaghey y bee laaoil.
Daag shin Tanjong Priok fastyr laa dy row as moghrey laa ny vairagh ec shey er y chlag, haink Illiam as mish veih'n thie tashtee (thie stoyr), cur lhien yn 'eill cour y laa, as, myr hug mee ee er y voayrd ain, cheayll mee peiagh ennagh cheusthie yn chamyr as meir neuyesh echey geabbey dy osley yn uinnag ghooint. "Cha nee shen y cleragh," smooinnee mee rhym pene, as myr shen, hass mee jeeaghyn er yn uinnag, goaill yindys quoi erbee va fosley yn uinnag er aght cha ordaagagh. Hooar mee my leagh fy yerrey hoal, dy moal, dy moal hie yn uinnag er 'osley, as hooar mee shilley jeh oaie aeg bwoyagh gyndys cre erbee veagh ry-akin eck, as eisht honnick ee mish my hassoo ayns shen! Ghooin yn uinnag dy tappee lesh polt cheayll mee yn sollys-marroo (dead-light) tuittym ayns yn ynnyd echey hene, as meir aalin (cha row ad cha moal as neu yesh nish!) chionney yn uinnag as y sollys-marroo. "She'n ven flah t'ayn cheusthie," dooyrt mee "as agglit dy mooar liorish yn eddin eck."
Haink Illiam dys yn chamyr choagyree tammylt beg ny s'anmey, as dooyrt mee rish "Illiam bwoie! Ta mee er n'akin y ven flah! Cha nee shenn chiallagh t'ayn noadyr! She caillin aeg bwoyagh ee, aalin erskyn insh! Agh bee ee marroo foddey roish my rosh mayd Jeddah my t'ee smooinaghtyn dy vel ee goll dy veaghey 'sy chamyr shen, lesh dorrys as uinnag dooint dy chionn! As dinsh mee da shen ny va mee er n'akin. "Bee ish marroo dy jarroo gyn ourys," dooyrt Illiam. 'Er lheeish dy vel ee er boayrd lhong Hollanagh, dy likly."
Va Illiam er n'insh dou mooarane mychione y dwoaie v'er ny Hollanee er dagh ooilley pheiagh ayns ny h-Injyn Hollanagh, as dy jarroo va mee hene ynsaghey mooarane ny smoo myr hie ny bleeantyn shaghey, er yn oyr nagh row yn ghlare Valayu ec Illiam myr v'ee aym. Vrie mee jeh Illiam kys v'eh dy row y ven flah ayns cabbane y chleree, as dreggyr eh, "Foddee dy vel yn ayr eck er chionnaghey y shamyr cour y turrys," as she shen myr v'eh, hooar shin magh fys ny s'anmey. Chreck yn chleragh y shamyr son kiare keead guilder. Haink yn Earroo 1 Cleragh marish y lhong myr chengeydeyr, dy loayrt eddyr ny troailtee crauee as skimmee ny lhong. Va'n currym echeysyn dy akin nagh row cowraghyn y Vreck Vooar brishey magh mastey ny troailtee crauee as dy hickyraghey dy row ad ooilley glen. Ny s'odjey, fakin dy row y ven flah er y lhong, begin da'n chengeydeyr cur shilley urree dagh voghrey dy vriaght row dagh ooilley nhee goll dy mie maree. Tra haink eh dooinyn y moghrey shoh, dooyrt Illiam rish: "Chleragh! Insh da'n chaillin ayd cheusthie yn shamyr dy vel shinyn nyn gheiney doaieagh as mie as dyn aggle y ghoaill j'in. Insh j'ee dy gheddyn eaddagh ennagh dy yannoo curtanyn da'n oorrys as ny uinnagyn, as eisht dy vod adsyn ve foshlit oie as laa, my s'ailleeish, as nagh jean fer erbee er y lhong tayrn ad ry lhiattee dy yeeaghyn stiagh urree. Ta fys mie ayd hene dy vel y shamyr shen cheh."
Va musthaa mooar troggit cheusthie jeh'n chamyr nish as cheayll shin coraaghyn troggit, agh coraaghyn aegey v'ad, myr dy beagh ad lesh guilley mysh jeih blein d'eash. as eisht. hooar shin shilley jeu! V'adsyn ard as roauyr as eddinyn baney orroo as va fys mie ain cre v'ayn! Fir spoiyt! Va ennym orroo ec Illiam 'caboonyn'! "
Cha row eh feer foddey derrey va curtanyn jeant as croghit er yn dorrys as er ny uinnnagyn agh cha row nane erbee croghit rish yn uinnag v'erskyn y voayrd ain, as va treisht mooar orrym nagh beagh! Ny yei, tra ghow mee toshiaght dy obbraghey ec y voayrd ec kiare er y chlag va'n uinnag shen foshlit as honnick mee dy row y ven flah ny lhie er y lhiabbee lesh e kione lesh toshiaght ny lhong, dyn monney coamrey urree as ish blakey orrym dy kinjagh! Agh cha dug mee geill j'ee. Va Illiam er n'akin dy row yn uinnag foslit, as dooyrt eh: "T'ee hene goaill dty howse wooinney! Nar jean red erbee dy villey y chooish!
Cha lheah's hie mee ersooyl veih shen, va'n uinnag dooint, agh va mee er n'yannoo yn red cairagh, er lhiam, son moghrey laa ny vairagh, cha lheah's va mee n'ghoaill toshiaght dy yiarrey yn 'eill va'n uunnag foshlit reesht as va'n ven flah ee hene ayns shen kiongoyrt rhym, ny soie er boayrd-screeuee y chleragh. Cha 'saym cre cha foddey yeeagh shin er y cheilley, sooill ry hooill, as v'ee jeeaghyn orrym rea as dy jeeragh, gyn daanys erbee. Cha s'ayms cre honnick ish, agh va ghraih aym er shen honnick mish!
Va mee hannah er n'akin dy row ee aeg as bwoyagh (hoght bleeaney jeig myr hooar mee magh ny s'anmey) agh nish ghow mee stiagh dagh ooilley nhee mychione eck. Cha row e crackan dorraghey er chor erbee, agh bane wuigh slayntoil. Va'n folt eck cha doo as y feeagh mooar, as va e sooillyn doo neesht as lane y vree, e beill beg as cha jiarg as y cheirn ta gaase ayns sleityn Vannin. Cha row jesheen ny cliejeen ry akin urree, cha row eer fainey er e mair as cha row feme ecksh er y lhied, v'ee cha bwoyagh nyn'gooish. Son ooilley, v'ee ny chaillin, oor, follan as dooghyssagh. Myr by chair eh v'ish y chied 'er dy loayrt. Va'n coraa eck rea as beggan injil myr dooyrt ee "Failt Hiarn". "Failt," dreggyr mish. "Cre'n naight?" vrie ee eisht, as dooyrt mish, myr by chliaghtey daue gra "Naight vie!" She myr shen t'ad goaill toshiaght dy loayrt, cha nel ad gra, "Kys ta shiu", myr ta shinyn gra.
Cha lheah's va mee er loayrt, chroymm ish e kione derrey v'ee jeeaghyn er y voayrd, as dooyrt ee, red beg ny s'troshey, "Cre ta Chiarn jannoo?'' "Giarrey feill ayns meeryn beggey dy yannoo 'curry', ' dooyrt mee. "Cre'n sorch d'eill t'ee?" vrie ee jeem. "Feill vart," as mish. "Cha nee feill vuc ee Hiarn?" dooyrt ee, craplaghey e stroin veg, as feoh dowin ayns e coraa. "Cha nee, feill vart,'' dreggyr mish. Ghow ee toshiaght dy vriaght jeem mychione y bee va shin gee er y lhong, as ren mee mie dy liooar maree er lhiam, fakin dy row ny enmyn ayns Malayu aym son dagh ooilley nhee va shin gee, as hoig mee ee tra vrie ee jeem mychione ny cheeraghyn va shin er ve ayn roish my daink shin gys Java, agh tra vrie ish, "Cre gollrish ta'n cheer Shapaan, Hiarn?" va mee bunnys ec kione my cheeaylley er y fa dy row y Malayu aym bunnys ooilley jeant! Son y traa shoh myrgeddin, va'n 'eill ooilley er ny yiarrey as b'egin dou goaill toshiaght er obbyr elley, as cha lheah's hie mee ersooyl va'n uinnag eck dooint reesht!
She myr shen v'eh derrey'n laa s'jerree eck er y lhong tra va shin ny lhie cheumooie jeh Jeddah. Cha lheah's haink mish faggys da'n chamyr eck, doshil ish yn uinnag as cha lheah's hie mee ersooyl, ghooin ee reesht ee! Cheayll mee fer ennagh cheet ny keayrtyn as hug mee raaue j'ee lesh my hooillyn, as chelleeragh ghooin ee yn uinnag!
Un laa haink Illiam shagh'ain choud's va shin coloayrt as hie eh roish stiagh 'sy chamyr choagyree as hass eh ayns shen lane thanvaanit lesh shen v'eh er n'akin, e hooillyn as e veeal feayn-foshlit jeeaghyn orrin. "Cha nel mee er n'akin y lhied shen roie ayns ooilley ny bleeantyn ta mee er ve shiaulley 'sy Niar," as eshyn. "Tra honnick mee uss as ish coloayrt ayns shen gollrish daa henn charrey, ren mee bunnys tuittym er y lout! Car ooilley ny bleeantyn ta mee er ve shiaulley voish ny hInjyn gys Jeddah, cha geayll mee rieau ben jeh'n chynney ocsyn loayrt rish fer erbee jeh n skimmee ain ny eer troggal e sooilleyn rish fer erbee elley er y lhong! Myr ta mee er n'insh dhyt hannah, t'ad freayll ad hene dauesyn hene, as dy beagh fer jeh'n skimmee jeeaghyn orroo veagh skynn 'sy ghreeym echey dy tappee! Cre'n aght ghow eh toshiaght?
Dinsh mee yn clane skeeal da, as ec y jerrey, dooyrt mee, "Cha nee myr joarree, ish dou, shynney lhiam ee, as ta mee gennaghtyn dy vel shin er ve nyn gaarjyn ooilley nyn mea!"
Jeh un red va mee shickyr. Cha ren ish rieau loayrt rish dooinney bane roish y traa loayr ee rhym. Ayns thie e hayrey veagh ny mraane freilt fo dy chionn ayns shamyryn beaghee oc hene. Dy begin ayns graih r'ee, veagh y chooish caillt roish my yinnagh ee goaill toshiaght! V'eh orrym eisht, dy yarrood my ven flah Yavanagh as dy hannaghtyn myr va mee dy kinjagh, coagyrey er lhong vree shiaulley mygeayrt y theihll!