Kegeesh er dy henney 'sy cholloo shoh dimraa mee braar ayrey da my ven enmyssit Illiam y Kaye, dooinney ooasle as kenjal hooar baase mee er dy henney. Rish shey bleeaney va mee gobbragh 'sy cheer cheddin as eshyn. Ec y traa shen. va'n cheer enmyssit Yn Rhodeish Hwoaie, agh nish, erreish da seyrsnys ve currit daue t'ee enmyssit Yn Sambia.

Ayns Toshiaght Arree 1956 dettyl mee ersooyl voish Ellan my ghooie gys y cheer yoarree shid. Laa feayr sniaghtee v'eh as daa laa lurg shen va mee gollish ayns Aerphurt Livingstone as giu lhune feayr ec y voayrd coontee 'syn aerphurt as, myr yiarragh Ned Maddrell, "Yn ollish roie sheese clash my hoyn." Va mee dy jarroo my yoarree ayns cheer yoarree, bunnys queig thousane meeilley voish Ellan My Chree, my lomarcan as gyn monney argid ayns my wallad as my ven faagit my yei ayns y thie v'er mayl ain ayns Kione Droghad.

Hie mee ersooyl er y fa nagh row obbyr chooie erbee ry-gheddyn ayns Mannin ec y traa shen as va ny smoo na thousane deiney 'syn Ellan er y chooney-ashoonagh. Va ny deiney ass obbyr cliaghtey shooyl trooid Doolish ayns famman mooar as cowraghyn oc as scruit orroo "Ta shin laccal obbyr." Cha dod mish jannoo y lhied as va mee skee jeh'n aght va dagh ooilley staartey lhieent. Va mee myrgeddin laccal shilley elley jeh'n theihll vooar cheumooie jeh'n Europey. Va mee hannah er cheau kuse dy vleeantyn 'syn Injey as va reddyn feer voal dy jarroo ayns Mannin.

Va'n Ghaelg ayns stayd atchimagh as ny loayreyderyn dooghyssagh ooilley geddyn baase nane lurg nane as cha row agh mysh shiaght deiney aegey gollrhym pene er mayrn as Gaelg flaaoil oc. Cha row reddyn ayns cooish ny Gaelgey myr t'ad laa jiu. Va'n Cheshaght Ghailckagh meeiteil ayns Straid Walpole Doolish, as, myr dooyrt Bernard y Caine ec y chaglym bleeaney shoh chaie, yiarragh y tashteyder, "Ta blein feer speeideilagh er ve ain nurree: Ta 4.16.3 ain ayns Banc Ellan Vannin." Erreish da shoh veagh ram bass voylley ayn. Yiarragh fer-oik ennagh elley ny Sheshaght, "Ta blein dy niartaghey feagh er ve ain". Tooilley bass-voylley, as eisht ragh dagh ooilley ghooinney gys e hie hene as gennalys ayns e chree.

Dy yannoo skeeal giare jeh skeeal liauyr va paart dy ghrogh-aigh er ve orrym pene as cragh er mooin cragh haink orrym ny yei, as va mee faagit gyn ping ruy ayns my phoagey as deeassee mee argid voish carrey mooar dou as ersooyl lhiam gys y chronk glass foddey jeh enmyssit Yn Africkey.

Cha nel arrys rieau er ve aym dy jagh mee da'n cheer shid. Ta'n Africkey ny mooar-rheynn feer suimoil as aalin as tra haink my ven dy chummal marym mysh shey meeghyn erreish da'n traa rosh mish Yn Africkey huitt ee ayns graih rish y cheer myrgeddin as cheau shin shey bleeantyn maynrey cooidjagh ayns shen, bleeantyn nagh jeanmayd dy bragh jarrood as orroosyn ta shin dy mennick jeeaghyn er ash lesh taitnys. Er my hon pene ta mee jeeaghyn er ash foddey ny s'menkey tra ta mee tayn y faill aym nish ayns Mannin, fakin dy vel mee cosney y faill cheddin nish as va mee queig bleeaney jeig er dy henney ersooyl ayns eebyrtys! Agh haink seyrsnys da'n cheer va mee gobbragh ayn as va mee eignit dy ynsaghey ooilley ny v'ayms mychione yn staartey aym da ny deiney doo dooghyssagh va keayrt dy row gobbragh foym as cha row obbyr erbee faagit da dooinney bane ny yei shen. Myrgeddin va mee, erreish da shey bleeaney, goaill foddeeaght ny yei Ellan Vannin reesht as ayns Mee Ny Boaldyn 1962 hrog shin orrin as ren shin lesh Mannin reesht.

Er y laa shen dimraa mee ec y toshiaght tra va mee giu lhune feayr ayns Aerphurt Livingstone va mee skee as tooillit erskyn insh lurg yn jurnaa trooid y speyr as va mee bunnys er troggloo tra rosh mee Livingstone. Ta Livingstone feer injil heese ayns glion yn awin Sambesi as she boayl feer cheh t'ayn dy jarroo. Ta'n chooid elley ny cheerey mysh kiare thousane trie erskyn ny marrey as foddey share dy vaghey ayn. Yn fastyr shen hie mee er etlan elley gys Salisbury, ard-valley ny cheerey ec y traa shen, raad va braar my ayrey ayn dy veeiteil mee ec yn aerphurt. By whaagh eh clashtyn coraa Manninagh geam magh ec yn aerphurt ayns Gaelg "Kanys t'ou Bhoy?" Va paart dy Ghaelg ec my naim as v'eshyn gobbragh ayns Salisbury rish tree bleeaney jeig. Va daa naim aym eisht, 'sy cheer shid braar my ayrey as Illiam y Kaye, eshyn dimraa mee heose.

Cheau mee yn oie marish my naim as lught-thie as moghrey laa ny mairagh hug ad lhieu mee dys thie cubbyl Manninagh voish Purt ny Hinshey. Va'n sliennoo oc Crellin. Ec y traa shen va Salisbury lung-lane dy ghleashtanyn mooarey Americaanagh as gleashyanyn deyr Sostynagh. Yinnagh oc fakin seyir-thie ny masoonagh goll gys yn staartey echey ayns Jaguar mooar as ny greienyn as jeshaghtyn echey ceaut er y toieag yerree. Faagail Mannin voght ec y traa shen myr ren mish, v'eh gollrish goll gys cheu elley ny heayst!

Hannee mee rish shiaghtin marish my 'ir vooinjerey ayns Salisbury ayns slyst y valley enmyssit "Mabelreign". Va'n boayl shen keayrt dy row lesh Manninee as va enmyn Manninagh er paart jeh ny straaidyn. Va boayl mooar eirinagh oc neesht enmyssit "Ellan Vannin", bunnys cha mooar as Mannin hene.

Daag mee y voayl shen as hie mee er y varroose my hwoaie dys ny meainyn coobyr queig keead meeilley ersooyl raad va Illiam y Kaye gobbragh er yn eaghtyr. Va mish shirrey obbyr fo-halloo as fy yerrey hooar mee ee erreish da goll er ash dy scoill rish nuy meeghyn dy ynsaghey mychione meaineydys as bleaystey as poodyr as ram reddyn elley.

Va'n turrys my hwoaie feer huimoil kiart ny hrooid yn 'bush' lane dy veiyn feie. Myr t'eh scruit 'sy Vible cheayll me yn lion buirrooghey. Tra rosh mee yn meain raad va "Naim Illiam" gobbragh, va mee slane rooisht argid, as, agh son eshyn as e chaarjyn veign er ve "er y skeerey" myr yiarragh ny shenn Vanninee!

By ghoillee eh dy gheddyn obbyr ayns ny meainyn ec y traa shen er y fa dy row ram argid ry-gheddyn as va deiney ass dagh ooilley heer fo'n ghrian rouail mygeayrt voish meain dy veain, shirrey staartaghyn. Hooar mee obbyr fy-yerrey as va mee currit da'n scoill reesht, fo-halloo, raad dynsee mee mooarane goaill stiagh chengey ny mayreyny deiney doo, chengey ta foast ayms dy bollagh, chengey ta mee cha flaaoil ayn as ta mee 'sy Ghaelg ain. Cha dod shin jannoo nyn obbyr fegooish y ghlare shen, er y fa nagh row Baarle erbee ec ny deiney doo. Dy jarroo va ram chengaghyn goll mygeayrt y moom as bwooise da Jee, va rieau gioot aym son chengaghyn as ny keayrtyn veign loayrt ass queig chengaghyn ayns un oor heese y veain! Hoshiaght va mee cur ram Gaelg mastey ny chengaghyn shen! Ayns ynnyd jeh gra, "Ine 'ndaba wena enza lo?" yinnin geam magh da fer doo, "Cre'n fa t'ou jannoo shen?" as yinnagh eh blakey orrym goaill yindys er shen va mee gra rish!

Ta ny deiney doo feer 'skeetagh' myr yiarragh ny Manninee as by haittin lhieu cosney fys mychione dagh ooilley ghooinney bane, raad t'eh cheet voish, yn ennym echey as dagh ooilley nhee fod ad feddyn magh. Keayrt dy row va daa Ghaelgeyr Albinagh gobbragh marym, daa ghuilley voish Ard Nave ayns Ellan Eeley. Va'n ennym oc Mac Eachern. Loayragh shin 'sy Ghaelg dy mennick as veagh ny guillyn doo goaill ard-yindys dy chlashtyn shin. Va fys oc dy row eh ghlare feer yoarree, as ny s'anmey harragh ad hym, gra "Bwana, ine lo mashobo ka wena na ma-bwana lapa. Ine lo chalo wena kaluma?" (Hiarn, jeh cre'n kynney ta shiuish as ny chiarnyn elley cre'n chengey ta shiu loayrt ry-cheilley?"). By ghoillee eh dy jarroo dy chur baght daue er Ellan Vannin as Ellan Eeley! Cha jinnagh ad cred]al er chor erbee dy row chengaghyn elley ayns Goal Vooar agh y Vaarle! Cha jinnagh ad credjal dy row yn seihll runt. Smooinee ad dy row grian noa girree gagh laa as eayst noa gagh vee as yn shenn ghrian as yn shenn eayst er nyn stroie boayl ennagh raad va "Lesa" cummal. Va "Lesa" yn ennym oc er Jee. V'ad credjal myrgeddin dy row awin vooar roie neese ny hrooid ooilley'n Africkey voish Lunnin as cha dod ad toiggal yn faarkey, ny rio, ny sniaghtey edyr. Tra va enney ny share oc orrym v'ad gra rhym dy row mee ny vreageyder fuilltagh son ginsh daue skeeallyn myr shen. Foddee dy row mee far enmyssit "Breagagh" oc! Va far-ennym er dagh ooilley ghooinney bane as va'n far-ennym ayms "Kabemba" ta shen dy ghra, "Eshyn as tushtey echey jeh'n ghlare ain", er y fa dy row mee feer flaaoil 'sy chengey oc er y fa dy ren mee studeyrys dowin urree as er y fa dy row mee sheer vriaght son focklyn nagh bione da'n chooid smoo jeh my cho-obbreeyn, adsyn nagh row wheesh dy huim oc er chengaghyn as v'ayms.

Ayns ny pabyryn naight ta shiu lhaih ram boghtynid mychione "apartheid" as y lhied as yn drogh-ghellal ta ny deiney doo geddyn voish ny deiney baney 'syn Africkey. Ta me goaill rish dy vel ny Hollanee 'syn Africkey Yiass feer chreoi er ny deiney doo agh raad va mish gobbraghey va shin ooilley feer choardit as va ram caarjyn aym mastey feallagh doo dooghyssagh ny cheerey. Va shin gobbragh ry-cheilley fo-halloo ayns danjeyr as dorraghys as ny smoo na un cheayrt ta mee er nakin fer doo cur sheese e vioys son fer bane, as fer bane cur sheese e vioys son fer doo. Son shen as ooilley va charvaal mooar eddyr ny kynneeyn er y fa dy vel ny deiney doo foast cheet magh ass yn eash-chloaie as ta shinyn er chur daue chellveeish as gleashtanyn as jough lajer as cha s'oc cre dy yannoo lesh ny reddyn shoh, ooilley currit daue ayns jeih blein as tree feed.

Myr screeu mee, va'n obbyr fo-halloo feer ghanjeyragh as doccaragh ny keayrtyn. Tra ta mee fakin er y chellveeish nish dy vel ny meaineyderyn ayns Goal Vooar shirrey 100 'sy chiaghtin cha nel mee mooaraghey shen dauesyn er chor erbee. T'ad toilliu shen as ny smoo. Cha nel mish ny mast' ocsyn ta gaccan tra ta'n leagh jeh sack dy gheayl goll er ardjaghey. Cha beagh monney j'in arryltagh dy yannoo yn staartey oc as er my hon hene cha raghin sheese ayns meain nish son queig keead punt 'sy chiaghtin! By liooar dou ny shey bleeantyn va mee ec yn obbyr shen. Va mee gobbragh mysh kiare thousane trie fo eaghtyr y thallooin ayns dorraghys doo, jeh'n lhied nagh nione diuish ta gobbragh er ooir aalin Yee. Va shin thiolley as bleaystey gagh laa as er y fa shen cha nel yn clashtyn aym cha mie as oddagh eh ve agh er lhiam dy vel my scowanyn kiart dy liooar. Ta mee er n'akin shenn veaineyderyn as ny scowanyn oc slane stroit lesh joan-creggey. Dy mennick va shin eignit dy obbraghey rish daa oor yeig 'sy laa ny daa oor yeig 'syn oie as ny keayrtyn shiaght laghyn 'sy chiaghtin.

Keayrt dy row va ooilley ny traenyn fo-halloo fo my churrym. Un oie huitt tunneyder (tunnel) stiagh orrin agh ren shin scapail lesh nyn mioys, bwooise da Jee. Keayrt elley va mee gobbragh heese ec bun slogh (shaft) as gheayrt queig millioon galloon d'ushtey neose orrym pene as er tree deiney doo. Reeshtagh ren shin scapail agh va daa ghooinney doo elley gobbragh faggys dooin as vaih ad 'syn ushtey. Kegeesh ny lurg shen hooar shin nyn girp tra va'n ushtey pumpit magh. By liooar shen dooys fo-halloo. Hooar mee staartey er yn eaghtyr ayns rheynn elley jeh'n cholught as cheau mee my hraa jerrinagh 'syn Africkey ayns y Thie-sheelee (refinery) raad va shin glenney y coobyr as aa-ghlenney eh reesht lesh electolysis derrey v'eh 99% glen.

Ta shenn raa 'sy Ghaelg, "Raad ta chionnal erbee ayn yiow shiu Manninagh" as dy jarroo va Manninagh ny ghaa gobbragh marym agh cha ren mee faikin monney jeu edyr. Ta troor jeu nish baghey ayns Mannin as ta mee fakin ad ny keayrtyn as ta shin loayrt ass y ghlare "Cibemba" ry-cheilley. Yn chied keayrt hie mee fo-halloo ayns caaidje va mee fo currym Freddie Clague, Manninagh ruggit as troggit ayrs Doolish. Cha dod ny Boeryn toiggal yn fockle "yessir" va shin jannoo ymmyd jeh! Un ole v'eh orrym dy gholl stiagh ayns shamyr vooar fo-halloo raad va ny greienyn mooarey pumpal ushtey magh ass y veain as va n ard 'er ayns shid ny Vanninagh voish Doolish enmyssit Hotchkiss, mooinjer dauesyn as thie-aaght oc er Shooylaghan Ghoolish. V'eh feer cheh 'sy voayl shen as dooyrt eh rhym dy beagh eh yindyssagh dy ennaghtyn paart dy "cooth" voish Ellan Vannin. Cha row monney "cooth" fo-halloo 'sy veain edyr!

Va nv deiney doo credjal dy bollagh ayns scanjoonyn as spyrrydyn as va ram buill fo-halloo raad nagh ragh ad er cor erbee, eer dy beagh ad ceaut magh ass nyn staa taghyn son gobbal dy gholl stiagh ayndoo. Ny keayrtyn v'eh orrym d'aagail ad my yei as goll roym my lomarcan as adsyn foaddey aile dy reayll ersooyl ny drogh spyrrydyn. Tra harrin er ash yiarrin roo dy vaik mee ram scanjoonyn as yinnagh ad roie gollrish yn jouyll hene dy chosney ersooyl voish y voayl neuluckee shen.

Ta shin lhaih mooarane ayns ny pabyryn naight ny laghyn shoh mychione "Apartheid" myr screeu mee, (Cha nod sleih ayns Goal gra y fockle dy kiart -- t'ad gra "apart-hide" agh ta'n fockley-magh kiart "apart-hate". Screeu ommidan ennagh keayrt dy row dy vel shoh er yn oyr dy vel ny kynneeyn cur feoh er y cheilley as adsyn scarrit!). Raad va mish gobbraghey cha row "apartheid" ayn agh cha row ny kynneeyn goll mygeayrt monney ry-cheilley agh son yn traa v'ad gobbraghey. Ta ny deiney doo feer voyrnagh ass y chynney ocsyn as ta ram j'eu smooinaghtyn nagh vel ny kynneeyn baney feeu son veg. Cha nel adsyn shirrey co-phoosey marish feallagh baney er chor erbee, chamoo ta'n feallagh baney laccal y lhied. Tra t'ou smooinaghtyn er, cha nel shin fakin ny foillanyn as ny troghanyn troggal nyn idd 'syn un voayl ayns Mannin. Hie yn chied dooinney bane gys Yn Sambia mysh jeih blein as kiare feed er dy henney as ec y tra shen va ny deiney doo slane barbaragh as dewil as kuse j'eu creck yn sleih oc hene da ny Arabee myr sleabyn. Cha row fys oc er y wheeyl as v'ad feer neuynsit. Keayrt dy row va dooinney ennagh ayns Lambarene 'sy Chongo Belge lesh shilley er Dr. Albert Schweitzer. Dooyrt y joarree, "Ta shiu dty ghooinney Chreestee, ta shiu credjal ayns Jee as er y fa shen cre'n fa nagh vel shiu credjal dy vel ny deiney doo ooilley nyn mraaraghyn diu hene -- ta un Jee as ayr jeh ooilley. " Dreggyr Schweitzer, ard-sushtallagh as fer-lhee, huc ooilley e vioys da'n feallagh doo, "Ta shiu dy jarroo kiart as ta'n dooinney doo my vraar gyn ourys, agh - he is my younger brother by many centuries". Er lhiam dy vel shen ansoor feer chooie as dy row yn irriney echey. Ayns Yn Africkey Yiass hene (yn phoblaght) ta'n apartheid feer eajee. Ta mee er n'akin binkyn ayns ny pairkyn ayns Johannesburg as ny focklyn BLANKES ALEEN - WHITES ONLY scruit orroo as harrish dorrys Offish Yn Phost hee shiu er ny screeu NATURELLE - NATIVES. Ta ny Boeryn credjal dy vel yn feallagh doo sluight jeh Ham, mac Noah, eshyn ren fakin e ayr rooisht, "As honnick Ham ayr Chanaan nearey e ayrey as dinsh eh shoh da e ghaa vraar v'er cheumooie jeh'n chabbane, as ghooisht Noah lurg y feeyn as dooyrt eh, Cursit vees Canaan, sharvaant dy harvaantyn vees eh da e vraaraghyn." Ta'n agglish Hollanagh 'syn Africkey Yiass credjal shoh as t'ee gynsaghey shoh 'sy cheeill as ta ny Boeryn gra, "Nagh vel eh scruit ayns goo Yee dy vel Mec Ham dy ve nyn harvaantyn dooin?" Ta shen y bun jeh "apartheid". Ta ram reddyn olk er ve jeant 'sy theihll shoh ayns ennym craueeaght, s'olk lhiam gra.

Cha nel ny Boeryn coontey monney jeh ny Sostynee er y fa dy ren ny Sostynee nyn gooid share dy stroie chengey ny mayrey oc as dy reayll ad fo-chosh tra va pooar ec ny Sostynee harrish ooilley Yn Africkey. Va'n cloan oc custhit 'sy scoill son loayrt Afrikaans as va ny cheid "campyn concentration" currit er bun liorish Goal Vooar 'sy Chaggey Boeragh. Ta ny deiney doo cur ammys mooar da ny Boeryn ga nagh vel graih oc orroo as t'ad cur graih da ny Sostynee er y fa nagh vel ad creoi orroo agh cha nel ad cur ammys erbee daue! S'quaagh eh nagh vel? Dooyrt fer doo rhym keayrt dy row 'sy ghlare echey hene "We like you because you are nice to us but we don't respect you." Va shinyn ny keayrtyn feer chreoi orroo fo-halloo son v'ad jannoo reddyn feer ghanjeyragh gyn yss daue hene. T'ad gollrish paitchyn oney.

Cha nel ny Sostynee 'syn Africkey Yiass coontey monney jeh ny Boeryn edyr, as ta sheshaght-folliaghtagh oc enmyssit "Mec Hostyn", sorch dy heshaght quasi-vasoonagh as tree keimyn ayn. She voish yn sheshaght shen dy daink yn eie hym dy chur er bun "Mec Vannin", red ren mee tra haink mee er ash dy valley 'sy vlein 1962. Agh cha nel tree keimyn ayns Mec Vannin as er lhiam nagh vel "ritual" oc foast! Veagh eh yindyssagh dy akin nyn garrey veen Lewis y Crellin lhiggey stiagh sleih da'n cheshaght gynsaghey daue greim laue as focklyn folliaghtagh as y lhied.

Oddin screeu lioar mychione my laghyn 'syn Africkey, laghyn maynrey nagh jeanym dy bragh jarrood as foddee dy jeanym shen laa ennagh. Tra hie mee da'n cheer shen cha row eh dy mie er enn da sleih 'sy cheer ain hene as tra dinsh mee da my chaarjyn dy row mee son goll gys Kitwe dy obbraghey dooyrt ad, "C'raad ayns niurin ta shen?" Nish ta shin clashtyn mychione yn Africkey bunnys dagh ooilley laa er y chellveeish. Ta skeeal liauyr foast ry-heet ass "Yn Mooar-Rheynn Ghoo" foastagh as er lhiam pene dy jean ny Communee geddyn greim mooar er yn sleih ayns shen. Bee ny Boeryn ayns shen derrey laa nyn maaish er y fa nagh vel boayl erbee elley oc dy gholl huggey. Ta armee mooar lajer oc as as armee-aer as lhuingys caggee trean as cha bee ad ceaut magh agh erreish da caggey mooar, foddee caggey mooar eddyr ashoonagh. T'ad credjal dy vel ad baghey sy cheer hug Jee daue gollrish ny Hewnyn, as cha jean ad livrey seose y cheer shid derrey vees yn dooinney jerrinagh ny lhie marroo er y veldt as e ven as cloan nyn lhie marishyn.

Cre'n erree hig orroo ayns Cheer Ny Greiney -- quoi ec ta fys?



BREAGAGH .
1977.