MARRINYS FEEAGH ODIN


Er ny screeu liorish SHORYS CRAYL
oltey jeh'n skimmee



CHA ren mee rieau screeu monney ass y Ghaelg roie ry-hoi soilshaghey magh ayns pabyr niaght as y lhied, agh neeym my chooid share nish dy insh diu mychione yn ayrn aym pene ayns marrinys y lhong liauyr "Feeagh Odin" voish Trondheim ayns Norlann dys Purt ny h-inshey ayns Mannin 'sy tourey jeh'n vlein 1979.

Va'n marrinys currit er bun liorish kuse dy Vanninee son dy chowraghey da'n theihll Feailley Thousane Bleeaney Reiltys Vannin, as va'n aigh vie aym dy ve fer jeh'n skimmee.

Va mooarane aarlagh as ynsaghey goll ayns Mannin car y gheuree roish y varrinys son dy reih as teiy fir y skimmee. Begin daue ve follan ayns corp as aigney as ayns slaynt feer vie.

Va shey meeghyn ain roie as shooyl harrish sleityn Vannin, snaue 'sy cheayn as shinyn jiarg-rooisht, brishey yn rio er dubbaghyn, un oarlagh er cheeid va'n rio ny keayrtyn, eisht shooyl ny hrooid as shinyn lane coamrit!

Ommidjagh t'ou dy gra? Well, foddee! Agh b'eeu eh da ny kirp ain ooilley, as v'eh slane feeu dooys hene. Haink y laa greesee tra cheayl mee dy row mee er my reih!

Daag shey jeh'n skimmee son Frederikstad ec jerrey Averil 1979 son dy charraghey y chullee-lhuingey, as, erreish da'n lhunney, son dy phrowal "Feeagh Odin" er yn aarkey, ny, lhisin gra, ayns fjordyn Norlann.

Ansherbee, ghow y marrinys toshiaght er my hon hene as er son kiare deiney elley, er y nuyoo laa Mee Boaldyn. Daag shin Aerphurt Runnysvie er etlan Lunnin, as son shickyrys haink ooilley ny lughtyn thie ain da'n aerphurt marin dy ghra "Bannaght Lhieu". Va shin fo-raad fy yerrey hoal!

Tra ren shin roshtyn Aerphurt Lunnin va ny sooillyn ayns my chione bunnys lheimmey magh assym tra honnick mee ooilley ny h-etlanyn aynshid, keeadyn jeu voish ooilley mygeayrt y theihll. V'eh er ny insh dou liorish dooinney ennagh dy vel mysh tree feed thousane persoonyn gobbragh da'n aerphurt. Nagh nee thanvaneagh shen?

Ansherbee, hie shin er boayrd skioot-etlan as ersooyl 'sy speyr lesh Loghlyn. Dettyl shin er skyn Stavanger as ny sleityn coodit lesh sniaghtey as ny loghanyn riojit.

Ec Oslo, ard valley Norlann, haink shin nyn quaiyl Odd Borstad as Arne Wiste, jees dy Loghlinee veagh 'sy skimmee marin. Va faasaagyn mooarey orroo as v'ad nyn gheiney choar as gennal. Lurg coonrey puint son kronaghyn va shin goit dys Fredrickstad ayns baroose beg.

Va aaght ain ayns ayrn jeh thie stoyr lesh shamyr aarlee ayn. Chaddil shin er y laare ayns poagaghyn cadlee. Va co-heshaght ain yn oie shen. Diu shin nyn haie dy rhum as ushtey bea ren shin kionnaghey 'sy chapp keesh-heyr. Hie mee dys my poagey cadlee ec tree er y chlag moghrey er giyn.

Laa ny vairagh honnick mee "Feeagh Odin" son y chied cheayrt. Shilley aalin v'ee, daahit gollrish airh as kione y dragan jeant ec David Swinton ny hassoo dy moyrnagh ec e toshiaght. V'ee jeeaghyn niartall.
Va'n skimmee ooilley cooidjagh nish son y chied traa. V'eh feer vie. Va fir y skimmee voish yn Ellan ain, Robin Bigland (Ard-ghooinney), Edard y Kaighin (stuireyder), Brian Cousins, Nigel Woods, Rick Tomlinson, David Eames (arreyderyn) as va fir y skimmee elley, Colin Bowen, Shane Lucas, Richard Young, Mike Ingram as mee hene, Shorys Crayl, as mish voish Balley Keeill Eoin ayns mean Vannin.

Va fir y skimmee Loghlinagh ayn neesht, Odd Borstad, Arne Wiste, Rolf Hansen, Knut Hoff as Knut Skogoy. Lesh dy chooilley pheiagh er boayrd urree, as ny kishtaghyn ain son nyn eaddeeyn, cha row monney reamys dooin er "Feeagh Odin" edyr. Ansherbee, lurg dooin cur bee as ushtey er boayrd, hiauill shin lesh balley enmyssit Horten, as, roshtyn eh, chaddil shin er y cheiy.

Va'n laa er giyn yn laa ruggyr aym as va er chosh ec kiare er y chlag 'sy voghrey as chur shin mooin eaddagh Loghlinagh, bayrnyn-caggee, cliwenyn, shieiyaghyn as reddyn elley myr shen. Va shoh er yn oyr dy row shin son soiagh er baatey ymmyrt enmyssit "Ree Olav" son dy ghoaill ayns cappeeys y captan er son feaysley jeh kuse dy voteilyn d'ushtey bea!

Car y traa va shin ayns Norlann va raanteenys ain liorish Det Norske Creditbank, as va ram reddyn jeant ain er nyn son oc, myr soiaghey er bancyn as goaill sleih ayns cappeeys son dy chosney cronnalys da'n vanc.

Honnick shin ymmodee baljyn, ram sleih as ram reddyn suimoil elley. Veeit shin rish Ree Norlann hene as hie shin lesh shilley er ny thieyn tashtee Kontiki as Gokstad.

Laa dy row va troor j'in cuirrit son dy ghoaill tey marish lught thie Norlannagh. Lurg tey feoilt hug ad yindys orrin liorish taishbyney dooir tarhoilshanyn jeh Ellan Vannin! Va nane jeh ny 'neenyn oc er ve ayns Mannin marish bann scoill. Er yn aght shoh v'ad cur er ash dooin yn oltaghey ocsyn.

Ta'n shiaghtoo laa jeig jeh Mee Boaldyn ny laa feailley mooar da ny Loghlinee -- as cre'n laa v'ayn! Cha naik mee ricau wheesh sleih as bannyn goll mygeayrt. Son shickyrys va shinyn 'syn ard-hooyl neesht, coamrit ayns eaddagh Loghhnagh.

Er lhiam dy vel adsyn jannoo ard 'eailley foddey smoo jeh'n laa shen ta shinyn hene jannoo jeh Laa Tinvaal. Va dy chooilley pheiagh feer ghennal as ram sleih er meshtcy ec kione y laa!

Jelune yn chied laa as feed jeh'n Voaldyn ghow shin y vaatey dys y logh. Ghow shin toshiaght dy reayll arrey er dy chooilley nhee, y shiaull, y croan, ny teaddyn, yn aker, ooilley'n chullee, yn bee, ushtey as myrgeddin ny kishtaghtyn ain. Va shin soie er nyn gishtaghyn tra va shin gymmyrt "Feeagh Odin".

Eisht, tra va'n baatey glennit v'ee troggit er boayrd baatey traghtee mooar son dy ve goit ersooyl dys Trondheim, raad va'n marrinys kiart goaill toshiaght dy gerrid.

Cha row ny kiare laghyn lurg shen ro vie dooin edyr, er y fa dy row feed punt currit da dy choolley oltey jeh'n skimmee as liorish yn argid shoh ynrican begin dooin roshtyn Trondheim er traen.

Va Trondheim bunnys keead meeilley my hwoaie. V'eh orrin dy vaghey rish bunnys shiaghtyn as cha row eh aashagh er chor erbee. Va'n leagh jeh dy chooilley nee scammyltagh. Laa dy row chionnee shin ooylyn, arran as caashey as ren ad costal queig punt.

Va traa dy phaays ain neesht er yn oyr dy row lhune costal punt as daeed ping son pynt! Myr shen va paays mooar orrin!

Va aaght ain ayns scoill, aaght jesh lesh lhiabbaghyn er y laare as ceau-oonlaghyn ayn. Cheau shin y traa niee yn eaddagh ain as goonlaghey shin hene myrgeddyn.

Lurg tree laghlyn rosh "Feeagh Odin" Trondheim. Va shin cubbyl dy laa laadey y vaatey Iesh stoyryn, ushtey, caffee, shugyr, anvroie chirmit, praaseyn, feill volht chirmit, feill vuc chirmit, eeast chirmit as y lhied, ooilley shoh v'eh currit fo lout eaghtyr ny lhong. Cha row monney reamys faagit eisht fo'n lout-eaghtyr.

Haink ny fir-chustym lesh shilley orrin son dy yannoo shickyr nagh row shin son drogh hraghtey red erbee ass y cheer ocsyn.

As cur jee my ner, fy yerrey hoal yn laa mooar shiaullee, yn shiaghtoo laa as feed jeh'n Vee Boaldyn.

Fy yerrey hoal haink yn laa mooar shiaullee, yn shiaghtoo laa as feed jeh'n Vee Boaldyn. Va shin ooilley feer neuaashagh. Va ram sleih ayn. Yeeagh ad orrin as shinyn troggal y shiaull. Hie yn traa shaghey dy moal.

Hug Aspick Trondheim shenn chlagh dooin, ayrn jeh Ardchiamble Nidaros, clagh mysh hoght cheead bleeaney d'eash as jalloo jeh dooinney ny hoie er caair urree. Va'n chlagh shoh son Aspick Sodor as Mannin son eshyn dy chur ee stiagh 'syn ardchiamble noa, Keeill Noo Carmane, ayns Purt ny h-Inshey.

Lurg kuse d'ocklyn liorish Robin Bigland, as eisht yn Aspick, gow shin Arrane Ashoonagh Vannin as eisht hie Feeagh Odin magh ass y phurt as yn chionnal geamagh as goaill arrane nyn yei. Cheayll mee ny s'anmey dy row shoh ooilley ry-chlashtyn bio er Radio Vannin!

Va baatyn dy liooar geiyrt orrin stiagh ayns Fjord Trondheim. Tra va tree meeillaghyn er ny shiaulley ain, haink geiyrt orrin daa vaatey shiaullee elley as shiauill kerrinagh mooarey orroo, baatyn jeh'n sorch cheddin ren ny Shenn Loghlinee ymmyd jeh hoght keead blein er dy henney son goll dys yn eeastagh.

Va ny skimmeeyn feer chorree rooin kyndagh rish y kione dragan as ny shleiyaghyn v'er er vaatey ainyn! Ayns y fjord ocsyn she cowraghey caggee v'ad! Beign dooin goaill neose ny shleiyaghyn as beign dooin coodaghey y kione dragan lesh sac! Eisht va shin lhiggit dy gholl er y varrinys ain ayns shee!

Va lhie ny greiney y fastyr shen yindyssagh, yn ghrian soilshean er ny sleityn as adsyn coamrit ayns sniaghtey. V'eh feer feayr er yn oie, mysh jeih keim fo neunhee as cha row shamyr lhiabbagh ry-akin. Moghey laa er giyn v'eh feer sterrymagh as hie shin er ash lesh y thalloo son dy ghoaill fastee ayns balley beg enmyssit Honningsuag.

Haink bunnys ooilley ny cummaltee lesh shilley orrin. Cha row agh kiare feed j'eu baghey 'sy valley beg hene as va thanvaanys orroo fakin lhong liauyr shiaulley stiagh 'sy phurt veg oc!

Ayns y gheurey t'ad freayll ad hene er mayrn gee eeast chirrym as y lhied. T'ad doont stiagh lesh sniaghtey voish Toshiaght Geuree dys kione Mean Arree.

Daag shin Honningsuag ec lieh oor lurg nuy er y chlag sy voghrey erreish da anjeeal jeh, bagoon as caffee. Va'n emshir ny share nish as ny tonnyn mooarey bunnys ersooyl agh ny s'anmey, laa er gyn, haink eh dy ve feer chayeeagh.

Va shin freayll arrey ayns shayllyn myr ta'n cliaghtey er lhongyn, agh ayns earish gharroo as kay as y lhied va'n skimmee ooilley freayll arrey, dy chooilley ghooinney er chosh as arreydagh, fuirraghtyn dy ve scoltit liorish lhong ooill.

V'eh er ny insh dooin dy vel Mooir Hostyn (Yn Keayn Twoaie myr t'ad gra rish 'sy Vaarle), faarkey feer hrong agh cha vaik shin baatey elley erbee derrey rosh shin ny magheryn ooill.

Va'n jurnaa dys Magheryn Ooill Ninian feer fliugh as feayr. Cha daink y ghrian magh ass ny bodjallyn derrey honnick shin y croan ooill smoo ayns Magher Ooill Ninian. Va'n B.B.C. fuirraghtyn orrin aynshid son dy yannoo fillym jeh Feeagh Odin goll mygeayrt y chroan ooill. V'ad jannoo y fillym voish etlan cassee.

Dooyrt y skimmee rish Edard y Kaighin nagh lhisagh eh goll fo'n aile mooar va cheet magh ass lhiattee y chroan ooill.

Agh hie shin fo, myr ta, as ga dy row lossan ny smoo na keead trie as daeed lostey er nyn skyn as dennee shin y chiass jeh, va shin kiart dy liooar, agh smooinnee mee dy beagh y shiaull goll er lostey. She stiureyder mie va Edard as ny Vanninagh dooie neesht as v'eh ny charrey mie dooys.

Haink baatey beg magh voish y chroan ooill lesh giootyn dooin, arran oor, caashey, feill volt, coca-cola as key riojey. Cha dannee shin ayns shen rish feer foddey. Hie shin er nyn doshiaght lesh Lerwick as lurg laa elley raink shin dys shen.

Va'n laa braew grianagh as cha row fynnyraght dy gheay ayn. Myr shen beign dooin goaill maidjey raue ayns ny laueyn ain as gymmyrt daa veeilley dys y phurt, baatyn beg as y baatey sauailagh mygeayrt y mooin.

Fy yerrey hoal haink fynnyraght, hrog shin y shiaull as hiauill shin dy moal stiagh 'sy phurt, raad va tree thousane ellanagh er y cheiy dy chur failt orrin.

Ayns Ellanyn y Sheltyn t'ad cummal feailley Loghlinagh enmyssit "Up Helly Aa" as t'eh gollrish y feailley Loghlinagh ayns Purt ny h-Inshey, agh t'ad foaddey y vaatey oc as lostey ee.

Mastey y sleih er y cheiy ayns Lerwick va olteynyn jeh Bing Up Helly Aa as va shinyn dy gholl maroo dy ghoaill aaght ayns nyn dhieyn oc.

Va shoh er ny insh dooin liorish Robin Bigland. Va shinyn gra "Robbin y Bobbin" rish myr far ennym, yn ennym t'er y fer ain 'syn arrane "Shelg yn Drean".

Dinsh eh dooin dy ghaghtey shin hene dy mie as dyn dy gheddyn scooyrit!

Va mish goaill aaght ayns thie dooinney enmyssit Jimmy Burgess as y lught thie echey. V'eh ny ghooinney mie as by haittin lesh pynteragh as geddyn scooyrit neesht. Myr shen cha b'eeu eh da Robin ginsh dou dy ghaghtey mee hene!

Yn oie shen va coheshaght currit er nyn son ain as haink olteynyn "Up Helly Aa" as y Meoir as Fir Oik elley da'n choheshaght. Coheshaght vie v'ayn neesht, lesh kiaulleeaght as arraneyn. Va Jimmy as e charrey Violet cloie kiaull er ny bocsyn oc.

Cha row arraneyn Gaelgagh erbee ayn, agh arraneyn myr "The Northern Lights of Old Aberdeen," "Westering Home" as "Blaa ny h-Albin" myr yiarragh shin ayns Gaelg, she arrane noa mychione Nalbin Jamyssagh y fer shen. Ansherbee, she ass y Vaarle ooilley v'ad goaill arrane.

Hie mee mygeayrt yn ellan marish Jimmy as y lught thie echey 'sy ghleashtan echey. Hie shin lesh shilley er y kione ooill ec Sullom Voe. Lurg dou cur shilley er cha noddym agh gra dy vel boggey mooar orrym nagh ren ad troggal y lhied er ny h-Ayryn ayns Mannin.

Hannee shin rish tree laghyn ayns Lerwick as tra v'eh cooie dooin dy ghreashaghey reesht haink ram sleih dy akin shin goll magh ass y phurt as stiagh 'sy Cheyllys. Va baatey Loghlinagh 'sy Cheyllys as va ny troailtee urree craa nyn roiaghyn dooin myr corp as slaynt dooin tra va shin goll lesh Kione Lumburough.

Haink troor dy h-ellanee marin er y yurnaa voish Yn Sheltyn dys Yn Orkaid. Va fer jeu, enmyssit Chalse, ny fiddleyr niartal as bione dou nane jeh ny carryn echey. T'adsyn gra "Daunse Ny Ferrishyn" rish, myr "Car ny Ferrishyn" ain, agh ta shinyn ayns Mannin gra neesht "Arrane Queeyl Nieuee" rish.
Ny s'anmey hug eh dou lioar dy chiaull Orkagh as hug mee dasyn myr coonrey y lioar ain "Kiaull Yn Theay" as bione dasyn shiartanse dy charryn 'sy lioar scanshoil shen ainyn.

Ren eh ceau fliaghey car ooilley y jurnaa dys Kirkwall 'syn Orkaid, as hie shin fo shiaull son y chooid smoo jeh'n thurrys.

Cha nel mee er n'imraa monney foast mychione y lhong liauyr Feeagh Odin ee hene.

Troggit ayns cooyrt-vaatey Vagnar Hansen ayns Elinsgaardskillen, Norlann v'ee jeant jeh darragh as ny treinaghyn yiarn aynjee lhoobit er ash ry-cheilley er yn aght cheddin ren ny shenn Loghlinee thousane blein er dy henney.

T'ee jeih as daeed trie er lhiurid as shey trieghyn jeig er lheead. Ta'n croan daeed trie er yrjid as ta eaghtyr y shiaull daeed trie cherrinagh. Voish boayrd yn ushtey gys y chiouyl ta kiare trieghyn dy lhieh ayn.

Tra v'ee 'syn ushtey as laadit dy slane lesh stoyryn as skimmee, cha row agh feed oarlagh dy seyrvoayrd ayn, agh hie ee harrish ny tonnyn mooarey myr ushag varrey. V'eh gennaghtyn myr dy row ee bio. Tra va shin er yn aarkey vooar v'ee cassey as jeesternee tra dy chooilley tonn goll fo'ee.

Ansherbee! Lhig dou goll back da'n skeeal aym. Tra rosh shin Kirkwall va bastag vooar currit dou, lane dy ghiootyn. Va ushtey bea cappanyn as ymmodee sorch dy vee ayn, as ooilley shoh jeant 'syn Orkaid hene.

Va oasteyr ennagh ayns Kirkwall ren gobbraghey keayrt dy row ayns thie oast ennagh ayns Mannin as ren eh gheddyn stoandey dy lhune Vanninagh currit lesh neese voish Thie Imbyl Okell ayns Doolish, as myr shen, coheshaght elley! Va'n jough Vanninagh blasstyn feer vie dy jarroo!

Ayns y thie oast echey yn oie cheddin va skimmee ayn ass ketch shiaullee ass Ellanyn Ny Geyrragh ("Faroes" 'sy Vaarle). Cha naik mee rieau nyn lhied roie! V'ad lhiemmyragh mygeayrt y chamyr, daunseyn as goaill arrane ass chengey ny mayrey oc hene, yn Faeroish. Va mee sheiltyn dy row eh glare feer whaagh.

Ghow shinyn ass Feeagh Odin arrane reesht arraneyn myr "Queeyl Laksey", "Cur dou yn Leagh Troailt gys Laksey" (Cur dou yn Argid Barroose dys Laksey?), "Ellan Vannin", "O Halloo nyn Ghooie" agh ooilley 'sy Vaarle reesht!

Keayrt elley, va mish abyl dy ghoaill arrane ass y Ghaelg as ghow mee "Ghraih My Chree" "Ushag Veg Ruy" as "Ny Kirree Fo Niaghtey"; ass chengey ny mayrey ain hene.

Tra va dorrys y thie oast doont va shin cuirrit ocsyn dy gholl er boayrd y vaatey oc as hannee shin ayns shen derrey tree er y chlag 'sy voghrey.

Hie shin laa er giyn ayns Feeagh Odin my hwoaie dys ellan veg enmyssit Rousay. Cha ren paart jin coontey monney jeh'n ellan veg shoh myr shen hie shin er ash dy Kirkwall er y vaatey ymmyrt.

Hannee Edard as mee hene marish carrey dasyn, fer enmyssit Bert Grieves. Va shin maroo rish daa laa goaill nyn aash agh beign dooin ve er Rousay reesht ec nuy er y chlag 'sy voghrey son dy hiaulley lesh Ellan Lioas.

Cha row baatey ny assaig ry-gheddyn yn moghrey shen, myr shen hooar Richard Young etlan cassee. Cha dod mee credjal eh! Va Richard rieau feddyn red erbee va feme ain er. Haink yn red dhoo quaagh shoh neose veih Niau sheidey ersooyl dy chooilley nhee va fo.

Tra va shin er roshtyn Rousay va'n skimmee ain ooilley ec y cheiy hannah as ren shinyn tarlheim veih'n etlan cassee faggys da thie obbree partan as hie shin stiagh raad hug ad partan oor dooin son anjeeal. Eisht daag shin Rousay, goll sheese y Cheyllys as ersooyl lhien lesh thie soilshey Sule Skerry.

'Sy vadran hooar shin reayrt-hallooin jeh coose twoaie Ellan Lioas. Doaltattym, ooilley mygeayrt y mooin va perkeeyn lhiemmyragh magh as stiagh 'sy cheayn as hannee ad marin rish tammylt liauyr, cheet gys cheu ny lhong as Edard loaghtey ad er nyn ghreeyminyn! By haittin lesh ny perkeeyn yn screebey-drommey.

By vie lhien ny cretooryn shoh. Cha row monney ain ry-yannoo tra shiaulley er laa braew. By yindyssagh eh myr ta, ny lhie er lout eaghtyr ny lhong as jeeaghyn seose er y shiaull mooar.

Hoshiaght ayns Ellan Lioas, hug shin stiagh er y thalloo ayns baie beg enmyssit Sheshader, dy ghoaill nyn aash as son ghlenney y vaatey. V'ee goaill toshiaght dy hoaral agglagh.

Hie paart j'in er y thalloo dy chadley 'syn 'aiyr. V'eh moghey 'sy voghrey as cha row peiagh erbee ny thie erbee ry-akin.

Mysh nane jeig er y chlag haink pobble dys y traie. Hie shin thie maroo dy chummal seose y chenn cliaghtey Albinagh - giu ushtey bea! Raad erbee dy jagh shin ny lurg shen ayns Ellanyn Sheear ny h-Albin as y cheer vooar hene hooar shin yn chenn chliaghtey shoh. Er lhiam pene dy re cliaghtey mie er bashtal t'ayn.

Fastyr yn laa cheddin va shin ec cheu ny keiy ayns Steornavaie hene, ard valley ny h-Ellanyn. Va piobeyryn ayn dy chur failt orrin as lurg oltaghey liorish fir oik ny purt va shin goit gys thie shenn sleih dy ghoaill aaght raad va ceau oonlaghyn, bee mie as lhiabbaghyn bog.

Va'n chooid smoo dy 'leih va gobbraghey aynshid nyn Gaelgeyryn. Va mee er choyrt lhiam shiartanse dy lioaryn Gaelgagh marym, goaill stiagh "Skeealaght", agh cha row ny Lioasee toiggal monney jeh ny lioaryn kyndagh rish yn anchaslys t'ayn eddyr y lettraghys ainyn as ocsyn, as cha doig mish agh kuse d'ocklyn ayns ny lioaryn oc.

S'bastagh eh dy vel yn anchaslys graney shoh ayn 'sy Gaelg ainyn. Nagh nee ooilley yn un chengey t'ayn bunnys?

Oie dy row va ceilidh cummit er nyn son ain. Tra v'ad daunseyn va'n sleih cassey mygeayrt y laare myr mwyljyn geayee as mish bunnys tuittytm harrish.

Va kiaulleyderyn as arraneyderyn mie agglagh ayn as dy chooilley arrane oc ass Gaelg ny h-Albey. Neeym gra shoh son ny h-Albinee she moyrnagh t'ad ass nyn jengey dooie. Va trimshey mooar orrym faagail Lioas cooyl aym as ny caarjyn va jeant aym aynshid.

Ren shin shiaulley ersooyl ec jeih er y chlag 'syn oie. Tra haink ny Loghlinee va jees jeu scooyrit as beign dooin gymmyrt! Well, cre'n brock v'ayn! Va ny maidjyn raue oc goll seose as sheese ayns ynnyd jeh goll er oaie as er gooyl. Va Robin as Edard jiarg-chorree, as shinyn gearey dooin hene.

Ansherbee, v'eh jarroodit dy lheah as va shin fo raad lesh Ellan Skianagh -- "Harrish y cheayn gys Ellan Skianagh" myr ta'n arrane gra. Cha row eh ro 'oddey derrey honnick shin yn ellan ard-ghooagh hene as hug shin sheese yn aker ayns baie beg elley faggys da Staffin.

Cha row veg ry-akin agh un thie fadaneagh heose er cronk as bayr coon gollrish cassan cairt cheet neose dys y voorey. Va traie chlaghagh ayn.

Haink y B.B.C. nyn guaiyl reesht aynshen son dy heet stiagh marin dys Purtree. Ren Odd coagyrey pohtt mooar dy anvroie dooin ooilley, as ren shoh Iesh arran, caashey as caffee, jannoo shin ooilley magh.

Haink daa ghuilley beg dys y traie as dyllee ad orrin dy heet dy gheddyn ad as ren shin shen. Veagh ad mysh jeih blein d'eash. Haink ad dy chur shilley er y lhong ain as dy chur cuirrey dooin voish yn ard 'er ynsee jeh'n scoill oc dy heet maroo lesh shilley er y scoill, as ren shin neesht.

Va ennym yn 'er ynsee Alan Mac Domhnaill as v'eh fuirraghtyn rhym heose er y vayr coon 'sy ghleashtan echey. Hie mee marish harrish ny cruink sheese coan ennagh, shaghey moaneeyn as fy-jerrey raink shin y scoill veg.

Hooar mee my yinnair aynshen marish ny paitchyn as lurg jinnair ghow ny paitchyn daa arrane Albinagh ass y Ghaelg oc, nane jeu enmyssit "Ellan Ny Keoh" yn far-ennym t'oc er Ellan Skianagh, raad ta ram keoh as fliaghey kinjagh ayn. Hug Alan dou daa phabyr niaght beg enmyssit "Cruisgean", pabyryn Gaelgagh ta goll er clou ayns Ellan Ooist y Twoaie.

Tra raink mee y traie reesht va cheinjean foaddit ec y V.B.C. as v'ad freeghey pronnagyn. Beign da va accrys mooar orroo son v'ad gee pronnagyn dhoo, Iostit ec yn aile.

Va shin daa oor anmagh roshtyn Purtree. Tra hie shin stiagh 'sy phurt hene haink baatey magh ass as dooinney aynjee as fillee beg er, cloie er y Phiob vooar. Son shickrys cha row agh un carr by chooie da dy chloie dooin -- "Harrish y Cheayn dys Ellan Skianagh."

Va'n emshir feer fliugh ayns Purtree myr t'ee dy mennick as va shin bunnys baiht ec y fiiaghey, agh foast er y cheiy va ram sleih fuirraghtyn rooin, fliaghey ny dyn.

Va'n cliaghtey ain dy feddyn thie oast beg jesh dy iu ayn as dy loayrt rish ny h- ellanee, as, cur my ner, hoal aynshid faggys da'n lhong ain va'n thie oast kiart. Scruit er yn oastrick va ny fockleyn shoh, "Tigh Osda a' Chidhe", ennym so-hoiggal da Manninagh as Gaelg echey!

Shimmey yn oie vie va ceaut ain cheusthie jeh. Ta sleih ayn as t'ad gra dy vel ny h-Albinee peajeogagh agh she breag t'ayn. Hooar mish feoiltys mooar voue.

Ec y traa shoh va shinyn, yn skimmee tannaghtyn ayns thie aaght beg as va Gaelg ec ooilley'n sleih va gobbragh ayn. Va jees ayn voish Ellan ny h-Earragh as jees elley voish Ooist as troor voish Ellan Skianagh ee hene.

Va 'nane jeh ny Skianee ny 'neen aeg as folt ruy eck as coraa ny h-ainleyn eck tra v'ee goaill arrane. V'ee ny kiaulleyder ayns Sheshaght Chiaullee Phurtree, ta shen y cheshaght chiaullee Ghaelgagh, ard-ghooagh t'ee er feiy ny cruinney y cheshaght shid. Hooar mee tape voee lesh arraneyn ny h-Ellanyn er, ooilley ass y "Ghaidlig" son shickyrys.

Cheau shin un oie marish y skimmee jeh bastey enmyssit "Goosander". V'ee ny baatey syns Lhuingys Chaggee Choonee Ghoal as v'ee powal meeryn da fovooiraneyn. Va ny deiney shoh ooilley nyn Albinee as nyn gheiney feer chreoi erskyn insh agh ooilley feer choar, myr ta. Ren ad cuirrey shin son dy yannoo co-chloie joostey moghrey laa er giyn.

Haink shin nyn quaiyl er y cheiy. Va daa vaatey beg ayn, yn derrey yeh jeant ass foiee as yn jeh elley ass glonney frauaigagh. Va ny baatyn lhiemmey mygeayrt er yn ushtey myr daa rannag! Hilg shin cooiney as ren shinyn coayl as hooar shin y baatey jeant jeh glonney frauaigagh.

Va jees j'in gymmyrt as fer ennagh ny hassoo ayns toshiaght y vaatey as skeab 'sy Iaue echey. Eisht ren shin gymmyrt dy tappee noi y cheilley as "polt" -- haink y skeab er my chione hene as vrish y skeab (cha row my chione ro vie edyr!).

Ghow y skimmee elley greim er y vastey beg ain as hie ee beeal fo. Agh y nah cheayrt hooar shinyn y baatey share as hooar shin y varriaght as va laue yn eaghtyr ainyn.

V'eh son dy ve yn share ass tree -- seose lesh y cooiney as neose reesht. Shee bannee mee, chaill shin reesht! Ansherbee, va boggey er ny h-ellanee dy akin shin!

Ta shiu ooilley er chlashtyn mychione Feeagh Odin goll beeal fo 'sy Cheyllys eddyr Ellan Skianagh as Raasay.

She munlaa v'ayn as va'n B.B.C. geearree dy yannoo fillym elley jeh Feeagh Odin. Cha row yn cheayn feer gharroo edyr as cha row agh shey jeh'n skimmee aynjee ec y traa, er y fa shen v'ee red beg eddrym.

Ren clabbin teaymagh dy gheay bwoalley y shiaull, as v'ee harrish 'syn ushtey, beeal fo. Ren ooilley'n chullee floadey ersooyl er y tidey. Ghow eh daa oor dy howal y lhong hene er ash dys Purtree as tree laghyn elley dy chymsaghey y jeeyl va jeant ec y chlabbin shen.

Beign dooin pumpal magh yn ushtey v'aynjee as ren shen goaill shin dys jees er y chlagh 'sy voghrey as hie shin dy lhie feer skee y moghrey shen. Va baatyn-eeastee cooney lhien 'sy chooish cur lhieu stoo stiagh, buird lout, kishtaghyn, maidjyn raue as lhied.

Ansherbee, ta ooilley mie ta jannoo jerrey dy mie, myr ta shin gra, as fy-yerrey haink y laa trimshey dy hiaulley reesht as d'aagail ooilley nyn gaarjyn noa er yn ellan aalin shen. Er my hon hene va lane trimshey orrym as jeir ny ghaa ayns my hooillyn fakin Ellan Ny Keoh skellal roish magh ass shilley.

Cha row monney ry-akin er y jurnaa dys Chibbyr Woirrey ayns Ellan Muileagh. Cha vaik shin veg agh y cheayn as y speyr. Nish v'eh yn feedoo laa Mean Souree.

Tra hie shin stiagh 'sy phurt ec Chibbyr Woirrey cha row eie erbee ec peiagh erbee craad dy feddyn ny moaralyn ain. Va shin gymmyrt mygeayrt rish leih oor fuirraghtyn er ny baatey eeastee dy ghleayshaghey as dy arraghey son dy chur reamys dooinyn.

Cha dug shin shilley er agh un boayl ayns Ellan Muileagh. Va shen thie mooar y chiarn hallooin Sostynagh. She thie stoamey t'ayn agh t'eh goll sheese ny lhargagh. Va palchey dy ee as dy iu aynshen as eisht hie shin son skeet mygeayrt y steayd. Cha nel mee shickyr quoid d'acyryn t'ayn agh t'eh feer feer vooar, ro vooar dy ve lesh daa phersoon.

Dy dooghyssagh hooar shin thie oast dooin hene reesht as ayns Chibbyr Woirrey v'eh enmyssit y "Mishnish". Smooinee mee hoshiaght dy row y keeayl jeh 'me now' agh dinsh fer ennagh dou bun yn ennym. She shenn Loghlinish eh son "kemmyrk feeaih" as ta boayl enmyssit 'Mishnish' er cheu hwoaie ny h-ellan.

Va'n nah phurt Yn Oban. Daa oor magh ass Chibbyr Woirrey haink y fliaghey teaumey neose orrin. V'eh doillee dy chadley er boayrd nyn lhong er y fa nagh row monney reamys ayn as myrgeddin cha row shin lowit dy yannoo ymmyd jeh nyn boagaghyn cadlee choud's va shin er y cheayn.

'Sy voghrey va shin shiaulley dy mie as va Odd gaarlaghey anjeeal dooin as jeih oohyn echey ayns panney mooar. Eisht gyn raaue erbee dyllee Edard.

"Neose lesh y shiaull dy tappee" as huitt y shiaull, teaddyn as ooilley neose er Odd, as haink jiarg-chorree er. V'eh lheimmey seose as neose gwee mollaghtyn as cheau eh ny h-oohyn harrish boayrd as adsyn floateil ersooyl er y tidey as ooilley ny guillyn accryssagh jeeaghyn orroo as nyn gib foshlit. Ah well, cha row yn arran as caashey ro olk!

Raink shin Yn Oban as shinyn fliugh reesht! Cha row monney goll er jannoo tra rosh shin y phurt. Ta bun yn 'ockle 'Oban' -- 'Purt' 'sy Ghaelg ainyn. Er slystyn y valley ta cowraghyn as "Failte do'n Obainn" scruit orroo.

Laa ny vairagh va shin jerkal rish sleih voish Mannin cheet dy nyn oltaghey. Va shin jerkal myrgeddin oltaghey y gheddyn voish Cooinseil Ynnydagh Ellan Boaid as Oirr Ny Gaeil. Va shin jeeaghyn roin dy gheddyn shilley jeh caarjyn voish yn ellan ain hene erreish da ymmodee shiaghteeyn ersooyl voee.

Hooar shin oltaghey mie er bashtal agh cha ren eh cheet gy kione dy tappee. Haink dy chooilley pheiagh er ash dys Feeagh Odin as adsyn ooilley lane dy yough. Cha row fer sloo na tree feed persoon er boayrd urree, cosh ry cholbey, lieckan ry lieckan as thoyn ry hoyn!

Ec tree er y chlag 'sy voghtey haink ny meoiryn shee. Smooinnee shin dy row y choheshaght ec kione! Cha row! Haink ny meoiryn shee er boayrd urree, gymmyrkey kishtey dy yough as boteil dy ushtey bea! Cha naik mee rieau y lhied roie!

Tra va'n choheshaght ec kione, ghow meoiryn shee Yn Oban dy chooilley pheiagh dy valley ayns car y phryssoon oc! Va'n car goll slewal mygeayrt ny corneilyn, ny queeyllyn echey screeaghey er y raad, y sollys gorrym er y chlea falleayssagh as y sireen gullal myr dy row ad geiyrt er kimmee er y raad. Cre'n choheshaght v'ayn as cre ny meoiryn shee t'ad shid 'syn Oban!

Laa ny vairagh cha row monney ry-yannoo, Hie shin lesh shilley er Ooig Fingal ayns Ellan Staffa as hie y baatey beg ain stiagh 'syn ooig. Shilley braew v'eh dy ve shickyr.

Laa ny vairagh va shin fo raad reesht lesh Ellan Eeley as erreish da laa liauyr dree as oie liauyr gyn monney goll er va shin cheet stiagh ayns Purt Yn Ellan, ny 'Port Ellan' myr ta'd gra rish 'sy Vaarle.

Woaill shin y cheiy as ren shin scoltey kione y dragan. Hug Eddie yn oardagh kiart "Cum Ushtey" agh cha ren shin cooilleeney dy mie yn oardagh echey as ren shin bwoalley y cheiy dy trome.

Haink ny paitchyn voish y scoill dy ghoaill arrane er nyn son as ren ad kiaulley ass y Ghaelg "Birlinn Ghoraidh Crobhain" ta shen 'sy Ghaelg Vanninagh "Birling Ghorree Chrovan", arrane ta ry-chlashtyn nish dy mennick ayns Mannin er dyn' traa ren Doolish y Karagher eh y hyndaa gys Gaelg Vanninagh. Ta'n arrane shen feer villish as aalin as lane Gaelgagh.

Ta Gorree Crovan hene, keayrt dy row Ree Vannin, oanluckit ayns Ellan Eeley as ta cummaltee Eeley goaill moyrn vooar ass shen. T'eh er ny oanluckey fo clagh vooar ayns jiass yn ellan, cha nee feer foddey ersooyl voish Purt yn Ellan.

Er y raad coon voish Purt Yn Ellan gys Bowe Mooar va'n thie aaght ain ry-gheddyn faggys da Machrie, ny "Machaire" myr ta feallagh Eeley gra rish. 'Sy voayl shen ta magher-golf feer ard-ghooagh as doillee.

Hie shin shaghey moaneeyn mooarey. Cha naik mee rieau wheesh dy voain. Va mooarane smoo ayn na moain erbee ren mee rieau fakin ayns Mannin. Va'n voain shoh bunnys ooilley cour ymmyd thieyn sheelee Eeley.

T'ad jannoo ymmyd jeh'n voain son dy chur bree as blass da'n ushtey bea. Ta ymmodee thieyn sheelee ayns Eeley as hug shin shilley er jees jeu, ec Bowe Mooar as Laphroaig, raad va mooarane sambil nastee currit dooin!

Faggys da'n Ellan Eeley v'eh reaghit dooin dy veeiteil rish y fovooirane H.M.S. Odin. Hie shin magh 'sy vaie fo hiaull agh va kay agglagh ayn as cha row monney ry-akin mygeayrt y moom.

Mysh tree meeillaghyn voish y phurt haink shin magh ass y chay as honnick shin, myr muc varrey vooar, y fovooirane hene. Chiangle shin rish cheu y fovooirane as ghrapp shin er boayrd urree raad dee shin as diu shin marish y chaptan as y skimmee echey.

Va shin fuirraghtyn rish yn etlan cassee b'lesh y V.B.C. agh kyndagh rish y kay v'ayn cha dod eh girree 'syn aer. Agh lurg oor haink yn etlan cassee. Hie eh mygeayrt y mysh y fovooirane goaill filmyn er son chellveeish B.B.C.
Er ash ayns Purt Yn Ellan va ceilidh goll er cummal ayns Thie Oast Machrie. Hug eh yindys mooar orrin tra haink stiagh tree as daeed shiaulteyryn fovooirane voish H.M.S. Odin. Va oie yindyssagh elley ain, lesh kiaull, daunseyn as piobberaght.

Va shinyn coamrit ayns eaddagh Loghlinnagh agh, ec kione ny h'oie va shin ooilley coamrit myr shiaulteyr ny lhuingys Chaggee Reeoil as adsyn ooilley myr shenn Loghlinnee. Ta eaddagh shiaulteyragh aym foast hooar mee yn oie shen!

Va trimshey orrym reesht faagail Ellan Eeley er y fa dy row ee yn ellan jerrinagh va shin son cur shilley er. Lurg Purt Pherick veagh shin jannoo lesh Purt ny h-Inshey as Mannin.

Tra daag shin Port Yn Ellan va paitchyn ayn reesht son dy chur "slane lhieu" dooin liorish arrane agh she "Ellan Vannin ass y Vaarle ghow ad dooin. Smooinee mee dy row eh kenjal jeu dy ynsaghey yn arrane shen dooin. Ghow shinyn arrane maroo neesht.

Hrog y gheay er yn oie as va mish mee hene y stiureyder. Yeeagh mee er my chooyl as va aggle mooar orrym fakin tonnyn mooarey, tree keayrtyn ny s'yrjey na Feeagh Odin geiyrt orrin. Ghow shin tonn vooar harrish cheu ny lhong ren bwoalley y skimmee ooilley er ny thoynyn oc. Raink shin Port Pherick ec kiare er y chlag as va shin shiaght ooryn ro lheah.

Va tree ny kiare baatyn Manninagh 'sy phurt veg. Haink ad nyn guaiyl son dy hiaulley back dys Mannin marin. Hie Richard as mee hene er boayrd baatey enmyssit Gypsy, as ghow shin oohyn as bagoon marish y mainshtyr Alan Boucher. Lurg anjeeal chaddil shin dy mie ayns ny skellooyn cadlee jesh v'ayn.

Shey ooryn ny s'anmey haink cooinseilagh y valley hooin as dooyrt eh, "C'red ta shiuish jannoo aynshoh hannah? Immee-jee magh as tar-jee stiagh reesht!"

Well, lurg oie gharroo gyn monney cadley ain, hie y cooinseilagh son amylt 'syn aarkey bunnys! Agh va'n B.B.C. Iaccal shin dy gholl magh reesht, as myr shen, ren shin. Beign dooin goll.

Tra va shin ayns y vaie honnick shin y baatey Manninagh Ben my Chree, cheet voish Ard Trossan dy Ghoolish. Tra honnick ad Feeagh Odin hyndaa ad y coorse oc dy heet ny sniessey dooin as heid ad y sireen oc.

Haink ooilley ny troailtee gys y cheu hoshtal dy akin shin as myr shen va skew agglagh er y Ven hene gys e cheu hoshtal. Fy yerrey, hie y Ven er e coorse lesh Doolish.

Tra daag shin y phurt son y nah cheayrt cha row peiagh erbee elley ayn agh tra haink shin er ash reesht va ny smoo na thousane dy leih ayn as bann kiaullee as piobberaght neesht.

Ec y traa shoh cha row agh cubbyl dy laa scarrey shinyn voish nyn dhieyn, mraane as paitchyn. Va'n chooid smoo j'in poost. Va trimshey orrin myrgeddin dy row y marrinys bunnys ec kione. Son shen as ooilley va shin imneagh dy roshtyn dy valley Myr shen va'n skimmee gaase red beg neufeagh.

Er y fa shen hug "Robin y Bobbin" lhongey vooar dooin ayns Thie Phurt Pherick, thie aaght stoamey, ard, heose er cronk faggys da'n valley. She sorch dy hibber jerrinagh v'ayn da'n skimmee. Agh traa anveagh v'eh. Va caarjyn jeant ain car y varrinys as caarjyn mastey'n skimmee neesht.

Tra ghow shin toshiaght er y varrinys cha row agh beggan fys ain er y vaatey ny red erbee elley bentyn rish y treealys.

Er lhiam pene dy row startey mie jeant ain shiaulley y vaatey as foddee eer ny smoo scanshoil, cur Ellan Vannin er e toshiaght as soilshaghey magh Feailley Thousane Bleeaney yn reiltys ain.

Myr screeu mee heose 'sy skeeal shoh va mish yn un oltey ynrican jeh'n skimmee as Gaelg Vanninagh echey as myrgeddin cha nel mee agh my studeyr j'ee.

Agh raad erbee dy jagh shin dinsh mee da'n sleih ooilley ny v'aym mychione y Ghaelg Vanninagh as y cultoor er lheh t'ainyn ayns Mannin, er lheh ayns sheeay ny h-Albey. Va foddey smoo caarjyn jeant ayms mastey ny Gaelgeyryn na peiagh erbee elley. Gyn ourys t'ad ny braaraghyn ain.

Ansherbee! ta mee rouailley er shaghryn veih'n skeeal. Shen yn aght lesh ny Manninee. Dy gholl er ash da'n chibber jerrinagh dimraa mee heose -- va palchey dy ee as dy iu ayn, feill vart, praasyn, arran, caashey, berreen, jough-cheyl, lhune, feeyn, ushtey bea, as lurg shibber va shin red beg scooyrit.

Va Robin ny hoie 'sy chaair ec kione y voayrd. Ghow kiare jin greim er as hrog shin eh dy ard er nyn skyn, magh ass y dorrys lesh as cheau shin eh lesh skeoll mooar stiagh 'sy phoyll faarkee. Eisht deiyr shinyn ersyn as shinyn coamrit as ny goaldee blakey orrin lesh nyn meill foshlit.

Haink y reireyder chelleeragh as v'eh garaghtee agh cha nee rish foddey. Ghow jees jeh ny guillyn ain greim er as ren ad roish, faagail ayns laue Arne muinneel e chooat! By liooar she dooin as va shen jerrey yn annymoilid.

Laa ny yeih, 'sy voghrey, ren shin glenney y vaatey. 'Syn astyr beign dooin cliaghtey eh cheet stiagh er y traie. Nagh beagh ooilley Mannin jeeaghyn orrin cheet stiagh ayns Purt ny h-Inshey?

She startey red beg doillee eh, agh lurg tree ooryn dy chliaghtey v'eh jeant ain mie dy liooar. Ren shin ymmyd jeh keayrtee er y chooylaghan as adsyn lhiggey er dy row ad Aspick Vannin as y Kianoort.

Daag shin Purt Pherick ec tree er y chlag 'sy voghrey. Shey ooryn ny s'anmey, ec nuy er y chlag, hooar shin Ellan Vannin ayns reayrtys. Va'n ghrian soilshean as va'n ellan ain hene jeeaghyn dy mie dooin lurg lhied y traa liauyr ersooyl voee.

Lurg tammylt beg haink magh ass Purt ny h-Inshey shiartanse dy baatyn beggey as er boayrd nane jeu va Juan Moss voish Radio Vannin son dy loayrt rish Robin as Edard.

Eisht honnick shin y lhong chaggee reeiol H.M.S. Mohawk as eisht, tra va shin shiaulley dy mie va etlan cassee jeeragh er nyn skyn.

B'lesh Lhuingys Chaggee Reeoil Norlann eh. V'eh jannoo rouyr geay lesh yn rotor echey as y gheay shoh blestal neose orrin as ren y gheay bunnys lhieggey Feeagh Odin as beign dooin goaill neose y shiaull.

Haghyr shoh kiare keayrtyn as va David Eames craa y doarn echey hug yn etlan cassee as v'eh gwee mollaghtyn mynney er y skimmee jeh. Hooar ad y chaghteraght as hie ad ersooyl.

Ec kerroo dys shey er y chlag 'syn astyr va shin faggys da'n traie mastey ymmodee baatyn beggey. Va ram sleih erskyn insh er y traie as er y chashtal as y boalley marrey as y kione thallooin neesht. Va Purt ny h-Inshey er croo lesh sleih as va mooarane feiyr ayn.

Mysh kerroo meeilley voish y traie ghow shin neose y shiaull as hug ny maidjyn raue 'syn ushtey.

"Nish my ghuilleyn vie," as Edard y Kaighin "Ymmyrt-jee dy mie er nonney neeym brebbal ny thoynyn eu!" . . .

Cha nod shiaulteyr erbee goll harrish fockle chaptan echey myr shen ren shin nyn gooid share as woaill shin y traie kiart ec shey er y chlag.

Lheim jees jeh'n skimmee ain stiagh 'syn ushtey as ny akeryn oc as hug ad stiagh 'sy gheinnagh ad. Eisht lheim y chooid elley j'in stiagh 'sy tidey as hooyl shin seose y traie cooidjagh. Va shin dy valley!
Tra raink shin yn Aspick, y Kianoort as e ven doaltattym va sleih ec dy chooilley voayl as shamragyn goll "click" ooilley mygeayrt ain. By haittin lhiam cosney er ash da'n vaatey son dy ymmyrt seose y phurt hene gys Thie Liauyr ny Loghlinee as ny mraane as paitchyn ain fieau orrin aynshid.

Hannee shin aynshen rish tammylt beg agh va shin ooilley imneagh dy gholl thie as, er aght erbee, va marrinys Feeagh Odin ec kione.

Fy-yerrey, she jurnaa mie v'eh voish yn immeeaght ain gys y jerrey. Va ram caarjyn jeant ec yn skimmee ayns ymmodee buill. Cha row monney co-streeu mastey'n skimmee as cha row builley bwoailt as cha row agh kuse veg dy arganeys ayn car ooilley'n traa as shoh ayns baatey beg as shey dooinney jeig er boayrd jingit cooidjagh rish traa liauyr.

Va traaghyn mie as traaghyn sie ain. Son chooid smoo jeh'n traa v'eh feayr as fliugh agh yinnin hene y marrinys reesht. Dynsee shin ooilley ymmodee reddyn mychione y keayn, yn emshir as ny Loghlinee hene. Mychione oc shid cha noddym gra agh dy row ad nyn gheiney creoi agglagh.

As ta shen jerrey yn skeeal. Ta treisht orrym dy vel shiu er n'ghoaill soylley jeh.


SHORYS Y CRAYL.

Mean Fouyir 1980