Diuish ta Gynsaghey y Ghaelg



Er hoh diuish skeeal beg mychione turrys veih Purt ny h'Inshey gys Eary Cushlin (as er-ash). Ny turrysee v'ayn -- my vraar, as mee-hene ayns van faagail Ballawattleworth (Purt ny h'Inshey) Jeheiney Caisht (gagh vlein eddyr 1933 1935). Hie shin sheese gys Purt ny h'Inshey hene, gys Shapp Mnr. Cashin. Va Caesar aarloo, ghow eh stiagh sy van ry-lhiattee my vraar va gimman, as mish red ennagh eddyr soie as lhie cooyl ocsyn -- er sac ennagh s'joghey -- (dy lickly).

Ersooyl lhein eisht son Eary Cushlin, agh fuirree ort, er y raad va Caesar loayrt mychione dy chooilley voayl as dy chooilley nhee.

Goll shaghey'n Raggatt, vel fys euish dy vel "Luss y Steep" gaase heese sy vagher foin? Va'n shenn sleih jannoo ymmyd jeh son "rennet cour caashey y yannoo."

Goll trooid Balley Beg Pherrick! "Ren shiu rieau clashtyn jeh Paie va baghey ayns shoh?" Vrie Caesar jin. "Va cliaghtey eck gra 'MEE HENE, CHA NEL MEE GRA MONNEY', as cha row fea er y chengey eck feiy'n laa, as foddee fud ny h'oie neesht."

"Jeeagh er y vagher shen!" as Caesar, "va kiare magheryn 'sy vagher shen tra va mee my ghuilley aeg; ta foast cowrey ny jees jeh ny shenn chleighee. Ta shoh 'Guadan', ny abbyr rhym 'Gordon'," as Caesar, va lane nagh yiarragh shin (my vraar as mee hene) 'Gordon', agh, myr v'eh dy kinjagh gra, ta'n blass yn red smoo sy chengey.

Nish ta shin goll shaghey 'Raby'. "Cha nel Quirk Raby jeh'n kynney euish." Shaghey café b'lesh Ratlee Karran as e lught-thie, sheese y raad -- as braew ughtagh t'eh dy jarroo. "Shoh Bayr Y Pashadeyr. Yes, Quilliam the Potter."

Nish ta shin drappal seose (she'n van va drappal), va'n greie g'accan as ny keayrtyn sprettal red beg, agh fy-yerrey, hooar shin shilley jeh Ballachrink, as va shen jerrey'n 'drappadeyraght' rish tammylt.

"Ta Delby fo'n raad feer vie da oarn," as Caesar, "agh ta'n ooir hene shirrey 'Trome- Lhiassaghey' - she thalloo joogh t'ayn dy jarroo."

Ta cooinaghtyn as skeealyn taaley magh ass beeal Caesar gyn scuirr. Ren shin scuirr rish tammylt, faggys da kione y vayr lesh y Lhag Ghelby. She reayrt feer aalin ta ry-gheddyn ayns shoh. Yeeagh Caesar er y cheer mygeayrt, as myr v'eh jeeaghyn er ny groink, as nyn ging fud ny bodjalyn beggey va gleashagh dy litcheragh harrysdoo. "Aalid Feie," as Caesar -- "Yes, Wild Beauty." - Va cliaghtey ec Caesar Baarle y chur er y Ghaelg, as cha nyrrys, nagh row eh gobbraghey fud ny skibbyltee boghtey car ny tourey rish bleeantyn er vleeantyn. Va Caesar goaill joaree ayns birlin ass Phurt ny h'Inshey; ny keayrtyn er turrys eeastee, ny turrys-fo hiauill gys Phurt Chiarn as er ash gys Phurt ny h'Inshey.

Nish er ash da nyn durrys; (Craad va shin?). She, faggys da Bayr y Lhag. "Ta'n Niarbyl bunnys ny h'ellan jiu," as Caesar. "Eaisht rhym! ny jean jarrooid y blass kiart er 'Niarbyl!' - 'Nyerr a bul'."

Ersooyl lhein reeshtagh! "Ta lane sooill-vie ry-gheddyn ass reayrt y lhag heese ayns shen. Va ram obbyr goll er sy vagheryn veggey v'ayn heese ayns shen, tra va mee aeg," as Ceasar.

Bee lane fys eu dy nee garroo y bayr ta jannoo lesh Eary Cushlin ec y traa t'ayn, agh myr garroo as t'eh nish, wheesh shen ny s'girroo v'eh ec y traa shen. Cha row eh ro olk da my vraar as Caesar, agh "dum" pene, va mee bunnys marroo, tilgit noon as noal, huggey as veih. kiart goll-rish "Eoineen sy Chishtey" (D.F.C.). Va my chione lieh-brisht noi mullagh y van, as my "deriere', bunnys goll trooid laare y van, ny yeih shen. Va shoh goll er son ooryn (ayns my smooinaght's hene ansherbee). Fy-yerrey, tamain (ta shin) er roshtyn Thie Eary Cushlin. Magh ass y van lhein, lurg da ve er ash ayns cheer ny bioee reesht, nyn lurgaghyn gleashagh myr dy beagh as lhein hene reesht ersooyl lhein lesh Lhag ny Keeilley. Gyn ourys, cha dooar shin sheese dys y cheeill hene, agh cha row shin feer foddey jeh.




J.T.L. QUIRK