Geaishtagh Rish Shenn Sleih


Va mee ruggit ayns thie earoo 12, Straid ny Keilley, Phurt ny h'Inshey 'sy vee mean fouyir, as yn laa s'jerree neesht. Tra va mee red gollrish mee ny jees dy eash, haink my vummig dy ve feer ching. Ghow my warree, as kuse dy nauntyn mish fo nyn gurrym, as va shoh toshiaght my ynsagh ny Gaelgey. S'feer eh dy jarroo, nagh dooar mee agh feer veggan as cha duirree agh feer veggan ayns my chooinaght's, agh ny s'anmey, tra va'n lught-thie ain cheet er ash dys yn ellan son nyn laghyn seyrey dy chooilley hourey, hooar mee tooilley Gaelg ass beeal my warree, foastagh, cha row agh beggan va goit stiagh ayns my chione aeg as bolvaneagh, ny yeih, cha ren mee rieau jarrood red erbee gollrish -- "Craad t'ou goll? Goll dy scoill." Dooyrt my vummig rhym dy row Yn Padjer Y Chiarn ayms ass y Ghaelg, foddey roish va'n lheid aym ass y Vaarle.

Va braar aym, as ta foast shuyr aym, as ec y traa shoh my skeeal; ta shen dy 'ra ec mean y chied chaggey (1916?) hie yn lught-thie ain tessan yn aarkey dys Seaforth (Gladstone Road), agh va dy chooilley laghyn seyrey-souree ceaut ain er yn ellan ayns thie my warree (lhiass vummag my vummag). Va'n thie shoh er chione yn shooylaghan. She "Athol House" va'n ennym er. Er laghyn braewn veagh nyn lught thie mooie er y cheer as reddyn elley myr shen, agh tra va drogh emshyr ayn, va shin sthie, va shen yn traa va my warree cur orrym Gaelg y ynsaghey. Cha ren mee coontey monney jeh'n lheid ec y traa shen, agh nish, tra ta mee goaill baght jeh ny laghyn shen, ta my wooise sheeney magh har ny laghyn as bleeantyn ta er n'oll shaghey, myr smoo ta mee smooinaghtyn orroo, wheesht shen smoo ta my wooise gaase as bishaghey.

Lhig dooin har-lheim y yannoo; foddee dys y vlein 1920. Laa dy row, va mee shooyl er y shooyllaghan Phurt ny h'Inshey, as hie mee shaghey Yn "Weather Glass", cha dug mee monney geil da'n shenn sleih va loayrt eddyr oc hene, derrey cheayll mee my ennym hene, as fer ennagh gra, "Bee yn 'er shen Oe Da John Quirk The Guide." Cha ren mee toiggal agh fockle ny jees v'ad gra, agh foastagh, va ny focklyn v'oc sheean cooie dy liooar dooys. Smooinee mee rhym pene, t'ad loayrt my my-chione agh va mee er chee goll roym reesht D'yllee magh fer jeu er-ard, "Come here guilley beg." Hie mee lesh y vink, as hass mee fenish oc. V'ad ooilley jeeaghyn orrym, as kuse jeu mong orrym red beg. Fy-yerrey, haink sorch dy heeab ass fer ennagh, as dooyrt eh, "Nish ta enney ayd er." Bee lane 'ys eu nagh vel shoh agh cheb er yn loayrtys v'oc, agh myr ta mee screeu shoh nish, ta caslys aym ayns my far-hilley's jeh'n sleih shen nyn soie er y vink shen. Ga nagh row Gaelg dy liooar aym ec y traa shen adsyn y hoiggal, ta mee lane shickyr dy row yn cheb shoh, feer goll-rish bun y chooish v'oc.

Tammylt ny yeih shoh, va mee roie er sorch dy lhiass-chassan jeant dy darragyn mooarey -- v'ad shoh sneimit rish boalley yn stashoon -- huitt mee stiagh sy phurt hene cha d'od mee snaue, agh va dooinney ennagh (er lhiam dy row "Skibbyltagh" v'ayn) cheet my chooyl. Va aigney birragh echey shoh, heen eh magh e vadjey shooyl, as ghow eh greim orrym lesh skorg y vadjey. Hooar eh mee ass yn ushtey, foddee roish my jagh mee fo son yn trass keayrt, ansherbee, ta mee lane shickyr dy ren eshyn mish y hauail. Tra va mee goit magh ass, cha dooyrt mee veg, agh ersooyl lhiam er aght lhiass-etlagh derrey rosh mee thie my warree. Myr va mee roie, va dubbyn beggey dy ushtey lhiggit er y ghrunt, honnick mee ad shoh, agh cha dug mee monney geil daue, agh roie er, as er reeshtagh.
Hie mee stiagh sy thie, as hass mee fenish my warree hene; cha dooyrt mee veg, as rish tammylt beg, cha dooyrt ish veg noadyr. Fy-yerrey, dooyrt ee ass y Ghaelg, "Voght villish veen she baiht t'ou." Ta foast cooiniaghtyn feer vie aym er y laa shen. Va shen y chied Ghaelg caidjyn cheayll mee, as lane toiggal aym urree.

S'cooin lhiam dy mie raaghyn d'ooar mee as beeal my warree, as shoh sampleyr jeu: "Cannys ta shiu? Lane vie gurra mie eu! Cannys ta shiu-hene (said as Cannys teshooeen) and note no intrusive 'D'. Braew braew. Cannys ta shiu hene ?-- ta laa mie ayn jiu!"

Kiart dy liooar, cha nel shen agh feer veggan, reeshtagh ta mee gra, she toshiaght v'ayn. Cooinee jee er yn arrane ta gra, "Ta red beg ny share na follym, ass red beg hig red mooar a.r.e."

Nish by vie lhiam irree ass ny laghyn shen, as screeu sheese kuse dy raaghyn d'ooar mee eddyr ny bleeantyn 1931-1943. D'aag mee yn Scoill Ree Illiam, as va mee gobbraghey er y thalloo, my vraar, my huyr, as mee-hene. Va Ballawattleworth ain er-mayl (1927-1937), as va shoh (ny shen) y traa ghow yn troor jin toshiaght er ynsaghey y Ghaelg. Hie shin gys vrastyl Phurt ny h'Inshey ayns yn chamyr-oik Vainshtyr Y Phurt, bunnys jeeragh er y Thie-Oast Peveril va fo churrym Corny Kaye. Va "Captan Kinla" sorch dy 'urriman, agh va Mnr. Caesar Cashin cummal y vrastyl hene. Va cliaghtey ain lhaih ass y Lioar Casherick (y Vible Casherick), goaill ayrn y pheesh. Choud's va shin va shin lhaih va Caesar arrey y 'reayll er nyn jebyn er dy chooilley 'ockle -- bunnys. Hie shin trooid Yn Chenn Chonnant, as Y Chonnant Noa keayrtyn er cheayrtyn.

Erreish da red goll rish oor, as shinyn ooilley lhaih, harragh sheean quaagh ennagh ass Caesar, as eshyn tayrn y phoib ass phoagey ennagh, thum stiagh poagey elley shirrey foaddan, lesh osney veagh y lioar goll y ghooney. Nish nee "Mnr. Cowlla" goaill y vrastyl lesh y lioar veg yiarg (va'n lioar gorrym). Va Caesar geaishtagh, agh cha row monney echey dy 'ra agh ny keayrtyn skeeal ennagh y insh.

Keayrt dy row, haink yn 'eysht shoh: Cred ta'n aght kiart dy 'ra "Laa"? Vel "Lah" kiart ny "Lae?" Haink freggyrt dy jeeragh ass Caesar "Ta nyn neesht kiart." Cannys ta shen?" Lhissagh e ve "Lah mie", agh Cronk yn Irree Lae. Cha dooyrt eh "Ta lah yn aght ennymagh," as "Lae" yn aght gennidagh ayns ny fockleyn shen, agh ayns y raa hene gyn-ys da. Ny keayrtyn harragh sheeab ass pyagh ennagh sy vrastyl: Cre'n aght kiart dy ra --? Ta yn aght share dy ra shen! Cannys ta shen; t'eh scruit, "S'cummey veg dooys yn aght t'eh scruit. Shen yn aght kiart dy 'ra e."

Tammylt ny yeih shoh, va mee loayrt rish carrey Yernagh aym (ain dy jarroo, son va enney vie ec kuse vooar jin er) enmyssit Oscar Mac Uilis (Willys ) mychione yn agh fockley magh Ghaelg va ec Caesar, as sampleyryn y choyrt da. Va Oscar goaill stiagh dy chooilley 'heean, as bunnys caigney orroo. Lurg tammylt, dooyrt eh, "Freayll greim er dy chooilley 'ockle t'ou er chlashtyn veih'n dooinney shen. Ta ny sheeanyn echey feer chooie dooys t'ad kiart eddyr Yernish as Albinish." Va Oscar feer ard-ynsit ayns Yernish as Albinish as ec y chooid sloo tree chengeyaghyn jeig elley.

Va Garran as Float ain, as va shin goll mygeayrt Phurt ny h'Inshey creck vainney veih thie dy hie. Va Caesar nane jeh ny "Customeyryn" smoo v'ain, son v'e goaill y vainney ry-hoi key riojey y yannoo da'n shapp v'echey -- sy tourey ansherbee -- Ta shoh jerrey my skeeal son y traa t'ayn.

J.T.L.Quirk