Caesar Cashin
Er hoh dhyt ny cooinaghtyn ayms jeh Caesar Cashin, S'feer eh dy jarroo dy row Gaelg
ry- ynsaghey ayns ny brastyllyn va goll er cummal tra va mee aeg ayns Purt ny Hinshey.
By chliaghtey ain son y chooid smoo lhaih ass y Lioar Chasherick agh va caa ain dy
chlashtyn rish blass Caesar hene. 'Sy vlein 1932 hie yn "Kione Doo" (my vraar Walter)
as mee hene as Noreen (my huyr) gys y vrastyl va goll er cummal ec y traa shen ayns
Offish Vainshtyr ny Purt ayns Purt ny Hinshey ayns Straid yn Attey. Hie shin stiagh
as hoie shin sheese as yeeagh mee er dagh oltey y vrastyl as va enney mie ayms er y
chooid smoo j'eu. Ny vud oc va shenn dooinney ennagh as faasaag liauyr lheeah echey
as smooinee mee rhym pene, "Cre'n fa ta'n shenn dooinney shen shirrey Gaelg y ynsaghey
as lhied yn eash ersyn?" Cha dooar mee freggyrt da m'eysht yn oie shen agh hooar mee
eh tammylt beg ny lurg. Quoi v'ayn agh Philly Quayle, yn dooinney ooasle hene, as
eshyn lum-lane dy Gaelg feer vie, agh ghow eh yindys ersyn hene doaltattym nagh dod
eh ee y lhaih er chor erbee! Shoh dooyrt eh rhym pene un oie, "Va mee ronsaghey ayns kishtey
ennagh as hooar mee Bible Ghaelgagh, doshil mee ee as haink fys hym nagh dod mee
ee y lhaih er chor erbee as ta shen y oyr dy daink mee da'n vrastyl." Son shickyrys
cha row eh feer foddey derrey va'n dooinney ooasle lhaih y Ghaelg dy flaaoil! Hie kuse j'in
oie elley dys brastyl ayns thie ennagh elley fo currym Philly as va ymmodee skeealyn
mie ry-chlashtyn ayns shen! Oddagh lioar ve er ny screeu mychione skeealyn Philly.
Va shoh yn ennym hug eh orrinyn dy chur er, as myr shen, bee fys euish dy row anmys
mooar ain ersyn:
Keayrt dy row vrie shin jeh myr shoh, "Kanys t'ou gra 'Go to the Devil' ayns Gaelg.
Dreggyr eh, "If you weren't a gentleman you would say 'Immee gys yn Jouyl'." -- she
shoh yn sorch dy ghooinney v'ayn.
Va Caesar Cashin gyn ourys "Ayr ny Gaelgey" ayns Purt ny Hinshey ayns ny laghyn
shen. Va Gaelg feer vie echey as Gaelg yindyssagh ry-chlashtyn ec y vrastyl echey.
Shegin dou gra, ny yei, dy row Gaelg foddey ny share ry-chlashtyn voish yn moghey
'sy voghrey taaley ass e veeal, tra v'eh skeeabey magh e happ as "Yn Kione Doo" as mee hene
cur y bainney stiagh dasyn.
Va ram shenn raaghyn er ny screeu sheese echeysyn as ymmodee j'eu er nyn screeu
sheese aym pene. Va ram j'eu cooinit echey voish laghyn e aegid. Ta seaghyn mooar
orrym nagh row greie-recortys ayn ayns ny laghyn shid hug Caesar orryms as er my
vraar "Kione Doo" dy screeu sheese yn sheean hene jeh'n Ghaelg echey as cha nee yn aght screeuee
ta ry-geddyn ayns Gaelg screeuit. Er hoh diu sampleyr jeh: "Niarbyl"--"Ni-err-abul";
"Eairk" (a horn) - "Err-uk", yiarragh eh "Two 'r's will do for English, but you need
three in Manx." Rish ymmodee bleeantyn hie 'Kione Doo' as mish, as Caesar hene, gagh
Jeheiney Chaisht, dys Eairy Cuishlin, ayns shenn "van". She "Ford" v'ayn. Un cheayrt,
tra rosh shin thie Eairy Cuishlin, ren shin shooyl roin er y clyst. Dooyrt Caesar,
"Ta shen 'Dalioora', she magher beg 'Dalioora' as magher 'Dalioora' liauyr, as ta skeeal
ayn mychione ny magheryn shen."
"Cre ta shen," vrie shin jeh. "Tammylt er dy henney va oarn cuirrit ayns ny magheryn
shen as va baar feer vie ayn. V'eh currit ayns sthookyn dy sauchey agh un oie haink
sterrym agglagh as va geay-chassee ayn as hie ny deiney sheese dys y vagher jerkal
rish folmid y 'akin agh va lane-vaar ny lhie er y thalloo ta shin nyn hassoo er nish."
Tra va shin shooyl er ash thie va "Kione Doo" shirrey "heise" (a lift) y chur da
Caesar tra v'eh drappal harrish cleigh ennagh, agh haink sheeb ass Caesar "Faag mee
feagh -- ny jean bac orrym." S'feer eh dy row yn aigney echey e aigney hene!
Er hoh yn skeeal s'jerree: Va Thie Lhionney ec Yn Arbyl (The Niarbyl) agh she daa
hie v'ayn as daa ven freayll ad. Va daa ayrn fo un chleah as dorrys ec y chione twoaie
as dorrys elley ec y chione jiass. Ymmodee keayrtyn va ben ennagh gyllagh. "Trooid
raad shoh Whoy -- Jough vie ayns shoh," as harragh coraa elley, foast er ard, voish cheu
elley y thie, "Trooid raad 'shoh Whoy, jough ny share ayns shoh!"
J.T.L. QUIRK