ROIE-RAA
Tammylt beg er dy henney va mee ronsaghey ny hrooid shenn "Vrialtee Ellan Vannin"
'sy Thie Tashtee ayns Doolish. Va mee shirrey fys mychione oanluckey my henn ayr
Evan Crebbin voish Bradda, hooar baase ayns Toshiaght Arree 1933. Hooar mee yn pabyr
naight kiart fy yerrey, as ayns shen, cred-jee ny dyn, va ny kione-linnaghyn shoh "MANX LANGUAGE'S
LAST GASP!" She skeeal v'ayn mychione Yn Olloo Marstrander cheet gys Creneash dy
akin Harry Kelly dy gheddyn fys mychione y Ghailck. Smooinnee bunnys ooilley ny Manninee ec y traa shen nagh row fer erbee ayn as Gailck flaaoil echey. Cha row fys ayn
dy row Gailck flaaoil ec Ned as Y Gaaue as ooilley'n shenn sleih elley bione da'n
cheeloghe aym pene feed vlein ny s'anmee.
Ec y traa shen, bwooise da Jee, va Manninagh aeg jeidagh ayn as graih echey er chengey
ny mayrey, dooinney aeg v'eh as eshyn gobbragh da'n Ard Vaylee Percy Kelly ayns Straid
Atholl, Doolish, raad hooar eh Gailck voish yn Ard Vaylee hene, agh erskyn ooilley, voish e charrey Harry Kelly, Creneash. She Markys Braide v'ayn, as ta Markys foast
chyndaa ny leihaghyn ayns Gailck cour yn Ard Vriw tra t'ad goll y 'ockley magh er
Cronk Keeill Eoin, Laa Tinvaal. Va enney ny share ec Markys er Harry Kelly na v'ec
peiagh erbee elley as ta shin ooilley slane kianglt bwooisal da son y skeeal shoh, as skeeal
mie t'eh dy jarroo. Er hoh diu eh, ayns focklyn Varkysh hene.
'Breagagh'
12 / 2 / 1977
HARRY KELLY
Te er ve feer taitnyssagh dou, as, ta mee shickyr, kiart cha taitnyssagh da studeyryn
elley dy lhaih 'sy Rollage Vanninagh ayns yn colloo "Noon as Noal" scruit ec 'Breagagh',
ny skeealyn mychione ny shenn Vanninee -- ny loayreyderyn dooghyssagh jeh'n chenn
ghlare.
Dys ny deiney shoh (as mraane neesht) ta shin fo lhiastynys mooar, as nish tra t'ad
ooilley chymsit dys ny shennayraghyn ocsyn te agh kiart dooin dy yannoo eab dy hoilshaghey
nyn mwooise da'n chooinaghtyn jeu, liorish soaighey sheese recortys jeh ny mraane as deiney shoh.
Ta Harry Kelly, Cregneash, nane jeh'n cheshaght vannit shoh as huitt eh dys y chronney
ayms dy ve ainjyssagh rish. Er lhiam nagh vel pyagh erbee elley ayn jiu dy voddagh
gra, "Ren mee gynsaghey Gaelg voish meillyn Harry Kelly," as shen y fa te ny lhie
orrym dy cur sheese fockle ny ghaa mychione y dooinney as e ynnyd vea.
Te nish ny smoo na queig blein as daeed neayr's veeit mee eh as lurg whilleen bleeantyn
foddee ta my aachooinaghtyn er n'aase faase, agh cha nel mee credjal shen. Dooys
ta ny aachooinaghtyn shen kiart cha birragh as cha gial my haghyr ad nurree.
Ta enney ec dy chooilley lhaihder er Thie Harry Kelly, as cha nhyrrys. Ta co-caslysyn
jee ry-akin er Lioaryn-Imbee, caartyn yn Nollick as er nyn gloughyn-phost, agh var-a-mish
cha beagh enney ec Harry er e hie hene ec y laa t'ayn jiu. T'ee er ve caghlaait ass towse agh 'sy thie shen cheau mee ymmodee ooryn maynrey.
Ec y Chingeesh 'sy vlein 1930 ren mee markiaght er "cabbyl yiarn" dys Balley Chashtal
as ayns shen veeit mee rish my charrey Bob Harrison. V'eshyn gobbraghey son pabyr
maght as va'n 'rheam' echey y clane jiass jeh'n Ellan. Myr shen va seyrsnys echey
dy rouail mygeayrt ny ardjyn sodjey-magh jeh'n rheam shoh jeeassyragh naightyn fegooish
lhiettrymys. Ec y traa shen va mee kiarit dy ynsaghey Gaelg as va mee shickyr dy
liooar dy beagh fer ennagh faagit ayns Cregneash as y Gaelg echey. Cha s'ayms kys
haink yn yeearree dy ynsaghey Gaelg. Cha row un 'ockle ec pyagh erbee 'sy lught thie ain, eer
ec my yishag vooar as eshyn ny shenn ghooinney, agh haink ee orrym doaltattym as
voish y traa shen magh ren ee mish y leeideil ayns ymmodee buill as veeit mee rish
ymmodee sleih. Sleih yindyssagh v'ad as cha bee ad dy bragh jarrooit ayms.
Hie Bob as mee hene hug y jiass as ayns traa cooie va shin goaill bine dy lhune
losserey cheu mooie thie-thooit 'sy valley beg Cregneash son va chiass mie ayn as
va shin gollish lurg yn laboraght ain. Denee mish voish ben y thie, "Nee ben Vanninagh
oo?"
"Cha nee," dooyrt ee, "agh ta my heshey ny ghooinney Manninagh."
"Nod eh loayrt Gaelg?" va'n nah feysht, as dreggyr ee, "Cha nod."
Cha row shoh toshiaght mie, ny feer ymmydoil edyr. Eisht dooyrt ee, "Ta shenn ghooinney
beaghey ayns shid hoal as ta Gaelg vie echey." Ta shen ny share, smooinee mee, agh
hie ee er, "Cha nel eh ymmyd erbee diu dy gholl geiyrt er son cha nel eh laccal dy
ve boirit rish joarreeyn."
Ny yeih, daag shin y ven as hooyl shin heese y traid agh cha row pyagh erbee elley
ry-akin. Va dy chooilley nhee cha feagh as kiune ve gollrish balley beg fadaneagh
er lhimmey son snaie dy yaagh bane troggal seose jeeragh 'syn aer ass chymlee. Ayns
haggard va paart dy chiarkyn screebey ayns aght lhag chreeagh er thorran as va moddey
ny lhie ny cadley fo chreeagh. Ghooisht eh as yeeagh eh orrin agh v'eh ro litcheragh
dy irree, eer dy ghounstyrnee as cur raaue da'n eirinagh dy row joarreeyn ayn. Eisht
cheayll shin thassane choraaghyn as lurg goll er tammylt beg va fys ain dy row paart dy
leih ayns tholtan ec cass yn ughtagh ta leeideil dys Cronk ny h'Arrey. Va troor dy
gheiney ayns shen as mysh shey ny shiaght kirree jeig. V'ad lommyrt ny kirree cheu-chooylloo son lurg gee yn aiyr noa va'd broighit lesh keck as ayns gaue dy ve goit ec y
carchuillag. Va'n dooinney saa mysh queig bleeantyn as feed dy eaysh (va shen Juan
Kinleoie), yn nah ghooinney (Thobm Kelly) mysh dooble yn eaysh shen, as y fer shinney
(Harry Kelly ) v'eh jeeaghyn dou dy ve mysh kiare feed blein dy eaysh.
Dy jarroo, smooinee mee, ta mee shickyr dy vel eh shen Manninagh dooie as shegin
da ve Gaelg echey.
Va'n shenn ghooinney mysh queig trieyn as reaish er yrjid as v'eh ceau bayrn keeir,
cooat feer liauyr as troosyn gorrym lhean. Fo'n vayrn va daa hooill gial jeeaghyn
magh voish eddin combaasit lesh faasaag lheeah vollagh. V'eh cummal piyr dy youishyn
ayns e laue yesh as honnick mee dy row ny juntyn ec baare e ordaagyn croymmit cour ny
meir lheid as ta mee er n'akin ec paart dy eeasteyryn.
Va my charrey Bob taggloo son minnidyn liauyrey rish Thobm Kelly (son va enn echey
er) er cooishyn bentyn rish Barrantee Purt Noo Moirrey -- va Thobm ny Barrantagh --
as heill mee dy row oyr nyn thurrys jarroodit. Fy yerrey denee my charrey jeh. "Vel
piagh erbee ayns y valley beg shoh ta taggloo Gaelg?"
Cha row sheean ry chlashtyn. Hrog Thobm e volleeyn (as molleeyn chiu doo v'ad) as
loayr eh ny goan cheddin dy meeley myr rish hene, eisht hyndaa eh gys e heshaghyn
as vrie eh jeu. Yeeagh ad yn derrey yeh er y jeh elley, as eisht, lesh un aigney,
chrie ad nyn ging. Hyndaa Thobm Kelly rooin, "Cha nel," dooyrt eh, "Cha nel Gaelg erbee loayrit
ayns shoh nish, shirr jee ayns Purt Noo Moirrey.'' Va shoh naight trimshagh as bunnys
erskyn credjue agh son shoh as ooilley va ourys aym dy row eh ginsh breag.
Lurg faagail yn tholtan, as gennaghtyn mollit, veeit shin rish dooinney coamrit
myr saggyrt ny hassoo ec giat cheu mooie jeh thie thooit. Va ennym "Cummal beg" scruit
erskyn dorrys y hie as va shoh leshtal dooin dy stappal as taggloo rish, jannoo imraa
jeh'n eilkin ain. Va'n ennym echey Cooke as dooyrt eh rooin ayns aght fastagh dy row
eh yn cliaghtey echey dy lhaih y Vible Manninagh gagh laa.
"Dy jarroo," dooyrt mee, ''ta shen yindyssagh son ta mee credjal dy vel oo dty
Hostynagh liorish dty hengey. Va shin jerkal dy chlashtyn Gaelg goll er loayrt ayns
shoh agh dinsh ad dooin nagh vel pyagh taggloo Gaelg nish."
Ren eh gearey choud as v'eh jeeaghyn cour y tholtan. "Vel oo fakin y shenn ghooinney
ayns shen? Ta Gaelg flaaoil echey," dooyrt eh. "T'eh goaill aggle mooar roish joarreeyn,
agh trooid marym, as hee mayd, son bee eh red scammyltagh myr ta shiu er jeet voish Doolish dy gholl ersooyl dyn clashtyn fockle erbee." Hie shin marish sheese y
bayr beg, raad, ec ooirr y bayr, va'n shenn ghooinney croymmit sheese ec niee e laueyn
ayns ammair chloaie.
"Harry", dooyrt nyn garrey noa, "ta'n dooinney aeg shoh er jeet voish Doolish dy
chlashtyn paart dy Gaelg: son shickyr cha jean shiu eh y hyndaa ersooyl mollit."
"Aw," dooyrt Harry, "cha s'ayms." Eisht hass eh seose chirrymaghey e laueyn er lhiatteeyn
e vreechen as yeeagh eh dy gyere orrym. "Cha nel agh paart dy focklyn ayms -- te bunnys
ooilley jarroodit ayms. Er aght erbee shegin dou goll thie dy yannoo aarloo cappan dy hey son Juan as Thobm nish."
"Cum ort Harry," dooyrt nyn garrey, "Cre'n driss t'ort? Abbyr red ennagh ta mee
guee orts rish y dooinney aeg."
Duirree Harry as dooyrt eh, "As ta shiu er jeet voish Doolish ghooinney aeg? Oh
m'arrane -- ta shen raad liauyr -- agh cre'd t'ou laccal clashtyn?"
"Red erbee, sailliu," dooyrt mish.
"Eaisht jee eisht," dooyrt eh, as loayr eh Padjer y Chiarn 'sy Ghaelg. Cre cha yindyssagh
va dy chlashyn yn Ghaelg firrinagh son y chied cheayrt.
Ren mee cur booise da as dooyrt mee rish b'laik lhiam cheet er ash laa elley dy
chlashtyn tooilley Gaelg. Cha noddym gra dy row cuirrey creeoil currit dou -- dy jannoo
cha row cuirrey erbee chebbit dou, agh hie mee er-ash dys Cregneash as liorish jannoo
lhiannan-shee jeempene hooar Harry dy row yeearree jeean ayms dy ynsaghey Gaelg, as
lurg va shen reaghit va failt roym traa erbee hie mee dy chur shilley er.
Ec y traa va mee cloie bluggan cass rish sheshaght 'Ny shen ghuillyn' ec keayrtyn
er fastyr Jerdein (va shen y lieh laa feailley 'sy chiaghtyn) as er coontey shen
cha row mish seyr dy hroailt dys Cregneash dy chooilley fastyr Jerdein. Ny sodjey,
ec keayrtyn va'n earish ro fluigh ny ro garroo as cha row eh cooie dy gholl markaight er cabbyl
yiarn, as shen y fa cha jagh mee. Cha daink smooinaght rieau ayns my chione dy gheddyn
cabbyl yiarn immanit liorish motor, as myr shen va ram caaghyn caillit aym. Ta shoh er ve oyr dy hrimshey mooar dou ayns bleeantyn s'anmee. Cre'n bolvaneys ommidagh!
Va mee gobbraghey gyn lioar erbee, son s'coan va'd myr feecklyn kiark chymsaghey
seose fockle nish as reesht gollrish eean shirrey rassyn dy reayll eh hene bio, as
screeu sheese dy chooilley red fockle son fockle myr cheayll mee eh. Ayns y tourey
shen chionnee mee aachlou Focklioar Cregeen voish Illiam Cubbon jeh'n Museum son daa skillin
yeig. Va mish jeant magh. Cre'n lioar yindyssagh. Va ogher ayms nish, myr yein, dy
osley dorrys theihll noa, as jirrym fegooish pyagh erbee gra m'oi dy row shoh yn
kionnaght share va rieau ry-gheddyn son daa skillin yeig.
Lesh cooney y Focklioar va'n Gaelg ayms cheet er y hoshiaght. Va Harry ny fer ynsee
jeidagh as mie, as va mee my ynseydagh arryltagh. V'eh loayrt Gaelg rhyms ooilley'n
traa, ayns y hie, er ny bayryn, er ny cassanyn as ayns ny magheryn. S'treih lhiam
gra nagh row traa ny smoo ceaut ayms ayns Cregneash geaishtagh rish, as traa ny sloo ceaut
ayms er y vagher bluggan cass, as jummalit er fardailysyn elley. S'creeney ta shin
tra te ro anmagh.
Oie dy row va mee ayns thie Harry as va kiare deiney elley ayns shen. V'ad ooilley
e nabooyn as she ooilley Gaelg v'ad loayrt. Hoie mee ayns chorneil, cha feagh as
lugh, screeu sheese cha wheesh as cha wheesh as voddin. Lurg roshtyn my hie hene,
bunnys ec munoie, myr ve oayllagh dou, hoie mee sheese ec y voayrd, yn Focklioar ec my lhiattee
dy reaghey magh ny screeunyn jeant ayms, as va jannoo yindys mooar orrym dy feddyn
magh son sambyl, dy row "lal" (myr cheayll mee yn ockle) ayns Focklioar Cregeen fo'n
chummey kiart "laccal", "smun-yin" fo "smooinaghtyn" as dy row "raw harvey" "ro happee".
Va mee cronnaghey reddyn noa myr shoh ooilley yn traa as va mee er ny ghreinnaghey
dy gholl er fegooish gennaghtyn skeeys erbee.
Voish Harry hooar mee enmyn ny magheryn 'sy valley beg as dinsh eh dou ymmodee skeealyn
jeh shenn hraaghyn, yn obbyr va goll er, kys v'eh ny eeasteyr goll dys y yeeastagh
ec Kinsale, as shiaulley dys puirt elley ayns Nherin as ny h'Ellanyn Albinagh raad
va'n shenn ghlare er ny loayrt as er ny hoiggal ec dy chooilley 'nane, as yn traa
cheaut echey er y Cholloo tayrtyn conningyn. Dinsh eh dou skeealyn mychione ny mooinjer
veggey, jeh reddyn quaagh t'eh er n'akin as chlashtyn, mysh yn traa v'eh gobbraghey
cur sheese yn raad yiarn tra va ny deiney voish Cregneash er cosh ec kiare er y chlag
'sy voghrey dy ve ec nyn obbyr as kys v'ad shooyl choud's Balley Chashtal dys yn
obbyr shoh. Cha row yn Gaelg dy rieau jarroodit echey son v'eh jannoo ymmyd j'ee
ooilley laghyn e vea.
V'eh ny ghooinney bioyr as skibbylt as foast jannoo paart dy obbyr ga v'eh erskyn
kiare feed blein dy eaysh, karraghey cleighyn, gobbraghey 'sy hraagh, soie praaseyn,
jannoo jeeigyn, freayll arrey er kirree as ollagh, as tayrn ushtey voish y chibbyrt
'sy vaghey cooyl y thie. Va ennym y chibbyrt shoh "Ushtey glen". Dy ve ny haaue ve dwoaieagh
da. V'eh ny shenn scollag aeg as dinsh eh dou nagh row traa echey dy gheddyn poost.
Er hoh skeeal jeh'n vioys echey ayns e ocklyn hene myr ve scruit sheese ayms 'sy
vlein 1930.
"Va mee ruggit ayns thie thooit ayn Creneash yn boayl raad ta mee sthill beaghey.
Va daa vraar aym as daa huyr aym. Va my ghaa vraar ny shinney na mish as va my ghaa
huyr ny saa. Va shuyr ayms beaghey ayns Sostyn as v'ee poost rish Constable. Va my
vraaraghyn yeeasteyryn agh t'ad marroo bleeantyn er dy henney. Va my yishag as my vummig
taggloo ooilley Gaelg eddyr ochene as va shinyn phonnieryn toiggal ooilley v'ad gra.
Va my yishag soie 'sy stoyll drommey vooar dy chooilley Jedoonee lhaih yn Bible Manninagh dooinyn.
Va shin goll dys y Chabbal dy chooilley Jedoonee. Va'n Chabbal faggys da'n Howe.
Ec ny laghyn shoh ta keeill ayns Cregneash myrgeddin. Ren ad chymsagh argid ayns
y voayl as hrog ad yn keeill. Ta cooinaghtyn ayms traa v'ee currit seose. Va my yishag
as my vummig feer chrauee. Va bunnys ooilley'n sleih mygeayrt shoh crauee ayns ny laghyn
shen. V'ad cliaghtit dy ghoaill pynt dy yough ny keayrtyn agh cha row ad goaill rouyr.
Cha jinnagh oo mennick fakin dooinney scooyrit, agh unnane foddee. Hie mish dys schoill freaylt ec Dame ayns Purt Noo Moirrey. Va mee geeck ping son shiaghtin as mannagh
row ping ec guilley moghrey Jelhein v'eh currit thie. Tra va mee shiaght bleeantyn
dy eaysh va mee gobbraghey er y thalloo jannoo kianglaghyn son bunneeyn 'syn ouyr,
cur magh yn ollagh 'sy vagheryn as cur lesh ad er ash 'syn astyr tra va'n dorraghys cheet.
Va mee jannoo sthookyn jeh ny bunneeyn as va paart jeu feer trome. Va'n arroo giarrit
ec ny mraane lesh corranyn agh ny keayrtyn va ny deiney giarrey eh lesh y yiarn foldyragh."
Oh dy beagh greieyn loayrt er-mayrn ec y traa shen lheid as t'ayn jiu. Nish ta
palchey jeu ry-gheddyn agh t'ad er jeet ro anmagh. Cre'n stoyr dy Gaelg v'ayns Cregneash
mysh jeih blein as daeed er dy henney. Ooilley caillit. Caillit son dy bragh. Dy
chassey goan Noo Mian. "Va'n fouyr dy jarroo palchey, agh s'goan va ny beayneeyn."
Scooin lhiam y Olloo Marstrander cheet voish Loghlinn as greie recortys echey dy
yannoo recortys jeh'n chenn ghlare ain. V'eh laccal pooar electragh dy obbraghey
yn greie shoh as hie Harry sheese dys Purt Chiarn dy loayrt Gaelg. Va'n recortys
jeant er rhollanyn coodit ayns kere. Va'n Olloo kiartit dy ghoaill ny rhollanyn dys Oslo as
ayns shen dy yannoo claareeyn voish ny rhollanyn er stoo foddey-farraghtyn as ghiall
eh dou dy yoin 'nane jeh ny claareeyn shoh. Haink yn caggey as cha row yn obbyr shoh
jeant, agh cheayll mee dy row ny rhollanyn currit ersooyl ec Marstrander dys boayl chemmyrk
ayns Dublin son sauchys.
Lurg y chaggey, 'sy vlein 1946, hie my charrey Illiam Radcliffe, voish Rumsaa, as
mish dys Nherin as lurg jannoo briaght hooar shin y voayl raad v'ad freayll ny rhollanyn.
V'ad ny lhie ayns kishtey fuygh eddrym fegooish farkyl ny coodagh erbee er lhimmey son joan chiu. Va kiare as feed jeu. Ass yn earroo shoh va jees dy bollagh brisht,
jees elley va scrabit ass myghin as ga dy row shin abyl dy chlashtyn rish feed jeh
ny rhollanyn er y greie ve eeassit dooin ec y voayl chemmyrk, va ny sheeanyn feer
faase ec keayrtyn. Cheau shin slane laa geaishtagh rish ny rhollanyn as screeu rolley soiaghey
magh cre va recortyssit er dagh rhollan. Va shoh stoyr yindyssagh jeh Gaelg myr
v'ee goll er loayrt ayns Cregneash 'sy vlein 1930 ny 1931 agh aless, cha nel pyagh
erbee er chlashtyn ny rhollanyn er lhimmey son Illiam as meehene as strooys lhiam dy
vel ooilley yn obbyr jeant ec Marstrander bentyn rish recortyssyn er ve ayns fardail,
son ta mee er chlastyn voish y Vuseum nagh vod ad geddyn sheean erbee nish ass ny
rhollanyn.
Va Harry coontey eh dy ve jurnaa liauyr eddyr Doolish as Cregneash as roish va
kied aym dy aagail e hie as goll roym va mee eginit dy ooraghey as niartaghey my-hene
lesh lhongey. Shen y fa va cappan dy hey, arran as eeym as ooh thunnag broiet currit
kiongoyrt rhym. Er-lhiam dy row oohyn thunnag gyn earroo ec Harry as va dwoaie ayms orroo.
V'ad ro lajer er my hon as cha dod mee ee nane. Hie yn ayrn smoo jeu ayns my vussal,
as eisht dys my phoggaid dy ve tilgit ersooyl er y raad thie. Cha jinnagh Harry geaishtagh rish ny leshtalyn ayms smooinee eh dy hass mee ayns feme jeh lhongey as va
shen jerrey yn arganys.
Smooinee mee keayrt dy chur lesh myr cowrey chooilleeney son e chenjallys dou.
Cha row eh goaill tayrn dy mennick agh heill mee dy beagh "Cabbyl Caggee" tombaghey
cooie er e hon. Va'n jishag aym kionnaghey yn stoo shoh as va fys ayms dy row eh
stoo lajer as niartal. Choud's ta cooinaghtyn ayms cha row Harry jannoo ymmyd jeh'n tombaagey
shoh ga va soiaghey jeant echey jeh. Cha naik mee rieau eh giarrey yn wed son y piob.
Bare lesh eh stoo gollrish shenn teid, cassit as thummit ayns therr v'eh freayll
ayns duinid e phoggaid. Cha row rieau monney jaagh cheet ass y piob as cha s'ayms mannagh
ghow eh taitnys ass ny dyn, agh va'n tombaghey shen jioogh atchimagh er foaddanyn!
Ta shen cur er-ash dou skeeal aitt.
Laa dy row dooyrt Harry rhym, "Vel fys ayds dy row yn chied er dy etlagh ayns Ellan
Vannin dooinney ayns Cregneash?'' Va thanvaneys vooar orrym. "Dy jarroo, cha geayll
mee shen -- insh dou yn skeeal my sailliu."
"Illiam Collister va'n ennym echey. V'eh faagail yn ven echey as getlagh dys Nherin
dy ve ny hushtallagh." Er hoh scuirr eh, as ghow eh toshiaght dy chur aile 'sy phiob
as va mish farkaght er dy meen. Shoh jeant, hie eh er, "Va red jeant echey ass daa
dollan er e gheayltin, hass eh er mullagh boalley y muclagh as dooyrt eh rish e ven, "Lesh
cooney Yee neems oo faagail," as lheim eh seose 'syn aer.
Ec y traa shoh va'n piob bunnys mooghit as va Harry tayrn er lesh ooilley e niart
as bwoailley foaddan lurg foaddan. Reesht va mee farkaght dy chlashtyn jerrey yn
skeeal as hooar yn miandid ayms y varriaght as vrie mee, "Cre haink er eisht?" Fy
yerrey, tra va'n piob lostey dy mie dooyrt Harry, "Ren y ven echey reuyrey eh magh ass y thorran
lesh grape." Shimmey keayrt ta mee er ghearey er y skeeal shen as yn aght ve inshit
dou.
Ga nagh row eh bannit lesh cooid heihllt cre erbee v'echey v'eh booiagh dy rheynn
rish pyagh erbee. V'eh dy mennick fockley magh goan Thomas y Thummider:--
Cha nel guiy feie mish
Ny Yernagh braddagh breagagh
Agh geddyn lhongaghyn car y laa
Lesh geeck as dellal cairagh.
Myr shen cha dug eh saynt da cooid dooinney erbee. Eaddagh jesh, litcherys, goaill
eaysh ec y chiollagh -- ren Harry soiaghey scansh er veg jeh ny reddyn shoh. Bare
lesh eh dy ve mooie raad va kiartaghyn dy ve jeant. S'doillee eh dy chur ry lhiattee
cliaghtaghyn jeh bea harroogh.
Ec yn oie harragh Harry gys kione e hie as cur buirroogh mooar magh ass, "Oie vie,
bhoy," as veagh fys ec y clane balley beg, as ec Purt Chiarn as Purt Noo Moirrey
neesht (cordail rish y gheay) dy row mee paartail son Doolish as my hie hene.
Hooar Harry baase ayns Mee Avril 1935 as v'eh oanluckit sy chenn rhullick ec Skylley
Chreest Rushen.
Va mee nane jeu ren ymmyrkey e chorp dys yn oaie ayns shen.
MARK BRAIDE.
Jerrey Geuree, 1977.