Mannin as Nerin ayns Lhing ny Loghlynee





Tamain lhaih ayns Annalyn Ullee dy ren sleih, ta ny annalyn gra Gentiles rish hoshiaght agh Goal ny Loghlynee rish ny sanmey, cheet ec jerrey ny hoghtoo eash dy yannoo roosteyrys as dunverys as dy spooilley buill agglishagh ayns Nerin as darree ad jannoo y lheid shen rish paart dy hraa ayns toshiaght ny nuyoo eash. Lurg chied vleeantyn ny h-eash shoh ayns ynnyd roosteyryssyn tappee as eisht goll dy valley hrog ad buill-vaghee, myr ta Nora Chadwick ginsh dooin, er king ny cheerey as er ellanyn va nyn lhie mygeayrt y clyst-varrey, as hug ad er bun doonyn dy roie magh dy siyragh assdaue noi ny Yernee. Hoie ad sheese ayns Divlyn hoshiaght ayns 836 as va doon currit er bun oc aynshen sy vlein 841. Ec y traa shen cha ren ad boirey dy mooar jiass ny hErin. Scanshoil eh goaill baght aynshoh dy re veih sheear ny hErin dy ren ny Loghlynee ny buillaghyn mooarey y yannoo ayns chied ayrn ny nuyoo eash as she yn Shannon yn raad mooar stiagh oc gys chesh vean ny cheerey hannah she Limerick v'eh jeeaghyn, va'n ard-voayl va fo laue dooinney ennagh enmyssit Thorgestr voish ghow eh greim er y cheer. As er y fa dy re veih sheear ny hErin ayns ynnyd ardjyn elley dy hionn ny Loghlynee stiagh er Nerin tarrarey ny hrooid gys Lian as gys y shiar, t'eh coontit dy re ass Inshyn Goal ayns Nalbin foddee ass Lioas, dy hiaull ny Loghlynee er y raad my yiass dy chur Nerin fo'n smaght oc.

Ga dy re feysht doillee dy reggyrt eh cre cho foddey as va ny Loghlynee ayns Inshyn Goal as ayns Ellanyn Orc, kyndagh rish studeryssyn va er nyn yannoo nish er enmyn buill, shendaleeaght, shennaghys as beeal arrish ta cooid vooar dy schoilleyryn credjal dy row Loghlynee cummal ayns ny buill shen tammylt liauyr roish my daink ad my yiass gys Nerin as gys Mooir Vannin, as t'eh jeeaghyn ny smoo lickly dy re ass Inshyn Goal dy jirree ny Loghlynee ren soie er ny Yernee mysh traa ny nuyoo eash, ga dy re ass yn Norrywee hene dy darragh ad dy bunneydagh.

Va doon er ny hroggal ayns Divlyn ayns 841 myr ta shin er vakin as fud ny nuyoo as jeihoo eashyn ren ny Loghlynee soie ad hene er y clyst-varrey sy shiar as sy jiass cur er bun buill gollrish Viklo (Keeill Vantyn--Wicklow), Veigsfjoror (Logh Garman -- Wexford) Vethrafjoror (Purt Laarigey -- Waterford), Ulfreksfjoror (Larne), as Hlymrekr (Limerick) sy sheear); ta fys ain e shoh son shickyrys veih recortyssyn as s'cosoyllagh dy row fir elley currit er bun oc ayns mean y cheerey hene. Agh sy vlein 844 rere Annalyn Ullee as annalyn elley, dirree ny Yernee ry cheilley fo'n ard-ree Maelseachnaill as hie ad noi ny Loghlynee as chur ad er chea. Va Thorgestr goit oc as er ny vaih lioroo, as myr shen ren pooar ny Loghlynee ayns Nerin tuittym ass y cheilley rish tammylt, er lheh lurg paart dy varriaghtyn hooar ny Yernee er ny Loghlynee ny yei shen.

Choud's yn traa shoh (c. 850) she ny Loghlynee hene va chionney stiagh er ny Yernee, agh ayns y vlein shen raink flod Danvargagh shiar ny hErin, feer lickly ass Sostyn as hug ad Divlyn fo chosh, rere Annalyn Ullee, as varr ad ram Loghlynee. Ayns 853 rere Tree Brooilagh ny Annalyn Yernagh, haink flod mooar ny Danyr fo laue Hormr as ren ad caggey dy mooar noi ny Loghlynee ayns Karlinnfjoror (Logh Cairlinn) as dimman ad ersooyl. Cha nel shin shickyr row ad shirrey pooar ny Loghlynee ayns Nerin ny dyn, agh t'eh er ve er ny ra dy dug ny Yernee cuirrey daue lesh gialdyn argid dy chooney lhieu noi ny Loghlynee. Agh cre erbee yn oyr jeh t'eh shickyr dy row ny Loghlynee kiarail veih'n traa shen magh y phooar oc y chummal dy lajer ayns Nerin. Myr shen, syn un vlein 853 ta Annalyn Ullee recortyssey dy daink Aaloo (Lsh. Olafr) 'mac ree Loghlyn', my yiass gys Nerin, as ghow eh shelloo jeh Divlyn, as lesh cochaarjys Ivar ren eh jeh Divlyn boayl smoo scanshoil ny Loghlynee ayns ny ellanyn shoh. Hooar Ivar baase ayns 873 as Aaloo ayns 874. Va daa vac Aaloo, Carlús as Eystein, marrooit ayns 868 as 875 gagh unnane as er y fa shen she mee Ivar ren reill ny yei.

Roish my dermayd coontey jeh reddyn ayns Mannin, share dooin goaill baght jeh dellal ny Loghlynee ayns Nerin as geabey dy hoilshaghey magh cooishyn mec Ivar ren reill ayns Divlyn as ayns buill elley ayns Nerin.
Choud's v'eh bio daase Ivar dy ve feer niartal ayns Nerin, myr tamain gynsaghey veih ny annalyn as hug eh er bun dy lajer pooar Loghlynagh fud ny cheerey. Agh lurg e vaase ren y phooar shen leodaghey gyn ourys kyndagh rish tuittym magh mastey ard deiney ny Loghlynee; ta ny recortyssyn taishbyney dy row mec Ivar Sichfrith as Sitriucc combasal ad hene ayns caggaghyn beggey ny Yernee. As fy-yerrey myr oddagh shin jerkal ren dooinney marroo dooinney, Loghlynagh marroo Loghlynagh as tra lhaihys mayd mychione baase Varic ayns 881 (AU), dunverys Hichfrith liorish e vraar (Sitriucc) ayns 888 (AU); as dy row Sitriucc hene, Chiarn Limerick, er ny chur gy baase liorish Loghlynee elley ayns 896 (AU), she casley rish dunveryssyn-crauee ny cummaghyn oc. Shen stayd ny cooishyn Loghlynagh tra ren ny Yernee chaglym ry cheilley dy yannoo caggey nyn oi mysh 902. Sy vlein shen hug ny Yernee er chea ad, as beign daue scapail dy bollagh ass Nerin paart jeu goll gys Nalbin er nyn leeideil liorish oeghyn Ivar, as paart elley fo laue Ingemund cosney thalloo veih ny Sostnee ayns Cilgwri (Wirral) as soie sheese aynshen as ayns buill elley.

Va ny Yernee rey rish ny Loghlynee rish mysh daa vlein jeig derrey 914 tra haink ad er ash as flod mooar oc, as ghow ad y cheer ec Purt Laarigey myr ta Annalyn Ullee ginsh dooin. Ta fys ain nagh nee sheshaght-chaggee va fo reill oeghyn Ivar ren cheet er Nerin hoshiaght sy vlein shen, agh sheshaght Loghlynagh elley ass y Vritaan, er y fa dy vel yn Recortys Sostnagh ginsh dooin dy hirr sheshaght-lhuingys feer vooar dy Loghlynee ass y Vritaan goll stiagh seose awin Severn dy ghoaill greim er y thalloo aynshen, agh v'ad er nyn seiy er ash liorish deiney Edard Ree Hostyn, as ta'n recortys shoh chammah's Recortys Aethelweard gra dy hiaull yn flod shoh cour Nerin ny sanmey sy vlein cheddin. Rere Annalyn Ullee, hug yn cheshaght Vritaanagh shoh Mooan fo chosh, ga dy row ad rish tammylt er nyn gumrail liorish ny Yernee. Sy vlein er giyn (915) haink tooilley Loghlynee gys Purt Laarigey as ren ad spooilley y thalloo as ny manishteryn ayns Mooan, as ayns 916 v'ad foast goaill ayrn jeh roosteyrys fud Mooan as Lian. Ayns 917 cordail rish Annalyn Ullee haink Sitric, oe Ivar, marish yn flod echey hug Cenn Fuait t'er cagliagh Lian. Hie Rennell, oe Ivar marish yn flod echey hug Goaldee (Loghlynee) Logh Dechaech (shenn ennym y phurt ayns Purt Laarigey). Myr shen s'baghtal dy daink ad dy ghleck reesht yn thalloo as yn eiraghtys va caillt oc ayns Nerin ayns 902 as dy chur er bun reesht reill sluight Ivar. Sy vlein cheddin ghreim Sitric er ash Divlyn, rere Annalyn Ullee, va treigit oc mysh queig bleeaney jeig roish shen. Tra va Rennell, fer shinney ny oeghyn, braew shickyr dy row yn greim oc er Nerin lajer dy liooar as tra smooinee eh dy voddagh eh ny cooishyn oc y aagail ayns sauchys, daag eh Purt Laarigey ayns 918 dy hiaull er ash gys Northumbria dy chur jerrey er e ghellal bentyn rish York. Erreish da Rennell faagail Nerin haink Sitric, far enmyssit Cam-hooillagh, ny Gaal, dy ve ny ree harrish ny Loghlynee ayns Divlyn, as ayns 919 va pooar ny Loghlynee er ny jannoo dy slane lurg caggey mooar noi Neal Gloon Doo, ard-ree ny Yernee, va marrooit sy chragh. Ayns 920, rere Annalyn Ullee, daag Sitric cour York dy ghoaill ynnyd e vraar Rennell hooar baase ayns 921, as ayns Divlyn ghow y braar elley Gorree ynnyd Hitric as reill eh ayns shen rish tammylt derrey 934.

Myr ta shin er n'ynsaghey va Magnus mac Arailt er ny varroo liorish Brian Boroimhe ayns 978 Lurg e vaase haink e vraar Gorree mac Arailt dy ve ny ree harrish ny Manninee as ny Ellanee. Veih ny mooarane imraaghyn jeh ayns ny annalyn Yernagh, ny Sagas Loghlynagh as ny Recortyssyn Bretnagh, s'cronnal dy re ree lajer eshyn ayns Mooir Vannin as Inshyn Goal ec y traa shen (979-89). Creidmayd yn red shoh ny sassey tra vees cooinaghtyn ain dy daink gy kione genney dy phooar ayns ny ardjyn shen erreish da Aaloo ree Ghivlyn (as da Eadgar ree Hostyn) geddyn baase; eer ayns Nalbin cha row niart dy liooar ec Kenneth II dy yannoo veg ayns ny Ellanyn. As myr shen va palchey caa currit da Gorree dy ve niartal ayns Mooir Vannin. Agh ec yn un traa va caa corrym rish y lheid v'ec Gorree goit ec dooinney elley e phooar hene y heeidey ayns ny ellanyn. She Eearley Ellanyn Orc, Sigurd Rouyr, yn dooinney shoh as ayns 982 hionn eh stiagh er Inshyn Goal as Mannin as v'ad ooilley currit fo smaght echey. As myr shen haink ny Ellanyn fo skian ny Orcee. Ayns 987, rere Annalyn Ullee (986 rere Brut y Tywysogyon) va caggey-lhuingys feer vooar eddyr Gorree as 'ny Danyr' faggys da Mannin Rere Saga Vrennunjal va Donnell mac Gorree marrooit sy chragh. Foddee dy row Gorree geabey geddyn rey rish smaght Higurd voish Mannin. Agh ny yeih ayns 989 rere Annalyn Ullee as Annalyn Tighernagh va Gorree hene er ny varroo liorish ny Albinee ayns Dalriata; haink e vac Rennell ny yei as reill eh gys laa e vaaish ayns 1005 (AU).

Ayns Nerin va pooar jeh Brian mac Cennetigh, far-enmyssit Brian Boroimhe, er ve girree stroshey as stroshey rish tammylt liauyr, as ayns 1002, rere ny annalyn, haink eh de ve ny ard-ree ny hErin dy lhearagh. Ga dy row shen myr shen, va paart dy reeaghyn ayns Nerin nagh jinnagh soiaghey jehsyn myr ard ree harrystoo. Ree Lian va nane jeu as yn smoo scanshoil jeu. Haink cooishyn fy yerrey gy kione ayns caggey feer vooar ec Clontarf faggys da Divlyn ayns 1014, boayl ren Maelmorda, ree Lian, caggey noi Brian. Dyn insh slane skeeal y chaggey shoh s'liooar dooin gra dy yeean Maelmorda er ny Divlynee dy chooney lesh, as hooar adsyn tooilley cooney veih'n Eearley Sigurd as ny Orcee, as myr shen veih ny Manninee as ny Ellanee. Sitric, oe Aaloo Carrane, far-enmyssit Sitric Fassaag Heeidagh, va reill ayns Divlyn ec y traa shen. Yn 23oo jeh Mee Averil va laa y chaggey as va thousaneyn jeu er nyn marroo er gagh cheu, goaill stiagh Brian Boroimhe hene as yn Eearley Sigurd, as deiney ooasle elley.

Cre erbee scansh y chaggey shoh da ny Yernee, v'eh feer trome-chooishagh da ny Manninee; shen yn nah cheayrt ren ad goaill ayrn ayns cooishyn politickagh nyn naboonyn cheumooie Ellan Vannin, as yn nah cheayrt va jeeill jeant jeu. Ec y traa shen, lurg Tara ayns 980, huitt ny Manninee fo reill ny hOrcee. Nish v'ad faagit gyn fendeilys as myr shen huitt ad fo smaght jeh sleih elley. Ga dy vodmayd gra dy dooar chea Vrian dy chaghnyssagh y varriaght, va ny cumraagyn as ny fir choonee echey fud y cheilley dy lhearagh as cha row ad abyl jannoo veg noi peiagh erbee elley rish tammylt dy hraa. As myr shen, er y fa dy row yn cheshaght chaggee echey as e phooar slane as follan bunnys, ayns firrinys she Sitric Faasaag Heeidagh, ree ny Loghlynee ayns Divlyn, yn dooinney stroshey ny yei, as haink eshyn dy ve coontit myr roortagh ny Loghlynee sy Sheear as ghow eh yn leeideilys harrystoo. Ta shendaleeaght ginsh dooin (rere O Riordain) dy daase Divlyn, lurg caggey Chlontarf, dy ve verchagh as nane jeh ny puirt smoo ry hoi traght as dellal fud ny Europey Sheear. Ayns Mannin ta'n thalloo hene er chur seose er y chooid sloo nuy prughyn jeig jeh cooinaghyn yn lhing Loghlynagh, as cha beagh fys ain eer y chooish shoh erbey dy ren yn Olloo Mayl Dolley obbyr feer ymmydoil orroo. Jeusyn va er nyn feddyn fodmayd gra son shickyrys dy vel shiaght cummal cooinaghyn Loghlynagh v'er nyn yannoo ayns Divlyn, yiarragh Mayl Dolley Hiberno - Norse roo, as fir elley (sheer gollrish ny fir Ghivlynagh) v'er nyn yannoo ayns Mannin; yiarragh yn Olloo Dolley Hiberno-Manx roo. S'lesh reill Sitric Fassaag Heeidagh ad. Chammah's shen ta paart dy phrughyn shoh cummal cooinaghyn elley gollrish fir Normannagh as Sostnagh, as s'lesh yn eash 1020-70 ny shiaght jeu. V'ad er nyn reuyrey seose ayns ny buill shoh:

(J--Jiass; T--Twoaie )

(J) Park Lewellyn-- cummal cooinaghyn c. 1030
(T) Nappin Sheear Skyll Pherick Yurby c. 1040
(T) Skyll Andreays, c. 1040+
(J) Ballaberna, Skyll Maghal, c.1050
(J) faggys da Laxa. 1060 +
(T) Skyll Mayl I (reuyrit seose 1834) c. 1060-70
(T) Skyll Mayl II (reuyrit seose 1972/75), 1025-60

Neeshtagh ta recortys jeh prugh va feddynit ayns 1786 ec Ballacannell ayns Laxa (J), agh cha nel fys ain cre t'eh cummal, ta'n Olloo Dolley fo smooinaght dy vel cooinaghyn yn eash shoh (1020-70) aynjeh. Ta prugh elley ayn ta cummal lheid ny cooinaghyn shoh, agh cha nel fys ain boayl v'eh goit voish; foddee boayl ennagh er y Twoaie. Va prugh elley er ny eddyn ayns Balley Laagh (T) ayns 1772 ta cummal cooinaghyn argid, dy lickly jeh'n eash shoh. As fy yerrey ta magher ayn ayns Skyll Andreays (T) er ennym Close yn Argid as ta Mayl Dolley coontey dy dooar e ennym foddee veih cooinaghyn argid va feddynit ayns shen keayrt dy row. My vees shen feer, eisht she cooinaghyn Loghlynagh vees ayn dy lickly.

Goaill stiagh dy chooilley phrugh yn emshyr shoh shickyr as lieh-hickyr, t'eh cronnal dy vel mysh nane jeig jeu ayn, as t'eh foaysagh cur tastey dy darragh mysh shiaght jeu veih twoaie Yn Ellan. S'crowreydagh shoh as heemayd yn scansh jeh shoh erreish dooin cur coontey da'n feanish elley.

Ta paart dy obbyr e ve er ny jannoo er ny enmyn-buill ta ry gheddyn ayns coontyssyn ny thallooinyn agglishagh (ta deiyrt er Recortys Reeaghyn Vannin (BL Cotton Julius Avii, ff 31r-54v) liorish Bnr Margaret Gelling as Mnr Basil Megaw. Ta'n doggamaid shoh, va coontit er ram sleih keayrt dy row dy ve er ny screeu sy cherroo eash jeig, mysh 1377, er ve er ny scrutaghey reesht as she c. 1280 y vlein noa ta currit urree nish; myrgeddin t'eh braew shickyr dy row ny coontyssyn shoh scruit sheese liorish yn un dooinney ren screeu yn rheynn shen jeh recortys Reeaghyn Vannin ta goaill stiagh ny bleeantyn 1263-1274. Ta'n tree coontyssyn sy doggamaid cur coontey jeh ny thallooinyn b'lesh maynee Abb Rushen ayns

a) Skyll Malew (J),
b) Skyll Chreest ny hAarey (T), as
c) ec Skinscoe ayns Skyll Lonan as Skyll Maghal (J).

Ayns y chied choontys ta kiare enmyn as feed recortyssit; she Loghlynagh yn chooid smoo jeu. Shen yn un skeeal lesh yn trass coontys boayl ta shiaght enmyn recortyssit, agh ayns y nah choontys, ta dellal rish thallooinyn ayns Skeeyll Chreest ny hAarey, ta queig enmyn jeig recortyssit as Gaelgagh yn chooid smoo jeu.

Ayns Recortys Reeaghyn Vannin as ny hEllanyn, scruit tamain coontey liorish maynee Abb Rushen, yn chooid smoo jeh c. 1257, t'eh gimraa fo'n vlein 1047 (rectius 1066) dy row dooinney ayn enmyssit Gorree mac Sitric va reill ayns Mannin ec y traa shen, as dy dooar eh baase ayns 1075. Ta Annalyn Ullee recortyssey 1075 myr blein tra hooar Gorree oe Rennell, ree Ghivlyn, baase. Rennell mac Aaloo Carrane yn fer shoh as v'eh marrooit rere ny annalyn, sy chragh vooar ec Tara ayns 980. V'eh ny ayr Eaghmarkiagh, ree Ghivlyn 1035-38 as 1042-52. Sy vlein shen (1052) ren Eaghmarkiagh caggey noi Dalrmod mac Maelnambo, ree Lian coardail rish Annalyn Tighernagh, as v'eh er n'imman ersooyl. Syn annalyn cheddin fo'n vlein 1061 (1060 AKM ) t'eh imraait dy dug Murchad mac Dairmod fo chosh dooinney ennagh enmyssit 'mac Rennell' ayns Mannin as dy row Mannin currit fo cheesh echey neesht. S'lickly dy row 'mac Rennell' reill ayns Mannin, myr t'eh currit dooin toiggal veih shen, as dy re Sitric va 'mac Rennell' as Gorree yn mac echey -- Gorree oe Rennell rere AU-- hooar baase ayns 1075.

My chreidys mayd shen, s'leayr dooin myr shen dy b'lesh sluight reeoil Ghivlyn Gorree mac Sitric. Ta ny annalyn cur skeeal dooin dy row flahee Yernagh guilliney dy ghoaill greim er Divlyn as er Mannin, er lheh lurg baase Sitric Faasaag Heeidagh ayns 1042 as tammylt roish shen. Shegin dooin cooinaghtyn nagh row eh bentyn rish ny Loghlynee nish row Divlyn hene fo reill ree Loghlynagh ny ree Yernagh, choud's b'lhieu y traght. Ren ad coontey argid foddey smoo scanshoil na ard enmyn, as choud's v'ad cosney cha jinnagh ad boirey dooinney erbee. Veih earroo mooar dy phrughyn yn emshyr 1020-70 va feddynit ayns Mannin, s'aashagh eh dy hoiggal dy row ad er nyn vollaghey ersooyl ayns traaghyn danjeyragh, myr ta ny annalyn recortyssey.

Myr shen, my chruinnys mayd nish ny ta imraait ain hannah: ny cooinaghyn, ny enmyn-buill as feanish ny annalyn as ny recortyssyn, yiowmayd caslys glen jeh smaght reeaghyn Ghivlyn va currit oc er ny Manninee ayns ny bleeantyn ren geiyrt er caggey Chlontarf ayns 1014 gys mysh 1080-75. Er y fa dy re er y Twoaie dy row cooid smoo jeh cooinaghyn yn eash 1020-70 er ny ngeddyn, as dy re er y Twoaie dy re Gaelgagh ta cooid smoo ny enmyn ta ry gheddyn ayns y nah choontys, fodmayd ve shickyr bunnys dy ghow ynnyd soiaghey noa dy Loghlynee (as gyn ourys Yernee) veih Divlyn as veih cheer Lian va mygeayrt-y-mysh er Twoaie Vannin fud ny bleeantyn mysh 1020 as ny lurg shen. S'kiart dooin cummal ayns aigney dy ren pooar as reill ny Loghlynee leodaghey ayns Nerin lurg ny caggaghyn ec Tara as ec Clontarf, as ta Mayl Dolley kiart dy lickly tra t'eh gra dy darragh ad gys Mannin dy hirrey thalloo noa ayns ynnyd y lheid jeh va caillt oc ayns Nerin, as dy jinnagh ad foddee teaymey yn ushtey ass ny curraghyn as traaue yn thalloo aynshen. Cha nel shin shickyr cre cha mooar va'n earroo oc agh ta oyr ain credjal nagh row eh ro veg. Fodmayd fakin y laa t'ayn jiu anchaslyssyn eddyr sleih y Twoaie as sleih y Jiass, Gaelg y Twoaie as Gaelg y Jiass. Ta Recortys Reeaghyn Vannin hene gimraa ny keayrtyn yn red shoh: Y caggey ec Santwat ayns 1098 eddyr Manninee y Twoaie as Manninee y Jiass, as reesht ayns 1228 ec Tinvaal. Tra haink Gorree Crovan ayns c.1079 gys Mannin marish e heshaght-chaggee ass Inshey Goal nagh quaagh eh dy hionn eh stiagh er y Twoaie boayl va soit ec ny Divlynee? Neeshtagh neemayd fakin ayns y jiass dy vel ny skeeraghyn aynshen er nyn gasherickey da nooghyn beggey Yernagh er y chooid smoo agh er y twoaie she kiare skeeraghyn ass hoght t'er nyn gasherickey da nooghyn Yernagh, troor jeu goaill stiagh daa noo mooar -- Perick yn Ostyll as Breeshey Cheeill Darrey. Va shoh (chammah's Caraine) feer ennoil ayns Nerin fud y chied eash jeig. As ayns cosoyllaght rish ny casherickyn sy jiass ta ny fir er y twoaie jeeaghyn anmagh. As er shen fodmayd ve shickyr dy liooar dy row soiaghey noa dy leih ass Nerin er ny chur er bun er y twoaie sy chied eash jeig as veih'n traa shen magh veagh daa horch dy leih ayn as daa horch dy Ghaelg oc, yn derrey cheint ayns y jiass foddee jeh'n chenn lhuight ass Ullee as ny Inshey Goal as Gaelg Ultagh as Ellanagh oc, as yn cheint elley er y twoaie jeh sluight Yernagh as ny s'jeianee as Gaelg Yernagh oc. Shen yn stayd ayns Mannin tra haink Gorree Crovan.

Rere Recortys Reeaghyn Vannin ren dooinney dy row, Gorree, farenmyssit Crovan, scapail veih'n chragh (ec Droghad Stamford ayns 1066) She mac Harold Doo ass Ysland yn Gorree shoh. Haink Gorree Crovan gys Gorree mac Sitric va reill ayns Mannin e y traa shen. Hug reiltagh Vannin er Gorree Crovan. Sy vlein 1079, myr dooyrt yn un recortys, haink eh gys Mannin reesht -- yn cheayrt shoh marish sheshaght-caggey ass Inshyn Goal -- as erreish da caggey noi ny Manninee hug eh fo smaght ad as ghow eh toshiaght dy reill aynshen. T'eh symmoil dy ghoaill baght dy ren ny Manninee, rere RRV, guee ersyn gyn ad y varroo - cha ren eh shen 'er yn oyr dy row eh er ny hroggal ny mast' oc rish tammylt. S'lickly dy vel shoh cheet er y traa v'eh marish Gorree mac Sitric ny traa roish shen nagh dimraa ny annalyn. Neeshtagh, tra ghow eh greim er Mannin, ta RRV gra dy dug 'Gorree Crovan Divlyn as ayrn mooar jeh Lian fo chosh,' as dy dug eh caglieeyn er earroo dy lhuing b'lesh lhuingys ny Albinee. Bentyn rish yn chooish s'jerree shoh ta Lioar Chlein Rennell gimraa dy row caggey ayn eddyr Gorree Crovan as flod Ergiyl, as hug eh fo haart ad. Veih ny recortyssyn s'leayr dooin dy row Gorree Crovan kiarail Mannin as Inshyn Goal y chur lesh cooidjagh fo'n reill echey, as haink yn eab shoh lesh tra heemayd dy ren e vec reill ny yei ayns Mannin as ny Ellanyn rish daa cheead vlein bunnys gys 1265. Va Mannin ny ard stoyl y reeriaght.

Coardail rish Annalyn Ullee as Annalyn Inish Fallen va Gorree Crovan -- Gorree Meranach t'ad gra rish -- ceaut magh ass Divlyn ayns 1094 as ayns 1095 hooar eh baase. Rere Recortys Reeaghyn Vannin hooar eh baase ayns Eeley lurg dasyn reill rish shey bleeaney jeig.








Shorys y Creayrie 1979