Quoi va Gorree Crovan?


Syn art shoh she soilshaghey magh yn lught-thie b'lesh Gorree Crovan, as quoi va ny shaneryn echey, as yn aggyrt v'echey er stoyll-reeoil Vannin as ny hEllanyn ta my eab.


Cha nee monney fys t'ain mysh Gorree Crovan veih recortyssyn as annalyn as nyn lheid, as s'goan dy liooar red erbee t'ain ta bentyn rish. Recortyssyn Reeaghyn Vannin as ny hEllanyn ta'n farraneys (hist. source) mooar ain, agh eer aynshoh cha nel eh er ny insh dooin agh beggan beg my-e-chione, as sheign jalloo erbee ta keeayllagh y hroggal seose veih toiggal ass feanish elley. Ga dy vel schoilleryn dy cadjin ayns cordailys dy row mooinjerys ennagh eddyr Gorree Crovan as reeaghyn Ghivlyn as fir toshee ny hEllanyn, ta'n art shoh geabbey taishbyney dy row e vooinjerys da reeaghyn Loghlynagh ayns Divlyn foddee ny stroshey na smooinee shin hoshiaght, as dy re chionn dy liooar va kianglaghyn e reeriaght rish reeaghyn Gwynedd.

Rere Recortyssyn Reeaghyn Vannin (RRV) haink Gorree Crovan dys Mannin lurg da goaill ayrn ayns caggey Droghad Stamford (ayns 1066), as hooar eh oltaghey boggoil veih Gorree mac Sytric va reill ayns Mannin ec y traa shen as ren geddyn baase sy vlein 1075. Haink eh reesht mysh y vlein 1079 marish ellanee, agh yn cheayrt shoh yn Ellan y chur fo smaght echey. Hug eh myr shen Divlyn as ayrn mooar Lian fo chosh, as ny lurg shen cur ny Albinee fo haart. Reill eh shey bleeaney jeig ayns y reeriaght as hooar eh baase ayns Eeley. Rere Annalyn Ullee (AU) hooar Godfraidh Méránach (ta shen dy ghra Gorree Crovan) baase sy vlein 1095. Chur Gorree Crovan er bun reeriaght ayns Mannin, myr ta ny Recortyssyn ginsh dooin, as darree shoh rish daa cheead blein bunnys, derrey 1265. Ta'n Olloo P.A. Munch er hoilshaghey dy beign da ve ec Gorree Crovan aggyrt leighoil ayns Mannin as ny hEllanyn, as ayns Divlyn, as dy lickly t'eh kiart tra t'eh gra dy re oe da Rennell (mac Aaloo Carrane) va er ny varroo ec Tara ayns 980 va dy lickly Gorree mac Sytric. Neeshtagh s'cosoyllagh dy row mooinjerys eddyr Gorree Crovan as Gorree mac Sytric foddee yn chied 'er ny second nephew da'n fer elley.

Ga dy vel eh cordit dy cadjin mastey schoilleryn dy re mysh mean yn nuyoo eash dy ghow ny Loghlynee toshiaght dy hoie sheese dy beayn ayns Mannin ny yeih cha nel shin clashtyn jeh reeaghyn ayns Mannin derrey tammylt mooar ny s'anmey. Sy vlein 973 ta Recortys Florence Worcester gimraa dooinney dy row enmyssit "Maccus ree ny ymmodee Ellanyn" myr nane jeh hoght reeaghyn va kionefenish ec chaglym mooar va er ny chummal liorish Eadgar yn ree Sostnagh er yn awin Dee ec Chester. Ta'n Maccus shoh cheet er ash ayn Annalyn ny Kiare Mainshteryn (AKM ) myr Magnus mac Arailt ren caggey noi ny Yernee ec Inish Cathaigh syn awin Shannon sy vlein 974. T'eh jeeaghyn dy row Magnus ny vac da Harald, mac Sitriucc Chiarn Limerick as mac Ivar, ren reill ayns Divlyn mysh 853-73 as cur er bun lught-thie Ivar, as dy lickly cheet ass Inshyn Goal. Va Magnus er ny varroo t'eh jeeaghyn, liorish Brian Boru, ny s'anmey Ard-ree ny hErin, sy vlein 978, rere Cogagh Gaedhel re Gallaibh (CGG), as she Gorree e vraar ren goaill e ynnyd myr ree ayns Mannin as ny hEllanyn. V'eh marrooit, rere Annalyn Tighernagh (AT), ec ny Albinee ayns Dalriada sy vlein 989. Ta'n ennym Gorree mac Harald dy mennick ry akin ayns recortyssyn Eeslanagh, Yernagh, as Bretnagh er lheh ayns "Brut y Tywywsogyon" (Lioar ny Princeyn) as mss. ta bentyn rish, boayl t'eh imrait dy re eshyn as yn flod echey ta cheet dy mennick dy chooney lesh ny dy chaggey noi ny Bretnee. As myr shen dy row eh dy liooar chronnal dy re feer niartal ayns Mooir Vannin as mygeayrt ec y traa shen va Gorree mac Harald. Lurg e vaase ghow Rennell e vac e ynnyd as reill eh, rere AU, myr ree ayns ny hEllanyn derrey laa e vaaish sy vlein 1005. T'eh jeeaghyn myr shen dy re hoshiaght voish bangan Limerickagh lught-thie Ivar dy daink reeaghyn ayns Mannin as Inshyn Goal as kyndagh rish ny enmyn Gorree as Harald cheet rish dy mennick ayns lught-thie Ghorree Crovan chammah's lught-thie Ghorree mac Harald, chreid Munch by b'lesh yn bangan Limerickagh va Gorree Crovan, ga nagh vel feanish creoi dy ghra dy re shoh yn chooish.

Fud yn jeihoo eash va forchanyn mooinjer Ghivlyn er nyn stiurey liorish yn ree lajer Aaloo Carrane (Olaf Cuaran Sitricsson) rish ny smoo na lieh-cheead blein derrey y vlein 981, as ta ny annalyn ooilley ayns cordailys ry-cheilley dy row eh niartal ass towse syn ard shen derrey yn traa shen, er lheh lurg da ve ceaut magh ass York mysh 953. Tamain er vakin dy row reeaghyn reill ayns Mannin as ny hEllanyn ec y traa shen lesh lhuingys-caggee lajer, as s'lickly dy chum Magnus as ny-yei Gorree e vraar Mannin as Inshyn Goal ass leih reeaghyn Ghivlyn. Hirr yn ree Eadgar dy cronnal dy cho-obbraghey marish Magnus sy vlein 973 dy yannoo shickyr dy row e heu-heear sauchey dy liooar, as v'eh aarloo dy eeck eh er-y-hon, rere feanish ny cooinaghyn. Agh hurr forchanyn mooinjer Ghivlyn dy mooar ayns y chaggey ec Tara sy vlein 980, as reesht ec Glenmama ayns 999, as voish shen magh cha ren pooar ny Loghlynee ayns Nherin couyral reesht dys yn stayd cho niartal v'oc roish shen. Va genney dy phooar syn ard shen nish kyndagh rish baase y ghaa ree lajer Eadgar (ayns 975) as Aaloo (ayns 981), as she shoh ren fosley yn raad da sleih elley dy heiy stiagh ayn. Sy vlein 982 haink Mannin as Inshyn Goal fo smaght ny hOrcee, va fo reill yn Eearley Sigurd Rouyr as fodmain sheein dy row Gorree mac Harold gobbraghey yn flod echey mygeayrt Mannin as ny hEllanyn ass leih ny hOrcee. Ta AU recortyssey sheshagh-chaggee voish Inshyn Goal kionefenish ec Caggey Chlontarf ayns 1014, as t'eh jeeaghyn dy row ny Manninee goaill ayrn jeh neesht.

Cre erbee va scansh y chaggey shoh da ny Yernee cragh vooar da ny Manninee v'ayn, son dy row ad er hreigeil son y nah cheayrt yn chooish oc dy vrishey stiagh er reddyn ny naboonyn. Ta'n Olloo Michael Dolley er haishbyney dy re shiaght prooghyn cooinaghyn er y chooid sloo jeh nane jeig ny ghaa yeig jeu (ta er ve nyn reuyrey seose ny er nyn ngeddyn rere beeal arrish, ayns Mannin bentyn rish yn eash 1020-75, as ram jeu cummal cooinaghyn Yernagh / Loghlynagh jeh Sitric y Faasaag Heeidagh, ree Ghivlyn c. 994-c.1028, as reddyn elley t'ad gra cooinaghyn Yernagh / Manninagh roo, ta goit voish cummey ny fir Yernagh) ta er jeet son shickerys, ny t'ad coontey dy vel ad er jeet veih twoaie yn Ellan. Feanish (evidence) ny enmyn buill, er-lheh ayns Baght ny Thallooinyn Agglishagh ayns Recortyssyn Vannin, ta er chur er Dr. Margaret Gelling as Basil Megaw dy smooinaghtyn dy re Gaelg yn chengey ta er n'irree reesht er y twoaie, as ta Michael Dolley kiangley shoh stiagh lesh feanish ny cooinaghyn; ta shen dy ghra, mysh y traa 1020-75 haink Gaelg dy lajer stiagh er twoaie yn Ellan voish Divlyn as ayrn jeh Lian. Neeshtagh ta ny annalyn recortyssey tammylt mooar corvaalagh ta reaishaghey mysh daeed ny lieh cheead blein geiyrt er caggey Chlontarf ta bentyn rish ny Divlynee chammah's ny Manninee tra ta flahee Ghivlyn streeu noi ry hoi dy gheddyn greim er stoyll-reeoil Ghivlyn (as Mannin). Er y fa dy row dy liooar phrooghyn er nyn vollaghey ayns Mannin ec y traa shen, she shoh ta lhiggey er dy re ayns corvaal va cooishyn ny Manninee. Ta Breandan O Riordain er hoilshaghey dy re cowryn ny Divlynee ren mooadaghey ymmodee fillaghyn fud ny bleeantyn lurg caggey Chlontarf, as dy re veih shoh dy daink Divlyn dy ve myr nane jeh ny ard valjyn s'berchee feiy Europ-Heear.

Feanish ooilley t'ain ta cur orrin smooinaghtyn dy daink ny Divlynee ny share na ny Manninee ass cragh Chlontarf, as she feanish ny cooinaghyn as ny enmyn-buill ta cowraghey magh dy ren mooinjer Ghivlyn eab mooar veih 1020 magh dy reaghey soiaghey sheese feer vooar er twoaie yn Ellan jeh'n sleih oc hene as dy lickly dy liooar Yernee veih'n cheer mygeayrt Divlyn, ie. woish Lian. Foddee dy jinnagh Sytric, ayr da Gorree mac Sytric, reill ayns Mannin ass leih Hitric y Faasaag Heeidagh ny Eaghmarkagh, ny eer reill aynshen nyn lurg er y fa dy vel eh dy lickly, myr ta Munch er haishbyney, dy re woish yn linney cheddin as Sitric y Faasaagh va Sytric (ayr da Gorree) as Eaghmarkagh, as myr shen dy jinnagh eh reill ass leih ny Divlynee ayns Mannin mannagh row eh reill ayns Divlyn hene. As myr shen dy vodmain fakin ayns nyn aignaghyn dy re rish tammylt mooar dy hraa - rish lieh-cheead blein my daink Gorree Crovan ayns c.1079 -- dy row Mannin fo smaght ny Divlynee as fo chosh ny hOrcee (va fo reill yn Eearley Thorfinn Lajer) va ny hEllanyn -- er cheu hwoaie Vannin va sleih ass Divlyn as dy lickly ass Lian neesht, as er y cheu yiass adsyn shen v'ayn hannah dy lickly ass ny hEllanyn, ass Ullee ny ass Galloo (Galloway). Sy vlein 1064/5 hooar Thorfinn baase as gow e vec Paayl as Erlend yn ynnyd echey, agh cha row ad abyl freayll rick er ny hEllanyn myr ren nyn ayr. Ayns 1075 ta AU recortyssey baase Ghorree mac Sytric, as er y fa nagh row dooinney lajer reill ayns Mannin ny ayns Inshyn Goal voish Divlyn ny Ellanyn Orc -- va ny Divlynee son lhiassaghey adsyn hene reesht foayr ard reeaghyn ny hErin veagh ayn dy phrowal dy chosney reesht nyn booar ayns Nherin, as dy lickly cha row monney symm oc nish er cooishyn Manninagh.

As Gorree Crovan, toiggal nish caghlaaghyn mooarey ny reddyn sy rheynn shoh, veagh eh abyl stiurey dy schleioil as dy cooishagh as lesh dy liooar shlawnys politickagh, Mannin as ny hEllanyn ersooyl ass greim ny Divlynee as smaght ny hOrcee, as darree yn stayd shoh derrey kione daa cheead blein bunnys. Shoh ayns firrinys va cooilleeney smoo Ghorree Crovan as e cho-hoyrtys smoo scanshoil da bunraght Vannin. Haink traaghyn trome-chooishagh ny lurg da ny Manninee tra v'ad niartal as pooaral mastey ashoonyn as oddagh oo gra nagh vel ad er n'akin y lheid er dy henney. Kianglaghyn chionn rish Divlyn chammah's rish ny hEllanyn veagh er ve ec Gorree Crovan dy ve er ny hoiaghey jeh ayns ny buill shen, goaill stiagh Mannin. Fodmain credjal shoh ny sassey my neemain toiggal dy dug ny Divlynee cuirrey da e oe Gorree mac Aaloo mysh y vlein 1154 dy reill harrystoo, rere RV. As oddagh shin gra, tra hug Gorree Crovan shilley er yn Ellan ayns 1066, dy beagh failt mooar currit da ec dooinney nagh row feer foddey ersooyl er mooinjerys da.

She shoh ta lhiggey er dy row ec Gorree Crovan kiangle rish Divlyn va ny s'chionney na'n lheid veagh echey, my va Gorree mac Harald veih'n vanglane Limerickagh ny haner da, so she Ivar Ghivlyn (hb. ayns c.873) ny lomarcan yn shaner cadjin v'oc.

Fodmayd credjal yn skeeal shoh ny sodjey, tra hoiggys main yn scansh va currit da reeriaght Ghorree Crovan ayns achau (listyn shennayraghyn) Ghruffydd ap Cynan, ree Gwynedd (1081 1137), neeshtagh er ny chiangley rish reeaghyn Ghivlyn. Va Gruffydd ny vac da Cynan ap Iago (va jeh sluight Rhodri Mawr, ree Gwynedd, hooar baase sy vlein 878), as da Rhanullt, ny Ragnhild, inneen da Aaloo mac Sitric y Faasaag Heeidagh, ree Ghivlyn. Rere ny laue screeunyn Peniarth 17 as 267, boayl ta vershoon lught-thie Ghruffydd ry akin. "Va Gruffydd ny vac da Rhanullt, inneen Aaloo ree Ghivlyn . . . va Aaloo hene ny vac da ree Sitric, mac ree Aaloo Carrane, mac Sitric, mac ree Aaloo, mac ree (Harold) Harfager, mac ree ny Danyr." Ta ny farraneyssyn Yernagh gra bunnys yn red as ny achau Bretnagh bentyn rish sliennooys (genealogy) Aaloo mac Sitric. Ren Aaloo mac Sitric geddyn baase sy vlein 1034 as v'eh dy baghtal ny ghooinney pooaral mysh ard mooir ny hErin. Son shickerys bunnys she'n Sitric shoh as Sitric y Faasaag Heeidagh yn dooinney cheddin. Ta'n Aaloo Carrane shoh ny ghooinney cheddin as Aarloo Carrane ny farraneyssyn Yernagh, ga dy vel AU fo'n vlein 1028 coontey eh myr yn jishig vooar da Sitric y Faasaag Heeidagh -- Sitric mac mic Amhlaimh ri Gall; veagh Sitric, ayr Aaloo Carrane, ny ghooinney cheddin as Sitric Gaal (Sitric Gale), hooar baase 926/7. T'ad gra oeghyn Ivar rish Sitric Gaal as e vraaraghyn ayns ny annalyn Yernagh, as choud's ta fys ain cha nel ad gimraa boayl erbee quoi va'n jishag oc. Cha nel feanish ayn dy ghra dy re mec da Sichfrith ny Sitriucc e vraar v'ayndaue -- va Sichfrith as Sitriucc nyn mec da Ivar Ghivlyn hene. Er y fa nagh vel yn ennym Aaloo kionefenish mastey enmyn mec Ivar, ta caa ayn dy re shoh ennym ayr Hitric Gaal, as t'eh dy symmoil fakin dy vel ny achau gra, my fod mayd cur treisht orroo, dy re Aaloo ta ny ayr da Sitric (Gaal). Bentyn rish Harald Harfager ta schoilleryn er ve abyl dy haishbyney nagh daink eh dy lickly hug ny ellanyn shoh edyr.

Tamain nish chyndaa hug imraa reeriaght Ghorree Crovan ayns ny achau Bretnagh. Rere Achau Brenhinoedd a Thywsogyon Cymru (listyn jeh reeaghyn as flahee yn Thalloo Vretnagh), sy trass ynnyd ass ghaa yeig jeu boayl t'ad ginsh quoi va shennayraghyn Ghruffydd ap Cynan o Gogail (ie. Gruffydd ap Cyan ap Iago), t'eh gra, "Rhanullt m. Gwythryg ap Afloyd m. Gwrthryt mearch m. Harallt ddu (m.) Ifor gamle m. Afloyd m. Swtrig" -- 'Rennell, mac Ghorree, mac Aaloo, mac Ghorree Mearch, mac Harold Dhoo, (mac) Ivar Gamle, mac Aaloo mac Sitric'. Ta'n skeeal shoh ayns cordailys rish ny tamain toiggal ayns Recortyssyn Reeaghyn Vannin. Ren yn Rennell shoh reill ayns Mannin as ny hEllanyn veih 1183 gys 1226; corrym rish e vac Gorree sy list shoh ta Gorree II (1154-87) jeh RRV, as Aaloo e ayr, shen Aaloo I (1113? 1153/4). Gorree Mearch, shen Gorree Mearach, ny Méránach, ayns ny farraneyssyn Yernagh, as Gorree Crovan ayns RRV (ta Mearach, ny Méránach, bentyn rish yn fockle 'meir' ayns Gaelg, as Crovan, ny Crobhan ayns Yernish, 'laue veg' ayns Gaelg. Ta ny farenmyn shoh cur faaue dooin dy row laueyn beggey ec Gorree Crovan ny va red ennagh quaagh lhieu myr shen). Mysh Harald Dhoo, shoh yn dooinney cheddin, fodmayd gra son shickerys bunnys, as yn Harald Dhoo ain ayns RRV. Agh bentyn rish Ivar Gamle cha nel shin shickyr dy liooar quoi v'eh, agh er y fa dy vel feanish elley er hoilshaghey dy row kiangle lajer ayn eddyr lught-thie Ghorree Crovan as reeaghyn Ghivlyn, t'eh feer lickly dy row Ivar Gamle er ny chiangley er aght ennagh roo, mannagh b'lhieu eh. Ta Annalyn Ullee ginsh dooin dy dooar Ivar, mac Harald, mac Aaloo Carrane, baase ayns 1054, Harald, e ayr, va dy baghtal ny eirey da stoyll-reeoil Ghivlyn, v'eh er ny varroo ec Glenmama ayns 999, rere CGG. As rere Annalyn Tighernagh, sy vlein 1038 cheau Ivar magh yn dooinney Eaghmarkagh myr ree ayns Divlyn, va'n dooinney shen reill aynshen neayr's daag yn naim echey, ny mac braar e ayrey da, Sitric y Faasaag Heeidagh ayns 1035 (AT). Ayns 1046 hug Eaghmarkagh Ivar er chea as ghow eh e ynnyd reesht myr ree (AKM ).

Maidjey rish shoh t'eh jeeaghyn dy dennee Harald as Ivar ny neesht dy row aggyrt leighoil oc er stoyll reeoil Ghivlyn, myr dy lickly v'ec Gorree Crovan tra v'eh reill aynshen derrey v'eh ceaut magh ass, rere AU as Annalyn Inish fallen, ayns 1094; as foddee e oe Gorree mac Aaloo mysh y vlein 1154 (qv). Er y fa dy vel yn traa v'ayn eddyr baase Harald as baase Ivar lhiggey er dy re shenn dooinney va Ivar tra hooar eh baase, t'eh feer lickly dy re Ivar Gamle ('shenn' ayns Eeslanish) as Ivar mac Harald jeh ny annalyn (hooar baase ayns 1054) yn un dooinney, ga nagh vel e ayr Harald er ny imraa ayns ny achau Bretnagh. Ta's ain voish ny annalyn dy re Aaloo Carrane as Sitric Gaal ny shennayraghyn jeeragh da Ivar mac Harard, as er y fa dy vel ny enmyn shen-ennee Aaloo as Sitric cheet rish myr enmyn ny shennayraghyn jeeragh da Ivar Gamle ayns ny achau, she shoh ta cur cooney da'n smooinaghtyn ain dy vel shin taggloo mychione ny deiney cheddin. As myr shen dy vel ny ta ny achau gra mysh yn kiangle dy row ayn eddyr reeriaght Ghivlyn as reeriaght Ghorree Crovan, dy vel ad ayns cordailys rish ny t'ain hannah veih farraneys syn elley. Ta shen dy, ghra, dy row mooinjerys chionn ayn eddyr Divlyn as Mannin feiy ny jeih bleeaney as daeed ny myr shen lurg Clontarf, as eddyr Mannin as ny hEllanyn, myr ta er ny chowraghey liorish reeaghyn va reill ayns ny ardjyn shen dy jerrinagh sy jeihoo eash as foddee ny sliee na shen. Myr shen dy vel yn chooish shoh cur faaue dooin dy beign da kianglaghyn leighoil as chionn rish Divlyn as Inshyn Goal ve ec reeaghyn ayns Mannin ny lurg shen dy ve er nyn soiaghey jeh aynshen. Ta'n Olloo Munch as sleih elley, dy cronnal Basil Megaw, er hoilshaghey kiangley ny hEllanyn. Kiangley lajer rish Divlyn ta ny farraneyssyn cur keeayll er, ny achau Bretnagh gra dy re jeh sluight Aaloo Carrane va Gorree Crovan, myr ta main er n'akin hannah, as myr shen dy lickly v'eh ny vac braarey foddey-jeh da Gorree mac Sytric.

She ard-ynnyd ayns ny achau ta currit da imraa jeh kianglaghyn reeriaght Ghorree Crovan rish Gwynedd sy trass eash jeig as beggan roish shen, as t'eh jeeaghyn dy haishbyney dy ren ny reeaghyn ayns Gwynedd coontey trome-chooishagh nyn sniemmey oc lesh linney reeoil Vannin. Haink yn sniemmey shoh dy ve ayn, t'eh jeeaghyn, tra hug dooinney er-ennym Rhodri ap Owain Gwynedd cuirrey da Rennell ayns 1193 dy cooney leshyn lesh lhuingys-caggee ayns e chaggey noi mec e vraaraghyn son dy gheddyn greim er Ellan Voan (Anglesey). Chammah's shen ren inneen ennagh da Rennell - cha's ain er e ennym -- yn Rhodri shoh y phoosey roish 1195, blein e vaaish. Hooar Rhodri yn cooney v'eh laccal, va dy baghtal feer vooar, as chur eh Ellan Voan fo-chosh. Agh v'eh dy jeeragh ceaut magh assjeh shen ec e noidyn erreish faagail Rennell as e gheiney. Lurg baase Rhodri ayns 1195 cha baillish Rennell e cho-heshaghtys marish reeaghyn as flahee Gwynedd y lhiggey ersooyl, as gow eh toshiaght veih'n vlein 1199 magh dy reaghey poosey eddyr ben treoghe Rhodri, e inneen, as Llywelyn Fawr ap Iorwerth, ree Gwynedd (1194-1240) as mac-braarey da Rhodri. Agh vrish sheese ny reaghyssyn sy vlein 1204, son va Llywelyn Fawr dy lickly coontey eh myr vondeish smoo politickagh dasyn hene dy phoosey Joan, inneen da'n ree Sostnagh John.

Agh gyn y wooise da shoh, cha row jerrey currit er y choventyn eddyr Mannin as Gwynedd, son rere coontyssyn ayns paart dy achau Bretnagh (bentyn rish sliennooys Llywelyn y Llyw Olaf (ie. Llywelyn yn Leeideyr Jerrinagh) ta er nyn imraa ayns laue screeunyn Peniarth 129 as 131, as ayns buill elley neeshtagh she ben er-ennym Rhanullt inneen elley da Rennell ree Vannin, va ny ben da Gruffydd ap Llywelyn Fawr (va ben elley ec Gruffydd enmyssit Senena haink dy lickly ny jei, son rere feanish elley v'ee ny moir da paart dy phaitchyn echey), as foddee va ny mummig da Llywelyn y Llyw Olaf, ree mooar jerrinagh ny Bretnee ayns Gwynedd veih 1241 gys 1282. Chammah's shen, rere sliennooys dooinney dy row enmyssit John ap Llywelyn ass Kidwelly ayns jiass yn Thalloo Vretnagh faggys da Llanelli ta ry gheddyn sy lioar "Heraldic Visitations of Wales" er ny femblal liorish Lewys Dwnn (c.1550 1616), va mac da Rennell enmyssit Hywel. As myr shen dy vel eh dy lickly dy re ben Vretnagh yn vummig echey, cha's ain nee co-lhiabbagh ny ben chairagh dasyn ny dyn ee. Yn ynrican eanish son shoh ta'n coonteys shoh, agh er yn oyr dy vel fys ain dy row daa inneen v'echey poost rish flahee Vretnagh hannah, as myr shen soilshaghey dy row Rennell kiarit dy hirrey co-chaarjys marish reeaghyn Gwynedd, cha lhisagh yindys ve orrin my phoos eh ben Vretnagh.

Bentyn rish yn chiangliaght Vretnagh ta RRV ginsh dooin skeeal mysh dooinney er-ennym Loghlan va mysh y vlein 1237 er ny churmaghey lesh kiannoortys Vannin liorish yn ree Harald tra v'eh ersooyl ayns ny hEllanyn, as lurg caggey marish caarjyn elley da Harald ren eh scapail marish e gholtey Gorree mac Aaloo hug y Thalloo Vretnagh syn arragh er giyn (1238). Myr va e ven-vooinjerey poost rish mac ree va reill ayns Gwynedd ec y traa shen, yioghe eh kemmyrk sauchey aynshen ny veagh y lheid er ve echey dy darragh eh bio magh ass y choayl lhuingey. Er yn oyr cheddin fodmayd toiggal cre'n fa ren Gorree, coontit dy ve ny vac da ree Magnus mac Aaloo, ree Mannin (1252-65), yn ree jerrinagh jeh linney Ghorree Crovan scapail dys yn Thalloo Vretnagh, erreish da ny Manninee er n'irree magh, agh ayns fardail noi kiannoortys ree ny hAlbyn ayns Mannin ec Runnysvie sy vlein 1275 Llywelyn y Llyw Olaf dy lickly va ny vooinjer da. As myr shen veih'n eanish t'ain fodmayd jalloo glen y ghleckey assjeh dy row coventynyn lajer fo raad eddyr Mannin as y Thalloo Vretnagh voish mysh yn kerroo jerrinagh jeh'n ghaa eash yeig derrey, as red symmoil ta shoh - jerrey ny reeriaghtyn seyrey ayns Mannin as Gwynedd ny neesht.

Syn art shoh ta mee er n'eabbey dy haishbyney dy row kianglaghyn lajer ayn eddyr ny reeaghyn ayns Mannin as ny hEllanyn, tra v'ad reill aynshen, as ny reeaghyn ayns Divlyn as ny lurg shen eddyr reeriaght Vannin as reiltee Gwynedd, ga dy vel oyr ain dy chredjal nagh re shoh yn chied choventyn eddyr oc. She'n feanish t'ain ta leeideil nyn smooinaghtyn dy chredjal dy re jeh sluight Aaloo Carrane mac Sitric va Gorree Crovan, ga dy row mooinjerys echey da fir toshee ayns ny hEllanyn. Dirree eh myr yn dooinney stroshey smoo scanshoil ayns cooishyn politickagh mygeayrt Mooir Vannin as ny hEllanyn mysh jerrey yn chied eash jeig. Ren eh Mannin as Inshyn Goal y hayrn veih smaght ny Divlynee as reill ny hOrcee, as cur er bun reeriaght cummal ee-hene seyr kyndagh rish niart e lhuingys-caggee (yn oyr dy row reeaghyn ayns Mannin veih traa Vagnus mac Arailt gys traa Vagnus mac Aaloo). Ny lhuing shen ren ad goaill ymmyd jeu, ny cur er mayl ad, goaill ayrn jeh reddyn politickagh nyn naboonyn, myr ayns Ellan Voan sy vlein 1193. Agh ga dy row ny coventynyn marish reeaghyn Gwynedd dy lickly er nyn stiurey kyndagh rish cooishyn politickagh ec y traa shen, as tamain toiggal veih farraneyssyn elley dy re shlawin cooishagh cluigagh va Rennell ayns e ghellal rish e naboonyn, foddee nagh row reeaghyn Vannin almoragh ooilley cooidjagh jeh shenn tradishoonyn yn Ellan keayrt dy row soit dy bollagh ayns seihll Bretnagh, ny Bretanag (British), as dy dennee ad dy row foddee kiangle dowin cadjin eddyr oc - ta mee booial dy haggloo mychione shoh ayns art elley. T'eh feer lickly dy dod Hywel, mac Rennell, Bretnish y loayrt as foddee e ghaa inneen ren poosey flahee Vretnagh. Fodmayd yn feysht y chur orrin hene, row Bretnish goll er loayrt ayns Mannin (chammah's Gaelg as Loghlynish as Baarle) ec paart dy leih ayns lhing ny reeaghyn ain. My chummys main ayns aigney yn coventyn eddyr ny cheeraghyn mygeayrt Mooir Vannin, cha lhisagh yindys cheet orrin feddyn brooillagh ny Vretnish, ny jeelymyn Yernish Lian ny Mooan ny ad ny neesht, ayns enmyn-buill yn Ellan ny ayns y chesh-vean Chengey ny Mayrey. S'feer veg ta ardjyn Mooir Vannin, agh she marran mooar veagh ayn dy jinnagh shin coontey feer aashagh toiggal shennaghys as tradishoonyn ny deiney ta cummal ayndaue neayr's traa Jan-Ben-Jan. Ta schoilleryn er ve abyl er-y-gherrid dy hoilshaghey dy re ny smoo cramp na smooinee shin roie ny reddyn shoh, as she my chredjue hene t'ayn nagh gowee main toshiaght dy hoiggal shennaghys jeh rheynn ny ardjyn shen mannagh dermain coontey trome da'n slane chooish.



Shorys y Creayrie 1979