Screeuyn voish Doon Edjin


Yn chiaghtyn shoh chaie hie mee lesh shilley er Ellan Arran ayns Cleayee (Clyde) enmyn-buill y hymsaghey, as tra va mee ayn veeit mee rish shenn dooinney va baghey ayns balley beg cheerey enmyssit Shiskine. She Jimmy Kelso yn ennym ersyn as v'eh mysh kiare feed bleeaney dy eash, as dinsh eh dooys yn skeeal shoh:

Roish yn Chied Chaggey v'eh jannoo shirveish ayns y cheshaght-chaggee Ghoaldagh as ec y traa v'ayn she ayns Catterick v'eh. Ansherbee cha chord y cheshagh chaggee rish as ghow eh ayns aigney dy hea ersooyl, as shen ren eh. Ren eh scapail veih yn cheshaght-chaggee as follaghey eh hene ayns Mannin.

Cha row eh tammylt ayns Mannin tra ghow ny fir-oik greim er as v'eh goit ersooyl as currit ayns pryssoon hidooragh ayns Perth. She pryssoon v'eh cadjin yn dorrys sniessey da'n phryssoon elley as tra v'eh ayns shen, cheayll eh dy row Arranagh elley ayns y nah phryssoon, as hooar eh kied dy gholl lesh shilley er.
Hooar eh magh nagh nee Arranagh eshyn noadyr agh dooinney enmyssit Rose va hoshiaght er ny gheyrey gy baase agh ny s'anmey va yn vriwnys er ny caghlaa gy bondiaght vea. She sy vlein 1890 ny mysh shen dy jagh yn dooinney shoh gys Arran ny laghyn seyrey echey y chur shaghey marish e charrey, as laa dy row ren ny neesht drappal er Goat Fell; she slieau syrjey ayns Arran eh as er y vullagh ren yn dooinney Rose yn charrey echey y cheau harrish eaynin er y clieau as huitt eh marroo sheese ayns Glion Rosa. Ren yn dooinney oanluckey e charrey fo charn cloaie as cheet er ash gys y thie-aaght v'eh tannaghtyn ayn as faagail yn ellan ayns siyr lesh cooid e charrey.
Cha row eh ry akin rish tammylt liauyr derrey chur peiagh ennagh enney ersyn ceau cooat jeh crackan keyrey v'ec e charrey.