Skeealyn voish Ellan Arran


Erreish dou faagail Mannin hie mee er ash gys Arran reesht as hug mee shilley er Jimmy Kelso, yn chenn dooinney voish Shiskyn as ram skeealyn echey. Dinsh eh dooys skeeal mychione dooinney va Jannoo ushtey-vea ayns pash-losseree heose ayns ny sleityn gyn yss da ny fir-oik - as veagh shen erskyn keead bleeaney er dy henney nish - as yinnagh eh yn stoo shoh y ghrogh braghtey gys Ardrushen (Ardrossan) ny Balleyhollan (Saltscoat) ny boayl erbee elley myr shen er y cheer vooar as argid y hirrey ersyn.

Ansherbee, oie dy row v'eh ersooyl as yn ushtey-vea marish ayns mullagyn ry chreck ayns Ardrushen, as veeit eh rish dooinney ayns shen as lurg dram ny ghaa leeid yn fer shoh yn Arranagh gys thie fer-howsee yn lhiggar dy hollaghey e laue lesh un vullag dy vogheh eh rey rish ny mullagyn elley gyn eeck keesh erbee orroosyn, agh dooyrt yn fer howsee dy gionnagh eh nane ocsyn er yn oyr dy re yn Vlein Noa v' ayn, as shen ren eh as lhig eh da yn raad. Ansherbee, dooyrt eh neesht dy ragh yn cutter gys Traie y Chashtal (Brodick) mysh mean-oie yn oie shen dy beagh eh arryltagh goll er ash. Ren eh goll lesh y chutter myr shen as lurg da goaill cheer bie eh roish by valley. Er y raad gys y thie echey sy dorraghys as ashyn snapperal er red ennagh va ny lhie er y raad kionegoyrt rish, huitt eh dy doal-tuittym. Tra ren eh foaddanaghey, she convaart jeh dooinney honnick eh sy toilshey ghullyr as va'n scoarnagh echey er ny ghiarey magh ass, as hug eh enn er myr dooinney va goaill aaght ec y valley ayns boayl rish yiarragh ad Glion Sherrig ta faggys da Traie y Chashtal. Hyndaa eh mygearyrt son cairt y gheddyn dy goghe eh yn corp er ash gys y valley. Hooar eh cairt as haghyr eh er caarjyn, as ooilley cooidjagh dymmyrk ad yn convaart ersooyl as ren ad shen y cheau sy gharey sniessey rosh ad as scapail, dagh fer gys e hie hene.

Dinsh eh skeeal elley neesht:- Doonaght dy row va sheshaght dy vraane goll shooyll gys Keeill Voirrey ayns jiass ny h'ellan son yn shirveish as er y raad smooinee ad dy beagh eh mie stappal son bine beg oc thie-oast ayns balley beg cheerey enmyssit Lagg - shen yn traa roish my daink leighyn ny joughyn dy ve ayn - as ren nane oc giu bine beg rouyr. Ny s'anmey tra v'ad ooilley nyn soie 'sy cheeill geaishtagh rish yn taggyrt sharmaneaghey, va'n ven shen ny cadley feiy yn charmane, as myr va'n saggurt cummal magh veih'n chronnag, hrog ee e laueyn myr dy beagh ee er chee dooishtey as dooyrt ish as ard-choraa ecks, "Ciod de tha'n t-seann bhugar ag ra a nis? " (C'red ta'n chenn vugger gra nish?) Clashtyn shen ghow shanstyryn ny keeilley greim urree dy tappee as cheau ad magh as y dorrys ee.