Skeealyn ass Arran as Lioas


Shoh skeeal mychione scaanjoon hooar mee ayns Arran tree meeghyn er ash, as t'ad gra dy daghyr eh paart dy hiaghteeyn roish shen.

Laa dy row haink dooinney aeg shirrey obbyr as hooar eh startey jeeigyn y chur sheese fo'n raad gys thie ennagh ayns boayl rish yiarragh ad Claghlyn (Claghlands), as cha nee feer foddey ass Traie y Chashtal yn boayl shoh.

Ansherbee, tra v'eh gobbraghey honnick eh ben as haink yn ven shen huggey as vrie ee jeh dy goghe ee kied dy hooyll mygeayrt yn thie shoh, cr yn oyr dy baghagh ee ayns shen bleeantyn cr ash sy vlein 1911. Dooyrt yn dooinney aeg nagh row eh ersyn shen y yannoo as dy b'are j'ee shirrey er ard ghooinney ny h-obbree er cheu elley'n thie lheid y chied shen y gheddyn voish, as myr shen hie ee ersooyl gys yn cheu elley. Cha smooinee yn dooinney aeg veg er shen ny sodjey as tra honnick eh ard ghooinney beggan ny s'anmey, hug eh feysht da mychione ny ben shen va son ceau shilley er y thie. "Cre'n ven?" dooyrt eh, "c'red t'ou cheet er?" Cha naik meee ben erbee mygeayrt aynshoh feiy'n voghree.

"Shen quaagh", dooyrt yn dooinney, as dinsh eh fer elley yn clane joblot. "Hug ee yn ennym urree neesht," dooyrt eh. "She Annie Allan yn ennym," agh hass yn fer elley er nagh naik eh ben erbee edyr.

Ansherbee, hooar ad magh ny s' anmey dy row ben baghey ayns shen sy vlein 1911 as dy re Annie Allan yn ennym urree, agh hooar ad fys neesht dy dooar ish baase mysh shey bleeaney er dy henney. Cha row yn daa ghooinney scooyrit edyr .

Yn traa va mee ayns Arran keayrt s'jerree cheayll mee dy by 'henn schoill yn thie sniessey da'n fer va mee tan naghtyn ayn as kiongoyrt rish yn thie shoh ta awin veg goll shaghey gluggeragh as ta droghad harree raad ta'n bayr goll laa t'ayn jiu. Ansherbee, cheayll mee veih Jimmy Kelso dy row deinney ennagh troailt dy valley er y raad shen laa dy row as dy doaltuittym cre honnick ad agh queig koiyr-oanluckee as adsyn bane as beg as v'ad goll kiongoyrt roo gyn cooney erbee veih dooinney erbee; cha row ad scooyrit noadyr as she braew shickyr v'ad fakin y lheid Haghyr eh laa er giyn dy duitt yn schoill stiagh er ny cloan v'aynjee as she queig ocsyn va er nyn marroo. T'ad gra laa jiu dy re laa breaw grianagh v'ayn as chiass mooar ayn neesht as kindagh rish shen huitt yn vullagh er ny paitchyn.

T'eh scruit sheese ayns ny recortyssyn dy ren yn schoill shen ayns Shoskyn tuittym yn aght shoh 'sy vlein 1841 as dy row queig dy phaitchyn marrooit aynshen, as ta enn ec Jimmy Kelso er ny shenn deinney t'ayn jiu as adsyn coayl shenn naunt ny shenn naim sy schoill shen.

Shoh skeeal cheayll mee veih Lioassagh ayns Doon Edijin. She ass rheynn-cheerey sy twoaie hene jeh Ellan Lioas haink eh, as she Nish yn ennym er y voayl shen. Ansherbee dinsh eh dou dy row enn echey er dooinney va baghey heose ayns Nish as by chliaghtey lesh geddyn scooyrit feiy'n laa as fud ny h-oie, as oie dy row v'eh ny lhie fo smooid vooar rish y raad. Haink paart dy chaarjyn echey ersyn as dymmyrk ad gys y rhullick eh as by oaie foshlit v'aynshen va er ny reuyrey hannah as va aarloo son soiaghey jeh corp veagh currit aynjee laa er-giyn. Ansherbee, lheig ad sheese eh syn oaie shen as daagad eh dy chadley gys y voghrey. Sy vadran ren eh dooishtey as girree as tra hass eh seose cha row red erbee agh e chione va broddagh magh ass yn oaie as fakin ny claghyn oaie mygeayrt-y-mysh dooyrt eh, "Jee bannee mee, nee mish yn chied dooinney t'er chosh moghrey jiu?"