Skeeal Ass Cheer-ee


Shoh skeeal er ny inshey liorish Donald Sinclair, ny Domhnull Chaluim Bain myr yiarragh ry ad rish, va baghey ec Balephuil ayns Cheer-Ee (Tiree).

Cha nel mee er chlashtyn monney mychione yn challiagh agh yiarragh ad, my she'n dooinney jerrinagh dooinney erbee ta cur jerrey er yn 'ouyr echey, dy vel eh eignit yn challiagh shoh y reayll sy thie echey car ny bleeaney, as myr shen my vees yn challiagh ayd, my she'n dooinney jerrinagh uss cur jerrey er dty ouyr, she drogh-aigh veagh ort. As er yn oyr shen va dy chooilley ghooinney jannoo yn chooid share echey as yn challiagh gyn ve echey, as eer va paart jeu gobbraghey fud ny h-oie dy beagh yn fouyr jeant oc as adsyn gyn geddyn yn challiagh.
Ansherbee, blein dy row va shenn dooinney ayn as v'eh baghey ny lomarcan as cha row eh abyl gobbraghey feer vie as she braew shickyr veagh yn challiagh echev ec kione yn ouyr. Ansherbee, un oie hie mish yn oie shoh marish daa ghuilley elley as va eayst ghial ayn, as va inneen aeg marin neesht. As ghow shin toshiaght er yn arroo y ghiarey lesh corranyn as cha by tammylt liauyr v'ayn tra va dy chooilley red jeant ain.
Dy moghey.er y voghree jirree yn shenn dooinney son e arroo yn ghianey as y chruinnaghey er yn oyr nagh row eh goll yn challiagh y gheddyn, as v'eh goll.dy chur jerrey er yn obbyr eh hene. Hie eh ersooyl roish y ven as tra rosh eh yn magher raad va'n arroo, hooar eh dy row yn arroo er ny ghiarey hannah as cheau eh sooill er rish tammylt fakin dy chooilley red currit ayns stookyn.
"Jee bannee mee," dooyrt eh, "she ny ferrishyn va mooie riyr as she ferrish mie va my yeih." Hie eh roish dy valley as tra haink eh er ash, "Cha row uss tammylt ersooyl," dooyrt e ven rish. "Cha row," dooyrt eh, "rinn ny ferrishyn yn clane job-lot dooys," dooyrt eh, "oyr tra rosh mee yn magher va'n arroo ooilley ayns stookyn, jesh as kiart." Agh va eie er yn dooinney quoi ren eh as hug eh dram dooin as cha dooar eh yn chaillagh er chor erbee.