Ellan Folliaght


Shoh skeeal er ny chymsaghey liorish Illiam y Kinry veih shenn deiney mysh keead bleeaney er dy henney .
T'ad gra dy vel ellan veg ayn ny lhie er ny tummey fo'n cheayn faggys da Purt Soderick as t'ad gra neesht ny shenn laghyn keayrt dy row tra va Fin MacCooyl goll mygeayrt dy row paart dy 'leih baghey er yn ellan shen as ren ad faghid er Fin er oyr ennagh as kyndagh rish shen ren eh yn obbeeys y cheau er yn ellan as hug eh urree dy ve tummit gys grunt ny marrey as ny cummaltee er nyn jyndaa gys kiapyn cloaie. T'ad gra dy voghe ad kied girree gys eaghtyr ny marrey keayrt er shiaght bleeaney rish lieh oor as dy beagh dooinney erbee ayn as daanys ayn, yinnagh eh yn obbeeys shoh y vrishey dy derragh eh bible er rheynn erbee ny h-ellan tra irreeagh eh dy bollagh ass yn ushtey myr v'ee ayn dy bunnydagh.
Oie dy row - as v'ee cheet gys kione ny mee Mean Fouyir - va ben enmyssit Nora Inney Caine shooyl er y traie marish yn dooinney va sooree urree as va rehollys vooar yn 'ouyir ry 'akin er nyn skyn tra hug ee geill da red ennagh 'sy foddeeys broddey magh ass yn ushtey as mooadaghey eh hene yn un traa. Hug ee, enn urree dy re ellan folliaght va shen as chum yn ellan girree magh ass y cheayn kiongoyrt ree. Dy doaltuittym lheim ee ersooyl veih'n dooinney as roie ee dy valley cho tappee as oddagh ee gyllagh er son yn vible son shen y chur lhee gys yn Ellan, agh va yindys mooar er e mooinjer fakin ee roie siyr mooar as hirr ad oyr urree rish shen. Dinsh ee yn skeeal daue as dy bieau ghow ee greim er y vible as vee ersooyl er ash gys yn traie yn ellan y roshtyn. Agh tra chosnee ee yn traie cha vaik ee veg agh mullagh yn ellan goll fo'n cheayn, as rish shiaght bleeaney elley yinnagh ee ny lhie er grunt ny marrey.
Veih'n oie shen magh hymlee ee rish tammylt liauyr roish my dooar ee baase as lane-trimshey urree. As t'ad gra veih'n laa shen magh nagh b'loys da dooinney erbee cosney er yn ellan shen er cor erbee.