Skeealyn ny Ferrishyn ass Arran

Shoh skeeal cheayll mee veih Jock Henderson, shenn dooinney, ta baghey nish sy thie-schoill ec Dougrie er cheu heear yn ellan.

Va dooinney croobagh cummal keayrt dy row ayns Loch Ransa 'sy twoaie as un laa v'eh mooie er y cheer son shooyll, as tra v'eh goll shaghey boayl enmyssit "Fairy Dell" - shen yn ennym er ny chur er y voayl shoh liorish ny skibbaltee; agh yiarragh ny shenn chummaltee Doo Phoyll rish - dy doaltattym cheayll eh kiaull cheet magh ass shen. Hie eh lesh shilley as cre honnick eh agh deiney veggey kiaulleaght as jannoo daunseyn sy choan shen, as by haittin lesh yn kiaull y chlashtyn. She Jelune, Jemayrt yn carr v'ad cloie, agh dooyrt yn dooinney cruittagh dy beagh eh foddey ny share shen y chloie myr Jelune, Jemayrt, Jecrean. Shen ren ad as chaghlaa ad y carr myr dooyrt eh as chord eh roo dy row shen foddey ny share. Myr shen, dy derragh ad leagh dasyn er son cooney lhieu scugh ad yn chruitt veih. dreeym dooinney as v'eh taitnyssagh erskyn towse lesh shen.

Hie eh roish dy valley as daa laa ny lurg shen v'eh goll shooyll er y traid as veeit eh rish e charrey as she cruittagh v'eshyn neesht, as tra honnick eh yn fer elley gyn chruitt erbee ren eh yn oyr y hirrey er son shen, as dinsh yn fer elley da ny haghyr.

Clashtyn shen hie eh ersooyl ayns siyr mooar gys coan ny ferrishyn dy yeeaghyn yinnagh yn mooinjer veggey yn red cheddin da, as tra rosh eh yn boayl cheayll eh yn kiaull va goll er. Vrie eh jeh ny ferrishyn yn carr v'ad cloie as dooyrt as Jelune, Jemayrt, Jecrean. "Agh," dooyrt yn dooinney croobagh, "shen ooilley aggairagh," as jimraa eh roo dy lhisagh ad cloie Jelune, Jemayrt, Jecrean, Jerdein, Jeheiney, Jesarn, son she'n carr shen ta foddey ny share na fer elley. Ansherbee, ghow ad toshiaght shen y chloie agh s'leayr daue dy re ro foddey v'eh as cha by vie lhieu shen, as haink jymmoose feer vooar er yn mooinjer veggey er yn oyr dy ren dooinney cruittagh brock jeh ny daunseyn oc. Myr shen ghow ad greim er as ren ad cruitt yn 'er elley y lhiantyn rishyn dy row daa chruitt ersyn nish, as ny lurg shen lhig ad yn raad da dy valley.


Keayrt dy row va bannish goll er cummal ayns boayl rish yiarragh ad Bennan ayns jiass ny h-ellan as er yn oie shen hug ad jerrey er yn ushtey-vea. Myr shen dy jagh jees ocsyn ersooyl gys yn thie oast sniessey tooilley ushtey-vea y chur lhieu er ash as dymmyrk ad mullagyn er ny geayltyn oc. Erreish daue geddyn y stoo haink ad roo er ash, agh tra v'ad cheet er y raad cre honnick ad agh towl va foshley kiongoyrt roo sy thalloo. As cheu sthie yn towl va soilshaghyn ny ferrishyn ry akin as kiaull ry chlashtyn, as honnick ny neesht oc ny deiney veggey jannoo daunseyn as y lheid ooilley cooidjagh. Dooyrt fer oc dy ragh eh stiagh son rink, agh dob yn fer elley shen yn yannoo as jimmee eh er ash gys yn ghiense vanshey.

Tra hooar eh er ash dinsh eh yn lane-skeeal mychione e charrey, agh clashtyn shen hie paart dy gheiney ec y vannish son nyn garrey y hirrey, agh lurg daue roshtyn yn boayl va'n fer elley ginsh mychione cha row towl erbee ry akin, as my shen haink ourys mooar orroo dy ren yn fer elley varr nyn garrey er y raad er ash as dinsh eh yn skeeal son yn kimmeeys shoh y 'ollaghtyn. Myr shen hie ny deiney ersooyl lesh shilley er mummig yn aaishnee dy row son coyrle, as dooyrt ee roo nagh lhisagh ad bentyn rish yn dooinney va fo ourys rish blein as laa, agh dy re yn laa shen lhisagh ad troailt gys y voayl shen raad ren nyn garrey yn skellal as aynshen dy vioghe ad yn towl foshlit.

Myr shen dy duirree ad gys haink yn laa pointit, as y laa shen hie ad roo as hooar ad yn towl er ny 'oshley as she'n dooinney hene honnick ad jannoo daunseyn foast marish ny ferrishyn, as y vullag er e gheaylin foast neesht. Hug ad sarey da cheet magh as shooyll dy valley maroo, agh dooyrt eh, "Jean-jee fuirraght gys bee jerrey rinkit aym." Tra haink eh magh ass y towl, smoonee eh dy re tammylt beg v'eh aynshen son jus' un ghaunse ynrican y yannoo.