Skeealyn ass Purt ny h-Inshey


Shoh skeeal ta mee er chlashtyn veih Ewan y Christeen ta baghey laa jiu ayns Straid Pherick, Purt ny h-Inshey, as hooar mee mysh tree bleeaney er ash eh.

Bleeantyn er dy henne nish hie ooilley ny baatyn son eeastagh yn skeddan magh gys yn ghrunt eeastee veih Purt ny h-lnshey aynshoh, as va ny mast oc baatyn veih yn Albin, yn Erin as shiaght ny hoght veih'n Ellan. Nish va'n emshyr castrey-cair as v'eh kiune tra hie ad magh, agh va bodjallyn mooarey as trome ayn as ghow eh toshiaght dy irree seose ayns yn heear ass; as tra va'n baatey er roshtyn dys yn voayl-eeastee, hug ad magh nyn lhieenteenyn, as tra va ny lhieenteenyn currit hie ad stiagh sy chabbane son dy ghoaill cappan dy hey, as va fer jeu currit dy reayll arrey. As traa beg lurg shen jirree yn gheay dy doaltuittym as ren ny tonnyn gatt as haink yn vooir dy ve freaynagh. Myr shen ayns siyr mooar ren ny eeasteyryn tayrn ny lhieenteenyn huc, as hiauill ad son dy chosney er yn astee jeh'n phurt, ooilley er lhimmey jeh un vaatey.

Nish ayns y vaatey veg shoh va shenn dooinney dunnal dy row enmyssit Juan Hall, as dooyrt eh rish e chumraagyn sy vaatey marish yn skimmee echey, - "C'red t'ou smooinaght eryn emshyr, my ghuilley?" "T'eh ro sterrymagh," dooyrt eh, "t'eh ro sterrymagh." "Oh, ta," dooyrt eh, "ta mee smooinaghtyn dy bee ny share dooin nish fuirraghtyn derrey veesmayd fakin yn laa brishey harrish ny crink er y voghree, as foddee dy bee beggan dy skeddan ayn as bee yn leagh son y skeddan, leagh mooar ec y margey sy voghrey."

Nish ayns y voghrey er yn oyr nagh row shilley erbee jeh'n vaatey veg shoh ry akin ayns y phurt, va'n phobble ec y gaase feer imneeagh, son va fys oc dy row yn baatey shenn as annoon. Myr shen mysh leih oor lurg hoght er y chlag 'sy voghrey hie yn baatey-sauailtagh magh dy hirrey yn oyr nagh row eh er roshtyn dy valley. As hie ad gys y jiass, gus y sheear as lurg shen gys y twoaie as hooar ad eh ayns shen. As tra honnick yn shenn dooiney yn baatey sauailtagh cheet huggey, as tra v'eh er gerrey da, dooyrt eh rish yn stiureyder 'sy vaatey sauailtagh, "C'red t'ou jannoo mooie aynshoh, Yamys ? T'eh ro sterrymagh dy ve mooie aynshoh! Ersooyl lhiat, ersooyl lhiat, ersooyl lhiat," dooyrt eh, "son ta mee jannoo dy mie, Ga dy vel daa filley ayns y shiaull ain, as cled mooar ain er y vaatey, ta'n baatey chirrym ."
Ny yeih ren y ghaa vaatey troailt dy cooidjagh derrey chosnee ad er ushtagyn kiune yn phurt. As la mee goll dy insh diuish dy row yn phobble ec y phurt feer wooisal fakin yn shenn dooinney as yn skimmee echey cheusthie ny ushtaghyn kiune jeh'n phurt reesht.


Skeeal ass Purt ny h-Inshey 2


Shoh skeeal ta mee chlashtyn veih Ewan y Christeen ass Purt ny h-Inshey mysh tree bleeaney er ash.
Bleeantyn er dy henney nish ta mee er chlashtyn dy row shenn dooinney cummal ayns thie-thooit beg rish ooir y strooan ec cass y chrink ayns boayl er gerrey da Purt ny h-Inshey ta enmyssit Glion Meay. As ta mee er chlashtyn dy re kenjal yn dooinney shen son shimmey obbyr vie va jeant echey da'n sleih ayns y skeerey; as ta mee er chlashtyn dy row un oasht mie echey, son ayns y gheurey yinnagh eh faagail yn dorrys eayslit as er y snig as she ymmodee troaltee yioghe fastee ayns shen, tra v'ad goll gys nyn dhieyn .
As ta mee chlashtyn neesht, tra va'n shenn dooinney goll dy lhie, harragh ooilley ny mooinjer-veggey veih'n skeerey mygeart stiagh sy thie echey son dy ghoaill fea as dy gheddyn cheh rish ny smarageyn va faagit sy chiollagh. As mooar va'n skeet v'oc son va dy chooilley naight sy skeerey as dy chooilley red va goll er ec ny mooinjer-veggey.
Nish un oie va ny mooinjer-veggey shoh goll sheese lesh shilley er ny mooinjer-veggey va heese ec yn voayl enmysit Cooyrt yn Aspick as tra v'ad er ngoll shaghey thie'n shenn dooinney, dooyrt fer rish fer elley: "Lhig dooin cur shilley er, as yllagh er son dy ghoaill eh marin, sgn t'eh feer vie dooin fud yn gheurey."
As hie nane jeusym sheese as chrank eh er yn dorrys as tra haink yn chenn dooinney magh er y traid, dooyrt fer ny mooinjer-veggey "Vel oo geeamee goll marin er jurnaa gys Cooyrt yn Aspick son giense?". "Cha voddyms gra," dooyrt eh, "son cha nel cabbyl ayms" (son va ny mooinjer-veggey ooilley markiagh er cabbil aalin). "Agh," dooyrt fer rish yn chenn dooinney, "Immee stiagh sy thie as fow yn garmin ass yn ghreie ayds," - son she fidder yn chenn dooinney - as tra haink eh magh er y traid as yn garmin marish, chelleeragh va'n garmin chyndaait gys cabbyl mie, as cabbyl aalin, as myr shen dy row eh abyl goll marroo er yn Jurnaa.
Nish cha row ad goaill ny raaidyn, agh hie ad harrish ny magheryn as harrish ny jeeigyn as ny cleighyn gys haink ad gys boayl enmyssit Glion Cam. Nish tra haink ad aynshoh, cha ren ad goll stiagh lesh y Cam agh lhiem ad harrish ny biljyn sy ghlion veih un gys yn cheu elley. As tra va shen jeant, dooyrt yn chenn dooinney: "My Yee, my Yee, cre'n lhiem mooar v'ayn!" as chelleeragh v'eh faagit soit ayns mean y raad er y gharmin, son ta me goll dy rish diuish dy row eh noi aigney mie ny mooinjer-veggey dy ghoaill ennym yn Chiarn ayns fardail .