Cabdil 14

Brishey Ushtey Purt Chiarn

Mysh yn vlein hoght cheead jeig three feed as kiare va'n chlagh undin yn Vrishey Ushtey ec Purt Chiarn soit. Va Illiam Milner yn ard ghooinney ayns y chooish.

Va slane stott spongit son yn laa mooar. Ren eh troggal bwaag, ayns magher yn Rowany, da sleih yn skeerey, as feallagh elley, dy ghoaill soylley jeh ny reddyn mie va ny cour oc. Va tubbagyn dy lhune, ny jough vie, noon as noal ayns y vagher, da dy chooilley unnane son dy iu jeh, Va dagh er cur-lesh saagh dy iu ass, eisht vod goll trooid yn bwaag, nane as nane, er-eiyrt dy cheilley. V'ad geddyn daa slissag dy arran, as slissag feill vart spongit, as eisht goll magh er yn chione elley yn bwaag gys ny tubbagyn lhune, as diu ad ny saie. Ec yn oie va feailley elley oc, er lout " Yamys Archie," da dy chooilley unnane harragh dy ghoaill eh.

Hooar Kiannoort Loch, Illiam Milner, as fer ny j ees elley, three feed as hoght dy housaneyn veih ny Gioalteyryn ayns Lunnon, dy yannoo yn Vrishey Ushtey ayns Purt Chiarn, Cha row ad geddyn monney argid dy eeck ayns use, agh red beg dy phunt 'sy vlein. Va ny Gioalteyryn laccal yn argid dy ve eeckit daue reesht, Ren Kiannoort Loch cur-lesh yn chooish kione-fenish yn Chiare-as-feed dy eeck yn argid. Dooyrt adsyn rish nagh row adsyn er ve briet mychione echey, shen-y-fa cha row ad dy lhie roish. Eisht va sheshaght reiht ass yn Chiare-as-feed, as y Choonceil, dy gholl gys Lunnon, dy yannoo bargane. As choard ad myr shoh:
V'adsyn geeck mysh nane as feed dy housaneyn da ny Gioalteyryn.


Son shen v'ad geddyn keesh er ooilley yn stoo va cheet stiagh ayns yn Ellan da'n Ellan, as screeunyn dy chooilley laa, as pooar dy hroggal keesh er thalloo, ooilley currit cooidjagh, t'eh mysh kiare thousaneyn 'sy vlein da'n Ellan. Shen-y-fa cha vel Purt Chiarn lhiastyn veg dy argid da'n Ellan.
Son yn oyr shoh, ren Kiannoort Loch cur ersooyl yn chenn Chiare-as-feed, as eisht va'n sleih dy reih yn Chiare-as-feed adhene, dy yannoo yn Chiare-as-feed lhie roish son keeshyn yn Ellan.