Cabdil 2

Yn Lioar Imbee

Ren ny Manninee rheynn yn vlein ayns daa ayrn, sourey as geurey.
Sourey ghoaill toshiaght er Laa Boaldyn, as geurey er Laa Hauiney.
Va'n tourey as yn gheurey rheynnit ayns yn arragh ny traa correy, as yn ouyr, ny traa vuinney. Va ec dagh imbagh three meeghyn, yn chied vee, yn vee veanagh, as yn vee s'jerree.
Va freilt feaillysyn as laghyn feailley soit liorish yn agglish. Va margey freilt er laa feailley, as hug sleih lesh yn chooid oc gys yn vargey dy chreck. Ta cooinaghtyn aym pene er ollan, snaie ollan, eggaghyn eaddee, yeeast chirrym, skeddan hailjey, as lhiare, creckit er yn daa laa as feed jeh'n vee veanagh jeh'n tourey, er Laa Colum, ayns Skeerey Chairbre.

Er y feailley Laa Colum ec yn Vallabeg, ta mee er n'akin whilleen as feed bwaag son creck lhune eddyr y daa ghroghad, as myrgeddin er yn hoghtoo laa as feed jeh'n vee s'jerree jeh'n ouyr, feailley Laa Simon as Jude.
Ta ny bwaagyn as ny buird arran-ginger ooilley ny ta er mayrn jeh'n chenn eailley, as cha vel bwaag er ve ayns yn nabooys shoh son bleeantyn.


Va shenn skeeal mychione Katriney, eirey jeh Colby Mooar. Cha row ee poost, as v'ee geearree yn ennym eck dy ve cooinit son traaghyn dy ry-heet, as dy yannoo shoh hug ee meer dy vagher son grunt margee, son y Feaill Katriney, va'n cheeill eck er yn thalloo eck, as va kiark dy ve er ny marroo, as palchey dy lhune dy ve iut ec yn feaillys.
Ta skeeal elley, roish my row veg dy hurneyryn ayn, va'n sleih jeh Colby Mooar cur dy lhiattee ooilley ny tuittymyn magh va eddyr oc ec y Feaill Katriney, as dy jinnagh dagh sheshaght speeney paart jeh ny fedjagyn as goanluckey ad, as va'n chooish reaghit.

Ta mee er chlashtyn shenn ghooinney gra dy ren yn vummig echey freayll thie-oast, as t'ee er gra rish dy jinnagh ny deiney as guillyn aegey jeh'n nabooys marroo kiark, as yinnagh ad shooyl jees as jees, cummal yn chiark eddyr ad, as yinnagh yn feallagh elley shooyl jees as jees trooid yn vargey lesh ny idd jeu, myr dy veagh ad ec oanluckey, as v'ad kiaulleeagh,
" Kiark Katriney marroo.
Gow uss y chione, as goym's ny cassyn, As ver mayd ee fo halloo." Harragh ad eisht hug yn thie oast, as geddyn palchey dy lhune.
Va farrar freaylt harrish yn chiark, as moghey laa ny vairagh hie ny deiney dy " speeiney yn chiark."
Va'n chione as ny cassyn giarrit j'ee, as v'ad oanluckit. Hug eh caa daue dy gheddyn bine beg er laa ny vairagh. Pyagh erbee va goll gys yn thie oast er yn laa lurg da'n vargey, va sleih gra " T'eh goll dy speeiney yn chiark."