Cabdil 3

Laa Boaldyn

Va ny mraane obbee smooinit dy ve lane pooar oc er Laa Boaldyn, as v'ad cliaghtey dy phrowal ooilley yn phooar va fys oc dy yannoo assee da sleih elley. T'ad er ve cronnit shassoo cheu-mooie jeh thieyn moghey moghrey er Laa Boaldyn, as gobbraghey ny roihaghyn oc dy hayrn yn aigh vie veih sleih elley.
Beagh er astyr oie Voaldyn ec guillin aegey crosh keirn ayns ny bayrnyn oc, as veagh crosh kianglt rish famman yn ollagh, ny baagh elley veagh ayns yn thie.
Ta'n aght cair dy yannoo crosh keirn dy scoltey un vaidjey as cur maidjey elley trooid, as myr shoh kiangle ad cooidjagh.
Va blaaghyn vluight, shuinyn, as cleesagh currit roish yn dorrys jeh ny thieyn as ny thieyn ollee dy reayll ad voish assee as drogh spyrrydyn.
Va blaaghyn as lossereeyn currit er bun dorrys, as stoyl uinnagyn, ayns ny thieyn dy reayll ersooyl ferishyn.
Va ushtey dy kinjagh freaylt ayns yn chrockan ec yn oie da ny ferishyn.

Va bollan feailleoin ceaut ayns yn chooat, as ny keayrtyn ayns ny bayrnyn 'syn astyr Laa Boaldyn, as er fastyr Laa'l Eoin. Va aileyn foaddit, as aile ayns cleiyee, as conney va losht dy agglagh ersooyl ny drogh spyrrydyn. Ren ad cur er ny cleiyee jeeaghyn gollrish boallaghyn dy aile. Shen bun yn fockle " Boal Tiene," Boal aile. Va guillin aegey lheim trooid yn aile, as va'n ollagh ny keayrtyn eiyrt trooid yn aile, dy reayll ad voish assee son slane blein.
Veagh carryn sleodey dy bollan feailleoin tayrnit veih boal dy voal, dy eiyrt ny drogh spyrrydyn ersooyl.
Va bollan feailleoin smooinit dy reayll jeh dy chooilley horch dy goghanyn currit lesh liorish drogh spyrrydyn, son dy row ad feer agglagh roish. Va'n aght cair dy reayll yn lhuss dy hayrn seose ee lesh ny fraueyn er yn astyr Laa'l Eoin, ec yn vean oie. Dy beagh ee tayrnit seose ayns yn aght shen, yinnagh ee freayll yn ymmyd kiart son yn slane blein.

Va paart dy leih genmys eh yn bollan bane, kyndagh rish yn daah bane fo ny duillaghyn.
Va cayrnyn sheidit fud-ny-hoie, as dollanyn chiaullee cloiet.
Ta sleih er yarrood dy row clig hoshiaght ymmyd jeant jeu dy agglagh drogh spyrrydyn ersooyl voish yn cheeill.
Moghrey Laa Boaldyn, dy leah er y laa, Kerree Mac Mollagh, shoh va sleih gra, v'ee " chirmagh yn ollagh as cur baase da ny lheiyee."

Lurg da ny cayrnyn va sheidit, as ny clig bwoaillit, ny dollanyn cloiet, ny blaaghyn vluight, shuinyn, cleesagh, as sumarkyn currit roish ny dorryssyn, as ny croshyn keirn ayns ny bayrnyn ny guillyn, as ayns fammanyn yn ollagh, as ny carryn sleodey dy bollan feailleoin tayrnit veih boayl dy voayl, as ny drogh spyrryd yn eiyrt ersooyl, as sleih as maase shooyl trooid yn aile, eisht va ny magheryn aarloo dy chur yn maase er yn aiyr.
Va ny bwoailtchyn yn boayl son yn ollagh ayns yn oie.

Er Laa Boaldyn va feaillys mooar er ny cummal ayns Ballachastal, as va sleih voish dy chooilley ard jeh Mannin cliaghtey cheet ayns eaddagh feailley oc.
Va cloie caggee cummit, caslys jeh'n chaggey eddyr sourey as geurey.
Va'n cheshaght souree jeh mraane seyrey as deiney seyrey er ny leeideil liorish yn ven aeg s'aalin, v'ee enmyssit quean y touree, as va'n cheshaght yeuree jeh deiney obbree as mraane obbree coamrit ayns yn aght quaagh, as ayns aght erbee dy bailleu, son gamman as cloie, as va'n fer hoshee enmyssit ree gheuree. Va'n dooinney s'jerree va ree gheuree va Captan Tyldesley jeh Beemakem.

Va'n cheshaght gheuree eebrit liorish yn cheshaght souree er yn raad gys Scarleod, as tra rosh ad gys Scarleod va'n chaggey harrish, caslys dy row yn ghrian er gholl dy lhi-e ayns y heear Eisht hooar ny sheshaghtyn bee as jough, as lurg shen va daunsin as gammanyn jeh dy chooilley horch.
Bollagh ad geddyn whilleen viol cloiederyn as oddagh ad, as sleih va oayllagh er y cheilley ren ad adhene ayns sheshaghtyn veggey, as goaill soylley jeh sheshaght y cheilley yn aght share oddagh ad.