Cabdil 5

Ooashley - ny - Greiney as Ooashley yn - Eayst

Va Sauin ny Bel Sauin yn jee syrjey jeh ny Gaeljee. Haink ny Gaeljee voish Asia, as yn vun fockle "Sauin" haink veih " saue" as " an," as v'ad dy ve toiggit " kiarkyl yn ghrian." Cha row ad booiagh genmys yn ennym echey (Bel Sauin) as ren ad genmys ee yn ghrian. Va'n ennym echey myr yn annym echey. V'ad smooinaghtyn dy row eh persoon, son dooyrt ad " t'ee girree," as " t'ee goll dy lhie."
Tra va ny baatyn " ec yn skeddan " er y Vaie Vooar, v'ad genmys yn voayl v'ee girree " Cronk yn Irree Laa."
Cha row ny Gaeljee fo varrynys ayn, son dy chooilley smooinaght ta shin goaill as dy choo illey red ta shin jannoo ta shin ayns lhiastynys da'n ghrian.
Ta'n irriney jeh shen dy ve fakinit ayns shoh. Myr ta dooinney tayrit ayns ceau sniaghtee, mannagh jinnagh eh cummal shooyl, nee eh coayl yn vhioyr jeh cassyn as laueyn, as hig eh dy chadley, as cha jean eh dy bragh doostey arragh. Cha jean eh smooinaght ny gleashagh. Cha beagh red erbee bio er y theill dy bee dy vel chiass cheet voish yn ghrian. Cha ren ny Hewnyn credjal ayns yn irree-seose jeh ny merriu derrey lurg daue va er ve ayns cappeys, as ren ad gynsagh eh ayns shen voish irree ny ghreiney.

Ren yn ghrian girree seose voish fo halloo ayns yn shiar, as hie ee sheese ayns yn sheear. Cha row ad shickyr nee yn chenn ghrian haink seose reesht, ny grian noa cheet seose dy chooilley laa, agh hie ad dy chur ooashley j'ee yn chied red 'sy voghrey, tra ren yn ghrian girree, as t'ad jannoo shen foast ayns yn cheer shen.


Ren- ny Hewnyn smooinaghtyn dy row yn theill rea goll-rish claare, as va ardjyn er, as va'n thalloo chaglit cooidjagh ayns yn un voayl, as va'n ushtey fo, as fo'n ushtey yn diunid gyn kione. Va slane eaghtyr y thalloo coodit har rish lesh yn aer ny niau, myr coodagh claare, as ayns yn aer va currit yn ghrian, yn eayst, as ny rollageyn, dy chur soilshey, dy reill yn laa as yn oie. Va ny ushtaghyn erskyn yn aer va er ny scarrey veih ny ushtaghyn fo'n aer. Va uinnagyn ayns yn aer, as tra v'ad foshlit ren fliaghey cheet sheese. V'ad smooinaghtyn dy voddagh ad troggal toor dy roshtyn seose gys niau, as v'ad smooinaghtyn dy voddagh aaraghyn roshtyn seose myrgeddin.
V'ad genmys yn toor " Babel," ta shen " yn ghiat jeh ny jeeghyn." Ta'n vun fockle " Baal " t'eh mainshter, ny chiarn, ny fer s'lajer, as va dagh cheer as va Baal echey da hene.
Cha row ad dy yannoo caslys erbee jeh'n Chiarn Jee, ny caslys jeh red erbee ayns niau heose, ny er yn thalloo wass, ny jeh red erbee fo'n ushtey.
Va ooilley aile cheet voish yn ghrian, as ayns shenn hraaghyn v'ad cliaghtey loshtey ny kirp jeh ny merriu dy chur kied da ny spyrrydyn dy gholl reesht gys yn ghrian.


Beign da sleih er ve ooashlaghey yn eayst as myrgeddin yn ghrian, son cha bliak lhieu fakin yn eayst noa son yn chied hraa trooid gless. V'ad booiagh argid ve oc ayns nyn phoggaidyn, as dy hyndaa yn argid lesh nyn laueyn ayns ny poggaidyn oc, as jannoo yeearree dy gheddyn palchey argid, as ta'n cliaghtey shen oc ec y traa t'ayn. Harragh ad magh ass y thie son nagh vaik ad yn eayst noa trooid gless, as ta mee er chlashtyn sleih gra tra yin nagh ad fakin ee, " Bannit dy row yn eayst noa, as bannit dy row mish." V'ad smooinaghtyn tra va sleih goll ass nyn geeayl dy row eh kyndagh rish yn eayst, as ren ad myrgeddin smooinaghtyn dy row ad dy mennick ny smessey ec caghlaa yn eayst. V'ad smooinaghtyn dy row ooilley mraane fo phooar yn eayst, as va'n earish as ny tidaghyn fo.

Ta chibbyr ushtey ayns Ballalhionney ayns Bradda, enmyssit Chibbyr Bolthane, as ta'n ushtey eck mie son sleih ching. T'ee er mullagh yn Abbey, ayns lhiattee jiass Baie Fleshwick. Ta cronnag combaasit runt mygeayrt lesh claghyn, boayl v'ad cur ooashley da'n ghrian ayns shen. Ta Cronk yn Irree Laa shiar jeh mullagh yn Abbey, yn voayl ta'n ghrian girree. Tra va'n ghrian girree v'ad cur ooashley j'ee. Ta cronnag elley cheu-mooie, boayl te smooinit v'ad geiyrt yn maase, dy reayll ad voish assee er son yn vlein shen.