Cabdil 6

Yn Ouyr

Va'n ennym er jee arroo Lug, ny Luan, as va'n feailley echey freaylt er Laa Lhuanys. - Dy yannoo yn thalloo ny sassey dy chuir rass as dy vuinn yn arroo, ve rheynnit ayns immyraghyn, red beg smoo na daa stundayrt, as yn chied hreagh ren yn cheeaght jannoo va en myssit yn foshley, ny " bai," as yn chreagh s'jerree va enmyssit yn " chlash."
Va shoh jannoo eh n'sassey dy chuir, son nagh beagh balkyn erbee jeant. " Ny jean balk jeh thalloo mie," va shenn raa-cadjin.
Tra va mheil veayneeyn goll stiagh ayns y vagher, va daa veaynee er dagh immyr, as yn chied er, ny reih beaynee, va enmyssit yn " furriman," as yn fer s'jerree va er y ghart.

Va dagh beaynee as corran echey, as lurg da v'eh er ghiarrey lane-doarn dy arroo, ren eh cur cront er nyn ghing, as myr shen jannoo queeyllagh, as eisht hug eh yn wheeyllagh er y thalloo, as cur beamyn jeh'n arroo er yn wheeyllagh derrey veagh dy liooar echey dy yannoo bunney. Tra veagh shen ve jeant yinnagh eh jannoo queeyllagh elley. Veagh pyagh elley cheet geiyrt orroo, as kiangley ny bunneeyn, as eisht soiaghey seose ny bunneeyn ayns sthook.
My yogh yn ghart trooid yn oght echey hoshiaght roish yn furriman v'eh grait dy chur losh da'n furriman.
Ayns mean yn astyr veagh ad geddyn pynt dy lhune, ny bainney as arran as eeym, as va shen enmyssit " mrastyr beg."

Tra va'n arroo ooilley giarrit, va'n meer s'jerree currit lesh thie, as ny cassyn chianglt as feeit, as ve freaylt son oural gys Jee yn Arroo. Ve enmyssit " yn vheillea." Hie yn vheil dy veayneeyn thie, as chur jeu eaddagh obbree, as eisht chur orroo yn eaddagh share, dy heet gys shibber ny mheillea.
Lurg shibber veagh daunsin, as viol cloieder oc dy reayll traa rish yn daunsin. Tra va'n laad s'jerree currit lesh thie, v'eh enmyssit " sthook y brimmin," as my va ghaa ny three dy chartyn ayns y vagher cooidjagh veagh ad streeu rish y cheilley quoi veagh hoshiaght, er yn oyr nagh row ad laikal ve enmyssit yn sthook y brimmin. Va drogh haghyrt ayns yn streeu shoh gys dooinney aeg ren tuittym jeh kart as brishey eh shleeast echey tra v'eh geiyrt tessen clash, va shoh yn oyr dooys dy ve fer lhee.


Ren eh tuittym jeh'n chart tra ve anmagh er yn astyr, as v'eh currit lesh thie, as ren mee soiaghey yn chraue. Laa ny vairagh hie mee son yn charrey ayms Illiam Clugaish, yn Strang, fer dy hoiagh craueyn jeh foaynoo mooar. Ren eh cur coyrle da my yishig dy chur mee gys Hospital Guy, Lunnon, as hie mee yn un chiaghtyn as va'n dooinney aeg son geddyn ass y lhiabbee.
Ren yn sleih goll er yn chied ghoonaght jeh'n ouyr, ny yn chied laa jeh'n chied vee jeh'n ouyr, dy yannoo lhiasaghey da Lug, ny Luanys, jee yn arroo. Hie ad gys Baroole, yn clieau syrjey, dy hymsagh banganyn dy choinney freaie as berrishyn freoaghane-ghorrym. T'ad shooyl gys Baroole foast dy gheddyn ny berrishyn, agh nagh vel fys oc cre hon aght t'ad jannoo eh.