Cabdil 7

Shibbyr Burt Baatey

Ren mee taghyrt dy akin sheshaght baatey lurg shibber burt baatey ayns y vlein hoght cheead yeig queig jeig as daeed.
Va'n chibber goit ayns thie mainshter y vaatey. Va'n ennym echey " Thomase Joss," as va'n ennym y vaatey " Swan."
V'ad rheynn ny ayrnyn, as failley cheshaght son y nah vlein.
Ec lhiattee y thie va magher faiyr, as va ec yn cheshaght meer dy snaie, stoandey, as maidjey raue.
Hug yn vainshter y vaidjey ayns loob ayns y chleigh dy stiurey.
Hie daa ghooinney harrish y chleigh, as va'n snaie currit harrish y chleigh. Hooar yn daa ghooinney holt jeh'n snaie, as hug ad lhieu eh magh ayns y vagher choud as harragh eh.
Va daa ghooinney er y dreeym, as fer ec y lint, as va fer elley ceau ny mollagyn magh.

Roish ghow ad toshiaght dy chuir yn snaie, v'ad taggloo mysh y shiaulley hug y ghrunt skeddan.
Dooyrt Johnny Dan dy row ee goll dy moal.
" Ta partan er y thoyn eck jiu ta mee credjal."
" Te ro leah dy chuir."
" Te traa dy liooar," dooyrt fer elley.
" Cha vel y ghrian dy lhie foast."
" Foddym fakin ingin my ordaag foast." *
" Nish, my ghuillyn, lhig dooin goaill burt, as chuir."
" Ta mee booiagh," dooyrt fer, " As ta mee booiagh," dooyrt fer elley.
" Ta caslys mie ain."
" Naik shiu yn pherkyn? "
" Honnick."
" R'ou prowal ayns shen, buy? "
" Va, buy."
" Dob ad snaue."

* Cha row yn lieen dy ve cuirt, choud as yinnagh dooinney fakin ingin yn ordaag echey, tra va'n roih echey sheeynt magh.

" Quoid t'ou cur ass y piyr? "
" Mysh keead."
Lurg tammylt dyllee y vainshter da fer elley,
" R'ou prowal y nah cheayrt? "
" Va, buy."
" Ren ad gobbal snaue."
Dooyrt fer elley, " Te kiart cha mie dooin prowal reesht."
" Ta skeddan dy liooar ayns shoh."
" Lhig dooin craa as cur magh reesht ee son oor."
Lurg jee ve oor cuirt, " Te kiart cha mie dy chur er boayrd. Te jeeaghyn quaagh," as va'n snaie ooilley er y tedd, as hug shin claghyn pohll er y snaie.
" Te sheidey feer creoi."
" Lhig dooin cur seose y chron."
" Chion sheet y lug dy chummal yn chione eck hug y cheayn."
" Cur shiu shiaull hug y chron dy tappee, ta'n cheayn roie feer trome."

As yn chied red chiangle shin three reefyn ayns y shiaull mean, as hie shin gys purt. Tra va shin goll cheayll shin eam, " Ta dooinney harrish boayrd."
" Baatey! Baatey! "
" Graih Yee."
" Beem's baiht."
" Cur magh yn yawl."
" Jean siyr ! Jean siyr ! "
" Bee oo roud."
" C'raad t'eh? " " C'raad t'eshyn? "
" Ta mee fakin eh."
" C'raad ta'n chlip? "
" Ceau coyrd huggey."
" Vel eh echey? "
" Vel eh er n'gheddyn eh? "
" Ceau mollag huggey."
" T'eh goll sheese y nah cheayrt."
" T'eh aym. T'eh aym."
" T'eh ayns shoh."
" Tayr holt er folt y ching."
" Greim eh er y wannal."
" Cum shickyr eh."
" Trog eh er boayrd."
" Chyndaa eh er e ghreeym."
" Cur eh tessen y stoandey, as lhig da'n ushtey roie ass."
" Vel yn ennal ayn? "
" T'eh lieh-varroo."
" Vel eh tayrn ennal? "
" T'eh cheet huggey."
" T'eh tayrn ennal."
" Cha n'aggle da foast."
" T'eh cheet my-laue."
" Ta'n chooid smessey harrish."
" V'eh bunnys baiht."
" S'faggys v'eh da baase."
" Cha bee dooinney baiht my t'eh dy ve croghit."
" Lhig dooin goll as goaill jough y dorrys."
Te ooilley dy mie ta cur jerrey dy mie.
Cha naik mee rieau jannoo cloie ayns thie cloie cha mie ayns my vioys.
Ve cloie firrinagh Gaeljee.