Dunveryssyn yn Tooder-Folley - The Vampire Murders

Skeeal straneagh liorish Brian Stowell: Ayrn 80
A serial story by Brian Stowell: Part 80

‘Cha nel mee cliaghtit rish sleih briaght jeem vel mee shickyr’, dooyrt Zeffer veih’n yrjid heose. ‘Hooar ny deiney shen baase jeh teaymyn-cree. Ny tuill ayns ny mwannallyn oc, cha row ad agh jeh beggan scansh. Shegin diuish, ny meoiryn-shee, feddyn magh cre’n fa va ny tuill ayn - my vees shiu abyl shen y yannoo’.
‘Beemayd abyl’, dooyrt Baldwin. Ny fir-lhee shoh, v’eh smooinaghtyn.
‘Gheiney seyrey’, dooyrt Zeffer, ‘yiow shiu yn imraa ayms tra vees eh aarloo. Ta treisht aym dy bee shiu abyl dy hoiggal eh.’
‘Agh row dunverys jeant?’ ren Sidebotham briaght. ‘V’eh jeeaghyn dy row yn daa ghooinney marrooit dy anleighalagh’.
‘Shiuish ny meoiryn-shee’, dreggyr y patoayllee. ‘Cha nee agh fer-lhee imlee mish! Ghow uss ymmyd jeh’n ‘ockle shen “jeeaghyn”. Dy mennick, ta ram eddyr “jeeaghyn” as y red ren taghyrt dy firrinagh...Ta skeealyn goll mygeayrt dy row y daa ghooinney shoh nyn lhie marish mraane traa ennagh roish my row ad feddynit marroo. Foddee dy nee cliassyn v’ayn as dy row ny deiney shoh er-çhee geddyn baase jeh teaymyn-cree. Foddee dy dooar ad baase kyndagh rish comyssey - oddagh shiu gra dy ren ny mraane dunverys!’
Va ny meoiryn-shee goaill yindys. Row y patoayllee ass e cheeall? Er y chooid shoh, va shoh slane meegherrymoil.
----------------------------------------------------------------------------------------------------------------
Cha nel mee cliaghtit rish sleih briaght jeem vel mee shickyr..(ha-NELL-mee- KL’YAKHT-it-rish-SLA-ee-BRY-akht-JEEM-vell-mee-SHIGG-er) - I am not accustomed to people asking me if I’m certain.. (‘..people asking of-me am I certain..’) No ‘if’ in the Manx!
..cha row ad agh jeh beggan scansh. (ha-ROW-add-akh-jay-BEGG-an-SKANSH) - ..they were only unimportant. (‘..they weren’t but of little importance’.)
..my vees shiu abyl shen y yannoo. (ma-VISS-shoo-ABLE-shen-a-YINN-oo) - ..if you are able to do that. (‘..if you will be able that to do’.)
Gheiney seyrey..(GHAYN-ya-SUR-a) - Gentlemen..!
Note: some first letters change when you speak to someone.
..yiow shiu yn imraa ayms tra vees eh aarloo. (YOH-shoo-in-im-RAA-IMM-iss-traa- VISS-a-ERL-oo) - ..you’ll get my report when it’s ready. (‘..when it will be..’)
..row dunverys jeant? (ROW-DUN-verr-iss-JINNT?) -..was murder done?
..marrooit dy anleighalagh (MARR-oo-it-the-an-LAY-al-akh) -..killed illegally.
Cha nee agh fer-lhee imlee mish! (ha-N’YAY-akh-FER-L’YEE-IM-lee-MISH!) - I’m only a humble doctor! (‘It’s not but a humble doctor I [am]!’)
.. traa ennagh roish my row ad feddynit marroo. (TRAA-enn-YAKH-ROHSH-ma- ROW-add-FETH-in-it-MARR-oo) -..some time before they were found dead.
Note: ‘..my v’ad feddynit..’ means ‘..if they were found..’
Foddee dy nee cliassyn v’ayn..(FUTH-ee-the-n’yay-KL’YAZZ-un-VAWN) - Maybe they were coincidences..(‘Maybe that it’s coincidences [which] were in..’)
Foddee dy dooar ad baase..(FUTH-ee-the-DOOR-add-BAASS) - Maybe they died..
Alternatively: Foddee dy ren ad geddyn baase...
..va shoh slane meegherrymoil. (va-SHAW-SLEDDN-mee-gherr-im-OLE) - ..this was completely unprofessional.