Carn 10

Scoill Vretnish ayns Gaue.


The very success of Cardiff's Welsh school seems to have made its future uncertain.


Shey bleeaney as feed er dy henney, va scoill Vretnish currit er bun ayns Caerdydd lesh hoght paitchyn jeig ayns daa hamyr. Ta'n scoill shoh er ve speeideilagh erskyn towse, as ec y traa t'ayn ta 460 ynseydee aynjee. Agh er y fa dy vel ee speeideilagh, ta fir-oik y lught-ynsee gra dy vel rouyr dy phaitchyn sy scoill as dy lhisagh y scoill goll er garraghey gys boayl ennagh elley. Agh cre'n boayl? Cha nel fys ec peiagh erbee choud's shoh.
Ec y toshiaght jeh Jerrey Souree, cha lhiggagh moiraghyn da barrooseyn faagail y scoill. Ta ny moiraghyn feer voirit mychione sauchys nyn baitchyn er y fa dy vel traaght (traffic) trome er raad faggys da'n scoill Vretnish. Lurg y taishbynys shoh, dooyrt fir-oik dy beign da'n scoill ve doont, daa hiaghtyn roish y jerrey jeh'n imbagh-scoill. Agh ny-yeih shen, hannee y scoill foshlit.
Ta drogh ourys ec Bretnee dooie nagh vel y lught-ynsee slane ayns foayr jeh ynsaghey trooid Bretnish. Ta ny fir-oik sheiltyn y ve lhiastey as myr shen cha nod Bretnee dooie ve shickyr dy vod nyn baitchyn ynsaghey trooid Bretnish ny-lomarcan ayns ard-valley ny Thalloo Bretnagh!
Dooyrt Mnr Fred Adams, y stiureyder-ynsee, dy bee y scoill Vretnish currit ayns daa hie - traa ennagh. Foddee dy bee y scoill scarrit ayns kiare rheynnyn ayns thieyn scarrit. Cha nhyrrys nagh vel ny hayraghyn as ny moiraghyn jeant magh lesh shoh. Dooyrt y fer-toshee ocsyn nagh row ad arryltagh dy lhiggey da'n lught ynsee y scoill Vretnish y scughey noon as noal. Raah dy row er ny Bretnee dooie.

Brian y Stoyll.