Carn 11

Lhiettal Bree-loayrtys ny Yernee ayns Sostyn

Bombs will not solve the English question in Ireland. Neither will England's ill-conceived Prevention of Terrorism Act.

Ayns Mee Houney, ta Sheshaght Connolly as y Choonseil cour Seyrsynys Theayagh (N. C. C. L.) ayns Sostyn son shirrey er olteynyn Ardwhaiyl Hostyn y Slattys cour Lhiettal Agglaghey y cheau magh. Lurg bleaystanyn Birmingham blein er dy henney, hie y slattys tranlaasagh shoh trooid Ardwhaiyl Hostyn gyn boirey erbee - ga dy loayr fer daaney ny ghaa noi.

Dy jarroo, oddagh oo gra dy vel y slattys shoh cur er Yernee oney ayns Sostyn smooinaght dy vel ad nyn gimmee er y fa dy vel ad Yernagh.

Derrey y shiaghtoo laa jeh Mee Luanistyn, va 766 sleih er ve goit ec ny meoiryn-shee, va goaill ymmyd jeh'n clattys shoh. Agh cha jagh agh 32 jeusyn er cassid, as cha row agh nane jeusyn feddynit y ve kyndagh! Ta 66 sleih er ve ceaut magh ass Sostyn: ny keayrtyn, hug shoh er nyn lughtyn-thie y hurranse dy mooar. Dy chooilley pheiagh ta ny meoiryn-shee greimmey, t'ad goaill e lurgyn-mair. Ta ny meoiryn shee goaill caslys jeh dy chooilley pheiagh t'ad greimm - ny bunnys dy chooilley pheiagh. Ta sleih cummit ec ny meoiryn-shee rish shiaght laa gyn caa y ve oc loayrt rish leighderyn ny rish ny lughtyn-thie oc.

Ny keayrtyn, ta stiurtyn-shapp er ve goit as va ny meoiryn-shee son eebyrt ad. Agh ren ny keird heshaghtyn caggey dy 'endeil ny stiurtyn oc va goit, as lhig ny meoiryn-shee daue goll seyr feer happee. Hoilshee shoh magh dy cronnal dy re drogh 'lattys t'ayn as dy lhisagh eh ve ceaut magh.

Brian y Stoyll