Carn 13

Foddeeaght son y Vooar-heer.

Manxmen and Irishmen (and others) get annoyed over the use of the term "mainland" meaning "Britain". The dispute between the U.K. and Iceland has made at least one English journalist complain that the Icelanders look up to no "mainland".

Shimmey keayrt ta Manninee as Yernee dooie cheet dy ve corree tra ta sleih loayrt mychione y "vooar-heer", she shen Sostyn. Shen y fa dy vel mish hene garaghtee tra ta Sostnee gaase corree my t'ad clashtyn dy vel lught y cho-phobble Europagh (yn E. E. C.) loayrt mychione Sostyn hene myr ellan beg faggys da'n "vooar-heer Europagh". Er dy gerrid, honnick mee red yindyssagh ayns pabyr-naight Sostnagh mychione turrys jeant ec earisheyr (journalist) gys yn Eeslyn, gys Reykjavik. Gyn ourys, va'n fer boght shoh ceau tammylt beg mastey ny barbaree er y fa dy vel y "caggey boiddagh" fo raad eddyr yn Eeslyn as Sostyn. Goll rish ram sleih voish cheeraghyn mooarey, cha row yn earisheyr shoh coontey monney jeh'n Eeslyn. Erskyn ooilley, v'eh coontey oie Jesarn ayns Reykjavik y ve dree agglagh. T'eh feer ghoillee jough y gheddyn. Aghterbee, ta boteil dy ushtey-vea costal 15. Heill yn earisheyr nagh beagh sym erbee ec ny Americanee boghtey t'ayns yn ynnyd-caggee NATO ayns cheer veg chughtee myr yn Eeslyn. Cha vod eh toiggal cre'n fa ta ny Eeslynee coontey claaryn chellooish (TV) Americanagh y ve "neu culturoil". As t'eh gra dy vel ny thieyn Eeslynagh cur er ny thieyn ayns fo-valjyn Ghlaschu dy ve jeeaghyn goll rish Mayfair. Noddagh oo smooinaght er oltooan smessey.

Dy neu-arryltagh, ta'n earisheyr goaill rish dy vel ashoon Eeslynagh ayn (".... of course, there are the trappings of a national identity.."). T'eh sheiltyn nagh beagh cho wheesh jeant ec ellan Albinagh as 200,000 cummaltee er as ta'n Eeslyn er nyannoo. Agh, ghooinney veen, ta'n fer boght gaccan, ta "mooar-heer" ec ellanee Albinagh as cha jean ny Eeslynee ommidjagh goaill rish y lheid!


Brian y Stoyll