Carn 14

Tinvaal as Kiartaghyn Shibbaltaght.


Laa Tinvaal shoh chaie - shoh yn chruinnaght, rere shennaghys as beeal-arrish, s'cliaghtey lesh ny Manninee veih lhing Ree Ghorree Crovan as tammylt roish shen chaglym ry cheilley dy chlashtyn ny leighyn noa er nyn loayrt magh as aghinyn as neuaashidyn er nyn gur roish y Chooyrt dy gheddyn couyr - va possan dy leih aeg kionfenish nagh row nyn saie lesh dellal er lheh va jeant ayns Cooyrt Tinvaal ny s'moghee er y chiaghtyn roish y laa shen, as haishbynee ad nyn neuaashidyn trooid fograghyn er y Chronk Chasherick roish my ghow nyn jiarnyn ain ny h-ynnydyn oc. V'ad gaccan mychione chaglym y Chooyrt va cummit dy follit as aynshen ren ny fir-oik resooney magh treealtys va currit roue liorish yn Chiannoort nagh jinnagh Reiltys Vannin e yeearree ass y noa dy lowal aghin phersoonagh veih peiagh erbee ayns Mannin ve currit roish Co-chruinnaght son Coadey Kiartaghyn Shibbaltagh t'ayns Strasbourg - v'eh er Mannin y lheid y yannoo marish Sostyn Jerrey Geuree mleeaney, agh ec y traa shen dobb Reiltys Vannin shen y yannoo. T'eh jeeaghyn dy ren yn kiannoort shoh er y fa dy row ram aghinyn neuchooie, myr dooyrt eh, currit lurg cooish y ghuilley va built lesh y clat-cheyl nurree, as e chooish cummit seose ec y 'National Council for Civil Liberties' ayns Lunnin. Reagh yn ard-turneyr ain cruinnaght Tinvaal y chummal dy follit er y leshtal dy jinnagh eh skielley as jeeill da "friendly settlement" eddyr Strasbourg, Mannin as Sostyn jeh'n chooish shoh dy beagh ee foshley da'n phobble. As myr shen chord eh rish Tinvaal aghin y Chiannoort y chooney lesh as t'eh braew shickyr bunnys nish nagh bee eh jeantagh da dooinney erbee syn Ellan shoh aghin erbee y chur roish y Cho-chruinnaght ayns Strasbourg; as er shen bee Mannin kiangle ee hene rish y Rank, y Ghreig, y Turk, as yn Chibyr nagh vel ny h-enmyn oc scruit rish y Cho-chruinnaght shoh. As she oyr imneaght eh shoh da'n Reiltyn Sostnagh smooinagh nish nagh vel monney kiarail ec yn Reiltys ain rish cairys gheiney. Ta shen dy ghra - faagail cooish ny slat-keyl ry-heu, dy jinnagh cooish elley roish sooillyn y phobble y irree, myr sampleyr, dooinney goit ayns laue dy olk liorish ny fir-oik ny built liorish ny polleenyn, cha voddagh eh e aghin er shoh y chur roish er chor erbee.

Cre'n torch dy vondeish by vie lesh yn Reiltys tayrn ass shoh cha doigym noadyr. By hreisht lesh y Chiannoortys ain yn treealtys shoh y chummal gyn-yss da'n phobble, agh nish t'ad corree-jiarg dy vel fys my-e-kione mooie mast'ny sleih, as hannah ta deiney goaill toshiaght dy accan as dy heet dy ve boirit ass towse lesh y red, as t'ee cur lesh drogh - ourys er ny fir-oik as ta sleih fenaght as briaght jeh - cui bono?

As er shen hug nyn jiarnyn nish, as creenys gyn jerrey oc, cuirrey foshley da'n Reiltys Sostnagh dy chur stiagh er kiannoortys Vannin as er reddyn gagh laa ny Manninee - er lheh lurg da Sostyn ve sleaydit trooid y laagh ass nyn leih ayns Strasbourg dy reggyrt er cooish nagh by vian lhieu. Foast er shen ta paart dy leih ayns y reiltys Sostnagh geearree geddyn rey rish Mannin myr 'tax haven'; she sorch dy red eh shoh vees cur siyr er y laa tra choaylys Tinvaal e pooar as e ardcheim, tra vees ny Manninee currit fo smaght ny Sostnee, dy slane; as ta sooillyn ny Sostnee chyndaait rooin dy neu-ymmyrchagh. Ga dy bee cooish ayn rheynnys shin veih Sostyn laa ry heet, cha nee shoh yn chooish.

Shorus Y Creayrie.




Slane Lhieu rish Harland as Wolff?


The London government is reported to be considering running down and even shutting Harland and Wolff's shipyard in Belfast.

Ta skeealyn goll mygeayrt dy vel reiltys Lunnin smooinaghtyn mychione cur er colught Harland as Wolff ayns Beeal Firshtey dy leodaghey, ny eer dooney dy bollagh. Ta ny Goaldee smooinaghtyn myr shoh er y fa dy vel palchey argid theayagh ayns y cholught shoh. Ayns y jeih bleeaney ta er ngoll shaghey, ta 137 milliun sluggit echey, ta shen dy ghra, y lieh chooid jeh'n argid ooilley va currit da colughtyn-lhuingey syn Unnaneys Reoil. Myr shen, vel eh feeu dy chumreil 10, 000 dy 'ir-obbree Veeal Firshtey gobbraghey, ga dy vel y chooid smoo jeu nyn 'leighalee'? Ta colught Harland as Wolff er chosney ard-ghoo lesh ny lhongyn t'ad er yannoo, as drogh-ghoo er y fa nagh vel cuirrey er ny chur da "Catolee" dy obbraghey daue. She colught 'leighalagh' t'ayn mie dy liooar.

Ta deiney ayns reiltys Hostyn corree er y fa dy ren olteynyn 'leighalagh' veih Ullee ayns ard-whaiyl Westminster votal noi'n clattys ry-hoi ashoonaghey troggal lhongyn sy Ghoal, ga dy row ny olteynyn cheddin shassoo son ashoonaghey ayns ny Shey Sheadinyn hene! Ta reiltys Obbree Hostyn er jeet dy ve feer voirit mychione cur slattyssyn trooid ard-whaiyl Westminster as v'ad jerkal rish cooney ennagh veih Ullee. Cha daink y cooney shen noadyr er y fa dy row ny 'leighalee' shickyr nagh jinnagh ny Goaldee ceau tooilley deiney ass obbyr ayns Nerin twoaie. Cha lhisagh ad er ve cho shickyr.

Feed blein er dy henney, va 20,000 dooinney gobbraghey da Harland as Wolff, daa cheayrt ny smoo na'n earroo nish. Dy beagh y colught doont, ragh yn earroo jeusyn ass obbyr ayns Nerin twoaie seose gys 16 sy cheead as ny smoo. Cha nee ny fir ta gobbraghey da'n colught hene veagh ass obbyr nyn lomarcan. Ta'n colught shoh er reaghey fo-chonaantyn (sub-contracts) mooarey lesh colughtyn elley as veagh foddey ny smoo jeih thousane dooinney ceaut magh ass obbyr. Verragh dooney y cholught builley agglagh da ny Shey Sheadyn. By vie lesh sharvaantyn theayagh Hostyn y colught ghooney: yinnagh shen sauail argid. Foddee nagh vel ad daaney dy liooar shen y yannoo. Agh fodmayd ve shickyr jeh un red. My vees y colught shoh doont sheese ny cummit bio, red erbee vees jeant ec ny Goaldee, bee jeant son ocsyn hene - son argidys Goaldagh, ta shen ghra

Brian y Stoyll.