Carn 16

Sostyn Boirit Mychione Ooill ny hAlbey.


Even though many English people remain apathetic or sceptical about "devolution" of some of London's powers to Scotland and Wales, there is evidence that London technocrats are taking Scotland's claim to North Sea oil rather more seriously in private than in public.

She Gordon Wilson, Albinagh va troggit ayns Mannin, chroo yn shenn raa creeney shid "She ooill ny hAlbey t'ayn". Dy neu-arryltagh, ta sheshaghtyn-politickagh Hostyn goaill rish dy ren Mnr Wilson obbyr yindyssagh tra chroo eh yn raa shen. Foastagh, cha nel y chooid smoo dy 'leih ayns Sostyn arryltagh dy chredjal dy vel ymmodee Albinee as Bretnee geearree nyn reiltyssyn hene y ve oc. Ta politickeyryn Sostnagh (as kuse dy Vretnee as Albinee) guee dy jed ny hashooneyryn ersooyl my jed y slattys cour jee-veanaghey (devolution) yn Reeriaght Unnaneyssit trooid Ardwhaiyl Lunnin. Agh nish ta'n slattys hene er ny chur roish yn ardwhaiyl shen. Eer my vees yn reiltys obbree brisht, as my vees ny Thoreeyn geddyn y varriaght ayns reihys, ta ashooneyryn ny hAlbey shickyr dy bee laue yn eaghtyr oc. My vees reiltys Callaghan tannaghtyn, hed y slattys cour jee-veanaghey trooid yn ardwhaiyl: ga nagh mie lesh monney Albinee y slattys shoh, she toshiaght t'ayn. My hig Bnr Thatcher stiagh lurg reihys, t'eh bunnys shickyr dy jean ee y slattys cour jee-veanaghey y cheau ersooyl. Foastagh bee laue yn eaghtyr ec Nalbin sy jerrey er y fa dy bee na hAlbinee cho corree my haghyrys shoh. Ta sleih cheet dy ve ny smoo shickyr gagh laa dy bee sorch dy heyrsynys ec ny hAlbinee. Cha nod ad ve cho shickyr mychione ny Bretnee. Dy granganagh, ta Lunnin son cur er bun sorch dy "Hie Taggloo" ayns Caerdydd as gra Cruinnaght Vretin rish. Cheet er ash gys ooill ny hAlbey, ta paart dy Hostnee er ve feer wooiagh dy lhaih lioar er ny screeu liorish John Grant, leaghteyr ayns leigh ec Ollooscoill Ghlaschu. Ta'n lioar shoh enmyssit "Independence and Devolution, the legal implications for Scotland". Dy beagh Nalbin eginit dy hassoo ny lomarcan, veagh urree croghey er queig magheryn-ooill nyn lomarcan, coardail rish Grant. Veagh ny magheryn-ooill Forties, Lomond, Maureen, Montrose as Piper ec Nalbin mie dy liooar, agh veagh ooilley ny fir elley ec Sostyn - as Sheltyn as Ellanyn Orc! S'cosoylagh nagh bee Sheltyn as ny hEllanyn Orc geearee ve ayns Nalbin hene tra vees ee seyr, as myr shen ta ram Sostnee treishteil nagh bee yn ooill mygeayrt y mysh ny hellanyn shen fo reill ny Albinee. My vees ny caglieeyn jeh ny magheryn-ooill currit sheese er y chaslys-cheerey rere Conaant Geneva 1958, ta Grant sheiltyn nagh bee monney ooill faagit ec ny hAlbinee boghtey! Agh heemayd sy traa ry heet.

Brian y Stoyll