Carn 17

Kiartyssyn Theayagh - Human Rights.

Britain has been found guilty of torture of prisoners in Ireland. To avoid further embarrassment at the European Court of Human Rights in Strasbourg the U.K. government might draw up a Bill of Rights for Northern Ireland. How effective would such a bill be?


Ta'n Barrantys Europagh cour Kiartyssyn Theayagh er vriwnys dy vel y Ghoal Vooar er dorchaghey pryssoonee ayns twoaie ny hErin. Ec y traa t'ayn, ta'n chooish cheddin goll er resooney magh sy Chooyrt Europagh cour Kiartyssyn Theayagh ayns Strasbourg. Ta reiltys Divlyn shirrey er y chooyrt, eh dy ockley magh dy row reiltys ny Goal oolee jeh torchaghey paart dy phryssoonee, janoo reddyn barbaragh rish pryssoonee elley as janoo reddyn mee-chiart rish sleih elley. By vie lesh ny Yernee un vriwnys jeh'n Varrantys y chaghlaa: ga dy dooyrt y Barrantys nurree dy row y Ghoal oolee jeh'n torchagh, cha ren eh briwnys dy ren ny Goaldee lhiettrymys noi Catolee ayns twoaie ny hErin ayns 1971 tra va'n ym-chagliaght (internment) goit ayns laue ec ny Goaldee. Ta reiltys Divlyn shirrey er y Chooyrt Europagh, eh dy ockley magh neesht dy row ny Goaldee jannoo lhiettrymys noi ny Catolee as dy lhisagh gagh reiltys ta er chur e ennym gys y Conaant Europagh (European Convention) geill y chur da ny slattyssyn sy Chonaant shen.
Ta reiltys Divlyn gra dy lhisagh gagh reiltys shickyraghey dy vel ny leighyn echey hene coardail rish slattyssyn y Chonaant Europagh. Son shickyrys, cha row ny reddyn ren y reiltys Goaldagh rish pryssoonee Yernagh coardail rish y Conaant. V'ad bwoaillt gyn myghin, v'ad eginit dy hassoo noi bwoallaghyn rish ymmodee ooryn; cha dooar ad jough ny beaghey, as v'ad er nyn moirey lesh sheeanyn mooarey as soilshaghyn lajer. Va poagaghyn currit harrish king ny pryssoonee neesht as v'ad freillit myr shen.
Ta ny Goaldee er ngoaill rish dy ren ad lheid ny reddyn shen, agh cha jean ad gra dy nee "torchagh" v'ayn. Gyn ourys, va fys ec ymmodee politickeyryn Goaldagh as sharvaantyn-theayagh dy row y torchagh shoh goll er. Ga dy vel y Barrantys Europagh er vriwnys dy vel y Ghoal oolee, cha nel fer erbee ren y torchagh er ny cherraghey foast. Dy jarroo, ta ny Goaldee jiarg-chorree er y fa dy vel Nerin goll er lesh y chooish. Agh she red mie eh dy vel reiltys Divlyn goll er: er y chooid sloo, ta'n Ghoal er ghra nagh jean ee ymmyd jeh ny "saaseyn feyshtey" (she shen, torchagh) shoh maghey shoh. As ta leighderyn Goaldagh goaill toshiaght dy screeu sheese Slattys cour Kiartyssyn Theayagh ayns twoaie ny hErin. Shimmey sheshaght ta er ghra dy lhisagh y lheid ve ry gheddyn fud ny Goal neesht. Agh rish keeadyn dy vleeantyn, ta lught-reill Hostyn er ve noi red goll rish Slattys cour Kiartyssyn (Bill of Rights): ta shen casley rish burnraght (constitution ) screeut, as ta shen ny red neu-Hostynagh, myr ta fys ec gagh peiagh! Foddee dy beagh Slattys cour Kiartyssyn foaysagh ayns twoaie ny hErin, agh shegin dooin ve er nyn dwoaie. Y slattys share, shen y slattys cour faagail Nerin dy bollagh.
Brian y Stoyll