Carn 9

Brishey Yn Unnaneys As Cairys Sheshoil

(Many English liberals have at last got some understanding of Celtic nationalism. But they still seem to believe that only they and their Celtic followers can work for social justice.)

Paart dy veeghyn er dy henney, screeu Francis Boyd ny focklyn shoh sy phabyr-naight, y "Guardian": "Peiagh erbee ta feddyn foill lesh yeearreeyn ny ashoonaghteyryn Celtiagh son seyrsnys lane, ta ny hashoonaghteyryn cur freggyrt da gra dy vel cheer ennagh ta ny sloo na yn cheer ocsyn slane seyr, as dy vel yn cheer shoh jannoo feer vie." Ta Mnr Boyd goll er dy ghra dy vel ashoonaghteyryn Celtiagh jannoo daa varran tra t'ad geearree y ve slane seyr veih Sostyn. Hoshiaght, cha vod fer erbee credjal dy ren sollaghey-laue Lunnin as fir-oik Whitehall stroie dy chooilley hro ec ny Celtiee 'moyrnagh', Y nah red, ta'n Reeriaght Unnaneyssit er ve gobbraghey son cairys sheshoil (social) as seyrsnys rish keead blein as ny smoo: cha lhisagh yn obbyr shoh ve ceaut ersooyl.
Tra yiow ny Celtiee tooilley seyrsnys, foddee dy bee tranlaasee cheet roo ayns ny cheeraghyn Celtiagh. Agh cre hon dy vel sleih goll rish Boyd smooinaghtyn dy re ny Sostnee yn ynrican pobble fod obbraghey son cairys as seyrsnys? Fod ymmodee Sostnee lesh paart dy hargid fordrail y ve meeley, cairagh as surransagh - cha nel caggaghyn er ve ayn er y thalloo ocsyn rish keeadyn dy vleeantyn. Cha nel nyn jengey ayns gaue ny lieh varroo. Cha vod ad toiggal yn eulys mee-chooyrtoil ta goll er ayns Nerin. As erskyn ooilley cha jean ad toiggal dy re chengey ny mayrey y tro smoo scanshoil ec pobble erbee. Tra ta'n tro shen stroiet, dy jarroo ta tro ny tranlaasee currit da'n phobble.

Brian y Stoyll