Carn 44


Caghlaa ayns Politickaght Yernagh?


Community politics plays an important role in Sinn Fein's new non abstentionist activities.

Va fo-reihys ayns Divlyn Meanagh er y gherrid. Ren sheshaghtyn y Cho-reiltys dy holk. Dy jarroo, chaill Fine Gael ymmodee voteyn as huitt yn Cheshaght Obbree veih'n treeoo ynnyd gys yn wheiggoo ynnyd. Va'n Cheshaght Obbree cheu-heear jeh Sheshaght ny Labreeyn as Sinn Fein neesht. Ren Fianna Fail mie dy liooar.
Agh cha row mon ney sym ec ymmodee sleih ayns red erbee agh vote Sinn Fein. Hooar adsyn 2304 voteyn ass red gollrish 33,000. Va shen coontit y ve feer vie son Sinn Fein as ta sleih credjal dy derragh eh cooney da'n eaghtyrane noa, Gerry Adams as eh geearree Sinn Fein y ve goaill ayrn ayns reihyssyn. Rish bleeantyn dy liooar, ta pobblaghtee Yernagh er haghney reihyssyn, er nonney t'ad er ngoaill ayrn ayns reihyssyn as er nobbal goaill soiagyn my t'ad er chosney y varriaght ayns reihys. T'eh jeeaghyn dy vel caghlaa cheet nish, sy twoaie as sy jiass ayns Nerin. Ta Sinn Fein er nyannoo dy mie ayns reihyssyn sy twoaie. Foddee ta'n speeideilys shen cheet my yiass nish.
Son y chied cheayrt neayrs Caggey ny Braaraghyn mysh tree feed blein er dy henney, foddee dy bee Sinn Fein geearree soiagyn sy Dail ayns Divlyn. Erreish daue v'er ngeddyn 43% jeh'n vote ashooneyragh sy twoaie, ta Sinn Fein son gobbraghey dy creoi ayns politickaght sy jiass. Roish ny stholkyn accrys ayns 1981, cha row monney speeideilys ec Sinn Fein ayns reihyssyn. Agh neayrs y traa shen, ta reddyn er chaghlaa. Myr sampleyr, ta Sinn Fein er vosley jeih thieyn-coyrle ayns Beeal Feirshtey as tooilley thieyn coyrle ayns baljyn elley sy twoaie. Ta arryltee breeoil gobbraghey ayns ny thieyn-coyrle shoh, cooney lesh sleih ta cheet huc lesh doilleeidyn jeh thieys ny jeh mee-startaght as y lhied. Dy jarroo, ta'n sleih ta gobbraghey ayns ny thieyn coyrle shoh clashtyn y bun jeh boirey dy liooar: y doilleeid jeh goll tessyn raad gaueagh, lectraghys goll er giarrey voish thie ennagh, guilley va bwoallit dy holk ec armee Hostyn. Ta lught Sinn Fein laccal cooney lesh sleih ayns ram cooishyn, beg ny mooar.
Ta arryltee Sinn Fein ayns ny thieyn coyrle shoh laccal cur er sleih dy yannoo caggey dauesyn hene, cha nee dy yannoo caggey er nyn son. T'ad shirrey creeaght as daanys 'chur stiagh sy phobble. As er y fa dy vel coonseilee oc hene nish, ta'n creeaght as daanys shen goll er croo mastey'n phobble mennick dy liooar nish.
Ta Sinn Fein credjal dy noddagh ad cosney hoght soiagyn er Coonseil Veeal Feirshtey ayns 1985. Oddagh yn cheshaght geddyn yn chormid jeh pooar er coonseilyn baljagh elley sy twoaie. Agh ny yeih shen as ooilley, t'ad coontey ny thieyn-coyrle y ve ny smoo scanshoil na ny coonseilyn baljagh. Er lhimmey jeh cooney lesh sleih ta boirit liorish mee-startaght as y lhied, ta ny harryltee laccal cooney lesh feallagh aeg ta cheet dy ve nyn gimmee (criminals).
Ta daa horch dy pheiagh aeg ta fo baggyrtys ayns shoh - sorch creoi as sorch bog. Ta Sinn Fein prowal scarrey adsyn bog vouesyn creoi. T'ad er chur er bun bingyn ry hoi sleih aeg dy reaghey cooishyn dauesyn hene. Shen red doillee, er y fa dy vel bree agglagh ayns y sleih aeg shoh as cha nel ad lowit jannoo ymmyd jeh.
Ayns Beeal Feirshtey, ta Sinn Fein er chur er bun ynnyd ry hoi mraane. Fod mraane ynnydagh goll gys yn ynnyd shoh dy gheddyn fys mychione cooishyn dy liooar. Ec yn traa cheddin, fod ad giu tey as goaill cowag. Ta creche syn ynnyd neesht. Dy jarroo, ta Sinn Fein prowal cur er sleih dy chredjal ayndaue hene. Dy firrinagh, ta ny harryltee politickagh geearree cur daanys da sleih liorish loayrt roosyn as cur orroo toiggal dy vod ad cooney lhieu hene ayns ymmodee cooishyn. T'eh jeeaghyn dy vel ymmodee pobblaghtee goll er politickaghey ayns ny campyn as ny pryssoonyn. Ta traa oc dy lhaih lioaryn liorish Connolly as e lhied. Tra t'ad seyrit, t'ad soiet er troggal gleashaght politickagh jeh'n phobble.

Brian y Stoyll




Shee Geayney.


This recounts an informal evening spent with a crew member of the Greenpeace vessel "Cedarlea' which was recently in Douglas after their actions across the water at Windscale.

Tra hie mee lesh shilley er my voir Jerdein shoh chaie (1.12.83) dooyrt ee dy row chaghter er-my-hon voish Paal ennagh ass Kernow. Ec y toshiaght dooyrt mee nagh row enney aym er Kernowagh ennmyssit Paal, agh eisht dooyrt ee dy vrie eh urree dy imraa feeyn smeyr ghoo rhym, as eisht va cooinaght aym. Tammylt foddey er-dy-henney va chaglym jeh'n Commeeys Celtiagh ec Purt Chiarn as va daa fer-kiaullee Kernowagh tannaghtyn ec nyn dhie. V'ad cloie marish possan va ennmyssit Quylkyn Tew (Rannagh Roauyr) as v'ad er jeet ass-lheh Kernow dys yn chaglym. Cha b'vie lesh Paal iu jough ec y traa v'ayn shen, as va palchey dy feeyn smeyr ghoo ain yn vlein shen. Myr shen d'iu eh feeyn. Daa Chaist er-dy-henney, tra va mee ayns Kernow, honnick mee eh reesht as ga dy row e ennym jarroodit aym, dyllee mee er, 'Bannee mee! Feeyn smeyr ghoo,' as va cooinaght er orrym.
Haink shin ny whaiyl ayns thie-aaght yn 'Villiers' ayns Doolish as hooar shin magh dy row eh shiaulley marish Shee Geayney er 'Cedarlea'. Dooyrt eh dy row eh er jeet nyn guaiyl tra v'eh ny haaue as tra hooar ad magh dy row eh ny yeshaghteyr lhuingey, hug ad cuirrey da g'obbragh daue. Myr shen hie eh dys Lunnin as rish tammylt v'eh karraghey yn jeshaght tra va'n baatey 'sy phurt, agh yn keayrt shoh v'eh shiaulley meriu. Tra v'eh g'obbragh ayns Lunnin v'eh goaill yindys er'n aght va'n skimmee g'obbragh traa erbee b'vie lhieu, ny goll mygeayrt nyn daaue myr vees ad g'eearree shen y yannoo. Dimraa eh shen rish jeshaghteyr elley as dreggyr yn fer elley dy row reddyn dy bollagh anchasley tra v'ad er y cheayn. Er y chiaghtyn roish shen v'ad er ve cur cheb er cur caag stiagh 'sy phiob deayrtey pishoon 'syn cheayn voish Windscale as honnick eh ben aeg Yernagh tannaghtyn ayns skollag rubbyr rish ooraghyn as ish freayll arrey er mollag ny lomarcan ayns mean y cheayn. Va emshir agglagh ayn as v'ee ayns aghaue coayl e bioys dagh tullagh. Tra gow eh toshiaght er g'obbragh meriu va ammys orroo echey, nish erreish da fakin ad ayns nyn streppey noi BNFL v'eh cur eer ny smoo moylley daue.
Tra v'eh ny haaue, roish my gow eh toshiaght er g'obbragh meriu smooinnee eh rish-hene dy row caa echey jannoo ymmyd jeh e schlei er aght yinnagh mieys da'n theihll. Er'n varrinys shoh va sleih dy-liooar cheet huggey lesh tooilley boirey as jeeill ayns dagh phurt tra va fys oc dy row eh Shee Geayney v'ayn. Va paitchyn cheet huc dinsh daue dy row sleih ennagh deayrtey geayr er'n voayl v'ad cliaghtey cloie yn aght va trieghyn nyn mraagyn goll loau. Va ben cheet nyn 'aare dinsh daue mychione pishoon deayrtit dy follit ayns strooanyn ec thie obbree. V'eh jeeaghyn da dy row foddey ny smoo jeeill goll y yannoo ny va shin smooinaghtyn. V'eh cur y drogh er feddyn mooadys yn dooillieed magh.
Ny s'anmey hie shin marish dy chur shilley er'n vaatey as loayr shin rish olteynyn elley yn skimmee. T'ad cheet voish ashoonyn fei ny h'Europey as ardjyn elley. Mastey three jeig jeu va daa Yernagh (mraane as Gaelg oc) Sostnagh, Frangagh, daa jeu voish yn Ollyn, Kernowagh, as Americagh, cha daink fer elley nyn guaiyl. Cha s'aym c'red va mee jerkal rish agh v'ad ooilley jeeaghyn dou dy ve nyn sleih feer chadjin. Ny-yeih va fys aym dy voddagh ad cummal ad-hene myr fenee. Raa dy row orroo.

Colyn y Jerree.