Carn 49
Lessoonyn Shennaghys.


It is even more crucial that there is more understanding of what is happening in Northern Ireland now that Irish neutrality is under threat.

Yn chiaghtyn elley, va mee goll stiagh ayns shapp sy vean jeh Lerpoyll. Er y raad stiagh, honnick mee doodee va creck pabyr politickagh ennagh sy traid cheumooie "Sidooryn magh ass Nerin!" v'ee gyllagh magh. Gyn ourys, t'ee sy ghleashaght "Sidooryn Magh", smooinee mish. Tra haink mee magh ass y chapp, va daa veoir shee loayrt dy jeean rish y doodee as rish fer aeg va er ve creck pabyryn neesht. Hannee mee dy 'eddyn magh c'red va goll er (ayns Sostyn y Thooder, cha nel oo loayrt rish meoiryn-shee my t'ou abyl shaghney shen). Fy yerrey, daag ny meoiryn-shee, as hie mee dy vriaght jeh'n chubbyl aeg c'red va goll er.
"Cha nel shin lowit creck y pabyr ain. Cheer seyr t'ayn, dy jarroo!" dooyrt y fer aeg dy sharroo. Va ny meoiryn-shee er chur raaue daue: mannagh row y doodee as y fer aeg goll ersooyl, veagh ad goit kyndagh rish y Slattys ry-hoi Lhiettal Ym-agglaghey (Prevention of Terrorism Act). Tra cheayll mee shen, va ferg orrym, agh cha row yindys orrym. Ta Thoreeyn Hostyn er nobbraghey dy jeean as dy creoi dy lhaggaghey seyrsnys y phobble as ta meoiryn-shee Hostyn ny smoo politickagh na v'ad rieau. As Nerin? Cha nel oo lowit loayrt magh mysh Nerin mannagh vel oo jannoo craid mysh ny Paddies mollaghtagh.
Agh va yindys orrym tra chionnee mee pabyr (dy tappee) veih'n fer aeg, cha nee lught "Sidooryn Magh'' v'ayn noadyr, agh possan cumannagh ennagh. Shimmey possan politickagh t'ayns Sostyn jiu, y chooid smoo jeu feer veg as feer yeean. Ayns y phabyr shoh va art mooar mychione Nerin Twoaie. V'eh scruit: "Ayns Mee Luanistyn 1969, haink sidooryn Goaldagh stiagh ayns Nerin Twoaie ...... queig bleeaney jeig jeh tranlaase Goaldagh''.
Ny cretooryn boghtey. Nagh vel fys oc dy vel sidooryn Goaldagh er ve ayns Nerin Twoaie rish keeadyn dy vleeantyn? Oddagh shin loayrt mysh keeadyn dy vleeantyn jeh tranlaase Goaldagh. Cha nee queig bleeaney jeig jeh. Va mee ayns coardailys rish y stoo elley va scruit mysh Nerin sy phabyr cumannagh shoh. Agh ec y traa cheddin, ta mee guee dy row y Skian Toshtal (as sleih elley) ayns Sostyn toiggal y chooish Yernagh ny share as ny s'diuney. Peiagh erbee ta smooinaghtyn dy jagh sidooryn Goaldagh gys Nerin Twoaie son y chied cheayrt sy vlein 1969, cha nel ad toiggal y chooish ro vie!
Red trimshagh eh, cha nel monney Sostnee graihagh er ny Yernee. Shegin dooin jannoo nyn gooid share dy vooadaghey yn earroo dy leih ayns Sostyn (as cheeraghyn elley) ta toiggal ny ta goll er ayns Nerin Twoaie. Erskyn ooilley, ta shoh scanshoil nish as shinyn fuirraghtyn rish kialgeyrys ennagh dy ve reaghit eddyr Lunnin as Divlyn roish traa foddey. Son "cur erash" y Twoaie, bee Lunnin jerkal rish Divlyn cheet stiagh ayns Nato (dy follit?) dy yannoo ny Americanee booiagh ayns nyn gaggey casherick noi'n Roosh. Ta ny Sostnee condaagagh shen, Tony Benn as Enoch Powell, er ghra tammylt er dy henney dy vel shen yn oyr ta Sostyn tannaghtyn cho jeean ayns Nerin Twoaie: ta ny Americanee laccal Nerin ooilley myr ynnyd-chaggee. Agh va sleih ennagh gra y red cheddin roish my daink Benn as Powell stiagh sy skeeal.


Brian y Stoyll