Carn 50


Screeu Lioaryn Celtiagh.

Va chaglym cummit ayns Lunnin syn Ynnyd Vretnagh ayns Averil mychione lioaryn screeut ayns ny chengaghyn Celtiagh. Va'n chaglym reaghit ec Peter Berresford Ellis as Banglane Lunnin y Chommeeys Celtiagh. Choud's ta fys aym, va shoh y chied cheayrt va lhied y chaglym reaghit. V'eh cooie dy row eh reaghit dy jeeragh lurg Feailley Lioar Lunnin sy Varbican.
Loayr mish son Mannin. Va sym dy liooar ec y lught-eaishtagh, ga dy re mish va'n loayreyder s'jerree as mish loayrt lurg traa-tey syn astyr! Agh red ren cur yn olk orrym, beggan, shen yn genney jeh lioaryn Gailckagh ry hoi taishbyney as creck. Va lioaryn er ve currit voish Mannin gys y chaglym ("Scrif-Celt 85") agh cha daink ad ayns traa kyndagh rish stholk ayns Heysham, foddee. Myr shen, begin dou cur lhiam paart jeh ny lioaryn aym pene as hooar mee tooilley lioaryn Gailckagh er eeasaght voish Mnr Berresford Ellis. Agh tra va sleih laccal kionnaghey lioaryn Gailckagh, cha row shen jantagh. Son shickyrys, my vees Scrif-Celt elley reaghit, shegin dooin reaghey taishbynys mie jeh lioaryn Gailckagh as lioaryn mychione Mannin. Foddee dy beagh sym ec delleyder lioar Manninagh ayn. Va Mannin jeeaghyn moal agglagh cosoylit rish ny cheeraghyn elley ec "Scrif-Celt 85".
Va ny loayreyderyn ooilley gimraa ny doilleeid t'ec ny Celtiee bentyn rish screeu as cur magh lioaryn ayns ny chengaghyn Celtiagh. Ta shen dy ghra, eer tra ta sleih dy liooar ayn as chengey Celtiagh oc, cha nel agh kuse veg jeu arryltagh kionnaghey lioaryn. Eer my t'ou cur magh lioaryn Baarlagh, she dellal gaueagh t'ayn. Son shickyrys, cha jean oo cosney monney argid liorish cur magh lioaryn ayns ny chengaghyn Celtiagh. Ny veih shen as ooilley, she red mirrilagh t'ayn dy vel red erbee currit magh ayns ny chengaghyn shoh. Erskyn ooilley, va ny taishbynyssyn Bretnagh as Britaanagh feer vie. Er aght ennagh va taishbynys yindyssagh ny Britaanee cur nearey er Celtiee elley.
Loayr Len Truran jeh Dyllansow Truran son y Chorn. She fer-ynsee va Mnr Truran, agh t'eh ny haaue nish as eshyn gobbraghey car yn traa son y colught hug eh er bun ry hoi cur magh lioaryn ayns Cornish as mychione y Chorn. Ta speeideilys dy liooar er ve echey. Tammylt er dy henney, cha row scoillyn Cornagh laccal goaill lioaryn mychione y cheer as y chengey, agh nish t'ad shirrey y lheid. Ren colught Vnr Truran. Dyllansow Truran cur magh y chied oorskeeal ayns Cornish er y gherrid. Ta'n oorskeeal shoh enmyssit "Crooin Fuilltagh Cheltia" as v'eh screeut liorish Melville Bennetto. Ta troo aym er ny Cornee Shegin dooin cur magh oor skeealyn ayns Gailck. Agh ta lane eddyr raa as jannoo my ta. Gyn ourys, ta kuse dy leih ayn oddys screeu oorskeealyn Gailckagh mie dy liooar. Ayns y toshiaght, oddagh coipyn jeh ny lauescreeunyn goll mygeayrt mastey pobble Gailckagh, foddee. Eisht, oddagh shin boirey mysh cur magh ny lioaryn sy chummey kiart. Erskyn dy chooilley nhee, ta shin laccal greeasagh cooishyn Gailckagh er aght crootagh.
Ec ''Scrif-Celt 85", chionnee mee oorskeeal screeut ayns Yernish son jeigeyryn. Screeu Cathal O Sandair y lioar shoh as t'eh enmyssit "Reics Carlo ar Oileán Mhanann" ("Réics Carló er Ellan Vannin''). Haink y lioar shoh magh nurree, as t'eh mychione y cronneyder (detective) ard-ghooagh Réics Carló voish Divlyn. Ta Reics ceau e laghyn seyrey ayns Mannin as geiyrt er deiney olk ec y traa cheddin. Ta Gailck dy liooar sy liooar skeayt mastey y Yernish sy lioar. Yernagh aeg erbee ta lhaih eh, nee eshyn ny ish gynsaghey stoo dy liooar mychione Mannin ec traa t'ayn - erskyn ooilley, mychione y chengey as y chiaulleeaght dooghyssagh. Sampleyr yindyssagh jeh eddyr-Cheltiaghys t'ayn. Ta sleih ennagh shirrey orrym cur Gailck er y lioar shoh as eisht foddee dy bee eh currit magh ec y Gum (y colught steat Yernagh). Ta shin laccal lioar erbee ayns Gailck, agh dy firrinagh bare lhiam my lioaryn aym pene y screeu ayns Gailck veih'n toshiaght. Yn traa, shen yn noid mooar.
Red elley haink ass "Scrif-Celt '85", va shen y caa dy chur magh lioar Gailckagh son paitchyn jeh red goll rish hoght bleeaney dy eash. Ta Ventura Publishing, ta cur magh ny lioaryn "Spot", arryltagh goaill ayns laue cur magh lioar "Spot" ayns Gailck. Dy jarroo, ta shin ayns feme mooar jeh lioaryn taitnyssagh ayns Gailck son eash erbee, aeg ny shenn.

Brian y Stoyll