Carn 51

Ny Skibbaltee Boghtey.

The Englishman abroad is often cited as a figure of fun, complaining that it's not like England and that foreigners jabber away in some funny language. The Englishman is not alone in this holiday imperialism, where instead of getting away from it all, you take it all with you. It ill befits the Celts to drop into similar bad habits.

Ta olteynyn Mec Vannin sursmooinaghtyn harrish treealtys ta Bernard Moffatt cur roish ard-chruinnaght vleeaney y pharteeg as t'eh cheet er, ayns ayrn, yn aght ta turrysee cheet dys Mannin voish Nherin.
Va shin rieau garaghtee er ny Sostnee ta goll gys cheeraghyn elley, agh t'ad gaccan nagh vel ny cheeraghyn shen gollrish Sostyn. As cha nel mee cheet er laaghyn y Raj - she'n un red jiu tra ta Sostnee aegey goll gys yn Spaainey, as t'ad shirrey eeast as speiltyn praase as Stoandey Jiarg Watney choud's t'ad aynshen.
Agh va mee loayrt mychione ny Yernee ta cheet gys Mannin. Vel ad yeedyn blass Vannin choud's t'ad aynshoh? Cha nel. T'ad geddyn Smithwicks as Guinness, as t'ad goll gys cuirraghyn-kiaull liorish Brendan Shine, Foster as Allen as Yernee elley. T'ad geearree shen, as t'ad arryltagh dy cheau nyn argid cheet voish Nherin er-nyn-son. Shen myr ve bleeantyn er dy henney, tra va ymmodee Albinee cheet gys Mannin. Cre v'ayn ec y traa shen agh cuirraghyn kiaull Calum Kennedy as Albinee elley. As c'raad va ny cuirraghyn-kiaull shen goll er cummal? Ayns Doolish. Doolish ynrican.
Ta Boayrd Turryssagh Vannin goll aggairagh cur fys da ny Yernee (naght cheddin as da ny Albinee ec yn amm shen) mychione yn Ellan shoh. Nurree ayns shiaghtin ny Cruinnaght va Larry Dillon, jeh Feailley ny Liberties ayns Divlyn, gra dy re Doolish ynrican ta er ny imraa ec Boayrd Turryssagh Vannin. Ta ny skibbaltee boghtey ayns Doolish cur argid-bea da ram sleih, as ta treisht orrym dy jean ad ooilley goaill boggey jeh nyn laaghyn seyrey. Cha nel mee gaccan mychione nyn giaull, nyn lhune, ny nyn gooishyn elley. Agh ta mee goaill yindys dy vel ad cheet gys Mannin gyn-yss er rheynnyn elley ny hEllan.
S'lesh Boayrd Turryssagh Vannin ta'n foill hoshiaght. Ta buill as reayrtyn feer aalin syn Ellan. Va Breandain O Ciobhain jeh R.T.E. goaill yindys dy row y lhied ayn - v'eh jerkal rish shooyllaghan liauyr as greienyn scoltan voish y Cheyllys gys Kione ny hAyrey. Agh v'eh goaill taitnys jeh'n Ellan hooar eh.
Sy nah ynnyd, s'lesh cummaltee Vannin ta'n foill. Cha nel fys ocsyn er nyn shennaghys as shennoaylleeaght. Shimmey fer va ruggit ayns Mannin, as shen eh - cha nel ee goaill tastey jeh currym elley, ga dy vel ee gra dy vel ee moyrnagh.
As sy trass ynnyd, cre mychione ny turrysee hene? Cha nel mee cur yn drogh er ny Yernee ta cheet gys Mannin. Ta mee loayrt my-mychione's goll gys cheer elley. Ta mee loayrt my-dty-chione ta troailt myr joarree ayns cheer yoarree.
Ta currym orrin ooilley gyn goaill orrin drogh oashyn. My vees shinyn gra dy vel, Wops, Chinks, Froggies as y lhied jannoo cabbaraght tra t'ad loayrt ry cheilley, cha nodmayd gaccan tra ta sleih gra dy vel Paddys, Dais as Macs jannoo yn un red. Shegin dooin goll stiagh ayns cheer elley as goaill yindys as taitnys jeh dagh anchaslys as cur bwooise da Jee dy vel y lhied foast ayn.
Red elley mychione y chooish. Dooyrt Larry Dillon dy vel ommidanyn ayns Doolish goaill rour argid ass ny turrysee. Vel ad-shoh sheiltyn nagh vel ny fir va mollit goll dy valley as cur raaue da nyn gaarjyn mychione ny maarliee ayns Mannin?
My vees ad geearree ny skibbaltee boghtey ayns Doolish, shegin daue gyn keck ayns nyn lhiabbee hene.