Carn 60


Gynsaghey ayns Buill Fadaneagh.


Personal impressions are given of the excellent work being done at the Welsh language centre at Nant Cwrheyrn The importance of language-learning centres in more populated areas is also stressed.

Cheayll mee hoshiaght mysh Nant Gwrtheyrn woish Cailean Spencer, ec y toshiaght jeh'n vlein shoh. Ta Nant Gwrtheyrn ny ynnyd ry hoi gynsaghey Bretnish t'ayns lieh-inshey Llyn ayns Bretin twoaie, my yiass woish balley Caernarfon. Va mee goaill yindys dy chlashtyn woish Cailean as eh chellvaney veih'n Nant. Va kiartey shallidagh echey ayns shen. Y keayrt s'jerree va mee er nakin y dooinney eddyr-Cheltiagh shoh, v'eh ec y chaglym UNESCO mysh studeyrys Celtiagh ayns Divlyn paart dy vleeantyn er dy henney. Ec y traa shen, va Cailean gobbyr son y Ghailck Albinagh.
Vrie eh jeems beign arryltagh dy heet gys Nant Gwrtheyrn son jerrey shiaghtin Celtiagh, dy ynsaghey Gailck rish possan dy leih. Veagh shoh ayns Mee Vart. Sy jerrey, hie mee marish Phil Gawne woish Poyll Vaaish as Manninagh elley. Va ny Manninee elley laccal gynsaghey Bretnish. Agh ghow shin yindys tra raink shin y boayl fadaneagh shoh as hooar shin magh dy row dy chooilley hengey Cheltiagh er lhimmey jeh Bretnish goll er ynsaghey y jerrey shiaghtin shen! Beign da ny Manninee elley gynsaghey paart dy Ghailck ayns ynnyd ny Bretnish.
Ta shennaghys symoil ec y Nant. Hooar eh yn ennym ''Gwrtheyrn" ayns onnor jeh fer toshee jeh ny shenn Vretnee va ny Rauee gra ''Vortigern'' rish. She boayl garroo, fadaneagh t'ayn, agh t'eh aalin er aght ennagh. Va quarralyn clagh hryal ayns shoh keayrt dy row, agh v'ad dooint sy jerrey roish y nah chaggey mooar. Ta'n balley beg hene bunnys er y traie, ec y veeal jeh glion beg ta keeadyn dy hrieyn fo mulleeyn ny cruink claghagh ta cruinnaghey stiagh er y voayl. Gys 1978, cha dod oo gimman gleashtan sheese gys Nant Gwrtheyrn. Va cassan garroo tuittym dy camstram sheese cronk gys y valley beg. Tra va'n balley beg treigit lurg y nah chaggey mooar va sleih foast tayrn nyn gooid neose seose er sleaydyn. Va'n cassan cho eaynagh as gaueagh as nagh dod queeylyn goll er. Hie mee gys jerrey shiaghtin Celtiagh elley sy Nant ayns Jerrey Fouyir as ta'n raad coon er ve tarmacit. Agh foast cha nod oo gra dy vel oo gennaghtyn sauchey as oo gimman sheese ayns gleashtan.
Myr dooyrt mee, va Nant Gwrtheyrn treigit sy jerrey myr balley dooghyssagh mysh daeed vlein er dy henney. Agh nish ta bioys noa ayn kyndagh rish yn ynnyd-chengey. Ny veggan as ny veggan, ta ny thieyn goll er jannoo ass y noa. Ta'n chabbal er ve jeant ass y noa, ga nagh vel ee myr cabbal firrinagh reesht. Sorch dy halley as thie tashtee t'ayn nish. Ta'n boayl myr symbol niartal jeh aa-vioghey mastey buill elley ayns Llyn.
Ta buill myr Nant Gwrtheyrn feer vie son gynsaghey chengaghyn er un aght. T'ad fadaneagh as doillee dy roshtyn. As doillee dy scapail woish! Tra va mee marish ny Manninee elley ayns shen ayns Mee Vart, v'eh feayr dy liooar (cha row chiass kiart ayns ny thieyn) as feer fliugh. As cha hoig ny Manninee dy beign daue cur lhieu y bee oc hene. Myr fer-ynsee va mish geddyn bee ayns shen. Agh ayns Jerrey Fouyir cha row eh myr shen: v'eh er gagh peiagh cur lesh e vee hene. Red mie dy row Bretnee feoilt ayns shen va cur bee dou!
Ayns Jerrey Fouyir, va Cornagh enmyssit Davyth Fear gynsaghey Gailck voym. Ta Davyth er nynsaghey Bretnish chammah as dy vel eh gobbyr myr fer-ynsee ayns scoill Vretnish faggys da balley Caernarfon. Goll rhym pene, ga dy vel eh coontey ram jeh Nant Gwrtheyrn, t'eh smooinaghtyn dy nhegin dooin cur er nyn doshiaght ny hynnydyn chengey ayns ny baljyn neesht. Ta shin toiggal dy mie yn aght dy vel sleih currit da buill fadanaeagh kiune as ''Celtiagh''. Agh ec y traa cheddin shegin dooin jannoo nyn gooid share dy chur caa dy ynsaghey ny chengaghyn Celtiagh dauesyn ta cummal ayns ny baljyn as nagh vel laccal goll gys buill t'ad coontey y ve ''garroo". Ren un ven voght goll er chea veih'n Nant yn oie roish Oie Houney er y fa dy row ee riojit. Cha nodmayd ooilley ve creoi as Celtiagh.


Brian y Stoyll


Smooinaghtyn Er My Laghyn Seyrey.


Seeing how people are living in another Celtic country should strengthen your resolve to resist further dilution of your own culture because by doing so you also defend the other country's culture.

Va mee er Ellan Eeley mleeaney, yn chied cheayrt va mee er shen. Va'n turrys yindyssagh, er-lhimmey jeh shey ooryn jeig as feed va shin ceau ec yn phurt aer Glaschu, agh va eer yn skeeal shen aitt er aght ennagh. Aghterbee, cha nel mee er-chee g'insh yn skeeal mychione yn turrys-hene, ga dy vel palchey oddin gra, reddyn nagh bee er-my-yarrood son dy bragh. Ta mee g'eearree screeu sheese my smooinaghtyn mychione red haink hym er'n ellan.
Erreish dou ve er shen rish laa ny jees va mee gennaghtyn dy row ee sheer gollrish Ellan Vannin yn aght v'ee queig bleeaney as feed er-dy-henney. Va'n sleih ynnydagh beaghey bunnys er'n aght cheddin, cha nee er aght oddagh oo fakin, v'ad coamrit er aght jeinagh, v'ad g'imman gleashtanyn noa as myr shen, agh va dy-chooilley red goll ny s'melley dyn driss erbee orroo. Ga nagh row siyr agglagh orroo, va dy-chooilley red jeant oc
Ta shin dy-kinjagh gra dy vel traa dy liooar ayn, agh cha row fys aym dy row wheesh dy hraa. Tra raink mee Ellan Vannin reesht va mee g'ennaghtyn dy row mee ayns Sostyn, ny boayl ennagh elley, boayl nagh vel traa ec peiagh erbee dy yannoo veg. Shen yn aght ta caghlaa er jeet dys Ellan Vannin dyn mish tastey y ghoaill jeh. S'treisht lhiam nagh jig yn caghlaa shen dys Eeley.
Ta fys ain ooilley cre voish haink yn caghlaa as cre'n oyr. Vodmayd cur lhiettrymys er, vodmayd aa-croo yn shenn aght beaghey reesht? Gyn ourys, bee eh lane dooillee, agh ta mee g'obbal credjal dy vel eh neuyantagh. Keayrt dy row dooyrt Doolish y Karagher rhym dy row eh smooinaghtyn er goll dys fer jeh ny Inshyn Goal er-yn-oyr dy row eh g'aase skee jeh streppey noi Sostnaghey jeh e heer hene. Cha jagh eh, bwooise da Jee, as er lhiams dy beagh eh er ve neu-kiart dasyn goll. Cha vod peiagh erbee cosney ersooyl voish yn olk shoh. Myr t'ou goll dys boayl elley, hig ee geiyn ort traa ennagh. Shegin da dagh ashoonagh streppey noi'n olk ayns e heer hene, er'n aght shen ta shin cooney lesh dagh ashoon Celtiagh elley. Tra ta shin cosney barriaght veg dooin-hene ayns nyn jeer-hene, ta shin cosney barriaght da dagh cheer elley.
Cha nel eh jeh ymmyd erbee goll dys cheer elley yn caggey y haghney. Hig yn caggey shirrey ort, S'foddey share eh jannoo dty chooid share caggey boayl ta fys eu er'n noid, nagh cur oarlagh da fegooish caggey eulyssagh. Myr shen, myr t'ou speeideilagh foddee nagh jig yn noid as ooilley e h'olk dys ny buill elley chioee as bee ad foast er-mayrn, as foddee oo goaill soylley jeu er son dy bragh.
Colin y Jerree