Carn 63


Mannin as Y Chorn.


Mastey ny cheeraghyn Celtiagh, skimmey keayrt ta shin cosoylaghey Mannin rish y Chorn. Goll rish y Ghailck, va'n Chornish bunnys ersooyl. Ta'n daa heer surranse er y fa dy vel ymmodee joarreeyn er jeet dy chummal ayn. Ta ard-ghoo ec y daa heer myr buill ry-hoi laghyn seyrey. Agh shegin dou gra dy vel y cosoylaghey shoh cur yn olk orrym dy mennick. Shimmey anchaslys eddyr y daa heer. Ny keayrtyn, shegin dou goaill rish dy vel mee er jeet dy ve began corree tra hoilshee nyn mraaraghyn as shuyraghyn Cornagh nagh vel ad toiggal dy vel seihll elley ayns Mannin. Ga dy vel shin gaccan my e chione, ta Tynvaal ayn. Ga dy vel eh cheet dy ve ny Sostnee gagh laa, ta'n leighderys Manninagh ayn. Ta shenn reddyn as cliaghtaghyn ayns Mannin foast ta slane Manninagh, ga dy vel ad ayns gaue mooar nish.
Gyn ourys, ta shenn reddyn as cliaghtaghyn sy Chorn ta slane Cornagh. Agh cha nel y vondeish jeh reiltys Cornagh as leighderys Cornagh er ve oc rish keeadyn dy vleeantyn. Foddee dy vel eh ny share myr shen: my ta Manninaghys ry akin ayns reiltys as leighderys, cha nel eh feer vondeishagh da ny Manninee nish as ooilley ny riftanyn ooasle as roosteyryn gymmydey lieh-heyrsnys Vannin dy chosney argid! Agh ny-yei shen as ooilley, t'eh jeeaghyn nagh vel ny Manninee toiggal ny vondeishyn ta foast oc.
Vondeish elley t'ec Mannin: s'cooin lesh paart jin sleih va loayrt Gailck dy dooghyssagh. Cha vod Cornagh erbee gra yn un red mysh Cornish. Agh my t'ou goll gys chaglymyn goll rish Scrif Celt, nee oo fakin dy vel dy Cornee foddey ny s'tarroogh na ny Manninee ayns cooishyn chengey. Ta ny Cornee cur magh ny smoo lioaryn ayns Cornish as mychione Cornish na ta ny Manninee jannoo bentyn rish y Ghailck. Dy mennick, ta ny Cornee sheiltyn dy ve ny s'breeoil na ny Manninee. Cre'n fa?
Ta un vondeish scanshoil ec ny Cornee cosoyllit rish ny Manninee: ta ny smoo jeu ayn. Ta shoh scanshoil er y fa dy vel oo laccal sleih dy yannoo yn obbyr. As ta colught lioar oc ta ayns foayr jeh cur magh stoo Cornagh. S'treih lhiam nagh vel y lhied ayns Mannin neayrs hooar y Shearwater Press baase.
Gyn ourys, ta ram obbyr er ve jeant son y Ghailck as ta paart jee er ve speeideilagh. Va fockleyr y Vreagagh currit magh, va coorseyn O-level jeant, ta ny lioaryn ''Spot'' as ''Ny Chied Thousane Fockle Gailckagh'' er ve currit magh. As red yindysagh dy vel Gailck ry chlashtyn gagh shiaghtin er Radio Vannin. As cre mysh ny scannaneyn Gailckagh?
Agh ta obbyr erskyn towse ry yannoo. Ta shin ayns feme jeh coorseyn-baghee raad ta sleih goll dy chummal ry cheilley son paart dy laghyn dy heet dy ve flaaoil sy Ghailck. Erskyn ooilley, ta shin laccal sleih ta loayrt Gailck gyn aggle as dy flaaoil. As shegin dooin jannoo nyn gooid share dy skeayley y Ghailck mastey'n phobble. Cha lhisagh y Ghailck ve ayns ghetto.
T'eh jeeaghyn dy vel ny Cornee er nyannoo obbyr vie ayns possanyn-cloie raad ta paitchyn gynsaghey Cornish. Raah dy row er y lhied ayns Mannin. Shegin dooin streeu dy chur y chengey er y hoshiaght gyn ve smooinaghtyn er ny shenn laghyn car y traa. Lhig dooin screeu sheese list jeh reddyn oddys ve jeant as jannoo ad.

Brian y Stoyll