Carn 71


Bretnish as y Currilym Ashoonagh


There are indications that the imposition of the UK 'National' Curriculum may lead to all children in state schools in Wales studying Welsh. This turn of events has produced some unexpected champions for the language. But how sincere are they?

Cha noddagh reiltys erbee agh reiltys y Thooder er nyannoo eh. Hoshiaght, yarrood ad y chengey Vretnagh dy bollagh tra v'ad kiaddey y Curriglym 'Ashoonagh'. Nish, ta skeealyn goll mygeayrt dy bee dy chooilley phaitchey ayns ayrnyn jeh'n Thalloo Bretnagh eginit gynsaghey dy choilley nhee trooid Bretnish!
S'leayr dou dy vel y Curriglym 'Ashonagh' geiyrt er y torch dy ashoon Sostnagh ta reiltys Hostyn laccal. Ayns y toshiaght, tra va'n Curriglym shoh goll er kiaddey, v'eh jeeaghyn nagh row fys ec ny deiney mooarey ayns Lunnin dy vel Bretnish y chied chengey ec thousaneyn dy 'leih. Shimmey paitchey nagh vel gynsaghey Baarle gys vees eh ny ee goll dys y scoill. Doillee dy chredjal eh, agh ayns y toshiaght cha row Bretnish ayns y Churriglym sy Thalloo Bretnagh. Cha nhyrrys dy row musthaa mooar ayn kyndagh rish shen as va Bretnish currit stiagh.
Agh nish ta paart dy 'leih gra dy vel reiltys Hostyn er ngoll dy jeeragh veih un cheu dys y cheu elley. Ta'n Thalloo Bretnagh goll er reill ec red t'ad gra yn Oik Bretnagh rish. Ta'n Oik Bretnagh er chur magh treealtyssyn mychione Bretnish ayns ny scoillyn as ta'n MP son Wrecsam, y Dr John Marek, gaccan dy vel ny treealtyssyn shoh goll rish red sy Romaan (Romania) tra va Ceaucescu foast ayns pooar ayns shen. Ta Marek gra dy bee dy chooilley phaitchey ayns scoillyn Bretnagh eginit gynsaghey Bretnish (feer vie, yiarrins). Ta'n Dr Marek gra dy vel eh geddyn ram screeunyn veih sleih ta feer voirit mychione Bretnish 'eginagh' as ta baggyrt cur nyn baitchyn gys scoillyn ayns Sostyn my hig Bretnish eginagh.
Red symoil dy vel Marek ny MP son y Cheshaght Obbree Ghoaldagh, ta er nyannoo ram assee da cooishyn ashoonagh sy Thalloo Bretnagh. Gyn ourys t'eh smooinaghtyn dy vel voteyn ry gheddyn liorish soie er treealyssyn ta foayroil da Bretnish, ga dy vel eh gra dy vel eshyn hene ayns foayr jeh'n chengey as dy vel eh noi'n egin ny lomarcan. Red aitt dy vel Thoreeyn, shenn noidyn ny Bretnee, abyl dy ghra ec y traa t'ayn dy vel ad gobbraghey son Bretnish. Dooyrt y Minister jeh Steat, Sir Wyn Roberts, dy vel ny treealyssyn mychione Bretnish ymmyrchagh ayns co-heks y Churriglym. Dooyrt Roberts dy nee 'tashtey' y chengey Bretnagh as dy vel y chooid smoo dy 'leih sy Thalloo Bretnagh (goaill stiagh ny cummaltee noa neesht) credjal dy vel Bretnish feeu. Bee feme son tooilley fir as mraane-ynsee Bretnish my vees bree currit da ny treealtyssyn shoh.
Dy firrinagh, cha vodmayd credjal dy vel reiltys Lunnin slane ayns foayr jeh Bretnish neesht. Ta'n chengey geddyn paart dy chooney er y fa dy vel sleih dy liooar foast loayrt ee as erskyn ooilley dy vel sleih goll roosyn ayns Cymdeithas yr Iaith Gymraeg jannoo caggey jeean as lajer son y chengey. Ta ny politickeyryn ayns Kiare as Feed Hostyn ayns Lunnin gymmydey Bretnish myr bluckan-coshey politickagh dy chosney beggan dy phooar ayns reiltys ta er jeet dy ve loau. Dy firrinagh, cha noddym credjal dy jean Lunnin cur er e hoshiaght Bretnish eginagh ayns scoillyn y Thalloo Bretnagh. Foddee dy bee slattyssyn jeant ec reiltys Lunnin lhiggey er dy vel y lheid goll er, agh cha bee yn argid ry gheddyn ny chour.
Ayns rheynn-cheerey Dyfed, ta caggey sollagh mysh y chengey er ve goll er rish tammylt. Ta polasee daa-hengagh feer speeideilagh oc ayns shen ayns ny scoillyn undinagh. Sleih va slane noi'n phiolasee shen sy toshiaght, t'ad slane ayns foayr jeh nish. Kyndagh rish y pholasee shen, ta paitchyn fo shiaght bleeaney dy eash gynsaghey trooid Bretnish as Baarle, agh beggan ny smoo trooid Bretnish. Coardail rish noidyn y chengey Bretnagh, shoh polasee jeh 'Bretnish ny lomarcan'. Paitchyn ta jeant bwooiagh dy ynsaghey Bretnish er aght feer haitnyssagh, t'ad clashtyn breagyn as foalsaght mychione ny scoillyn oc hene er y chellooish as y radio. Shass-jee dy dunnal, Vretnee!
Ga dy vel ram ry chlashtyn ayns Sostyn ec y traa t'ayn dy nhegin da ny Sostnee gynsaghey chengaghyn elley goll rish Giarmaanish, Frangish as Shapaanish, cha nel monney sleih son jannoo red erbee. Foast, ta'n chooid smoo dy Hostnee goaill aggle roish cur cheb er chengaghyn elley, er nonney t'ad noi chengaghyn elley. Ec y traa cheddin ta ny smoo paitchyn cheet magh ass scoillyn Hostyn nagh vod lhaih ny screeu Baarle dy mie. Sy chooish shoh, ta reiltys y Thooder er ve fea speeideilagh syn eab echey dy yannoo arrish er dagh red Americanagh. Roish foddey, bee scoillyn Hostyn cho agglagh as ram scoillyn Americanagh!
Agh er fa dy vel yn edjaghys goll sheese y liargagh ayns Sostyn, oddagh shoh cur wappin dauesyn ta noi Bretnish. Neemayd clashtyn ny smoo jeh'n chenn skeeal: 'Baarle kiart hoshiaght, as eisht Bretnish (foddee)'. Y sleih ta gra y lheid, son y chooid smoo she ad shoh y sleih cheddin ta boirit mychione paitchyn ve gynsaghey Baarle as Bretnish ec yn un cheayrt as eisht ta goll er dy loayrt dy foayroil mychione paitchyn er y Cheer Vooar (Continent) gynsaghey ram chengaghyn ec yn un cheayrt. Choud's ta paitchyn gynsaghey chengaghyn 'ymmydoil' t'eh mie dy liooar, t'ad gra. Agh ta drogh ourys aym dy vel ram jeh'n sleih shoh credjal dy vel Baarle yn ynrican chengey ta 'ymmydoil'.

Brian y Stoyll


Chellveeish ayns yn Albin


Summary:
The promise of 200 extra hours of Gaelic television in Scotland has raised many questions about programme content and timing. The danger of the money draining away elsewhere has also been mooted.

Ta gialdyn er ve currit da ny h'Albinee tammylt beg er-dy-henney beagh hoght millioon punt ayn dy g'eeck son daa cheead oor smoo imskeayllaghyn ayns Gàidhlig. Ta lane accan er vrishey magh chelleeragh mychione yn aght lhisagh immyd ve jeant jeh'n argid. Ta laueyn jioogh stroshey veih'n yiass hannah ec sleih gyn sym erbee ayns cooish ny Gaelgeyryn. Ta aggle neesht ec Brian Wilson (eshyn ta loayrt ass lheh cooishyn ynnydagh yn Albin son ny Soshiallee ayns Westminster) bee ny claareyn scarrit as caillt mastey ooilley yn trushtey voish Sostyn as ardjyn elley. Hug eh roish dy lhisagh ooilley ny claareyn noa shoh, goll imskeaylley magh ec yn un cheayrt cheddin dagh laa, yn aght be sorch dy min SC4 crooit oc. Ta trushtey dy-liooar roshtyn Albin trooid ny jystyn ta snaue ass ny chamryn-aarlee as drappal seose ny boallaghyn.
Va boirey elley ayn ec chaglym ayns Mee Voaldyn ec Inverness. Dooyrt Bob Christie, stiureyder chellveeish Grampian, dy lhisagh ny claareyn goaill stiagh naightyn, cooishyn yn laa, craaueeaght, edjaghys yn theay as chellveeish ny phaitchyn. Traa dooyrt eh dy lhisagh drama goll dys kione sodjey yn arbyl va screeudeyryn ayns Gàidhlig corree agglagh. Va'n chaglym currit er bun er-lheh dy loayrt mychione caaghyn noa ta g'aase as bishaghey da ny screeudeyryn shoh, as v'ad sheiltyn dy row Christie dooney yn dorrys smoo gialdynagh ayns nyn eddinyn.
Ayns ard elley ta Donald Smith gra dy vel caa er ve currit da Gaelgeyryn Albinagh dy chroo aght er-lheh oc-hene ayns imskeayllaght. Ta palchey ayn ayns shenn skeealyn, shennaghys, aittys as fassoonys yn Gael vees goll y vishaghey, marish kiaull as ellynee elley. Ta aghaue ayn beagh claareyn Sostnagh cheet magh ayns eaddeeyn Gaelgagh. Eer ec y traa t'ayn t'ad er chur yn far-ennym, 'After Eight Club' orroo ta chebbal geddyn greim er'n argid.
Ec bunnys yn traa cheddin haink yn naight dy hed 200 startaghyn coayl voish BBC Highland as BBC Radio nan Gàidheal. T'ad choyrt lesh yn derrey laue as t'ad goaill ersooyl lesh yn laue elley.


Colin y Jerree

Gaeltacht Er Y Cholloo!


A very successful Gaelic weekend was held on the Calf of Man in June. It is to be hoped that another trip will be arranged in the near future.

Ec jerrey yn vee Mean Souree, va kione ny shiaghtin Gaelgagh cummit er y cholloo. Hie un Ghaelgeyr jeig (shey Gaelgeyrn flaaoil as queig studeyryn) gys y Cholloo ec hoght er y chlag fastyr Jeheiney. Tra daag shin Purt Le Moirrey, va'n emshyr tashagh as va shin ooilley fliugh tra raink shin yn thie eirinagh, boayl hannee shin.
Hug shin lhien nyn greieyn-kiaullee, ny lioaryn arrane as palchey lhune as liggar, as dagh oie va shin kiaulleeaght, pynteraght as cooisheraght. Ren Chris Sheard as mee hene karraghey yn cleigh cloaie caglee jeh'n aaie, as hooyl ny Gaelgeyryn elley mygeayrt yn Cholloo jeegahyn er ny ushagyn as y lhied.
Va'n kione ny shiaghtin Gaelgagh feer ymmydagh son ny studeyryn as ny Gaelgeyryn flaaoil neesht. V'eh foddey s'assey taggloo 'sy Ghaelg tra raink shin Purt le Moirrey er y Doonaght na tra daag shin Jeheiney!
Reagh Fiona McArdle yn clane turrys. S'treisht lhiam dy bee yn lhied reaghit ec Fiona reesht.

Phillie Beg