Carn 78

Ashoonyn as Mynlughtyn



Nationalism is usually thought of in terms of the way it is expressed by the imperial nations. This variety of nationalism has been responsible for much that is wrong with recent history. These nations, and their people, find it difficult to understand the aspirations of smaller nations included within their borders or populations with other traditions in their midst. They assume that these minorities can participate in the culture of the larger group and find fulfilment, even to be absorbed into that culture.

Er'n Late Show, B.B.C.2, 5th Feb., va Michael Ignatieff loayrt rish Isaiah Berlin. Va Isaiah er n'akin yn toshiaght jeh'n Irree Magh ayns yn Roosh tra v'eh hoght bleeaney d'eash. Haink e lught-thie dys Sostyn tammylt beg ny s'anmey ayns bleeantyn ny feedyn. Tra v'eh ec yn Olloo-Scoill jeih bleeaney ny s'anmey, v'eh shassoo meriu va noi kiunaghey marish Hitler. Va'n cooid smoo jeu shoh nyn soshiallee jeh'n heu chlee.
Gow ad toshiaght er loayrt mychione yn irree jeh ashoonaghys fei-ny-Europey ayns mean y nuyoo keead jeig as er-lheh ayns yn Ghermaan. Smooinnee Isaiah dy gow er toshiaght tra va ashoon g'ennaghtyn injillid cosoylit rish ashoon er gerrey daue. Beagh ad smooinaghtyn dy rod ad neuchosanagh ayns cultoor, politickaght as tarmaynys. Beagh ad g'ennaghtyn dy row yn ashoon elley jannoo patroonys orroo, as beagh jeill jeant er nyn anmys-hene. Ec y toshiaght beagh ad greinnit dy hoilshaghey dy row ad corrym rish ashoon erbee elley. Aghterbee, ny keayrtyn, oddagh ad g'ennaghtyn egin dy hoilshaghey ad-hene myr deiney s'ardjey as stroshey, as foddee beagh feme oc dy yannoo cairys er reddyn olk jeant orroo. T'ad shirrey er goair scapit, goaill toghiaght er mooadaghey nyn coloinyn, as jannoo cummaght sidooragh. Maghey shoh hig caggey as pogramyn.
Myr v'ad loayrt haink eh dy ve baghtal dy row ad smooinaghtyn mychione ashoonaghys jeh ashoonyn mooarey: Yn Rank, Cheer Ny Goal as Yn Ghermaan. V'eh jeeaghyn nagh voddagh ad cur enney er ashoonaghys mastey ny ashoonyn beggey. Oddagh ad toiggal dy beagh mian ec co-hellooderysyn beggey lesh cultoor, chengey as shennaghys cadjin, dy beaghey cooidjagh myr theay scarrit. Ny-yeih, v'ad smooinaghtyn dy voddagh ad beaghey myr ayrn jeh ashoon smoo. Ec y cheayrt cheddin oddagh sleih myr shoh cur enney er cultoor cadjin jeh'n ashoon smoo as goaill ayrn as taitnys ass. Oddagh ad ve Rooshagh ayns Sostyn as myr shen. Lurg tammylt bee nyn gloan goit stiagh syn ashoon smoo. Ta mee smooinaghtyn nagh vel shen kiart. Ta mynlughtyn ayn t'er ve scarrit rish sheelogeyn ta foast g'earree tannaghtyn myr shen, dy beagh caa currit daue. Bare lesh ny troailtee tannaghtyn scarrit, agh ta nyn muill farkee goit ersooyl voue. Ga dy vel ny Hewnyn er ve beaghey nyn mast ny Sostnee, as sleih elley, rish keeadyn dy vleeantyn t'ad foast nyn sleih er-lheh as scarrit. Ta mee jerkal nagh bee ny Moslymee Goaldagh goit stiagh dy beagh nyn yeearreeyn currit daue. Eer ec y traa t'ayn t'ad g'earree scoillyn er-lheh daue-hene.
Ta cooish ayn nagh voddagh Berlin as sleih elley toiggal. Cha nel yn cultoor cadjin t'ad loayrt mychione ny chultoor cadjin er chor-erbee. Cha nel eh jeh feeuid erbee da'n sleih cadjin, goaill stiagh ny Sostnee cadjin. S'lesh ny berchee eh. T'ad kionnaghey jallooghyn, ard-chiaull, ballay as cooidyn ard-ellynagh ry-hoi soilshaghey rish yn sleih cadjin dy vel ad berchagh as er-yn-oyr shen lhisagh ad ve nyn reiltee. Mastey ny ard-Sostnee ta palchey jeu ayn ta loayrt mychione cultoor, as cur ram argid da, as arrym da, agh ta'n cultoor Europagh t'ad kionnaghey. Ta'n Kiannoortys Vannin jannoo yn red cheddin. T'ad kionnaghey ard-chiaull as kiaulldramey dauesyn ta g'earree soilshaghey ad-hene dy ve ny share as ny stroshey na'n theay chadjin. Ta argid niart, as adsyn ta g'eeck smoo argid smoo niartal. Ta sleih ayn as adsyn smooinaghtyn dy row ny berchee kionnaghey wheesh dy yallooaghyn jeh mraane rooisht ayns ny laghyn er n'gholl shaghey, er-yn-oyr dy row feme oc dy ennaghtyn dy row niart oc harroo. As ny smoo ny shen, v'ad soilshaghey daue-hene as nyn gaarjyn dy row palchey dy argid oc as, myr shen, palchey dy niart. Myr shen neesht, v'ad toilchin ve nyn reiltee.
Cha nel yn cooid smoo jeh'n sleih cadjin cur monney arrym da'n chultoor shoh. Son yn cooid smoo jeh ny Sostnee cha nel cultoor cadjin ayn, as t'ad cur arrym da bluckan coshey as kiaull cadjin voish America. Bunnys nagh vel cultoor cadjin erbee oc-hene. Cha vod ad cur enney er cultooryn ny Cheltee, as mynlughtyn elley, as cha nel ad toiggal cre'n fa t'ad scanshoil daue. Cha nel y lhied oc as cha nel ad sheiltyn dy vel nyn jengey ayns gaue. Oddagh oo gra dy vel yindys oc dy vel chengey erbee elley ayn, er-lhimmey jeh Baarle. T'ad goaill yindys myrgeddin tra ta ny mynlughtyn elley g'earree nyn giannoortys-hene. Cha vod ad toiggal cre'n fa nagh b'vian lesh ny mynlughtyn ve nyn ayrn jeh'n ashoon smoo. T'ad smooinaghtyn dy vel shin nyn Ghoaldee as tra ta roortagh voish Nalbin cosney yn airh ec ny Olympee t'eh cheet dy ve ny Ghoaldagh chelleeragh. Tammylt beg er dy-henney, haink Nicky Keig dy ve ny Ghoaldagh lieh harrish Yn Eearvooir.
Ta eer ny Sostnee-hene g'ennaghtyn ad-hene myr Sostnee hoshiaght as nyn Ghoaldee 'syn nah ynnyd. Ta mee shickyr dy vel paart jeu ayn ta g'ennaghtyn ad-hene myr deiney Yorkshire hoshiaght, Sostnagh 'syn nah ynnyd as nyn Ghoaldee jerrinagh. Cre'n fa eisht nagh vod ad toiggal adsyn ta nyn Manninee hoshiaght, nyn Ghoaldee 'syn nah ynnyd agh cha nel rieau nyn Hostnee. T'ad toiggal mie dy-liooar dy vel Unnaneyseyr Ultagh g'ennaghtyn ny Ultagh hoshiaght, eisht Goaldagh agh cha nel rieau ny Yernagh. Ta eer Isaiah Berlin hene goaill rish dy vel eh g'ennaghtyn ny Rooshagh foast as cha nel dy boallagh ny Hostnagh. T'eh gra dy vel eh g'ennaghtyn myr shoh er-yn-oyr dy vel daa hengey echey. Cha beagh shen cur lhiettrymys er cummal seose red erbee ta ny Sostnee jannoo. T'eh aarloo dy yannoo caggey er nyn-son dy beagh ad g'earree shen. Oddagh eshyn toiggal yn oyr ta ny Hewnyn g'earree ashoon er-nyn-son hene. T'eh goaill rish dy vel eh ymmyrchagh eer dy vel yn kiannoortys oc feer skian yeshagh as jannoo tranlaase er ny ashoonyn mygeayrt-y-moo. Ta mee goaill orrym-pene dy vel Isaiah Berlin foast g'ennaghtyn eh-hene dy ve ny Hew.
Er laa elley va sleih loayrt mychione ben ennagh voish Guatemala va currit roish son yn Aundyr Nobel cour screeuaght. Ta e smooinaghtyn as cooinaghtyn mychione aght beaghey ny vunlughtee e heer, goaill stiagh nyn hennaghys, ashlishyn, feayn skeealleydaght, keeaylyn chionnit as ennaghtyn er ve currit sheese. V'ad gaccan nagh row yn lioar feer screeuaght er-yn-oyr nagh row ee screeuit ec-hene. Va e fockleyn currit sheese er recortysser rybbanagh as eisht screeuit sheese ec reagheyder. Myr t'ou smooinaghtyn er-yn aght shoh cha nel feayn-skeealleydaght Ghreagagh, ny Cheltiagh, ny foddee eer Yn Conaant Noa feer screeuaght.
Ayns scoill Manninagh tammylt beg er dy-henney va arrane currit da ny phaitchyn. Dooyrt yn fer-ynsee dy row eh orroo dy screeu linney-hraa. Hug eh orroo dy feddyn magh mychione yn lhing Henry Hoght. Beagh shen aashagh dy-liooar, dooyrt eh, er-yn-oyr dy vel ram screeuit my-e-chione kyndagh rish e scansh ayns nyn hennaghys.


Colin y Jerree






Yn Aght dy Yannoo Blebeeyn


The United Kingdom election result showed the continuing grip of southern England along with anti-Celtic racism.

Yeeagh y reihys Goaldagh dooin yn aght dy yannoo blebeeyn jeh'n chooid smoo jeh'n theay car y traa. Cha noddagh oo gra dy beagh flaunys ayn dy beagh y varriaght ec y Cheshaght Obbree Ghoaldagh. Agh veagh red erbee, bunnys, ny share na ny riftanyn as ommidanyn shen sy Cheshaght Thoreeagh. Ga dy vel Major jannoo eab ennagh dy scapail veih scadoo y Thooder, dy firrinagh she guilley drid y Thooder t'ayn. Son y chooid smoo, ta'n fer beg shoh geiyrt er ny polaseeyn shen ren cur er milliunyn dy ve ayns stayd treih. As ren kuse vooar jeh ny milliunyn shen votal son ny polaseeyn shen! Red trimshagh dy vel y sleih shoh credjal ny breagyn cughtee t'ad lhaih bunnys gagh laa ayns pabyryn naight goll rish y 'Sun'.
Lurg y reihys shoh as shinyn beggan ny s'creeney, fodmayd gra nagh row shin dy firrinagh credjal dy voghe ny Albinee nyn seyrsnys cho tappee as nagh beagh y laue varroo jeh jiass Hostyn foast ny lhie dy trome er gagh red. Agh son tammylt beg va paart jin aarloo dy chredjal dy beagh ny mirrilyn shoh taghyrt. Haink y jeihoo laa jeh Mee Averil as va shin foast sy chenn stayd, myr va Jee kiarail, t'eh jeeaghyn. As cha dod ny Thoreeyn credjal eh noadyr.
Yn ynrican mieys haink magh ass y chooish scammyltagh shoh, va shen nagh dooar ny Unnaneyseyryn ayns Nerin twoaie tooilley smaght er Lunnin. Ec un cheayrt v'eh jeeaghyn dy beagh laue yn eaghtyr ec y phossan shoh dy beagh ardwhaiyl 'croghit' ayn. Agh t'eh olk dy liooar, foddee, dy vel dooiney goll rish Mayhew ny ree ayns Nerin Twoaie nish. Cha noddagh oo gra dy vel y fer shoh feer ghraihagh er ny Yernee. T'eh ro faggys da chiarnyn-thallooin Nerin twoaie. Haink corree as aggle er Divlyn tra cheayll ad dy row Mayhew pointit.
As ayns Sostyn hene, ta'n cheer ny smoo scoltit na v'ee rieau. Ta sleih ayns Surrey coontey sleih ayns Cashtal Noa myr cretooryn voish cheer (planaid?) elley. Roish as lurg y reihys, v'eh baghtal ry akin nagh row milliunyn dy Hostnee abyl votal son Kinnock er y fa dy vel eh ny Vretnagh. Va shoh ny red feer hymoil. S'mie lesh y chooid smoo jeh ny Hostnee sleih y ve rheynnit ayns brastyllyn as clubbyn. Cha nel y chooid smoo jeh ny Celtiee toiggal reillyn y ghamman shoh. Son ny Celtiee ta cummal as gobbraghey ayns Sostyn, shoh ny vondeish dy mennick, myr shione dooys. Agh she neuvondeish t'ayn y ve dty Cheltiagh my t'ou shirrey reill harrish y Reeriaght Unnaneyssit, myr hooar Kinnock magh.
Son shickyrys, ta Celtiee ennagh er ngeddyn yn startey shoh. Ta'n ennym Lloyd George lheim stiagh syn aigney aym. Agh reesht t'eh feer hymoil dy loayragh sleih mysh y 'Fer-Obbee Bretnagh' tra v'ad loayrt mysh Lloyd George. Hooar eh y startey liorish kialgeyrys Celtiagh, ta shen dy ghra obbeeys as druaightys. Cha row eh ny 'decent chap'.
Va'n beoyn shoh ry akin dy cronnal feiy'n reihys shoh chaie ayns Sostyn. Lurg y reihys, dooyrt Sostnee er y chellooish nagh vote ad son Kinnock er y fa dy nee Bretnagh t'ayn. V'ad laccal votal er e hon, agh cha dod ad eh 'yannoo.
Ta shoh soilshaghey magh y doilleeid t'ec ny Celtiee ta cummal fo smaght Lunnin. S'treih lhiam screeu shoh, agh shen boghtymd va grait ec yn Albinagh shen sy Cheshaght Obbree er y chellooish tra hooar eh y varriaght harrish Jim Sillars jeh Sheshaght Ashoonagh Nalbin. Dooyrt yn Albinagh shoh dy row e varriaght soilshaghey magh dy row sleih Nalbin laccal tannaght marish sleih Virmingham (myr dy beagh sleih Nalbin jarrood sleih Virmingham dy voghe Nalbin sorch dy heyrsnys!) Ta foast sleih onnoroil ayns Nalbin ta dy firrinagh laccal cooney lesh sleih Hostyn. Agh t'eh doillee dy liooar dy feddyn sleih ayns jiass Hostyn ta laccal cooney lesh Nalbin er-lhiam.
T'eh cheet dy ve ny smoo as ny smoo ymmyrchagh dy vod Nalbin, y Thalloo Bretnagh as Nerin ooilley scapail veih Lunnin. S'cosoylagh nagh vod ad scapail dy bollagh son tammylt foddey, agh shegin daue jannoo nyn gooid share dy lhaggaghey y kiangley agglagh shen.
Ayns Mannin, v'eh ny red aitt dy chlashtyn sleih er Radio Vannin gra dy beagh eh ny red olk dy beagh y varriaght ec y Cheshaght Obbree Ghoaldagh er y fa dy jinnagh ad soie er staydys-keesh Vannin. Agh er y laue elley, veagh eh olk dy voghe ny Thoreeyn y varriaght er y fa dy beagh adsyn ginjillaghey keeshyn Hostyn as eisht cha beagh bwhid ghonnagh cheet gys Mannin arragh. Mannin voght.


Orree Crennell