Carn 85
Yernish Ayns Nerin Twoaie
The position of Irish in Northern Ireland has improved in recent years,
although that position is not secure. It is instructive to look at the
attitudes to the language before and after Partition on the part of London
and the former Unionist administration in Belfast.
Hug carrey Yernagh dou coip jeh lioaran feer anaasagh. Ta'n lioaran
shoh enmyssit 'The Irish Language in Northem Ireland: The Training of Primary
and Post Primary Teachers'. V'eh screeut liorish Liam S. Andrews ass lieh
yn Fryske Akademy, ta geddyn argid veih'n Oaseirys Oarpagh (European Commission).
Ta'n lioaran cur bwooise da 'Gaeil vie y Twoaie dreill yn Yernish bio sy
lhing dorraghey'.
Mastey reddyn elley, ta'n lioaran shoh soilshaghey magh yn aght dy
row reiltys Lunnin cur geill ennagh da Yernish roish my row Nerin rheynnit
ayns 1920. Tra hooar unnaneyseyryn ny Shey Counteeyn y reiltys oc hene,
ren ad nyn gooid share dy chur y chengey ghooghyssagh fo chosh. Shoh lessoon
niartal dauesyn ec y traa t'ayn ta shirrey cur y clag ersooyl as lhiggey
da ny hunnaneyseyryn jannoo red erbee t'ad laccal ayns ny Shey Counteeyn.
Tra hooar ny hunnaneyseyryn pooar ayns 1920 as 1921, ghow ad ymmyd jeh'n
phooar shen gyn lhiettal, bunnys, gys haink ny 'trubbylyn' s'jerree ayns
ny bleeantyn tree feed. Ta fys ec y chooid smoo jin dy vel ymmodee sleih
nish ayns Nerin Twoaie gobbraghey son y chengey. Agh foddee dy vel shin
cliaghtey smooinaghtyn er shoh myr red thalk noa. Cha nel shen kiart -
va ram sleih ayns foayr jeh ynsaghey as loayrt Yernish ayns Nerin Twoaie
tra va'n steat noa currit er bun. Agh va'n chengey bunnys plooghit dy bollagh
ec reiltys Stormont.
Red feer hrimshagh v'ayn dy daink Yernish dy ve coontit myr red 'Catoleagh'
ny lomarcan. S'goan y peiagh t'ayn nish as fys echey ny eck dy row Yernish
screeut er ny bratteeyn jeh Possanyn Jiarg-bwee (Orange Lodges) dy liooar
- as dy daink arrane myr 'Lilibulero' veih arrane Yernish.
Ayns ny hardjyn haink dy ve ny Shey Counteeyn, va'n chengey er raad
y vaaish myr chengey y theay sy nuyoo cheead jeig. Ayns 1851 ayns ny hardjyn
shen, va Yernish ec 39,236 dy 'leih, ny 2.7% jeh ny cummaltee ooilley cooidjagh.
Sy vlein 1893, va'n Commeeys Yernish currit er bun as haink ashooneyryn
Yernagh dy ve ayns foayr jeh'n chengey. Kyndagh rish shen, va'n coontey-sleih
ayns 1911 gra dy row Yernish ec 28,729 dy 'leih (2.3%). S'cosoylagh nagh
row yn earroo kiart cho ard as shen, agh hoilshee yn earroo magh dy row
sleih dy liooar ayns foayr jeh Yernish ayns ny hardjyn haink dy ve 'Nerin
Twoaie' ayns 1920. Va boodeeys Yernish ayn va arryltagh dy obbraghey dy
jeean son y chengey. Harrish Nerin ooilley, va'n Commeeys Yernagh er chur
er reiltys Lunnin dy ghoaill rish yn chengey as dy chur paart dy chooney
jee.
Va'n cheer rheynnit as cha row coontey-sleih ayns Nerin Twoaie cur
geill da Yernish gys y vlein 1991. Coardail rish y choontey-sleih ayns
1991, va Yernish ennagh ec 142,003 dy chummaltee ny Shey Chounteeyn as
ad tree bleeaney dy eash as ny shinney. Shen 9.5 sy cheead jeh ny cummaltee
ooilliu. Reeshtagh, bee ourys ayn dy vel yn earroo shoh ro ard, agh s'leayr
dy vel ram sleih graihagh er y chengey as shirrey ymmydey ee.
Roish my row Nerin rheynnit, va'n reiltys Sostnagh er vockley magh
dy row Yernish ry-gheddyn myr cooish reihyssagh ayns ooryn reiltagh y laa-scoill.
V'eh lowit dy ynsaghey trooid Yernish ayns ardjyn raad va Yernish goll
er loayrt. Va Yernish goll er ynsaghey myr cooish-scrutaght ayns scoillyn
ardey as ayns coorsyn ollooscoill.
As va Yernish ry-gheddyn myr cooish reihyssagh dauesyn va cheet dy
ve nyn ynseyderyn ayns bunscoillyn. Chammah as shen, va reiltys Hostyn
geeck argid da colleishyn Yernish y Chommeeys Yernish, as va'n reiltys
shen cur bree da teishtyn trainal ny ynseyderyn. Va kuse dy Oaseiryn Yernish
pointit.
T'eh doillee dy gheddyn earrooyn kiart, agh t'eh jeeaghyn dy row red
goll rish 380 ynseyderyn gynsaghey Yernish ayns 177 bunscoillyn ayns 1920
sy steat noa ('Nerin Twoaie'). Va un ynseyder Yernish er y chooid sloo
ayns dy chooilley scoill ard Chatoleagh ayns Nerin Twoaie. Va Yernish goll
er ynsaghey sy choorse jeh Studeyrys Celtiagh ec Ollooscoill y Venrein
ayns Beeal Feirshtey as va Yernish ry-gheddyn ec Colleish Trainal Voirrey,
y cholleish raad va ynseyderyn Catoleagh goll er trainal.
Ghow y reiltys noa toshiaght dy stroie shoh ooilley, goaill toshiaght
ayns ny bunscoillyn, raad va'n chooid smoo jeh ny ynseydee ry-gheddyn.
Va ny reillyn bentyn rish cooishyn ayns ny bunscoillyn caghlaait as haink
eh dy feer ghoillee dy ynsaghey Yernish. Huitt ny hearrooyn jeusyn jannoo
studeyrys er Yernish ayns ny bunscoillyn. Ren reiltys Stormont obbraghey
dy jeean dy gheddyn rey rish Yernish as ayns 1933 va'n chengey ayns drogh
stayd ayns ny scoillyn. Cha row monney caghlaait ayns daeed blein. Ayns
1949, va slattys jeant va gra dy row eh noi'n leigh dy chur seose fograghyn-straid
ayns Yernish. Ayns 1956, dooyrt reiltys Nerin Twoaie nagh row lioar teks
Yernish cooie er y fa dy row brattagh beg tree-daahagh ry-akin cheu-sthie
jeh!
Voish 1900 gys 1920, va'n Commeeys Yernish er nyannoo reddyn mooarey
cour ynsaghey Yernish fud ny cheerey. Agh chaill y Commeeys e vree ayns
ny bleeantyn feed. Va Steat Seyr Nerin currit er bun as va'n Commeeys shickyr
dy beagh y reiltys noa ayns Divlyn gobbraghey dy jeean dy aavioghey y chengey.
Hooar sleih magh ny s'anmagh dy row eh ny varran mooar dy chredjal dy beagh
y chengey aavioghit liorish ny scoillyn nyn lomarcan. As ayns y 'Twoaie
Doo' va reiltys va coontey sleih myr noidyn my v'ad graihagh er y chengey.
Erskyn ooilley ayns ny Shey Counteeyn, va lught ny chengey eginit dy chroghey
foast er saasyn ancheirdagh (amateur) y Chommeeys Yernish. Kyndagh rish
shen, as rish noidys Stormont, cha dod ynseyderyn Yernish ve trainit dy
kiart.
Ta reddyn ny share nish ayns ny Shey Counteeyn. Ta thousaneyn dy 'leih
gynsaghey Yernish as goaill ymmyd jee, ga dy vel drogh Yernish dy liooar
goll er loayrt. Ta scoillyn ayn ta gynsaghey trooid Yernish, as ta stayd
ny chengey er sharaghey ayns ny hollooscoillyn. Rish feed blein nish, ta
paart dy studeyryn veih cheu ny hunnaneyseyryn er jeet dy yannoo studeyrys
Celtiagh ayns Ollooscoill y Venrein.
Ta claaryn Yernish ry-chlastyn er y radio (eer y BBC). Agh cooinee
er ny reddyn haghyr jeih bleeaney as feed er dy henney. S'aashagh blaa
ta gaase y stampey fo chosh.
Orree Crennell