Enmyn Buill


Summary

The Celtic countries are no the only ones where place names and their associated history can be lost.

Va mee clashtyn rish claare er y radio voish yn Ullee as v'ad g'accan dy row sleih ayn er shen as adsyn caghlaa enmyn buill voish Gaelg dys Baarle. V'eh taghyrt feer vennick boayl va thieyn noa goll y hroggal ayns stay baghee noa. V'ad loayrt mychione boayl enmysit Ballyree, mastey buill elley, va caghlaait dys Bexley. Ta lane fys ain, shinyn ta g'ynsaghey Gaelg, dy vel y lhied taghyrt ayns shoh, as ta fys ain ooilley dy vel lane caillt tra ta enmyn gollrish shoh skellal ersooyl.

Ta fys ain er bun jeh fockleyn gollrish "balley", "awin", "cronk" as "beg", as eer mastey ny Baarleyryn ta sleih ayn as fys oc my-nyn-gione. Ga dy vel nyn enmyn buill fo baggyrt as t'eh orrin ooilley dy coadey ad, boayl ta fys ta niart myrgeddin. Ta sleih ny mast ain ta freayll arrey dy-kinjagh as streppey dy chur erash enmyn va bunnys caillt. Agh nish, smooinee-jee er Sostyn. Ayns shen ta meeryn jerree (suffixes) dy-liooar ayns enmyn buill gollrish "-ton", "-hurst", "-worth", as "-ham" agh cha nel fys ec monney sleih er nyn vun. Ta fys ec bunnys ooilley yn theihll er y vun jeh "-ford" as "-chester" agh er-lhimmey jeusyn shen cha jinnagh monney cur bun er ennym gollrish "Billingshurst" boayl ta my huyr baghey.

Roish my row mee poost as foast baghey ayns Essex, tra nagh row fys erbee aym er'n Ghaelg, va stayd baghee noa goll y hroggal mysh daa veeiley ersooyl voym. Er yn oyr dy beagh palchey dy leih noa cheet stiagh 'sy valley beg v'ad er-chee troggal thie oast noa da ooilley ny scoarnaghyn chirrym noa shen. Va'n boayl reihit er corneil er raad enmysit "Hanging Hill Lane". Myr shen reih yn thie imbyl dy chur yn ennym "The Gibbet" er. Va lane accan mastey ny barrantee ayns yn balley sniessey (Brentwood). V'ad smooinnaghtyn dy row yn ennym jeh'n raad cheet voish dunverys-hene ennagh as d'ennee ad nagh row ennym yn thie oast cooie. Cha row ad arryltagh kied y chur er-y-hon.

'Sy vlein 1381 va irree magh ny sleih cadjin ayns Sostyn. Va fer jeh ny cooishyn v'ad noi, keesh noa va'n Ree er-chee cur ad fo enmysit yn "poll tax". Haghlee fir-baghee voish daa valley beg cheerey (Fobbing as Mucking) dys Brentwood as hyndaa ad harrish ny buird boayl va ny briwnyn beggey chaglym yn keesh. Tra cheayll ny deiney voish Kent, ta tammylt beg ersooyl harrish yn Thames voish Fobbing as Mucking, dy row nyn vraaraghyn ayns Essex g'irree magh hie ad lesh Lunnin fo'n leeideilys Wat Tyler as Jack Straw. Roish shen va saggyrt ayns Essex enmysit John Ball er ve preachcil voish teks myr shoh:

"When Adam delved and Eve span, who was then the gentleman?" Tra rosh ad ooilley dys Lunnin va'n Ree loayrt roo ec chaglym mooar ayns Spittalfields. Va Tyler dunverit dy vraheyderagh liorish yn Ard-Veoir Lunnin as ghow yn Ree as e chiannooyrtys toshiaght er tranlaase ny sleih cadjin. Hug ad palchey jeu dys y chriy ec Gallows Corner as Hanging Hill Lane ayns Essex as buill elley ayns Kent.

Screeu mish as my chaarjyn rish yn thie imbyl as dooyrt shin cre'n fa nagh oddagh ad cur ennym gollrish "The Wat Tyler" ny "The Peasants' Revolt" er'n thie oast. Oddagh jallooaghyn voish yn traa shen ve currit er ny voalaghyn as verragh shen foays er'n thie. Hooar shin freggyrt voue gra dy row ad er ve smooinaghyn er'n ennym "The Last Drop" er agh va lane boirey er ve oc hannah, as va'd er reih dy chur yn ennym "The Woodpecker" er.

Colin y Jerree

Yn Eddyr-Voggyl as ny Chengaghyn Celtiagh

Summary:

While some people may well be tired of hearing exaggerated claims for the Internet it has significant potential to further the cause of the Celtic languages.


Shimmey imraa mychione yn Eddyr Voggyl (Intenet) t'ayns na pabyryn-naight er y gherrid. Er y fa dy vel y chooish shoh bentyn rish co-earrooderyn as y lheid, nee ram sleih gra nagh mie lhieu clashtyn my e chione. Agh oddagh y lheid jannoo foays da chengaghyn beggey goll rish ny chengaghyn Celtiagh as bare dooin goaill ymmyd jeh.

Ghow yn Eddyr-Voggyl toshiaght red goll rish jeih bleeaney as feed er dy henney tra va ny Americanee geearree co-earrooderyn mooarey y chiangley ry cheilley. Ec y traa v'ayn, cha nee agh co-earrooderyn mooarey v'ayn, ayns ynnydyn ronsee currit da cooishyn-caggee as ayns ollooscoillyn (ram jeusyn currit da cooishyn-caggee neesht). Lurg tammylt, hoig sleih dy liooar dy row eh beggan ommidjagh dy ve gobbraghey dy jeean lesh co-earrooder mooar ayns un voayl, geddyn ooilley ny eiyrtysyn (results) er tape ny pabyr, eisht cur lesh ooilley ny tapeyn as pabyr shen ayns gleashtan ny etlan dys co earrooder mooar elley ayns boayl elley, as jannoo obbyr dy liooar nagh row ymmyrchagh. Cre mysh kiangley y daa cho-earrooder ry cheilley as giarrey magh ram jeh'n obbyr? Eisht, veagh y daa cho earrooder 'loayrt' eddyr oc hene, goaill ymmyd jeh linnaghyn-chellvane. Dy beagh sheanseyryn (scientists) gobbraghey ayns California, abbyr, oddagh ad cur eiyrtysyn nyn obbyr stiagh ayns co-earrooder raad v'ad gobbraghey as eisht cur ny eiyrtysyn shen dys co-earrooder erbee va kianlt lesh y cho-earrooder ocsyn. Oddagh y nah cho-earrooder ve faggys da'n chied cho- earrooder, ny thousaneyn dy veeilaghyn ersooyl. As oddagh co-earrooderyn dy liooar ve kianlt ry cheilley dy yannoo moggyl (network).

Ghow sleih toshiaght dy chur chaghteraghtyn hug sleih elley harrish ny linnaghyn eddyr ny co-earrooderyn. Va shen y toshiaght jeh post lectraneagh as y toshiaght jeh'n Eddyr-Voggyl myr ta shin toiggal eh nish. Va moggylyn currit er bun son anaaseyn er-lheh (special interests). Eisht, va moggyl mooar jeant jeh ny moggylyn ooilley. Y moggyl mooar, shen yn Eddyr-Voggyl.

Derrey tammylt beg er dy henney, v'eh doillee da peiagh ny lomarcan dy ghoaill ayrn syn Eddyr-Voggyl. V'eh orts ymmyd y ghoaill jeh co-earrooder mooar va lesh reiltys ny ollooscoill ennagh. Agh nish, foddee oo goaill ayrn lesh co-earrooder persoonagh sy thie ayd hene, choud's ta jee-chummeyder (modem) ayd as t'ou surransagh dy liooar. Jee-chummeyder, shen greie ta lhiggey da co-earrooder ennagh 'loayrt' rish co-earrooder elley harrish linney chellvane.
T'ou geeck argid dy reiltagh da sheshaght-voggyl ennagh as t'ee shen cooney lhiat dy ghoaill ayrn sy voggyl eck hene as syn Eddyr-Voggyl. Dy firrinagh, t'eh foast doillee as costal dy liooar dy ghoaill ayrn, ga dy vod oo 'loayrt' rish sleih ayns Tokyo, abbyr, son y leagh jeh eam-chellvane ynnydagh (bwooise da'n argid reiltagh t'ou geeek da'n cheshaght voggyl). Ta'n doilleeid ayn kyndagh rish cooid-vog (software) teaymagh as jee chummeyderyn teaymagh. Ta colught Microsoft toiggal shoh, as t'adsyn er-chee creck stoo vees dty warree abyl dy ymmydey gyn boirey! Heemayd.

Ta moggylyn co-earrooder ymmydoil dooin er y fa dy vodmayd cur stoo Celtiagh noon as noal feiy ny cruinney. Fodmayd cur stoo-ynsee (lesh jallooyn as sheean) harrish ny linnaghyn. Dy jarroo, ta Marion Gunn voish Divlyn as e caarjyn jannoo y lheid rish shiartanse dy vleeantyn lesh y voggyl Gaelagh GAELIC-L. Agh foastagh, tra va shen currit er bun, v'ou eginit goll trooid co-earrooder mooar - red nagh vod oo roshtyn dy aashagh ayns Mannin. Nish, ta reddyn er jeet dy ve ny sassey.

Son shickyrys, cha nodmayd jerkal rish mirrilyn dy heet magh ass co-earrooderyn. Ta niart boghtynid er ny screeu mychione Ard-Raad Mooar y Fysseree (The Information Superhighway), raad vees co-earrooderyn, chellvaneyn as chellveeish gobbraghey ry cheilley. Dy firrinagh, cha nel monney anaase ec y chooid smoo dy 'leih er y lheid ec y traa t'ayn. Rouyr blaatar, foddee. Agh red erbee ta lowal dooin skeayley magh fys er yn Ghaelg, she red feeu t'ayn, gyn ourys erbee. Erskyn ooilley, sheeu eh tra ta sleih shirrey y lheid orrinyn. As ec y traa cheddin, fodmayd gynsaghey voish stoo ta shin geddyn voish cheeraghyn elley, stoo ta cheet harrish ny moggylyn.

Ta reiltysyn toiggal dy vel niart ec y fysseree (information). Er aghtyn ennagh, ta ny Americanee ny smoo currit da seyrsnys y pheiagh na ny Oarpee. Shen y fa dy daink yn Eddyr-Voggyl rish ayns America. Agh eer ayns shid, ta sleih pooaral cheet dy ve imneagh mychione corvaal yn Eddyr-Voggyl. By vie lhieu eh y chur fo'n smaght oc as gagh red y reill dy jesh. Choud's shoh, ta lught yn Eddyr Voggyl caggey dy jeean noi shen.

Surrys enn nagh bee reiltys Hostyn ny smoo graihagh er yn Eddyr-Voggyl lurg da fer brishey stiagh ayns co-earrooder Chellinsh Goaldagh as feddyn magh earrooyn-chellvane follit. Agh s'doillee da reiltys Hostyn lhiggey er dy vel eh geddyn rey rish reillyn as prowal dy screeu reillyn noa ec y traa cheddin. Dy bishee niart yn Eddyr-Voggyl! As nagh mie dy smooinaghtyn dy vel oo cur paart dy imnea er reiltys ennagh as oo cur cooishyn Celtiagh er e hoshiaght ec y traa cheddin.

Orree Crennell