MOIR NY CRUINNEY
Va'n ven ny lhie dy kiune er lhiabbee jeant ass faiyr vog. V'ee coontey
ny rollageyn as hug ee failt orroo ooilley. Hie yn eayst tessen y speyr
doo, soilshean er y thalloo. "Kys t'ou?" dooyrt y ven as hug
ee failt er yn eayst, tra haink ee r'ee. Yeeagh yn eayst er y ven as mongey
er e meill. Lhig y ven osney ass-jee; she laa yindysagh v'ayn jiu. Yeigh
ee e sooillyn as dooyrt ee "Oie vie" rish ooilley ny beiyn, biljyn
as lossreeyn, roish my daink cadley sheeoil urree.
Ghooisht ee eddyr y daa hollys, as doshil ee e sooillyn, heeyn ee magh
ny roihaghyn eck as lurg tammylt haink ee huic hene. Yeeagh ee trooid duillagyn
ny biljyn as honnick ee yn ghrian girree seose 'sy speyr. Hrog ee ee-hene
er ny uiljyn eck as yeeagh ee mygeayrt-y-mooee. Cheayll ee ny ushaghyn
kiaulleeagh as ny beiyn roie mygeayrt 'sy cheyll, as haink soar millish
ny h-ooirrey as ny blaaghyn huic. Hayrn ee ennal trome stiagh 'sy troin
eck as ny lurg shen v'ee slane dooisht. Va'n ushtey skiootal harrish ny
cassyn eck, choud's v'ee ny soie geaishtagh rish y trooan va roie harrish
ny claghyn.
Doshil ee e beeal as hug ee failt er yn laa lesh coraa kiaullee as mial.
Dirree ee seose as roie ee yn daa laue sheeynt eck ayns ushtey millish
yn trooan. Hie ee sheese er e glioonyn er clagh vooar ayns mean y trooan,
as vrish ee eaghtyr yn ushtey lesh ny laueyn eck reesht. Va'n ushtey feayr,
glen as oor. Hug ee eab er goaill greim er ny scellyn, agh cha dod ee.
Ren ee cappan jeh ny bassyn eck as diu ee e saie jeh'n ushtey oor millish.
Yeeagh ee er ny eeastyn va snaue mygeayrt y mooee as trooid cuirtlaghyn
va gaase faggys da'n vroogh. Honnick ee rannag ny soie er lilee, as cheayll
ee ushagyn goaill arrane ayns ny biljyn. Eisht roie ee trooid yn cheyll
lhiggey da ny laueyn eck strooghey roost ny biljyn. Roie ee as lheim ee
'syn aiyr, mongey as garaghtee, loayrt rish dy chooilley red va bio 'sy
cheyll. Ren y gheay sheidey trooid ny duillagyn, leaystey ny biljyn noon
as noal. Va shoh traa lane dy ghialdynyn son dy chooilley red 'sy teihll.
V'ee maynrey, she moir ny cruinney v'ee.
Screeuit liorish S.Garrett.
*******************************************************
SKEEAL GIARE FIRRINAGH
Shoh yn imbagh son giensaghyn as y lhied, nagh vel? Lhig dou ginsh skeeal
giare diu .
Kuse dy vleeantyn er-dy-henney, va mee my oltey jeh sheshaght-hiaullee
ayns Doolish. Hie giense "eaddagh-breagey" er ny chummal gagh
blein, as un vlein, hie mee gys shen coamrit gollrish "LUGH MICKEY"!
Cheau mee oashyryn liauyrey doo, troosyn giarey as gallasyn lesh crammanyn
mooarey. Hug mee slaa doo er my lieckanyn as stroin, as ren mee cleayshyn
mooarey braew as famman thanney liauyr. Er lhiam dy row mee jeeaghyn my
lugh stoamey ! !
Va bine dy yough as paart dy vee ry-gheddyn, as va'n giense goll dy mie,
tra dooyrt carrey rhym dy row mee jeeaghyn bolvaneagh ! Agh myr dooyrt
mee r'ee, er yn oyr nagh row gless-huarystal aym, cha doddin jeeaghyn orrym
pene, as myr shen va mee gerjoilagh dy liooar. Smooinnee mee, 's'cummey'.
Ec kin-oie, hooar mee yn chied aundyr . Nish, cha row shen red doillee
da'n vriw, er yn oyr nagh row fer erbee elley 'sy voayl coamrit ayns "eaddagh-breagey".
. . . . . . er-lhimmey jeem pene ! ! ! ! ! ! S'feer shen.
Screeuit liorish Pamela Parkes.
CAARJYN NY GAELGEY
Va Caarjyn ny Gaelgey currit er bun 'sy vlein 1991 ec chaglym va cummit
ec Thie Tashtee Vannin ayns Doolish.She oyr yn cheshaght troggal argid
dy chooney lesh sleih elley as taghyrtyn ta cummal seose as bishaghey chengey
ny mayrey. Myrgeddin ta shin cummal brastyllyn Gailckagh ec Thie Chibbenagh
ec y Vraaid. Ta brastyllyn dauesyn ta goaill toshiaght er ynsaghey, brastyllyn
meanagh as ard vrastyllyn ayn, as brastyllyn coloayrtyssagh myrgeddin.
Ta failt er peiagh erbee dy heet dys nyn mrastyllyn ec traa erbee. Ta shin
er chummal shiartanse dy choorseyn kione-shiaghtin speeideilagh, chammah
ayns thie goaldee as ayns Thie Chibbenagh, as coorseyn jeean laaoil myrgeddin.
Ta shin cummal fastyryn coloayrtyssagh ec y Vraaid yn chied Jeheiney dagh
mee, tra ta chammah studeyryn ny Gaelgey as loayrtee flaaoil cheet cooidjagh
dy cheau fastyr taitnyssagh, jannoo coloayrtys choud's t'ad giu caffee
as tey. Ta ram lioaryn anaasagh as caartyn "gura mie eu" goll
er creck ny fastyryn shoh.
Ta shin er chummal ceiliyn, gienseyn, cuirraghyn kiaullee, oieghyn ec ny
raitchyn, fastyryn caffee, cronghyryn mooarey, fleahnyn foalley, as taghyrtyn
elley dy hroggal argid. Ta Club 300 ain, as ta'n foscreeuyn 12 dagh blein.
Ta paart jeh'n argid shoh currit dagh mee myr daa aundyr, as ta'n chooid
elley goll er tashtey.
Lesh yn argid hrog shin, chionnee Caarjyn ny Gaelgey ny cowraghyn ta currit
da paitchyn ec jerrey nyn goorse daa vlein ayns ny scoillyn. Myrgeddin
hug shin aundyr dy ve currit da'n phaitchey as y Ghailck share echey/eck
ayns co-hirraghyn y Chruinnaght. Va shoh currit yn chied cheayrt nurree.
Trooid Caarjyn ny Gaelgey va'n Ard-Aundyr Lettyragh Gaelgagh currit er
bun. Ta'n aundyr shoh currit dagh ooilley chor vlein da peiagh ennagh ta
screeu skeeal ny art ny daanyn ayns chengey ny mayrey.
Loayr rish Bnr C. Frost, 842270, mychione cheet dy ve dty oltey jeh'n Chlub
300, as rish Bnr J. Caine, 843436, mychione cooish erbee elley bentyn da
Caarjyn ny Gaelgey.
Taghyrtyn ry heet :
29 . 3. 96 'Any Questions' at the Guild Room, Straid Atholl , Purt ny h-Inshey.
13/14 . 4 . 96 Kione-Shiaghtin Gaelgagh ec Thie Chibbenagh, Yn Braaid.
17 . 5 . 96 'Night at the races' at the Ballacallin Hotel, Delbee.
Scruit liorish Joan Caine
**************************************
FORUM GAELGAGH
Nurree, va Forum Gaelgagh reaghit as paart jeh Feailley Gaelgagh. Ec y
chooish shen va ram sleih ayn as ny mast' ain, ny smoo na kiare keead blein
dy Ghaelg. Va sleih ayn nagh row agh fockle ny ghaa jeh'n Ghaelg oc, as
adsyn t'er ve loayrt yn Ghaelg neayr's nyn aegid. Va shin smooinaghtyn
er yn Ghaelg t'ayn nish as er yn Ghaelg ayns ny bleeantyn ry heet, as va
shin loayrt er yn aght dy vishaghey ee. T'ad shoh nyn mriwnyssyn.
Bee eh er yn Cheshaght Ghailckagh cur magh tooilley stoo ayns y Ghaelg;
lioaryn, kishteenyn, feeishanyn (videos) as y lhied. Smooinee shin neesht
dy bee eh eie mie dy chur magh earishlioar ayns ynnyd jeh'n screeuyn naight
ain (ta shoh yn chied 'er). Dooyrt sleih v'ayn dy row ad geearree lhaih
artyn anaasagh, skeealyn, naight as fys mychione focklyn noa. Bee eh er
yn Cheshaght Ghailckagh neesht dy loayrt magh ayns ny pabyryn naight, er
y radio, as rish ny politickeyryn, dy chur yn Ghaelg roish y theay. Ta
paitchyn ayn as Gaelg flaaoil oc, as va shin smooinaghtyn er yn aght share
dy chroo lioaryn noa er nyn son. Va aghin ayn er sleih dy chooney lesh
yn obbyr, cur focklyn mie Gaelgagh er lioaryn ta ry gheddyn hannah ayns
Baarle, Yernish as Gaelg Albinagh. Choard shin dy bee eh femoil son ooilley
ny Gaelgeyryn gobbragh cooidjagh, dy vishaghey yn Ghaelg ain.
Va shin smooinaghtyn neesht er yn obbyr ta er yn reiltys jannoo er nyn
son. Va shin briaght er tooilley Gaelg dy ve ymmydit ec yn reiltys ain,
er yn argid ain, ayns ny thieyn tashtee as er laa Tinvaal hene. Agh ny
smoo na shen, va shin briaght er tooilley Gaelg ayns ny scoillyn as son
paitchyn aegey. Ta scoill cloie ayn nish, agh cha nel ee goll er cummal
agh un cheayrt dagh shiaghtin. Lesh tooilley argid oddagh eh meeiteil dagh
laa, as eisht veagh eh ymmydoil da paitchyn nagh vel Gaelg oc 'sy thie.
Raad ta paitchyn as Gaelg flaaoil oc hannah, va shin shirrey ynsagh trooid
yn Ghaelg. Va shin smooinaghtyn dy bee eh eie mie dy reaghey coorse Gaelgagh
giare da ooilley ny paitchyn ta ayns ny scoillyn. Da ny paitchyn shinney,
va shin cummal seose yn 'GCSE' Gaelgagh as eer 'A level' Gaelgagh neesht
ayns ny bleeantyn ry heet.
Screeuit liorish Peddyr Hayhurst.
*******************************************
NODDEE AS Y TEAD YMMYDOIL
Fastyr dy row, va Noddee roie mygeayrt as driss mooar er. V'eh geabey
dy chur follid er e ghleashtan cha tappee as dod eh. "T'ou uss jeeaghyn
stret, Noddee," as Mnr Tubbee Bear. "Ta driss agglagh orrym,
ta shiu toiggal, Vnr Tubbee" as Noddee. "T'eh orrym cur lhiam
Mnr Jumbo dys y stashoon raad yiarn."
"Wahll, v'eh foym ceau ersooyl yn tead shoh, agh foddee dy by vie
lhiat eh cour y ghleashtan ayd, Noddee?" vrie Mnr Tubbee Bear. "Oddagh
oo tayrn reddyn lesh." "Gura mie mooar eu, Vnr Tubbee,"
dooyrt Noddee dy maynrey. "Ta mee shickyr dy bee yn tead shoh feer
ymmydoil.
Va Mnr Jumbo gee e chirbyl ec yn thie bee, fuirraghtyn er Noddee dy heet
as cur heise da. V'eh gee e chiarroo yyst dy chey riojey, as yn irriney
y ghra v'eh cliaghtey jannoo feiyr feer ard choud's v'eh gee. Va ny caraigyn
as ny carthanyn blaakey er ayns yindys. S'goan v'ad credjal ny v'ad fakin.
Raink Noddee, as dyllee eh er. "Vel shiu ullee dy gholl dys y stashoon?"
vrie eh. Ren Mnr Jumbo gaccan "Nheign dooin goll nishtagh? Ta mee
foast gee my chirbyl."Yiole eh yn key-riojey va er-mayrn dy feiyral
as hass eh seose. "Wahll," dooyrt eh, "cha bee traa dy liooar
aym son puiddin."
Ghow Noddee chymmey er y ghleashtan beg echey. "Strooys dy dee shiu
ram key-riojey jiu, Vnr Jumbo" dooyrt eh. "Um . . . ooph . .
. cha noddym dooney dorrys dty ghleashtan, Noddee" as Mnr Jumbo. "Shee
bannee mee! Ta mee jerkal rish tuittym magh ass."
Dy doaltattym woaill eie er Noddee. "Ny bee imnea erriu" dooyrt
eh. Foddym kiangley shiu rish cheu sthie my ghleashtan lesh yn tead ymmydoil
shoh." "Foddee oo" as Mnr Jumbo. "Hmmmm . . . ta mee
cur foill er y thie bee shen. Hug ad foddey rouyr dy chey-riojey dou."
Ec yn stashoon hug Noddee cooney da Mnr Jumbo dy ymmyrkey yn scudlagh echey.
"C'raad t'ou goll" vrie eh. "Higym my whail my vraar ec
oirr ny marrey," dreggyr Mnr Jumbo. "Chyndaaym reesht er yn arbyl
bree 'syn 'astyr. Bee ayns shoh dy chur lhiat mee dy valley, my sailt."
"Bee'm" ren Noddee gialdyn.
Gow Dinah-y-Babban boggey dy akin Noddee. "S'mooar my haitnys dy vel
oo aynshoh" dooyrt ee. "Baill veih Jee dhyt, y Ghinah" dooyrt
Noddee. "Nailt mish y chur lhiam oo dys y valley?" "Saillym,
y Noddee. Ta kishtey foawragh dy lioaryn aym ry-hoi creck ayns my 'waane
as t'eh trome agglagh."
"Hmmm" dooyrt Noddee, "yn irriney y ghra, ta feme ain er
red ennagh dy chiangley mysh y chishtey, dy hayrn eh dys my ghleashtan.
Cre oddagh shin jannoo ymmyd jeh?" "Noddee, ta tead ayd ayns
dty laue" dooyrt Dinah garaghtee. "Vel?" vrie Noddee as
yindys mooar er. "Oh ta, ghraih veen, s'aighoil shen" dooyrt
eh, as chiangle eh yn tead mysh y chishtey. "Va fys aym dy beagh yn
tead shoh ymmydoil."
Ec yn traa cheddin, va Tessee Bear ec y vargey, freill arrey er bwaane
Ghinah-y-Babban, derrey chosne ee er-ash veih'n stashoon. Lunjeanee Mnr
Wobblee huic as dooyrt eh "T'ou uss feer chenjal, son cur cooney da
Dinah-y-Babban."
Eishtagh, haink Noddee as Dinah. V'ad puhttey 'n kishtey mooar. "C'red
ta shen?" vrie Mnr Wobblee. "She kishtey foawragh lioaryn"
dreggyr Noddee. "Shen eh." "Gura mie ayd, y Noddee"
dooyrt Dinah-y-Babban, "as gura mie ayds, y Hessee, son freill arrey
er my 'waane."
"Gow-jee my leshtal" dooyrt Mnr Wobblee, "Cha nel mee laccal
boirey erriu, agh strooys dy vel mee festit eddyr yn chishtey mooar shoh,
as bwaane Ghinah-y-Babban." Va Mnr Wobblee boght jingit dy fest dy
jarroo. "Ta feme tead ain ry-hoi tayrn magh eh" dooyrt Tessee
Bear.
"Ta tead ymmydoil aym!" dyllee Noddee. "Cooin-jee lhiam
eh y chiangley mysh Mnr Wobblee." "Er-lhiam nagh lhisagh oo ratchal
eh, y Noddee" dooyrt Dinah. "Cha jeanym" dooyrt Noddee,
"Nee my ghleashtan eh." "Ny ratch rouyr, ny foddee dy bee'm
lunjeanagh son dy bragh" dooyrt Mnr Wobblee, agh va Noddee ayns e
ghleashtan hannah. (ratch - a sharp pull, a jerk)
Doad Noddee e yeshaght, as ren y gleashtan beg echey tayrn cha niartal
as dod eh. Dy doaltattym lheim Mnr Wobblee seose 'syn aer as haink eh neose
er mullagh y chishtey. Eisht ren eh skirrey dy sauchey sheese yn cheu elley.
"Woooh" dooyrt Mnr Wobblee as eshyn lunjeanagh huggey as veih.
"Va shen jeant dy mie, y Noddee" dooyrt Tessee. "By vie
lhiat cheet dys my hie son tey as sooghyn thallooin?" "By vie,
my sailt, y Hessee" dreggyr Noddee. "Ta feme aym er aash, dy
jarroo."
Er ny hyndaa ass Baarle liorish Stewie Bennett, lesh cooney veih Adrian
Pilgrim as e Vrastyl ec y Vraaid.
Fow magh cha ymmydoil as ta'n tead ec Noddee ayns y nah ayrn taitnyssagh
jeh'n skeeal shoh ayns y nah earishlioar!
*****************************************************
LIOARYN ROORTYS AS YN YERNAGH
Ta mee shickyr dy vel fys eu ooilley dy row lioaryn roortys clouit ec y
Cheshaght. Foddee nagh bee fys eu dy row ny lioaryn shoh crooit, kiaddit,
as yn argid son clou ad reaghit ec Sean O Bradaigh. Ta'n Cheshaght Ghailckagh
cur milley booise da Sean son yn obbyr mie jeant echey er y chooish shoh.
Ta Sean er ve gobbragh dy chreoi er cooishyn Gaelgagh elley neesht. T'eh
er ve cooney lesh Yn Chied Chesmad cur lioaryn 'sy Yernish cour paitchyn
as fys mychione possanyn cloie ayns Nerin dooin. T'eh er jeet ny whail
ard-reiragh (chief executive) Teilifis na Gaeilge er nyn son as hug eh
coontey mie da jeh'n chengey ain as dy row cooish vie son chellveeish ny
Gaelgey. Ta posteyryn ny h-ushagyn Manninagh er ve clouit ayns Divlyn reaghit
ec yn Yernagh shen reesht!
FEAILLEY GAELGAGH
Hed shoh er cummal yn shiaghtin s'jerree jeh Mee Houney. S'treisht lhiam
dy bee claare yn 'eailley feer ghollrish yn claare v'ayn nurree. S'treisht
lhiam neesht dy bee tooilley argid cheet stiagh as myr shen bee yn chaghteraght
ain currit roish yn theay ayns aght share. Ta'n ving ayns feme jeh cooney
voish dy chooilley Gaelgeyr er yn 'eailley. G'insh da Phil Gawne (834844)my
foddee oo cooney lhien. Ta shin geearree eieyn noa son y chiaghtin, argid
voish co-lughtyn as sheshaghtyn as dy chooilley pheiagh ayns Mannin loayrt
paart dy Ghaelg er y chiaghtin.
Ny jarrood 23 - 30 Mee Houney!
Scrueeit liorish Philip Gawne.
CUMMEY JEIH BLEEANEY
Hie Chris Sheard as mee-hene er turrys gys Nalbin dy ronsaghey aavioghey
ny Gaelgey ayns shen. Hooar shin magh nagh vel foaynoo yn chengey ain cha
olk as va shin smooinaghtyn. Ta ny Gaelgeyryn ayns Mannin jannoo obbyr
mie da'n Ghaelg oc . Ta un red scanshoil nagh vel ain foast agh ta ec ny
Albinee, as shen cummey son yn traa ry-heet. Ta paart jin er ve loayrt
mychione yn vaarney shoh ain as haink shin er ny eieyn screeuit lurg shoh.
Ta mee geearree cur yn cummey10 bleeaney (heese) da chaglym bleinoil cadjin
ny Sheshaght Ghailckagh 'sy vlein shoh as s'treisht lhiam dy vodmayd loayrt
my-nyn-gione. S'treisht lhiam neesht dy vodmayd coardail rish paart jeh'n
chummey, yn chied vlein er lheh. Oddagh yn ving gobbragh er y chummey jeih
bleeaney car y touree as cur eh da chaglym er lheh er y Feailley Gaelgagh
ayns Mee Houney.
1996 : Cur er bun Possan Cloie queig laa 'sy chiaghtin son paitchyn eddyr
tree as queig bleeaney dy eash, ayns Doolish.
Cur er bun Bun Scoill lieh-laa dagh shiaghtin son paitchyn as Gaelg flaaoil
oc hannah.
Cur er bun startey noa son Oasier Lhiasaghey (Development Officer), un
laa dagh shiaghtin ec yn toshiaght. S'feer eh dy vel obbyr dy liooar son
jeih obbreeyn gobbragh dagh laa 'sy vlein ec y chooid sloo as eer shen
cha jeanmayd ooiley ny reddyn ta shin geearree son y chengey ain. Bee faill
cooie yn startey shoh mysh daa ny tree thousane punt dagh blein, as er
lhiam dy bee eh er Yn Cheshaght as foddee Caarjyn ny Gaelgey troggal yn
ayrn smoo jeh shoh. Foddee dy bee Undinys Eiraght Vannin arryltagh dy chooney
lhien er y chooish shoh.
Nee yn Oasier Lhiasaghey cooney lesh yn Phossan Cloie, troggal argid as
bishaghey yn earroo dy phaitchyn harragh gys Possan Cloie Gaelgagh. Nee
eh tuarystal (report) mychione Turrysaght Gaelgagh ayns Mannin. Ta ny Albinee
arryltagh dy chur lieh ghuillag stiagh ayns nyn lioaran turrysagh er nyn
son ain.
1997 : Cur er bun 'Parentyn as Paitchyn' son paitchyn eddyr 0 as 3 bleeaney
dy eash, ayns Doolish. Nee shoh cooney lesh yn Phossan Cloie, as jeeaghee
eh da'n Reiltys dy vel sleih arryltagh dy ynsaghey nyn baitchyn oc trooid
Gaelg.
Cur er bun Possan Cloie er y twoaie son paitchyn eddyr 0 as 5 bleeaney
dy eash, laa ny ghaa dagh shiaghtin, ec y toshiaght.
Nee yn Oasier gobbragh er cooishyn ynsee; ver eh er yn Reiltys as y theay
dy vel ynsagh trooid Gaelg mie erskyn towse; cooinee eh lesh ny possanyn
cloie; as reaghee eh cruinnaghtyn ynsee jeh studeyryn ny brastyllyn oie.
Cooinee eh lesh cur er bun co-lught dellal yinnagh cowraghyn, lheintyn-T
as lhied myr shen ry-chreck da Gaelgeyryn as turrysee.
1998 : Cur er bun Unnid Gaelgagh ayns Bun Scoill, son paitchey erbee ta
geearree gynsaghey trooid Gaelg. Ta'n lhied shoh jeant dy mie ayns Nalbin,
as ta ny smoo jeh ny paitchyn cheet voish thieyn raad nagh vel fockle erbee
dy Albinish goll er loayrt. Lurg Bun Scoill Gaelgagh ta ny paitchyn daa-hengagh
ny share loayrt Baarle na paitchyn as jus Baarle oc!
Nee yn Oasier bishaghey yn obbyr jeh'n cho-lught (croo posteyryn as lioaran),
lhiasee eh turrysyn Gaelgagh as cultooragh ayns Mannin, as eabee eh cur
er ny co-lughtyn radio as chell veeish dy ymskeaylley claareyn Gaelgagh.
Lesh cooney Yn Chruinnaght, Yn Cheshaght Ghailckagh as Caarjyn ny Gaelgey
nee yn Oasier cur er bun feaillaghyn ny h-aegid raad ynsee paitchyn nyn
Gultoor Gaelgagh - kiaull, daunsin, arraneyn, draneyn, skeealyn as eiraght.
1999 : Cur er bun Possan Cloie 'sy jiass son paitchyn eddyr 0 as 5 blein
dy eash, laa ny ghaa dagh shiaghtin, ec y toshiaght.
Cur er bun 'Coorse Thummey Gaelgagh' ec y colleish ayns Doolish. Kiare
ny queig laghyn dagh shiaghtin. Lurg shoh veagh studeyryn lieh flaaoil
. T'ad cummal y lhied shoh ayns Nalbin nish as t'eh feer speeideilagh.
Bee argid dy liooar er jeet stiagh voish yn cho-lught as yn reiltys son
yn Oasier dy ve gobbragh tree laghyn dagh shiaghtin. Nee eh ooilley ny
reddyn screeuit sheese hannah, agh ny smoo na shen nee eh gobbraghey er
cooish eddyr-Ghaelgagh, as cooinee eh lesh yn coorse thummey as coorseyn
Gaelgagh beggey son turrysee.
2000 : Cur er bun Parentyn as Paitchyn as bee yn Possan Cloie queig laghyn
'sy shiaghtin er y twoaie. Aachroo 'Aeglagh Vannin' fastyr beg ny ghaa
dagh shiaghtin son paitchyn eddyr queig as daa vlein yeig dy eash. Ta shoh
possan ny h-aegid raad t'ad gynsaghey nyn gultoor Gaelgagh.
Nee yn Oasier tooilley obbyr croo coorseyn son sleih aasit. Cooinee eh
lesh claareyn as feeshanyn (videos) son y chellveeish as y radio.
2001 : Nee yn nah ynseyder goaill toshiaght ayns yn Unnid Gaelgagh. Ynsee
eh paitchyn eddyr hoght as un vlein jeig dy eash.
Cur er bun Parentyn as Paitchyn as Possan Cloie lane-emshyragh ayns y jiass.
Cur er bun Possan Cloie ayns Purt ny h-Inshey laa ny ghaa dagh shiaghtin.
Bee yn Oasier gobbraghey er cooishyn Gaelgagh car y chiaghtin nish. My
vees y lheid ry-gheddyn nee yn co-lught kionnaghey thie goaldee. Bee shoh
boayl mie son ny turrysee ta er jeet son turryssyn Gaelgagh, as son studeyryn
ny Gaelgey. Verragh shin er bun Club Gaelgagh ayns y thie shoh, as thie-bee
raad nee bee Manninagh goll er creck.
2002 : Cur er bun yn nah Unnid Gaelgagh ayns Bun Scoill elley.
Nee yn Oasier gobbragh dy creoi da ny Possanyn Cloie as ny Unnidyn Gaelgagh.
Nee eh gynsaghey fir as mraane ynsee as leeideilee ny h-aghtyn share dy
ynsaghey trooid Gaelg.
2003 : Cur er bun Possan Cloie lane-emshyragh son paitchyn eddyr 3 as 5
bleeaney dy eash, ayns Purt ny hInshey.
Ver yn Oasier er bun Colleish Gaelgagh ec yn Chlub Gaelgagh, raad nee sleih
aasit gynsaghey trooid Gaelg (gollrish Sabhal Mor Ostaig beg!).
2004 : Cur er bun Parentyn as Paitchyn ayns Purt ny hInshey.
Lhiasee yn Oasier screeuaght Ghaelgagh.
2005 : Nee yn nah ynseyder goaill toshiaght ayns y nah Unnid Gaelgagh.
Cur er bun Unnid ayns Scoill-Ard raad ynsee paitchyn cooish ny ghaa trooid
Gaelg.
Lurg jeih bleeaney bee hoght paitchyn as shey feed (128) gynsaghey trooid
Gaelg, shen dy ghra hoght paitchyn ayns dagh vlein scoill. Ta shin jerkal
rish earroo dy phaitchyn eddyr shey as jeih ayns dagh vlein scoill, as
yn earroo cheddin ayns ny possanyn cloie. Hooar shin magh voish ny Albinee
dy jig ny paitchyn dy ve flaaoil 'sy Ghaelg, as myr shen bee mysh keead
dy Ghaelgeyryn noa ain. Ec y traa cheddin bee kiare startaghyn Gaelgagh
crooit son ynseydee as ec y chooid sloo un startey son Oasier Lhiasaghey.
Son shickyrys cha vod yn Oasier ooilley yn obbyr ny lomarcan, agh lesh
cooney ny Gaelgeyryn bee yn cummey shoh cooileenit ain. Cooin-jee dy row
ny h-Albinee ayns y stayd cheddin dooin queig bleeaney jeig er dy henney,
roish my d'eiyr ad er lheid yn chummey heose.
Screeuit as crooit liorish Phil Gawne as Chris Sheard lesh cooney ny Gaelgeyryn.
TAGGLOO
Taggloo eddyr fer y thie as Juan, ta cur shilley er.
Fer: Vel peiagh erbee ayns shen ec y dorrys?
Juan: Ta, nagh vel oo dy my chlashtyn?
Fer: Cha nel. Quoi t'ayn?
Juan: Nagh nhione dhyt nish, wooinney? Nagh vel oo cur enn orryms?
Fer: Dy jarroo, ta mee shickyr dy Ihisin enn y chur er y coraa shen! Fuirree
nish, derrey nee'ms y dorrys y osley. Shen eh! Trooid stiagh nish. Wooinney
veen, nee uss t'ayn? Cha nel mee er vakin uss rish bleeantyn!
Juan: S'foddey dy hraa dy jarroo.
Fer: R'ou foddey ec y dorrys?
Juan: Oh, cha row. Ren mee crankal keayrt ny ghaa, agh cha daink fer erbee,
as va mee er-çhee goll ersooyl, sheiltyn nagh r'ou sthie. Eisht
cheayll mee sheean ennagh cooyl y thie, as ren oo geamagh.
Fer: S'treih Ihiam dy r'ou eginit dy uirraght. Va mee mooie 'sy gharey,
as cha geayll mee veg rish tammylt. Aght erbee, t'ou sthie nish fy yerrey,
as failt ort! Quoi eh shoh ta mayrt? Cha bione dou eh.
Juan: Carrey dooys eh, voish jiass yn ellan, agh cha ren uss rieau çheet
ny whaiyl roie. She Ffynlo yn ennym echey, Manninagh dooie voish Purt-le-Moirrey.
Fer: Failt ort, y charrey! As nish, soie-jee sheese. Vel Gaelg erbee ec
dty charrey, Yuan?
Juan: Ugh, ta aggle orrym nagh vel. Va Gaelg dy-liooar ec y voir echey,
as fockle ny ghaa ec e ayr, as roish my jagh eh dy schoill v'eh son loayrt
paart dy Ghaelg. Agh ny lurg shen she ooilley Baarle v'eh clashtyn as loayrt.
Cha row fer erbee geearree dy chlashtyn yn çhenn ghlare, as nish
t'ee ooilley jarroodit echey.
Fer: S'olk shen. S'treih Ihiam eh y chlashtyn, agh cha vel mee goaill yindys
erbee.Shen yn aght te ny laghyn shoh, ta çhengey nyn mayrey tilgit
magh as jarroodit, eer ec ny Manninee hene - nearey orroo! Agh ta ourys
aym nagh vel ee slane jarroodit ec dty charrey, wooinney. Dy beagh eh geaishtagh
rish y Ghaelg goll er loayrt rish tammylt, harragh yn ghlare er-ash huggey,
ta mee shickyr.
Louis Crellin
(scruit ymmodee bleeantyn er dy henney cour e vrastyl Gailckagh)
QUOI TA SHIU EISHT?
Haghyr shoh 'sy Loghlin (=Norway) 'sy Nah Chaggey Seihill. Chiart roish
y Nollick ren ny pabyryn-naight, va fo stiurey ny Germaanee, greinnaghey'n
theay dy chuirrey er ny sidooryn Germaanagh Nollick y cheau mâroo
ayns nyn dhieyn hene. Hug ad er bun oik er lheh 'syn ardvalley dy reaghey'n
chooish shoh dy kiart. Laa dy row, ren çhellvane y scrudeyr clinkeragh:
"By vie lhiam cuirrey er kuse dy Ghermaanee." "Oh, gura
mie eu, ta shiu feer chenjal." "N'abbyr eh edyr." "Cre
whilleen oddys shiu y ghoaill?" "Foddym goaill ad ooilley."
"Gow my leshtal, er-lhiam nagh geayll mee shiu dy mie." "Foddym
ad ooilley y ghoaill." "Agh quoi ta shiu eisht?" "Mish
yn jouyl hene," dreggyr y coraa, as çhelleeragh va'n glackeyder
currit sheese.
Adrian Pilgrim